Read Ngiemboon Matio 21 Bible Online

Matio 21 - Ngiemboon bible

Matio 21

¹Yěsô pâ *ngàŋa kwò yé gʉa tà ne ńkúu Yerósalem, ńnyé ńgwɔ́ shÿó Mbedfajé, á jʉ’ʉ lekwɔ’ɔ́ metÿǒ mèvɛ olive. Á leen ńké ńtúm *ngàŋa kwò yé yépʉ́a,

²ńgɔɔn né pɔ́b ngie: Pi gʉa tsɛ̀ɛ lá’ yɛ̂ gie áa mvfò pi lɛ, pi ge leen kúu wó é gyá nzìkásè, mbà mé ně ńcʉŋ, míŋ we gwɔ lejʉ́ŋ yé, pi kyɛ́’ɛ wɔ́b, ńdɔgɔ wɔ́b ńtó, ńná né mèŋ.

³Pi lɔɔn ne ńkyɛ́’ɛ, nyìŋ gɔɔn nò, pi tsɔ́’ ngie: A Ndè zɔ ne ńtsɔ́ɔn. Mbà à ge gwóon nyé pi lɔg ńgʉa.

⁴Mɔɔn menò gwɔ́ pá’ɔɔn ńdɔgɔ ḿbumte ná nò gie à *ntsẅì nkʉ̀ Ssé la lá’ ńgɔɔn ngie:

⁵«Pi tsẅii mbwó pʉ̀a pie ée tsɛ̀ɛ tÿǒsoŋo Sioŋ ngie: Pɔ́ líe ńgyá pá’ fùɔ wɔ́b ne ńtóo né lejʉ́ŋ pɔ́b, ńgwɔ́ ngàŋ mbʉ́lè, ńnéŋe ndùm nzìkásè, á gwɔ́ mùɔ nzìkásè».

⁶*Ngàŋa kwò Yěsô gʉa ńkúu wó, ńgÿo kɔ́ɔkɔ́ wɔ́ pɔ́ pá’ Yěsô ně ńtsẅi,

⁷ńdɔg nzìkásè pɔ́ múɔ ńtó, ńzáb menzsǒ fÿɔg mɔ́b nkà’ menzìkásè, Yěsô ńnéŋe nà tsɔ̌.

⁸Lelÿò pʉ̀a saŋte menzsǒ mɔ́b ndùm mánzsè, petsɔ́ pʉ̀a fag mbwó tÿǒ ńtó saŋte mánzsè yɔ́b.

⁹Àlá’ gwɔ́ mvfò, yetsɔ́ gwɔ́ nzèm, ńgiŋe ńgɔɔn ngie: “Gugẅî”[8]! Mbwó nyìŋ na ngẅɛ fùɔ Ndavíd Mbʉ́lè gwɔ́ né nyìŋ gẅie à tóo ná lezíŋ Cʉ̀apʉ̀a. Gugẅî mbwó Ssé tàa tÿǒ lepwó

¹⁰Yěsô gʉa tà ńkúu Yerósalem, àtÿǒsoŋ pú ńcʉ́’ʉ, èpʉ̀a ne ńzɛ́te ngie: Wɔɔn nyìŋ gwɔ́ pɔ́ wɔ̌?

¹¹Àlá’ tsɔ́’ ngie: Aa Yěsô á *ntsẅì nkʉ̀ Ssé, à fóo tÿǒsoŋo Nǎzarɛd nà pàga ngwòŋ Galilea.

¹²Yěsô gʉa tà ńkúu tsɛ̀ɛ *jʉ’ʉ Ssé, ńtág pàsẅiŋ shúm pâ pàjúu, ńtsó mekǔ metʉ̌a pàkube nkáb ḿma’a ssé, ńgíŋe ńtág melʉŋ pàsẅiŋ mekàpʉ̀ŋ ńgwá’,

¹³ńdeen ńgɔɔn né pɔ́b ngie: Áa tsɛ̀ɛ ŋwà’ne Ssé, e Ssé gɔɔn ngie: «Mé ge lá’a tóŋo ndá yɔ̀ɔn ngie: Ndá sẅíŋtè Tá pi ne ńdɔgɔ ńgÿo nkʉ̀a metsǒŋ»

¹⁴Pàfʉ̀ menÿɔ́g mbɔɔ pàpwɔ́’te mekwò piŋ tóo lejʉ́ŋ Yěsô tsɛ̀ɛ *jʉ’ʉ Ssé, á gÿo pɔ́ zeŋe.

