Read Ngiemboon Matio 20 Bible Online

Matio 20 - Ngiemboon bible

Matio 20

¹Yěsô gíŋe ngie: Ànò *lefùɔ Ssé leen ńgwɔ́ pɔ́ pá’ nò tsɔ̌ nyìŋ gẅie à la mʉ́ mba’ámba’, ńgʉa fa’ megàŋa fà’ pie à ge ńnéŋe nká’ yé.

²Pâ megàŋa fà’ lʉ’te pá’ à ge náa tà’a pàga nkába mbwó tà’ nyìŋ ná lyɛ’ɛ́ lá’. Á leen ńké ńtsẅi pɔ́ gʉa né nká’ yé[7].

³Nèm lepfwɔ’ɔ́ piŋ ńku’, á gíŋe ńkẅɛɛ mbʉ̀a yé, ńgyá tsɔ́ ngàŋa fà’ gíŋe ńtyé mefagá nzsè, pɔ́ té ne ńgÿo tsɔ́ mmó wɔ́.

⁴Á gɔɔn né pɔ́b ngie: Pi gʉa gí nká’ mèŋ fa’a fà’. Mèŋ n ge gÿo lʉŋte gẅi ntsɔ’ɔ́ fà’ ná fà’a gí.

⁵Pɛ̌ pʉ̀a gʉa né nká’. Àngàŋ nká’ gÿo ńgwɔ́ tsɛ̀ɛ zsǒ, ńgíŋe ńkẅɛɛ mbʉ̀a yé, ńgÿo ńgwɔ́ mbÿɛ̀ njÿó ná nèm tá, ńgíŋe ńkẅɛ, ńgyá megàŋa fà’ fʉ̀’ʉ kɔ́ wɔ́, ńgɔɔn pɔ́ pú’u.

⁶Á gÿo ńgwɔ́ ncwò nzèm ná nèm tʉ̀a, ńkẅɛ, ńgyá tsɔ́ megàŋa fà’ tyé, á zɛ́te wɔ́b ngie: Mélà’a kɔ́ pi tyé jʉ’ yɛ tà fó mba’ámba’ té ne ńgÿo tsɔ́ mmó?

⁷Pɔ́ tsɔ́’ ngie: Á gwǎ gwɔ́, mbà tsɔ̌ nyìŋ kaa tóŋo wég nà fà’ wɔ́. Á gɔɔn né pɔ́b ngie: Pí gʉa gí nká’ mèŋ fa’a fà’.

⁸Àfʉ̀’ ye létsɔ́’ɔ fà’ ku’, àngàŋ nká’ tsẅii mbwó nyìŋ gẅie à líe shúm sé ngie: Tóŋ megàŋa fà’, ńná nkáb yɔb, zye ná pʉ̀a pie mèŋ n toŋó wɔ́b nà fà’ pɔ́ nzèm la, ńgʉa ńkúu ná pʉ̀a pie mèŋ n ně ńzye ná pɔ́b

⁹Pʉ̀a pie pɔ́ zyě yɔ́b fà’ ná nèm tʉ̀a ncwò nzém tó, mé náa tà’a pàga nkáb mbwó wɔ̌wɔɔ ná pɔ́b.

¹⁰Pʉ̀a pie pɔ́ ně ḿvɔg ńzye fà’ gwɔ tó yɔ́b, ńně ńkwaŋa ngie yɔb nkáb ge ná’a gyɔ́ɔn, tá mé gíŋe ńná pɔ́ tà’a pàga nkáb mbwó wɔ̌wɔɔ ná pɔ́b.

¹¹Pɔ́ gwaa kẅé lóŋ wɔb ne ńgyáŋa ńtí ngàŋ nká’.

¹²Pɔ́ ne ńgɔɔn ngie: Pʉ̀a pɛ̂ tǒ pɔ́ nzèm, pɔ́ fǎ’ pɔ́ ndà’ ná tà’ nèm, ɔ̀ kě ńgíŋe ḿbéen wɔ́b pɔ́ pá’ peg lá, tá mbà peg ně ńzye fà’ tsɛ̀ɛ mba’ámba’, peg kě ńzɔ́g fa’ pɔ́ tè zẅɛte, nèm ne ńtuɔ wég.

