Read Ngemba Nkyɛʼə 20 Bible Online

Nkyɛʼə 20 - Ngemba bible

Nkyɛʼə 20

¹Ma tíʼ ndzɛ́n ntsendá Ŋwi ɨ lo a fɔməbvurə ɨ shiʼə ngyiŋə, ntiʼtɨ akugɨ abɨ́ a kfúrɨ́mándzó za abɔʼnɨ təkɔʼ bɨ nkɨ atɨŋə a mu abó zɨə.

²Wɛrə a fé a dragɔn, ɨnyo bənguʼ za — lá be ngə́, Dəbɨrɨ, kə Satan — nkorɨ ayi nɨ mɨnkɨ mɨ atɨŋə atú ɨlom táʼ nchwuʼ ə.

³Ntsendá Ŋwi za ɨ máʼ ayi a mu abɨ́ a kfúrɨ́mándzó za, ɨ fən a zɛrə, ɨ sɨŋ nɨ ɨfɛnwu, taŋ á wɛrə a chi keʼ bə ntamtɨ ɨbɛn bɨ ɨlaʼ tsa ɨ kɔʼ kuʼ ndwitɨ ɨlom tsa táʼ nchwuʼ ə. Mbáʼ nkfu məziŋ minə, bɨ mɨ zagɨ nyɛʼtɨ ayi a nye məkum a nkfu ə.

⁴Ma tíʼ ndzɛ́n ɨbərɨ ə. Bɨ ghá mɨtən mɨ sáʼə mɨsáʼ a mbó ɨbɛn ba bɨ shíʼtɨ́nɨ́ ntsi atú tsɛrə ghe. Ma kɨ́ ndzɛ́n bɨgharɨ bɨ ɨbɛn ba bɨ zhwítɨ́nɨ́ awa mbɨ́ʼ ngə́ bo chwítɨ́ nkənu za mbɨ́ʼ a Yeso abɔʼnɨ nɨgham nɨ Ŋwi ə. Bo sé ghuʼsɨ ɨnyam mɨbaʼ za kə a mɔn abe ɨyi ɛ. Bo sé kɨ ntsi nɨ alyigɨ a ɨnyam mɨbaʼ za a mɨdzenɨ bo kə a nye mbó ɨma ghe. Bo yén a mu ntsi ntən, ɨ sáʼ tso bɨfɔ bo bɨ Kristo atú ɨlom táʼ nchwuʼ ə.

⁵Abvuʼ za a kfónɨ́ a sé yen a mu ntsi ntən ɨ kɔʼ kuʼ nkfu za ɨlom tsa táʼ nchwuʼ mínə́. Nə nɨ ntsambyi nkfu za Ŋwi a mɨ nzhwemnɨ ɨbɛn a mbó nɨvwo ə.

⁶Nɨdorɨ abɔʼnɨ ɨfɔgə zɨ ngwi tsi a mbó ba bɨ nɨŋnɨ awa a mu ntsambyi nzhwemnə a mbó nɨvwo məziŋ ə. Ka nɨvwo na nɨ zɔŋtɨnɨ a nye ɨdiʼ tsi bá tsi ayi nɨ mɨtən mə tsɛrə atú bo ghe; bo ghɨ bé bɨntumshe bɨ Ŋwi kɨ be a mbó Kristo, bo mɨ sáʼ bo bɨ wɛrə atú ɨlom táʼ nchwuʼ ə.

⁷Mbáʼ ɨlom tsa táʼ nchwuʼ tsanə, bɨ mɨ fɨgɨ a satan adiʼ wa bɨ kórɨ́nɨ́ ayi ɨwu lá, ɨ nyɛʼtɨ ə.

⁸Wɛrə a mɨ tiʼ fu ghɛn a ntámtɨ́ ɨlaʼ tsa tsɨ dzagɨnɨnɨ a mu mbyi tsum lá, lá be ngə́, Gɔgɨ nɨ Magɔgɨ lá. Satan a mɨ ghotɨ awa a ntó ntso ghe. Ndvuŋ ɨwa gháʼ mbe tso awaŋə za a tsinɨ a ngə́rɨ́ sagɨrə wu ngwi ə.

⁹Bo tíʼə númə́ ngyíŋə́ a mu mbyi tsum, nkɨ nkarɨsɨ a balɨgɨ wa ɨbɛn bɨ Ŋwi tsinɨ ɨwu abɔʼnɨ ntáʼmbagə wu wi wa Ŋwi a kɔŋnɨ lá. Lá ɨmugɨ ló a fɔməbvurə ɨ shiʼ ngyen ntsənkɨ awa ghe.

¹⁰Bɨ tíʼ maʼ a Dəbɨrɨ wa a támtɨ́nɨ́ awa lá a mu sagɨrə ɨmugɨ wa ɨ tənɨ be tɨ́sə́n, adiʼ wa bɨ kwɛ́nə maʼ ɨnyam mɨbaʼ za abɔʼnɨ ntom Ŋwi ɨchwenu za ɨwu lá. Bɨ mɨ diʼ ngɨ́ʼ nɨ bo nɨ njwi nɨ ɨtfúʼ nɨnkoŋ nɨnkoŋ ə.

¹¹Ma tíʼ ndzɛ́n abərɨ zə fú zə wi za abɔʼnɨ ŋwɔn wa a shíʼtɨ́nə́ nchyɛ̌ wətú lá. Atuəshe abɔʼnɨ fɔməbvurə tíʼ ndotɨ awa a ɨshi zɨ, bɨ keʼ a tsɛrə bə ndze.

¹²Ma kwíʼ ndzɛ́n adzaŋ za bɨkfú bə wi abɔʼnɨ bə kɨʼnɨ tɛ́mnɨ́ a ɨshi abərɨ za. Bɨ ŋáʼ ɨŋwaʼnɨ, ntiʼ nkwiʼ ŋaʼ aŋwaʼnɨ zə mɔʼɔ mbáʼ a lá aŋwaʼnɨ za bɨ ŋwaʼnɨnɨ mɨkum mɨ ɨbɛn ba bɨ mɨ ntsi ntən nɨnkoŋ bo bɨ Ŋwi lá. Bɨ sáʼ bɨkfú ndzɔ̌ŋ ɨnu tsa bo ghɨ́nɨ́, adzaŋ za bɨ ŋwáʼnɨ́nɨ́ a mu ɨŋwaʼnɨ tsa lá.

¹³Sagɨrə wu ngwi a tíʼ nyɛʼtɨ bɨkfú bɨ ɨbɛn bɨ ba bɨ kfónɨ́ ɨwu ə. Bɨkfú ba bɨ kɨ́nə́ nchyɛ̌ a mu mbyi bɨkfú zhwémnɨ́ a mbó nɨvwo taŋ á Ŋwi a sáʼ awa ghe. Ŋwi a tíʼ sáʼ awa bɨtsum ndzɔ̌ŋ ɨnu tsa bo ghɨ́nə́.

¹⁴Bɨ tíʼ maʼ nɨvwo abɔʼnɨ mbyi nɨvwo a mu sagɨrə ɨmugɨ wa. (Sagɨrə ɨmugɨ wa lá nɨvwo na nɨ zɔŋtɨnɨ a nye ɨdiʼ tsi bá lá.)

¹⁵Ŋwɔn tsum wa ɨkum ɨyi sé tsi a mu aŋwaʼnɨ za bɨ ŋwaʼnɨnɨ mɨkum mɨ ɨbɛn ba bɨ mɨ ntsi ntən nɨnkoŋ bo bɨ Ŋwi bɨ máʼ ayi a mu sagɨrə ɨmugɨ wa.