Read Ngiemboon Matio 15 Bible Online

Matio 15 - Ngiemboon bible

Matio 15

¹Á gwɔ́ tsɔ́ lyɛ̌’, etsɔ́ pà *farisay pâ *pàkyagte lepʉ̌ Mǒsê fó Yerósalem ńtóo lejʉ́ŋ Yěsô, ńzɛ́te yé ngie:

²Mélà’a kɔ́ *ngàŋa kwò jú té giŋe ná nùŋe pà mvfò wɔ́ɔ? Pɔ́ gaa ḿpfɛ́ shúm té sɔg mbwó mɔ́b nà ntí gie mà là’ wege ne ńzɛ́te?

³Yěsô tsɔ́’ɔ mbwó pɔ́b ngie: Á gʉa ná pi, pi lɔgɔ tsẅé lá’ gí ńgwága Ssé mélà’a kɔ́?

⁴E Ssé la gɔɔn ngie: «Gÿo mekù’ tá gù pɔ́ má gù, ńgíŋe ńgɔɔn ngie: Nyìŋ lɔɔn ńzoonte tá we ka má we wɔ́, mé zẅé ngàŋ».

⁵Á gʉa ná pi, pi gɔɔn gí ngie: Ńgwɔ́ nyìŋ gɔɔn mbwó tá we ka má we wɔ́ ngie, á kɔ́ɔkɔ́ gie à lɔɔn ńgwɔ́ á lɔg ńkẅéte yé cʉ’ʉ́ ye Ssé.

⁶Nyìŋ vɔg tà ńgɔɔn pú’u, mbà mé tè gíŋe zɛ́te yé ngie: Tà ɔ̀ gÿǒ mekù’ tá gù wɔ́? Pú’u, pi lɔgɔ mà lá’ gẅi ńgwága shwóŋó Ssé.

⁷Pi ee pà nkwòŋ menÿɔ́g! Esǎya á *ntsẅì nkʉ̀ Ssé, lɔ̌ɔn fɔ́ɔn ńgɔɔn pá’a shwóŋó nò, pá’ à la gɔɔn ná mà lá’ gẅi ngie e Ssé gɔ̌ɔn ngie:

⁸«Pʉ̀a pɛ̂ lɔgɔ pɔ́ ndà’ ncwò wɔ́b ńgu’te wɔ̀ɔn, ntʉ́m wɔ́b té ná mèŋ wɔ́.

⁹Pɔ́ ne ńgu’te wɔ̀ɔn tá ànò té mǒ wɔ́, ńtí nò gie pɔ́ ńnéŋe twó ńzí’i pʉ̀a mmó tɛ’ tá’, á gwɔ́ pɔ́ ye pʉ̀a mesoŋ».

¹⁰Yěsô tóŋo lá’, ńgɔɔn né pɔ́b ngie: Pi zẅí’te, ńcwoŋo ńjú’,

¹¹àmmó gie á fó ncwò nyìŋ ńkúu lepfòm yé, té cʉŋte yé wɔ́, àgie á kẅɛɛ ncwò yé zɔ̌ cʉŋte yé.

¹²*Ngàŋa kwò Yěsô leen ńké sẅɛ’te nnɛ́ ńto ńzɛ́te yé ngie: Tà ɔ̀ ne ńzsé ngie: Ànò gie ɔ̀ gɔ̌ɔn la gegé pà *farisay tɛ’?

¹³Yěsô tsɔ́’ɔ mbwó pɔ́b ngie: Mé ge gÿo pú tsɔ́’ɔ kɔ́ɔkɔ́ gie Tá wɔ̀ɔn mie aa tÿǒ lepwó zɔ la tè pye.

¹⁴Pi nyé wɔ́b! Pɔ́ ée pàfʉ̀ menÿɔ́g pie é kíbe pwó petsɔ́. Àfʉ̀ menÿɔ́g lɔɔn ńkíbe pwó wetsɔ́, mbà pɔ́b yé mépʉ́a ge cʉ́me tsɛ̀ɛ gem.