¹⁵*Metándá pànùŋe pwɔ́’ pâ *pàkyagte lepʉ̌ Mǒsê, gyá menò mmɔɔn mmɔɔn mie Yěsô gÿǒ, ńgíŋ ńjú’ pá’ penkʉ́ ée tsɛ̀ɛ *jʉ’ʉ Ssé ńzɔbɔ ńgɔɔn ngie: Gugẅî, àgù’te áa mbwó nyìŋ na ngẅɛ fùɔ Ndavíd, ńgyáŋa lóŋ,

¹⁶ńdeen ńké ńzɛ́te Yěsô ngie: Tá ɔ̀ ne ńjú’u mmó gie penkʉ́ ne ńgɔɔn lɛ? Yěsô tsɔ́’ɔ mbwó pɔ́b ngie: N ne ńjú’u! MÀbiŋ ngie: Pi laa fó ńtóŋ nkàŋ ŋwà’ne Ssé gẅie é gɔɔn ngie: «Penkʉ́ tà mbɔɔ pûɔ mepÿɛ́, ńne ńdɔgɔ ncwò wɔ́b ńgu’te gú pá’ ɔ̀ ka tsɔ̌ɔn» wɔ ka?

¹⁷Ńgɔɔn pú’u, ńnyé wɔ́b, éfó tÿǒsoŋ ńkẅɛ ńgʉa né Mbetáni, ńkúu wó ńdá’.

¹⁸[9] Njÿó gÿo ńdʉ́a pɔ́ gwaa piŋ né tÿǒsoŋ, nzyè gyáŋa Yěsô.

¹⁹Á gyá tÿǒ mbÿě ngem ngʉ̀ŋe mánzsè, ńgʉa tsìŋe wó, ńgyá pɔ́ ndà’ meffo mǒ, ńgɔɔn né tÿǒ ayɛ̌ ngie: Ɔ̀ tě ńdá’a ńgíŋe ńzéme ntɔ̌ɔn wɔ́! Àtÿǒ ayɛ̌ gwóon ńjúm.

²⁰*Ngàŋa kwò yé gyá pá’ á jǔm, á pú ńcʉa wɔ́b, pɔ́ gɔɔn ngie: Á gÿo lêkɔ́ tá tÿǒ yɔɔn tyé pɔ́ fʉ̀’ yɔɔn ńjúm?

²¹Yěsô tsɔ́’ɔ mbwó pɔ́b ngie: Mèŋ shwóŋó gẅí, kwà’ nénʉ́, pi lɔɔn ńzáb ntʉ́m nà Ssé, tà pi tè mʉ́’te, mbà pi ge ku’u légÿo mmó gie mèŋ n gÿǒ nà tÿǒ mbÿě ngem lɔɔn. Mbà à lɔɔn ńgwɔ́ pi gɔɔn né lekwɛ́ sɛ̂ ngie: Fó jʉ’ɛ ńgʉa ńtyé tsɛ̀ɛ ntse té pàa! É jú’ ncwò gẅí

²²Pi lɔɔn ńzáb ntʉ́m nà Ssé, ésẅíŋte yé ńdúɔ kɔ́ɔkɔ́ wɔ́, mbà à ge ná.

²³Yěsô gíŋe ḿbiŋe tsɛ̀ɛ *jʉ’ʉ Ssé tà ńzye lézí’i pʉ̀a nò Ssé, *metándá pànùŋe pwɔ́’ pâ melÿò tsɛ̀ɛ lá’ tó ńzɛ́te yé ngie: Ɔ̀ lɔgɔ lezíŋ wɔ́ ńgÿo mɔɔn menò? Kwà’ wɔ̌ zɔ túmo ɔ́ ngie ɔ̀ gÿo pú’u?

²⁴Yěsô tsɔ́’ɔ mbwó pɔ́b ngie: Mbɔɔ mèŋ yɔ́ɔn n ge zɛ́te gẅi tà’a nò. Pi tsɔ́’ɔ mbwó mèŋ, mèŋ n deen ńké shwóŋó gẅi kwà’ nyìŋ gẅie à ka túmo wɔ̀ɔn ńgÿo mɔɔn menò.

