Read Ngiemboon Matio 14 Bible Online

Matio 14 - Ngiemboon bible

Matio 14

¹Á gwɔ́ fʉ̀’ ayɛ̌, *Herôd gẅie à lɔ̌ɔn sá’a pàga ngwòŋ Galilea jú’ pá’ mé kíme Yěsô ńtí menò mie à ne ńgÿo,

²ńdeen ńké ńgɔɔn mbwó mentsìndá pé ngie: Nyìŋ gẅie mé gɔɔn aa Jâŋ Mbabtis, mbà à zǐm. Áa mmó gie á gÿo, tá á ku’u légÿo menò mmɔɔn mmɔɔn.

³*Herôd gɔɔn pú’u, mélà’mie à la gÿo mé gwoon Jâŋ, ńkwɛ́ɛ yé ńnéŋe yé ndá tsǎŋ, mélà’ *Herôdiad gẅie à laa nzwě Filib, fɛ́ *Herôd ŋwɛ́.

⁴Á gwaa gwɔ́, mbà Jâŋ ka ne ńgwá ńkaga yé ngie: *Lepʉ̌ té ne ńzẅíŋe ngie à zɔ́’ɔ *Herôdiad wɔ́.

⁵*Herôd jú’, ńzye léfa’ shÿó lézẅé Jâŋ, tá nně ḿbɔ́gɔ nÿɔ́g pà Yuda. Á nue pɔ́b metsèm la ne ńzsé ngie Jâŋ aa *ntsẅì nkʉ̀ Ssé.

⁶Á gÿo ńgwɔ́ lyɛ’ɛ́ línɔ́ɔn, lélɔg ńkímte lyɛ̌’ gie mé la zyé fùɔ *Herôd. Míŋ *Herôdiad we manzwě zíŋe mvfò lá’. Ànò pú ḿboŋo fùɔ *Herôd,

⁷tà á gɔɔn tà ńkʉa ngie: À lɔɔn ńdúɔ pɔ́ kɔ́ mbwó yé wɔ́, mbà á ge ná.

⁸Má pà múɔ manzwě tsóte múɔ manzwě ŋwɛ́, ngie à gʉa ńgɔɔn ngie à ne ńkwoŋo twó Jâŋ Mbabtis á tsɛ̀ɛ káŋ pɔ́ fʉ̀’ɔɔn.

⁹Àfùɔ jú’ ḿbú ḿmÿɔg tɛ’. Tá le gwɔ́ gie à ně ńgɔɔn mvfò megʉ̀ pé tà ńkʉa gÿo, á tsẅi ngie mé náa twó Jâŋ mbwó múɔ manzwě ŋwɛ́,

¹⁰ńdeen ńké ńtúmo nyìŋ, á gʉa ndá tsǎŋ, ńzá’a twó Jâŋ,

¹¹ńnéŋe tsɛ̀ɛ káŋ ńdɔg ńtó ńnáa mbwó múɔ manzwě ŋwɛ́, á kẅé, ńgʉa ńnáa mbwó má we.

¹²*Ngàŋa kwò Jâŋ jú’, ńgʉa ndá tsǎŋ ńkaa pfó yé ńdɔg ńgʉa ńtúŋ. Tà á ku’, pɔ́ gʉa shwóŋó Yěsô nò gie á cʉ̌a.

¹³Yěsô jú’u yɔɔn nò, ńkúu tsɛ̀ɛ kanú’ ne ńgee né jʉ’ gie nyìŋ tè wó wɔ́. Àlá’ zsé, éfó tsɛ̀ɛ metÿǒsoŋ ńkẅɛ, ńgiŋe mekʉ̀ŋ ntse ḿvɔg ńzá’a yé.

¹⁴Á kúu jʉ’ó, éfó tsɛ̀ɛ kanú’ ńkẅɛ, ńgyá nùɔ lá’, mezìŋe mɔ́b kúu yé. Á zye légÿo megàŋa guɔ pie ée tsetsɛ̀ɛ pɔ́b zeŋe.

¹⁵Á gÿo ńgwɔ́ ncwò nzèm, *ngàŋa kwò Yěsô tóo lejʉ́ŋ yé ńgɔɔn ngie: Pege ee jʉ’ɔɔn nkwòŋo tsẅɛ, mbà za’ pǐŋ ńcʉa. Tsẅi né pʉ̀a, pɔ́ gʉa jʉ’ gie membʉ̀a ée wó, éfa’ shúm léjÿó ńjú.

¹⁶Yěsô tsɔ́’ɔ mbwó pɔ́b ngie: Á té gwɔ́ pɔ́ ngie pɔ́ ge gʉa tsɔ́ jʉ’ wɔ́. Pi zɔ náa mmó pɔ́ pfɛ́.

