Read Ngiemboon Matio 19 Bible Online

Matio 19 - Ngiemboon bible

Matio 19

¹Yěsô la ná mɔɔn mentÿɔgɔ́ mbwó pʉ̀a tà ńtsẅé jʉ’, éfó Galilea ńkẅɛ, ńdɔg shÿó Jẅidea ńgʉa, á nà yetsɔ̌ nzǐŋ ntse Jurdeŋ.

²Àlá’ cʉ́me nzèm yé tà ńgyɔ́ɔn. Á kúu wó ńgÿo megàŋa guɔ nùɔ pɔ́b zeŋe.

³Epʉ̀a ná nùɔ pà *farisay tó yɔ́b, ńkwa’te Yěsô, ńzɛ́te yé ngie: Tà áa pé’e *lepʉ̌ sége zẅíŋ ngie nyìŋ jwoŋo nzwě we tà mbɔɔ ná yɛ̌ nò wɔ́ gie à fʉ̌a?

⁴Yěsô zɛ́te wɔ́b ngie: Pi tè tóŋo ŋwà’ne Ssé ńjú’ wɔ́ ka? Mé la ŋwe’e ngie: «E Ssé la fó nùŋe ngwòŋ ḿbwóon mámbàŋa pɔ́ manzwě».

⁵Áa mmó gie á gÿo nyìŋ ńnéŋe tà fag nnɛ́ ye ná tá we pɔ́ má we, ńgʉa ńda nnɛ́ ná we manzwě, pɔ́ yé temte ńcʉ́’ʉ tà’ nyìŋ

⁶Á fó ná fʉ̀’ó pɔ́ té gíŋe ńgwɔ́ pʉ̀a mépʉ́a wɔ́, pɔ́ cʉ́’ ńgwɔ́ pɔ́ tà’ nyìŋ. Pú’u la, nyìŋ mesoŋ pɔ́ɔn léfege mmó gie Ssé temté.

⁷Pà *farisay zɛ́te yé ngie: Tà mélà’a kɔ́, Mǒsê la gɔɔn ngie: «Mé náa ŋwà’ne á mbwó manzwě lélɔg ńjwoŋo yé».

⁸Yěsô tsɔ́’ɔ mbwó pɔ́b ngie: Mǒsê lɔ̌ɔn ńgɔɔn pú’u, mélà’mie à la gyá ngie pi tʉʉ twó mbwó Ssé tà á cʉa. Tá á zẅíŋ ngie pi jwóŋ mezwě pí, mbà á la fó nùŋe ngwòŋ ńké tè pú’u, wɔ́.

⁹Mèŋ shwóŋó gẅí, nyìŋ lɔɔn ńjwoŋo nzwě we té gwɔ́ pɔ́ ngie à gÿǒ gÿɛ́, ńzɔ́’ɔ tsɔ̌, mbà ngàŋ gÿo pɔ́ gÿɛ́

¹⁰*Ngàŋa kwò Yěsô gÿo ńgɔɔn né yé ngie: Àlɔ́ɔn ndá lɔɔn ńgwɔ́ pɔ́ pɛ́’ɛ, ḿba mvfò nyìŋ léńnéŋe té zɔ́’.

¹¹Yěsô tsɔ́’ɔ mbwó pɔ́b ngie: Pʉ̀a metsèm zɔ̌ té ku’u lézẅíŋe yɔɔn nò wɔ́. Tá e Ssé kě ńne ńgÿo, étsɔ́ ntá’ pʉ̀a ku’u mǒ.

¹²Eshúm sie é gÿo pʉ̀a té zɔ́’, gwɔ́ tà ńgyɔ́ɔn: Á gʉa nà tsɔ́ pʉ̀a, pɔ́ té ku’u lézɔ́’ wɔ́ tà fó pɔ́ lyɛ’ɛ́ nzye, ńgʉa nà petsɔ́, mbà pʉ̀a mesoŋ zɔ̌ la gÿo, ḿbiŋ ńgʉa nà petsɔ́, mbà pɔ́ la zẅíŋe légwɔ́ pú’u, ntíi nò *lefùɔ Ssé. Nyìŋ gẅie à gyǎ lézẅíŋe yɔɔn nò à zẅíŋ.

¹³Epʉ̀a gÿo ne ńdɔgɔ gubé ńtóo mvfò Yěsô légwɔ́ gie à ge gwɔ záb mbwó ná pɔ́b, é ne sẅíŋte Ssé. Tá *ngàŋa kwò yé ne ńtɔ’ɔ wɔ́b.

¹⁴Yěsô gɔɔn ngie: Pi nyé gubé pɔ́ tó ńkẅɛ́te wɔ̀ɔn, tà pi táte wɔ́b, èpʉ̀a pie ée pá’ gubé zɔ̌ gẅiin nò ná *lefùɔ Ssé,

¹⁵ńgɔɔn pú’u, ńzáb mbwó mé ná pɔ́b, tà á ku’ á fó jʉ’ó ńgʉa.

¹⁶Àtsɔ̌ nyìŋ gÿo ńtóo lejʉ́ŋ Yěsô, ńzɛ́te yé ngie: Tsítsà, à lɔɔn ńgwɔ́ mèŋ n gÿo kɔ́ nò mbòŋo tà ńgẅiin le gwɔ́ tèmí?

