Read Ngemba Nkyɛʼə 3 Bible Online

Nkyɛʼə 3 - Ngemba bible

Nkyɛʼə 3

¹“Ŋwaʼnɨ a mbó ntsendá Ŋwi zɨ ndáŋwi za ɨ tsinɨ a Sadisɨ ngə́: Nə nɨ nkən wa ɨ lonɨ a mbó zɨ wa a sáʼnɨ́ ɨzhwi Ŋwi tsa tsi samba tsa tsɨ faʼnə a mbó Ŋwi nkɨ ntiʼtɨ mɨndzɔŋ ma mi samba lá. Ma zhi anu za nɨ ghɨnə ghe; nɨ ghɨ̌ ɨnu tsa tsɨ diʼnɨ ngə́ nɨ tsi ntən lá mbáʼ nɨ kfokɨnə ghe.

²Ma lan, á nɨ lo atɨ́, nkɨ shintɨ a za a bvurɨnɨ ntsi bɔŋ á myigɨnɨ nkfoə. Mbɨ́ʼ ngə́ ma zɛn anu za nɨ ghɨnɨ a keʼ kɔʼ ntəm ngə́ tsáŋ a ɨshi ɨmɨgɨ Ŋwi ə.

³A nɨ tiʼ ngwaʼtɨ a za bɨ díʼnɨ́ awən ɨwu abɔʼnɨ za nɨ zúʼnɨ́; á nɨ ndzúʼnə́ a zɛrə nkɨ mbəŋ mɨntəm ɨmən a nye mɨbvu ɨmɨŋ ə. Be nɨ tú lo atɨ́, muŋ ma mɨ shiʼnɨ atú bən tso ndzɛrə ghe. Nɨ mɨ keʼ kɨ nji a nyom wa ma mɨ yiŋə.

⁴Lá bən bə tse a nɨsháŋnɨ́ ɨgha a Sadisɨ sugɨ ɨtsɛʼ ɨtsən tsɨ fɛmnə ghe. Nɨ ghɨ yenɨ bɨgɨnə, ɨ wəgɨ ɨtsɛʼ tsɨ fú, mbɨ́ʼ ngə́ nɨ kuʼnɨ a ngɨə adzaŋ məwa.

⁵Ɨbɛn ba bɨ tokɨnɨ ntsi nɨ ayanguʼ məzen mɨ wəgɨ ɨtsɛʼ tsɨ fú adzaŋ wen, á ma kaʼ kɨ fɨgɨ mɨkum ɨma a mu aŋwaʼnɨ a ɨbɛn ba bɨ tsinɨ ntɨŋ ə. A ɨshi ɨmɨgɨ Ta ɨghan abɔʼnɨ ɨtsendá ɨchi, ma mɨ soŋ ntəm ɨghan asaŋəsaŋ ngə́ məba a nɨ ɨbɛn ɨbə.

⁶Zɨ wa tsinɨ nɨ ɨtoŋnɨ á zhwiʼtɨ anu za Azhwi a sóŋnə́ a mbó ndáŋwi ə!”

⁷“Ŋwaʼnɨ a mbó ntsendá Ŋwi zɨ ndáŋwi za ɨ tsinɨ a Filadɛlfia ngə́: Nə nɨ nkən wa ɨ lonɨ a mbó zɨ wa a fɛmnɨ nkɨ mbe wɛrə wa a nɨ wu nkənu ə. Wɛrə a tsi nɨ akugɨ za a bénɨ́ zə Devidɨ ə. Be wɛrə a ŋaʼ ntsu ndá, ŋwɔn tse a chi keʼ a wɛrə vwuʼnə. A kɨ ngvuʼnɨ a wɛrə, ŋwɔn tse a chi keʼ ŋaʼə.

⁸Ma zhi ɨnu tsa nɨ ghɨnə ghe; ma zhi ngə́ adaʼ azən a kɨ́gɨ́ ə; nɨ zɔŋnə ɨnu tsa ma díʼnɨ́ awən nɨ tsɛrə, nɨ kə́ faʼə a mbó me nɨ táʼ ntəm ə. Zɛnə azɨŋ ə, ma ŋaʼnə ntsu ndá a ɨshi bən wa ŋwɔn tse a chi keʼ vwuʼnə.

⁹Zuʼnə! Mbɨ́ʼ ngǒtə za ɨ tsinɨ a mbó Satan lá, ngaŋ ɨchwenu tsa bo soŋnɨ ngə́ bo nɨ bə Yuda tɨ be bɛrə lá, ma mɨ ghɨ á bo yen nkwem mɨkwiʼtɨ ɨma a ɨshi bɨŋ ə. Bo bɨtsum mɨ zhi ngə́ ma kɔŋ awɨŋ ə.

¹⁰Mbáʼ nɨ lɛnə nɨgham ɨnan na nɨ lɔnə ngə́ á nɨ tsi nɨ nchigə, ma mɨ kɨ baʼtɨ awən a mbó nkfu ngɨ́ʼ zen za ɨ yenə atuəshe a njwə́ŋtɨ́ ɨbɛn bɨ atuəshe bɨtsum lá.