¹⁵Piɛ leen ńké ńgɔɔn né Yěsô ngie: Kyagte sagá nò yɛ̂ shwóŋó wég.

¹⁶Yěsô tsɔ́’ɔ mbwó yé ngie: Ńzsé ngie sí legye nyé ḿvɔ́g vɔ́g pá’ se petsɔ́ pʉ̀a gwaa?

¹⁷Àmmó fó ncwò nyìŋ ńcʉa, ńkúu lepfòm yé, ḿbiŋ fó lepfòm yé ńkẅɛ, ńkúu tsɛ̀ɛ kwɛ.

¹⁸Tá’, àmmó gie á fó ncwò nyìŋ ńkẅɛ, a fóo tsɛ̀ɛ ntʉ́m yé, yɛ̌ zɔ̌ ńnéŋe *lɔ̌’ ná ngàŋ.

¹⁹Á nue menkwaŋá tepòŋ zɔɔn ńkẅɛ pɔ́ tsɛ̀ɛ ntʉ́m nyìŋ, mɛ̌ zɔ̌ tsóte nyìŋ á zẅé wetsɔ̌, á gÿo gÿɛ́, mbàŋa fa’ pànzwě, pànzwě fa’ mbàŋa, á jʉ, ńcÿɔ nò á jʉ’ gie mé ŋaga mentsaŋ wó, ńtÿɔ́g sóon twó nyìŋ.

²⁰Gyá shúm sie é ńnéŋe *lɔ̌’ á ná nyìŋ, tá ńgwɔ́ gie nyìŋ lɔɔn ńjÿó shúm té sɔg mbwó pá’ mà lá’ wege ne ńzɛ́te, á le ńnéŋe *lɔ̌’ ná yé wɔ́.

²¹Yěsô gÿo fó jʉ’ó ńgʉa ná tsɔ́ pàga ngwòŋ, á shÿó tÿǒsoŋ Tir pɔ́ Sidoŋ,

²²ńkúu wó, àtsɔ̌ manzwě Kanaan fó wó ńtó, ńzye léga’te, ńgɔɔn ngie: Cʉ̀apʉ̀a, nyìŋ na ngẅɛ fùɔ Ndavíd! E *Ssé tepòŋ pǔ ne ńgege míŋ wɔ̀ɔn we manzwě tɛ’.

²³Tá’ Yěsô jú’, ḿbú tè pÿɛ. *Ngàŋa kwò yé tóo lejʉ́ŋ ye, ésẅíŋte yé, ḿbú’ mbwó ngie: Gÿo manzwě wɛ̂ gʉa, à ne ńcu’u twó yégè.

²⁴Yěsô tsɔ́’ ngie: E Ssé la túmo wɔ̀ɔn pɔ́ ndà’ mbwó *menjʉ̀njÿò mie é la pyé tsɛ̀ɛ ngẅɛ̀ ndá pà Israel.

²⁵Tá’ manzwě awɛ̌ tó, ńkẅí’te mvfò yé, ńgɔɔn ngie: Cʉ̀apʉ̀a kẅéte wɔ̀ɔn!

²⁶Yěsô tsɔ́’ ngie: Á té poŋo lekẅé shúm léjÿó penkʉ́, ḿma’a mbwó ngwé wɔ́.

²⁷Manzwě ŋwɛ́ tsɔ́’ ngie: À Nde, ɔ̀ gɔɔn shwóŋó nò tá’, ngwé ké ńdagte mesɔ́ɔn shúm mie éfóo ndùm tápele tá wɔb ńgwete ssé.

