Read Ngiemboon Matio 16 Bible Online

Matio 16 - Ngiemboon bible

Matio 16

¹Pà *farisay lâ pà *sadukay tó ńzẅí’ ncwò Yěsô, ńzɛ́te yé ngie à nyɛɛ wɔ́b liŋé gie á la’te ngie Ssé zɔ túmo yé.

²Yěsô tsɔ́’ɔ mbwó pɔ́b ngie: Á gʉa ncwò nzém gẅie lefaŋ é selé ḿbaŋ pi gɔɔn ngie: Njÿó ge lʉ́a àlyɛ’ɛ́ lá’ zɔ́g ḿboŋ.

³Á gwɔ́ mba’ámba’ gẅie lefaŋ é pǎŋ sîŋ sǐŋ pi gɔɔn ngie: Àlyɛ’ɛ́ lá’ té ge zɔ́g poŋ wɔ́. Pi gwɔ́ tà ńdíe lefaŋ, ńgwóon ńzsé pá’ àlyɛ’ɛ́ lá’ ge gÿo gwɔ́ pú’u, tá ńgʉa nà shúm sie e Ssé ne ńnyɛɛ fʉ̀’ɔɔn pi tè zsé mmó gie sɛ̌ shúm lɔgɔ ńgɔɔn wɔ́ mélà’a kɔ́?

⁴Pʉ̀a pie ee tsɛ̀ɛ njyó fʉ’ɔɔn pie ée pʉ̀a tepòŋ, ḿbiŋ ńké ne ńtʉʉ twó mbwó Ssé tʉ ne ńzɛ́te ngie: Mèŋ n nyɛɛ liŋé. Tá mé té ge nyɛɛ wɔ́b tsɔ́ mmó wɔ́, tà ńdí ndà’ nò gie á la gÿo Jonase. Yěsô gɔɔn pú’u, ńnyé wɔ́b jʉ’ó ńgʉa.

⁵*Ngàŋa kwò Yěsô gÿo ńtúm letʉŋ yɔ́b, ńgwaa túm, ńdege té pí mbelég.

⁶Yěsô gÿo ne ńgɔɔn né pɔ́b ngie: Pi laga twó gí, ḿbɔ́ɔn *mvòŋ pʉ̀a *farisay lâ pʉ̀a *sadukay.

⁷*Ngàŋa kwò yé jú’, ńdeen ńké ne ńgɔɔn tsetsɛ̀ɛ pɔ́b ngie, ndyɛ̌’ à gɔɔn pɛ́’ɛ, mélà’mie pege ně ńdege té pí mbelég[5].

⁸Yěsô zsé pá’ pɔ́ ne ńkwaŋa pú’u, ńgɔɔn né pɔ́b ngie: Pi tè záb ntʉ́m ná mèŋ mboŋó wɔ́. Pi kwaŋa pɔ́ nò mbelég gie pi tè gẅiin mélà’a kɔ́?

⁹Pi lɔgɔ ḿbú ńnyé pɔ́ tè zsě nò gwáa? Ńzsé ngie pi kaa kímte mbelég yá mbu’ú ntʉ̀a, pá’ mèŋ n ka lɔg ńjÿɔ́g mbàŋa ntsá’ tʉ̀a la wɔ́ kěen? Pi laa lyɛ̌’ó pá’a ńdag mekèm, é kẅɛ metúŋ meshÿɔ́’ɔ léen,

¹⁰ńzsé ngie pi kaa kímte mbelég yá mbu’ú sɔɔn mbʉ́a, pá’ mèŋ n ka lɔg ńjÿɔ́g mbàŋa ntsá’ lekùɔ la wɔ́ keen? Pi laa lyɛ̌’ó pá’a ńdág mekèm, é kẅɛ metúŋ meshÿɔ́’ɔ léen.

¹¹Á piŋ ńgÿo lêkɔ́, pi tè jú’ ngie mèŋ n tě ńgɔɔn nò nà mbelég wɔ́? Mèŋ n giŋé ńgɔɔn ngie: Pi pɔ́ɔn *mvòŋ pà *farisay lâ pà *sadukay.

¹²*Ngàŋa kwò Yěsô leen ńké ńjú’ ngie, á kě tě ńgɔɔn ngie pɔ́ pɔ́ɔn *mvòŋ lɔg ńcwoŋte mbelég wɔ́. Á kě ńgɔɔn pɔ́ ngie pɔ́ pɔ́ɔn mmó gie pà *farisay lâ pà *sadukay zí’i pʉ̀a.

¹³Yěsô gʉa tà ńkúu Sezare gẅie Filib lɔ̌ɔn sá’a, ńzɛ́te *ngàŋa kwò yé ngie: Àlá’ áa pá’ɔɔn ńne ńgɔɔn ngie: *Míŋ Nyìŋ aa wɔ̌?

¹⁴Pɔ́ pÿɛ ngie: Etsɔ́ pʉ̀a ne ńgɔɔn ngie: Ɔ̀ɔ Jâŋ Mbabtis, petsɔ́ ne ńgɔɔn ngie: Ɔ̀ɔ *Elîɛ, petsɔ́ ne ńgɔɔn yɔ́b ngie: Ɔ̀ɔ Yeremi, petsɔ́ ne ńgɔɔn yɔ́b ngie: Ɔ̀ɔ tsɔ̌ tà’ nà pà *ntsẅì nkʉ̀ Ssé.

