Read Ngemba Nkyɛʼə 8 Bible Online

Nkyɛʼə 8 - Ngemba bible

Nkyɛʼə 8

¹Mbáʼ Mɔn Mbyindzɨ wa a ŋáʼnɨ́ fɛnwu za ɨ zɔ́ŋtɨ́nɨ́ a nye ɨdiʼ tsi samba lá, ashwí a tsí a fɔməbvurə a nye akum a táʼ nyom ə.

²Ma tíʼ ndzɛ́n ɨtsendá Ŋwi tsa tsi samba tsa tsɨ tɛ́mnə́ a ɨshi Ŋwi lá, bɨ ghá ntaŋ tsi samba a mbó bo ghe.

³Ntsendá Ŋwi zɨ mɔʼɔ, za ɨ tíʼtɨ́nɨ́ akəbɨ a ŋwaʼŋwaʼ a ntǒn alyɛn, ɨ yén ntɛ́m a ɨshi mɨkuʼ ə. Bɨ ghá alyɛn wəmbo a ghaʼ ngə́ á kwiʼtɨ a nye ɨtsaʼtɨ Ŋwi ɨbɛn bɨ Ŋwi bɨtsum nga tso akáŋ a Ŋwi atú a mɨkuʼ mɨ ŋwaʼŋwaʼ ma mɨ tɛmnɨ a mbyi abərɨ za lá.

⁴Fɨndyiʼ fa fɨ kɨ́nə́ fúə a mu alyɛn za bɨ tɔ́nɨ́ lá, kɔ́ʼ ngɛn abɔʼnɨ atsaʼtɨ a Ŋwi a ɨbɛn bɨ Ŋwi ndo a mu mbó ntsendá Ŋwi za ɨ tíʼtɨ́nɨ́ akəbɨ za ntɛm a ɨshi Ŋwi lá.

⁵Ntsendá Ŋwi za tíʼ ndɔgɨ akəbɨ a ntǒn alyɛn za, nkɔgɨ ɨmugɨ atú a mɨkuʼ ma ndwɨgɨ wə mu, ntiʼ nchwirɨ atuəshe. Mbəŋ kúm, mbɨ́ʼkɨ́, njwibtɨ, ɨshe kɨ nɛmə.

⁶Ɨtsendá Ŋwi tsa tsi samba tsa tsɨ tsínɨ́ nɨ ntaŋ tsa tsi samba tíʼ nkyaŋtɨ ɨnye ɨtsa a ntɔ́ŋ tsɛrə ghe.

⁷Ntsambyi ntsendá Ŋwi za tɔ́ŋ ntaŋ ɨzhi ɛ. Fɨwɛ nɨ ɨmugɨ ɨ nyamtɨ nɨ alɛm fú ɨwu nchwinɨ atuəshe. Ɨmugɨ tɔ́n a táʼ bagɨ mbáʼ bɨ yɛbtɨnɨ atuəshe ɨdiʼ tsi tárə́, táʼ adiʼ mbáʼ bɨ yɛbtɨnɨ ɨtɨ ɨtsum atuəshe ɨdiʼ tsi tárə́ abɔʼnɨ ngyɛn zɨ shwe tsum ə.

⁸Ntsendá Ŋwi za ɨ zɔ́ŋtɨ́nɨ́ a nye ɨdiʼ tsi bá ɨ tɔ́ŋ ntaŋ ɨzhi ɛ. Bɨ máʼ azúm zə tse za a fínɨ́ mbám zɨ ngwi za ɨmugɨ kɨ́nə́ nkwárə́ ɨwu a mu sagɨrə wu ngwi ə.

⁹Táʼ bagɨ mbáʼ bɨ yɛbtɨnɨ a sagɨrə wu ngwi ɨdiʼ tsi tárə́ a bə́ŋ alɛm, táʼ adiʼ mbáʼ bɨ yɛbtɨnɨ ɨdzúm tsɨ kaʼnɨ tsa tsɨ tsínɨ́ ntən ɨdiʼ tsi tárə́ a mu sagɨrə wu ngwi wa kfókɨ́, nkɨ ndzɔŋ ntsənkɨ a táʼ bagɨ mbáʼ bɨ yɛbtɨnɨ ɨbáŋ nkyi a mu sagɨrə wu ngwi ɨdiʼ tsi tárə́ ghe.

¹⁰Ntsendá Ŋwi za ɨ zɔ́ŋtɨ́nɨ́ a nye ɨdiʼ tsi tárə́ tɔ́ŋ ɨzhi ntaŋ ə. Fɨndzɔŋ fə wi, nkɨə tso nkaʼ, tsɔ́ʼnɨ́ a fɔməbvurə ngvo a nye táʼ adiʼ mbáʼ bɨ yɛbtɨnɨ bɨmɨzam ɨdiʼ tsi tárə́ abɔʼnɨ bɨnáŋə́bə́rə ghe.

¹¹(Ɨkum fɨndzɔŋ fa nɨ “Mɨlwichwiʼ ə”.) Táʼ adiʼ mbáʼ bɨ yɛbtɨnɨ nkyi ɨdiʼ tsi tárə́ a bə́ŋ ntíʼə ndwɛ̌, ɨbɛn bə ghaʼnɨ kfokɨ mbáʼ bɨ nónɨ́ nkyi wa, mbɨ́ʼ ngə́ ɨ bə́ŋ ntíʼə ndwɛ̌ ghe.

¹²Ntsendá Ŋwi za ɨ zɔ́ŋtɨ́nɨ́ a nye ɨdiʼ tsi nɨkwa tɔ́ŋ ɨzhi ntaŋ ə. Bɨ búʼ a táʼ adiʼ mbáʼ bɨ yɛbtɨnɨ a nɨnyom ɨdiʼ tsi tárə́, mbuʼ a táʼ adiʼ mbáʼ bɨ yɛbtɨnɨ a saŋ ɨdiʼ tsi tárə́ nkɨ mbuʼ a táʼ adiʼ mbáʼ bɨ yɛbtɨnɨ mɨndzɔŋ a nye ɨdiʼ tsi tárə́ ghe. Ma lan, nkaʼ ɨwa sé tá a nye táʼ adiʼ mbáʼ bɨ yɛbtɨnɨ nkfu za bo tánə́ a nye ɨdiʼ tsi tárə́ ghe. Nkaʼ sé bé a nye táʼ adiʼ mbáʼ bɨ yɛbtɨnɨ nəzhwɨgɨnɨ ɨdiʼ tsi tárə́ ghe. Nkaʼ sé kɨ mbe a nye táʼ adiʼ mbáʼ bɨ yɛbtɨnɨ ɨtfúʼ a nye ɨdiʼ tsi tárə́ ghe.

¹³Ma tíʼ nden, ndzúʼ adzaŋ za azám a kɨ́nə́ ndyíə a təntsánɨ́ a mu ɨfɛgɨ a ghámnɨ́ nɨ nji zɨ nkɔʼnɨ atɨ́ ngə́, “Wei ngɨ́ʼ zɨ ngwi! Wei ngɨ́ʼ zɨ ngwi! Wei ngɨ́ʼ zɨ ngwi! A ghɨ tíʼ bɨ́gɨ́ be tɨ́sə́n a mbó ɨbɛn ba bɨ tsinɨ atuəshe a nkfu wa nji za ɨ funɨ a mu ntaŋ tsa abvuʼ ɨtsendá Ŋwi tsa tsi tárə́ mɨ zagɨ tɔŋə!”