²⁸Yěsô leen ńké ńtsɔ́’ ngie: Má wɔ̀ɔn! Ɔ̀ záb ntʉ́m ná mèŋ tɛ’. Á poŋ ngie àmmó gie ɔ̀ ne ńtsɔ́ɔn á pumte! Yěsô gɔɔn pú’u, míŋ manzwě wá gwóon ńzeŋe pɔ́ kwà’ fʉ̀’ó.

²⁹Yěsô gÿo fó jʉ’ó, ńgʉa né ngʉ̀ŋe letʉŋ sie ée Galilea, ńkwɔ́’ tà ńkúu ndùm lekwɔ’ɔ́, ńnéŋe ssé.

³⁰Menùɔ lá’ tó, ńgwaa tó, ńdɔg pàpwɔ́’te mekwò, pâ pàfʉ̀ menÿɔ́g, pâ megàŋ *melɔ̌’, pâ pàtámbǎ’, mbɔɔ tsɔ́ megàŋa guɔ tà ńgyɔ́ɔn. Pɔ́ lɔgɔ wɔ́b ńtóo mvfò Yěsô pú’u, á gÿo pɔ́ zeŋe metsèm.

³¹Pàtámbǎ’ gɔɔn nò, mekÿǒon zeŋe, pàpwɔ́’te mekwò giŋ mboŋó, pàfʉ̀ menÿɔ́g gyá jʉ’ mboŋó. Àlá’ gyá ḿmɔɔn tɛ’, ńgu’te Ssé pà Israel.

³²Yěsô tóŋ *ngàŋa kwò yé, ńgɔɔn né pɔ́b ngie: Mezìŋe lá’ yɔɔn pǔ ńkúu wɔ̀ɔn tɛ’, mélà’ mie ée fʉ̀’ɔɔn ńgwɔ́ lyɛ̌’ tá, pá’ pɔ́ ké ńgwɔ́ pɔ́ lejʉ́ŋ mèŋ, ńké tè nyé ńgẅiin tsɔ́ mmó gie à lɔɔn ńgwɔ́ pɔ́ pfɛ́ wɔ́, ńgwɔ́ gie n dɔɔn nyé wɔ́b pɔ́ gʉa nzyè, mbà pɔ́ té gẅiin metʉ̀ lélɔg ńgʉa tà ńkú wɔ́.

³³*Ngàŋa kwò yé gɔɔn mbwó yé ngie: Ńgwɔ́ peg lɔg mbelég nzɔ̌, á nkwòŋo tsẅɛ wɔɔn, ńdɔg ńjÿɔ́g nzẅìŋ lá’ yɔɔn tà pɔ́ zẅɛ́?

³⁴Yěsô zɛ́te wɔ́b ngie: Pi gẅiin mbelég jʉ’ɛ mbu’ú shÿɔ́’ɔ? Pɔ́ tsɔ́’ ngie: Peg gẅiin mbelég mbu’ú sɔɔn mbʉ́a, ńgíŋe ńgÿo mbɔɔ ntá’ membaŋ ssó.

³⁵Yěsô tsẅi ngie àlá’ ńnéŋe ssé,

³⁶ńdeen ńké ńkẅé mbelég ŋwɛ́ mbu’ú sɔɔn mbʉ́a lê messó má, ńná ndǎg mbwó Ssé, ḿbwɔ́’te ńnáa mbwó *ngàŋa kwò yé, pɔ́ gaba mbwó lá’.

³⁷Mânyìŋ ntsèm pú ḿpfɛ́ tà ńzẅɛ́, mé piŋ ńcú’te pfwɔ’ á lúe metúŋ sɔɔn mbʉ́a.

³⁸Pʉ̀a pie é la pfɛ́ɛ mmó lâ mbàŋa ntsá’ lekùɔ, té sáŋ penkʉ́ lâ pànzwě.

³⁹Yěsô tsẅi lá’ gʉa, á kúu tsɛ̀ɛ kanú’, ńgʉa né tsɛ̀ɛ pàga ngwòŋ Magadaŋ.