¹⁵Yěsô zɛ́te wɔ́b ngie: Kwà’ pi gí gɔɔn ngie mèŋ n gee wɔ̌?

¹⁶Símo Piɛ tsɔ́’ ngie: Ɔ̀ɔ *Nzà’nkÿo, Míŋ Ssé gie ee wó.

¹⁷Yěsô leen ńké ńgɔɔn né yé ngie: Símo míŋ Jâŋ, ɔ́ɔ shÿó mbòŋo, á nue nyìŋ mesoŋ zɔ kaa gÿo, tá ɔ̀ zsé yɔɔn nò nénʉ́ wɔ́. Tá wɔ̀ɔn gẅie aa tÿǒ lepwó zɔ nyɛ̌ gú.

¹⁸N ge ké gíŋe shwóŋó ɔ́, kwà’ nénʉ́, ngie: Ɔ̀ɔ Piɛ, ńdɔgɔ ngie tóon, mèŋ n ge gÿo tÿɔ́gɔ cú’te pʉ̀a pɔ́ɔn ndùm tóon ŋwɛ́. Tà mbɔɔ legwé lelá’ ńku’u lénʉ’te yɛ̌ cú’tè wɔ́.

¹⁹Mèŋ n ge gÿo ná metsɔ́’ɔ lélɔg ńtsɔ́’ nzsè *lefùɔ Ssé á mbwó gù. Àmmó gie ɔ̀ ge gÿo lʉ’ʉ ndùmo ssé tsetsá’, mé gÿo ńdʉ’ʉ tÿǒ lepwó. Àmmó gie ɔ̀ ge zẅíŋe á ndùmo ssé tsetsá’ mé ge gÿo zẅíŋe tÿǒ lepwó.

²⁰Yěsô gɔɔn pú’u, ńdeen ńké ńtsẅiŋe *ngàŋa kwò yé ngie, tà pɔ́ kím tà nyìŋ ndyɛ̀’ɛ zsé ngie aa *Nzà’nkÿo.

²¹Á fó fʉ̀’ ayɛ̌, Yěsô Kristo shʉashʉa ḿbÿe mbwó *ngàŋa kwò yé ngie: Á ne ńzɛ́te ngie à gʉa Yerósalem. À ge kúu wó gyá ngɔ́’ tɛ’ mbwó mekěme lá’, pâ *metándá pànùŋe pwɔ́’, mbɔɔ *pàkyagte lepʉ̌ Mǒsê, pɔ́ gÿo mé zẅé yé. A piŋ nzime na legwé na ḿbɔ́ɔnte lyɛ̌’ tá.

²²Piɛ leen ńké ńtóŋo yé ntsem, ńzye lékaga yé, ńgɔɔn né yé ngie: Cʉ̀apʉ̀a, tà Ssé zẅíŋ yɛ̌ ntí nò gÿo gú! Ńgwɔ́ á le gwɔ́ pú’u wɔ́.

²³Yěsô sele nnɛ́, ńgɔɔn né Piɛ ngie: Fó nzèm mèŋ ńtsíŋte nnɛ́ me Sátà! Ɔ̀ cʉ’ʉ́ ńtate wɔ̀ɔn taté. Ɔ̀ tě ńkwaŋa pɛ́’ɛ, á gwɔ́ pá’ Ssé ne ńkwaŋa wɔ́, wɛ̂ gwɔ́ pɔ́ nkwaŋá pʉ̀a mesoŋ.

²⁴Yěsô gíŋe ńgɔɔn mbwó *ngàŋa kwò yé ngie: Nyìŋ lɔɔn nge gwɔ́ wɔ̀ɔn nyìŋ, á gwága twó mbùm yé, ńkaa yé tÿǒ nkǐ ńdɔg ńzẅíŋe lékwé, tá ńcʉ́me nzèm mèŋ.

²⁵Nyìŋ gẅie á ge zɔɔn fa’a lépɔ́ɔn we le gwɔ́, zɔɔ nyìŋ gẅie à ge pyé we le gwɔ́ wó ŋwɛ́. Tá’ nyìŋ gẅie à kě ḿbyé we le gwɔ́ wó mélà’ mɔ́ɔn, mbà wɛ̌ nyìŋ ge lá’ gwɔ́ wɔ́.

²⁶Mé lɔɔn ńzɔɔn ḿbú ńkaa njÿó yɔɔn ntsèm ńná né nyìŋ, tá’ á ké ńgwɔ́ gie e ge lɔg pɔ́ twó yé, mbà á ge kẅéte yé nà kɔ́? À lɔɔn ńgwɔ́ nyìŋ lɔgɔ kɔ́ ńdɔg ńkúbe twó yé?

²⁷Pi zsé ngie: *Míŋ Nyìŋ pâ mecÿɔ́’ pé ge gÿo tó, á tsɛ̀ɛ legú’ Tá we, à leen ńké ńtsɔ́’ɔ fà’a wɔwɔ́, pɔ́ nà ngÿǒ menò mé.

²⁸Mèŋ shwóŋó gẅí, kwà’ nénʉ́, etsɔ́ ntá’ ná pʉ̀a pie ée jʉ’ɔɔn fʉ̀’ɔɔn té gÿo kwé, té gwɔ́ gie pɔ́ gyǎ pá’ *Míŋ Nyìŋ tǒ pá’ fùɔ wɔ́.