¹⁷Yěsô zɛ́te yé ngie: Mélà’a kɔ́ ɔ̀ zɛ́te wɔ̀ɔn nò ná mmó gie áa mbòŋ? Nyìŋ mbòŋo gwɔ́ pɔ́ wémɔ’ɔ́. Ɔ̀ lɔɔn ne ńkwoŋo ngie pi Ssé gwɔ́, ɔ̀ kú’te mbʉ̌ mé.

¹⁸Nyìŋ ŋwɛ́ zɛ́te ngie: É mɛ̌ mbʉ̌? Yěsô tsɔ́’ ngie: «Tè zẅé nyìŋ, tè gÿo gÿɛ́, tè jʉ́, tè tÿɔ́g sóon twó nyìŋ

¹⁹Ná mekù’ tá gù, pɔ́ má gù, kwoŋo fɛ́ gù nyìŋ mesoŋ pá’ ɔ̀ kwoŋo twó mbùm jú».

²⁰Mûɔ shùm ŋwɛ́ gɔɔn né yé ngie: Mèŋ, n gee ńké ńtsẅé ńkú’te mbʉ̌ mɛ̂ ku’té ntsèm, àkɔ́ nyé ńzága wɔ̀ɔn?

²¹Yěsô tsɔ́’ɔ mbwó yé ngie: Ɔ̀ lɔɔn ne fa’a lémege ńcʉ́me, ɔ̀ gʉa sẅiŋ shúm sie ɔ̀ gẅiin ntsèm, ńná nkáb mbwó pàtèmmó, ńdeen ńké ndá’ ńgẅiin shúm tʉ̀ nzẅìŋ tÿǒ lepwó. Gʉa ńgÿo pú’u, ḿbiŋ ńtó ńcʉ́me nzèm mèŋ.

²²Mûɔ shùm jú’u yɔɔn shwóŋó, eshÿó wé sẅɛ́’, á tém nzèm ńgʉa, mélà’mie à la gẅiin shúm tʉ̀ nzẅìŋ tɛ’.

²³Yěsô gɔɔn mbwó *ngàŋa kwò yé ngie: Mèŋ shwóŋó gẅí, kwà’ nénʉ́, ngie: Á tʉʉ mbwó ngàŋa mmó lézẅíŋ ngie e Ssé zɔ cʉ́’ʉ sá’a yé.

²⁴Mèŋ, n ge gíŋ ńnyɛte shwóŋó gẅi ngie, á zeŋe mbwó shÿɔ́ɔ léshúu tsɛ̀ɛ njwòŋ lesyɛ’ɛ́, ńcʉa ngàŋa mmó lézẅíŋ ngie Ssé zɔ cʉ́’ʉ sá’a yé.

²⁵*Ngàŋa kwò yé jú’u yɔɔn nò, á pú ńkʉ’ʉ wɔ́b tɛ’, pɔ́ gɔɔn ngie tà á lɔɔn ńgwɔ́ pɛ́’ɛ, mbà wɔ̌ ge lá’ tsẅɛ́?

²⁶Yěsô líe wɔ́b tà ńgɔɔn ngie: Á cʉa pɔ́ pʉ̀a mesoŋ, e Ssé ku’u légÿo kɔ́ɔkɔ́.

²⁷Piɛ gɔɔn mbwó Yěsô ngie: Tà peg leen nyé shúm ntsèm, ńcʉ́me nzèm gù pá’ɔɔn, tà yég nò ge lá’ gwɔ́ lêkɔ?

²⁸Yěsô tsɔ́’ ngie: Tà mèŋ shwóŋó gẅí, kwà’ nénʉ́, mé ge lá’ kúu tsɛ̀ɛ ngwòŋ sẅé, *Míŋ Nyìŋ ńnéŋe nà lʉŋe lefùɔ yé gie á gẅiin shʉ́shÿɔ́g, pi pʉ̀a ntsɔ̀b pʉ́a nê legém pie pi la cʉ́me nzèm mèŋ, gíŋe ńnéŋe gí nà melʉŋ ntsɔ̀b pʉ́a nê legém, ńŋag pʉ̀a Israel, ngẅɛ̀ ntsɔ̀b pʉ́a nê legém

²⁹Àwɔ̌wɔɔ gẅie à la nyé mendá, ńnyé mefɛ́ pé pe mbàŋa mbɔɔ pe pànzwě, ka pɔ́ tá we, ka pɔ́ má we, ka pɔ́ penkʉ́ pé, ka pɔ́ menká’ mé wɔ́, ntí lezíŋ sɔ́ɔn, à ge lá’ gíŋe gẅiin sɛ̌ shúm ngʉ̀a nkÿo, é gíŋe gẅiin le gwɔ́ tèmi.

³⁰Tá’ lelÿò pàgwɔ́ mvfò fʉ̀’ɔɔn, ge lá’ cʉ́’ pàgwɔ́ nzèm, lelÿò pàgwɔ́ nzèm fʉ̀’ɔɔn e lá’ ńgwɔ́ pàgwɔ́ mvfó