¹³Ngàŋ nká’ tsɔ́’ɔ mbwó tsɔ̌ tà’ nyìŋ ná pɔ́b ngie: Àshǔ wɔ̀ɔn, mèŋ n kaa tsɔ́ nò mbwó gù fʉa. Pɔgɔ ně ńdʉ’te tà ńgwɔ́ tà’ nyìŋ, pá’ ɔ̀ ge kẅé tà’a pàga nkáb nà lyɛ’ɛ́ lá’.

¹⁴Kɔ̀ nkáb jù, éfó lejʉ́ŋ mèŋ ńtsíŋte nnɛ́. Á gʉa ná nyìŋ gẅie à tǒ pɔ́ nzèm, mbà mèŋ n gyǎ ngie mèŋ n ge ná ndʉŋ ndʉŋ mmó gie mèŋ n nǎ mbwó gù á mbwó yé.

¹⁵Mèŋ n gẅiin lélɔg nkáb yɔ̀ɔn ńgÿo mmó gie mèŋ n kwǒŋ, á té pú’u, wɔ́ ka? Ka ɔ̀ gyáŋa lóŋ ńtí pɔ́ nò gie ɔ̀ gyǎ n gwɔ́ ngàŋa pòŋo ntʉ́m?

¹⁶Yěsô gíŋe ńgɔɔn ngie: Áa pú’u tá pàgwɔ́ nzèm ge lá’ cʉ́’ pàgwɔ́ mvfò, pàgwɔ́ mvfò e cʉ́’ pàgwɔ́ nzèm

¹⁷Yěsô ne ḿbʉʉ né Yerósalem, éfag *ngàŋa kwò yé ntsɔ̀b pʉ́a nê legém, pâ pɔ́ ne ńgiŋe, á gɔɔn né pɔ́b ngie:

¹⁸Pi cwoŋo ńjú’ mboŋó, pege ee mánzsè ne ḿbʉʉ né Yerósalem pá’ɔɔn, é kúu wó, mé sẅiŋe *Míŋ Nyìŋ á mbwó *metándá pànùŋe pwɔ́’ paa *pàkyagte lepʉ̌ Mǒsê. Pɔ́ ŋaga yé, ńzáb ngie à ge kwé,

¹⁹ńnáa yé mbwó pàtèzsé Ssé, pɔ́ zoonte yé, ńdɔg ngwɔɔn ńcúɔ yé, ńkime yé nà tÿǒ nkǐ. A piŋ ńzíme nà legwé na ḿbɔ́ɔnte lyɛ̌’ tá.

²⁰Má pà Jâg pɔ́ Jâŋ, é gubé Zebede, leen ńké ńdɔgɔ wɔ́b ńtóo mvfò Yěsô, ńkẅí’te ssé lélúɔ tsɔ́ mmó mbwó yé.

²¹Yěsô zɛ́te yé ngie: Ɔ̀ tsɔɔn ngie n gÿo lêkɔ́? Á tsɔ́’ ngie: Mèŋ n ne ńtsɔ́ɔn ngie ɔ̀ zẅíŋe mbwó mèŋ ngie, ɔ̀ ge gÿo gwɔ́ fùɔ, egubé yɔ́ɔn mɔɔn yépʉ́a ńnéŋe lejʉ́ŋ gù, tà’ gwɔ́ nà gwoŋó pwó jú ye tʉ̀, wetsɔ̌ gwɔ́ nà gwoŋó pwó jú ye kyɛ̀bɛ.

²²Yěsô tsɔ́’ ngie: Pi kaa zsé mmó gie pi ee pɛ́’ɛ ńdúɔ yɛ̌ wɔ́. Pi ku’u lénú ntú’ ngɔ́’ gie mèŋ n ge lénǔ? Pɔ́ tsɔ́’ ngie: Peg ku’u lénú.