¹¹A bvurɨ tsɛʼ məbaŋtɨ á ma yiŋə. A nɨ ngěn nɨ mbyi ntiʼtɨ abeməntəm azən ɨ shiʼnɨ, taŋ á ŋwɔn tse a keʼ kwarɨ nɨ adaʼ ɨsáʼfɔ ɨzən za ɨ nɨ mɨkyaŋnɨ ɨmən lá.

¹²Ma mɨ ghɨ á ɨbɛn ba bɨ tokɨnɨ ntsi nɨ ayanguʼ məzen tiʼ ntɛʼ a mu nɨshwim nɨ Ŋwi ɨghə. Bo láʼ keʼ a nɛrə nyɛʼtə. Ma mɨ ŋwaʼnɨ a nye bo ɨkum Ŋwi ɨghan abɔʼnɨ ɨkum ntáʼmbagə wu wi wu Ŋwi ɨghan, Yerosalɛm wu fi wa a mɨ lo a mbó Ŋwi ɨghan a fɔməbvurə lá. Ma mɨ kɨ ŋwaʼnɨ ɨkum ɨghan wu fi a nye bo ghe.

¹³Zɨ wa a tsinɨ nɨ ɨtoŋnɨ á zhwiʼtɨ anu za Azhwi a sóŋnə́ a mbó ndáŋwi ə!”

¹⁴“Ŋwaʼnɨ a mbó ntsendá Ŋwi zɨ ndáŋwi za ɨ tsinɨ a Laodisia ngə́: Nə nɨ nkən wa ɨ lonɨ a mbó ‹A be lá› wa, atɛmə-ndzě wu nkənu nkɨ mbe wa a faʼnə tsɛʼ nɨ táʼ ntəm, zɨ wa a nɨ mbiʼnɨ anu atsum za Ŋwi a káʼnɨ́ lá.

¹⁵Ma zhi ɨnu tsa nɨ ghɨnə ghe; ma zhi ngə́ ka nɨ shwě awən nkeʼ nkə́ ndómə́ ghe. A ghɨ́ ake á nɨ shwě kə ndómə́ le!

¹⁶Ma lan, mbɨ́ʼ ngə́ nɨ jɔbtɨ tsɛʼ jɔbtɨnɨ, nkeʼ ndómə́ kə ɨ shwě, ma mɨ tfugɨ awən a ntsu me ghe!

¹⁷Nɨ sóŋə́ a mbó ɨtumbəm ɨtsən ngə́, ‹Ma tsi nɨ afuʼ zə wi nkɨ ntsi ɨ shiʼnɨ; ma tsi nɨ atsum za ma lɔnə ghe.› Lá ka nɨ zhi awən adzaŋ za nɨ zɛ́nɨ́ ngɨ́ʼ, bɨ kə nkǒ a mɨlɨŋnɨ a nye bɨŋ ə! Nɨ fum, ɨ fɨgɨ nkɨ ntsi ntyigɨnɨ ə.

¹⁸Ma tiʼə ntɨ́gɨ́tə́ awən ngə́ á nɨ zon a ŋwaʼŋwaʼ wa a lonɨ a mbó me, ŋwaʼŋwaʼ wa ɨmugɨ ɨ ghɨnɨ a fɛm, taŋ ɨ be ngaŋ afuʼ zə wi ə. Nɨ kɨ ndzuŋ ɨtsɛʼ tsɨ fú ngwəgɨ a ɨnye bən, ntiʼ mbɔmtɨ ntyigɨnɨ adɨrətú ɨzɨŋ ə. Nɨ kɨ ndzuŋ mɨvwurɨ mə tse a nɨ́ŋə́ a ɨmɨgɨ bən, taŋ ɨ chi zɛn ɨdiʼ ə.

¹⁹Ma ghamtə nkə́ nɨ̌ŋ ngɨ́ʼ a nye ŋwɔn tsum wa ma kɔŋnə. A nɨ mbɛ́bə́ a mbəŋ mɨntəm ɨmən a nye mɨbvu ɨmɨŋ ə.

²⁰Zuʼnə! Ma tɛm a ntsu ndá, mbúʼtə́ ghe; be ŋwɔn tse a zuʼ nji ɨzan, ɨ ŋaʼ ntsu ndá, ma kon a ndá zɨ, ntiʼ dzɨ bɨgɨ zɨə. Wɛrə mɨ kɨ dzɨ bɨgɨ zɨə.

²¹A mbó ɨbɛn ba bɨ tokɨnɨ ntsi nɨ ayanguʼ məzen, ma mɨ ghɨ á be adiʼ aza a shiʼtɨ tsi a mbyɛn me, atú abərɨ azan, tsɛʼ tso mbáʼ ma tsinə nɨ ayanguʼ, ntiʼ shiʼtɨ ntsi tɨtsɔŋnɨ a mbyɛn Ta ɨghan atú abərɨ azhi lá.

²²Zɨ wa a tsinɨ nɨ ɨtoŋnɨ á zhwiʼtɨ anu za Azhwi a sóŋnə́ a mbó ndáŋwi ə!”