¹⁷Pɔ́ tsɔ́’ɔ mbwó yé ngie: Peg gẅiin pé ndà’ mbelég mbu’ú ntʉ̀a jʉ’ɔɔn ńgÿo mbaŋ ssó yépʉ́a.

¹⁸Yěsô gɔɔn né pɔ́b ngie: Pi lɔg ńtó, ńná né mèŋ jʉ’ɔɔn,

¹⁹ńgɔɔn pú’u, ńtsẅii mbwó lá’ ngie: Pɔ́ pwɔ́’ɔ legǐ ńnéŋe mǒ, ḿbí mbelég ayɛ̌ mbu’ú ntʉ̀a, nê messó mɛ̌ mbaŋ pʉ́a, ḿbʉ’ʉ twó ńdíe tÿǒ, ésíe Ssé, ḿbwɔ́’te ńnáa mbwó *ngàŋa kwò yé, pɔ́ gaba mbwó lá’.

²⁰Àlá’ pfɛ́, ńzẅɛ́. Mé cú’te mepfwɔ’, é lúe tsɛ̀ɛ metúŋ ntsɔ̀b pʉ́a nê legém.

²¹Pʉ̀a pie é la pfɛ́ɛ mmó laa mbàŋa mmó ntsá’ tʉ̀a, té sáŋ pànzwě paa gubé.

²²Yěsô gwóon ńtsẅii mbwó *ngàŋa kwò yé ngie: Pɔ́ kúu tsɛ̀ɛ kanú’ ḿvɔg ńgwɔ́ mvfò, ńtúm né yetsɔ́ nzǐŋ, à cʉ́’ nzèm ńde’e menùɔ lá’ e gʉa.

²³Yěsô cʉ́’ ńde’e menùɔ lá’, ńkwɔ́’ɔ ndùm lekwɔ’ɔ́ lésẅíŋte Ssé. Nzěm gÿo ńgwaa síŋ, á cʉ́’ ńgwɔ́ jʉ’ó pɔ́ gíle yé,

²⁴mbà kanú’ zyě ńgiŋ tà ńgwɔ́ soŋ ntse. Ntse ne ńgege pʉ̀a pé, mélà’mie fefà la ne ńtóo pɔ́ mvfò mvfò.

²⁵Á gÿo ńgwɔ́ nkwɔ̀’ njÿó, Yěsô gwɔ́ jwoŋte wɔ́b, ńně ńgiŋe ndùm ntse.

²⁶*Ngàŋa kwò yé, gyá pá’ à ne ńgiŋe ndùm ntse, ńzye lépɔ́g, ńkwaŋ ngie áa gʉgÿɛ́ nyìŋ, ńne ńga’te.

²⁷Tá Yěsô gwóon ńgɔɔn né pɔ́b ngie: Pi pʉ́le ńnéŋe, à gwɔ́ pɔ́ mèŋ, tà pi pɔ́g.

²⁸Piɛ leen ńké ńgɔɔn né yé ngie: Cʉ̀apʉ̀a à lɔɔn ńgwɔ́ kwà’ gú, ɔ̀ gÿo mèŋ n giŋe ndùm ntse ńtó ńzá’a ɔ́.

²⁹Yěsô gɔɔn né ye ngie: Tóo! Piɛ kẅɛɛ tsɛ̀ɛ kanú’, ńne ńgiŋe ndùm ntse légʉa ńzá’a yé.

³⁰Tá ńgyá fefà ne ńcʉ’ʉ tɛ’, á pɔ́g, ńzye léme’e tsɛ̀ɛ ntse, ńdeen ńké ńga’te ngie: Cʉ̀apʉ̀a, n kwě le.

³¹Yěsô gwóon ńtsege pwó yé ńkwɔ́bɔ yé, ńgɔɔn né yé ngie: ɔ̀ záb ntʉ́m ná mèŋ pɔ́ mejʉ’! Ɔ̀ gwǎ mʉ́’te ńgaa?

³²Pɔ́ yé kúu tsɛ̀ɛ kanú’, fefà zá’a.

³³Pʉ̀a pie ée tsɛ̀ɛ kanú’ kẅí’te mvfò Yěsô ńgɔɔn ngie: Áa kwà’ nénʉ́, ɔ́ɔ Míŋ Ssé.

³⁴Pɔ́ túm ntse tà ńkúu nà nzǐŋ ye Jenezared,

³⁵ńgwaa sẅɛ́’ tà tyé ssé, mé liŋe Yěsô, ńgwóon ńkÿote, ńgʉa tsɛ̀ɛ membʉ̀a ńgÿo mé lɔg megàŋa guɔ ńtó.

³⁶Esẅíŋte yé ngie à fó ńzẅíŋ, pɔ́ kíbe pɔ́ ndà’ tsɔ̌ɔn nzsǒ yé. Epʉ̀a metsèm pie pɔ́ la kíbe tsɔ̌ɔn nzsǒ ŋwɛ́ pú ńzeŋe.