²³Yěsô gɔɔn né pɔb ngie: Pi ge gÿo nú ntú’ yɔ̀ɔn. Tá, ńgʉa nà leneŋé nyìŋ nà gwoŋó pwó yɔ́ɔn ye tʉ̀ ka pɔ́ ye kyɛ̀bɛ wɔ́, mbà mèŋ n zɔ tè gẅiin léná né nyìŋ wɔ́. Tá wɔ̀ɔn zɔ ne ńzsé pʉ̀a pie à la nyɛte sɛ̌ jʉ’ ńdɔgɔ ḿbyɛ́bɛ wɔ́b.

²⁴Yetsɔ́ *ngàŋa kwò Yěsô legém gwɔ́ tà ńjú’u nò gie pɔ́ gɔ̌ɔn, ńgyáŋa lóŋ ńtí wɔ́b mépʉ́a.

²⁵Yěsô tóŋo wɔ́b metsèm, ńgɔɔn né pɔ́b ngie: Pi ne ńzsé ngie mefùɔ pàtèzsé Ssé ne sá’a lá’, ńnɔ’ pʉ̀a nɔ’, memáa pʉ̀a ne sẅɛ́ɛ lá’ sẅɛ́

²⁶Tá á ké te poŋ ngie á gwɔ́ tsetsɛ̀ɛ pi ńgwɔ́ pú’u wɔ́. Nyìŋ lɔɔn ne ńkwoŋo légwɔ́ ndÿò tsetsɛ̀ɛ pi, mbà á póŋ ngie à cʉ́’ʉ menkʉ́ gẅie.

²⁷Nyìŋ ná pi lɔɔn ne ńkwoŋo légwɔ́ ndÿò tsetsɛ̀ɛ pi, mbà á poŋ ngie á zẅíŋe légwɔ́ nkwɔɔn gi

²⁸Ndʉŋ ndʉŋ pá’ *Míŋ Nyìŋ la te tóo ndùmo ssé tsetsá’, pɔ́ pá’ epʉ̀a mesoŋ gee fa’a mbwó yé wɔ́, á la tó pɔ́ lefa’a mbwó pʉ̀a mesoŋ, éfa’ fa’ tà gíŋe náa twó yé lélɔg ncu’ pʉ̀a tà ńgyɔ́ɔn.

²⁹Yěsô paa *ngàŋa kwò yé gÿo ne foo tsɛ̀ɛ tÿǒsoŋ Yériko nkẅɛɛ, anùɔ lá’ cʉ́me nzèm yé.

³⁰Etsɔ́ pàfʉ́ menÿɔ́g mépʉ́a pie e ńnéŋe ngʉ̀ŋe mánzsè, jú’ ngie Yěsô ne ncʉà jʉ’ó, ńzye lega’te, ńgɔɔn ngie: Cʉ̀apʉ̀a nyìŋ na ngẅɛ fùɔ Ndavíd tsɔ́ɔn mezìŋe meg.

³¹Epʉ̀a tà ńgyɔ́ɔn kaga wɔ́b ngie pɔ́ láŋte, tá pɔ́ fó mege nga’a lega’te ńgɔɔn ngie: Cʉ̀apʉ̀a, nyìŋ na ngẅɛ fùɔ Ndavíd tsɔ́ɔn mezìŋe még.

³²Yěsô tyé ńtóŋo wɔ́b, ńzɛ́te wɔ́b ngie: Pi tsɔ́ɔn ngie mèŋ n gÿo lêkɔ́ ná pi?

³³Pɔ́ tsɔ́’ ngie: Cʉ̀apʉ̀a, gÿo ngie menÿɔ́g még gyá jʉ’.

³⁴Yěsô tsɔ́ɔn mezìŋe mɔ́b, ńzab mbwó mé ná menÿɔ́g mɔ́b, e gwoon nzyé légyá jʉ’, pɔ́ cʉ́me nzèm yé.