²⁵Àwɔ̌ la túmo Jâŋ lénu’ pʉ̀a ntse? E Ssé ka nyìŋ mesoŋ? Pɔ́ jú’, ńkwaŋte tsetsɛ̀ɛ pɔ́b ngie: Pege lɔɔn ngie e Ssé zɔ la túmo yé, mbà à ge zɛ́te wégè ngie tà mélà’a kɔ́ pege la tè zẅíŋe nò gie Jâŋ lɔ̌ɔn ńgɔɔn wɔ́?

²⁶MÀbiŋ ngie pʉ̀a mesoŋ, mbà lá’ té ge nyé wégè wɔ́, mélà’mie pʉ̀a metsèm ne ńzsé ngie Jâŋ laa *ntsẅì nkʉ̀ Ssé.

²⁷Pɔ́ kwaŋ pú’u, ńcʉ́’ ńtsɔ́’ pɔ́ ngie: Peg kaa zsé. Yěsô gɔɔn né pɔ́b ngie: Mbɔɔ mèŋ yɔ́ɔn n te shwóŋó gẅi nyìŋ gẅie n dɔgɔ lezíŋ sé ńgÿo mɔɔn menò wɔ́.

²⁸Yěsô gíŋe ńgɔɔn ngie: Pi jú’u yɔɔn nò, éshwóŋó wɔ̀ɔn gí nò gie pi kwaŋá mǒ. Àtsɔ̌ nyìŋ lǎ’ ńgẅiin penkʉ́ pé mépʉ́a, ńgɔɔn mbwó mvɔ́g mvfò ngie: Míŋ wɔ̀ɔn, gʉa nká’ lyɛ̌’ yɔɔn ńzɔ́gɔ wó fa’.

²⁹Á tsɔ́’ ngie: Mèŋ n dʉ̌’. Mbiŋ ńnéŋe, ńdʉa mmó gie á ně ńgÿo á gɔɔn pú’u, ńgʉa né nká’.

³⁰Tá wɔb gíŋe ńgɔɔn pɔ tà’a nò mbwó wetsɔ́ múɔ, wɛ̌ múɔ tsɔ́’ ngie: Oon, mèŋ n ge gʉa, tá’, ńgɔɔn pú’u, ńké tè wó gʉa.

³¹Àwɔ̌ nà penkʉ́ pɔɔn mépʉ́a la gÿo mmó gie tá wɔ́b ne ńkwoŋo? *Mentándá pànùŋe pwɔ́’ pâ melÿò tsɛ̀ɛ lá’ tsɔ́’ ngie: Aa ndùŋ mvfò. Yěsô leen ńké ńgɔɔn né pɔ́b ngie: Mèŋ shwóŋó gẅí, kwà’ nénʉ́, pàkẅé ncùb pà *Roma pâ pàkáa tÿǒ pànzwě ne njÿó pì *lefùɔ Ssé ńcʉa gẅí,

³²ńti pá’ Jâŋ la tó ńnyɛɛ gẅi mánzsè gẅie e Ssé ne ńkwoŋo ngie pi giŋe mǒ, tá pi lʉ’ʉ nò gie à gɔ̌ɔn lʉ’. Pàkẅé ncùb mbɔɔ pàkáa tÿǒ pànzwě ké ńzẅíŋ, pi piŋ ńké tè gyá pú’u, ńkúbe mà gẅi, ńzẅíŋ gí wɔ́

³³Yěsô gɔɔn ngie: Pi gíŋe ńjú’ tsɔ̌ sagá nò. Àtsɔ̌ ndÿò lǎ’ ńgẅiin jʉ’ʉ nká’ yé, ńgʉa wó ḿbye metÿǒ mie mé kyéen mentɔ̌ɔn ńdɔg ńnyɛte melù’, ḿbwóon nkàŋ nká’ ńdɔg ḿbú ńkíle, ńgʉa tsɛ̀ɛ nká’ ńtúŋo jʉ’ gie mé ge kyéen mentɔ̌ɔn wó, ḿbwóon tà’ shʉ̀a ndá gẅie mé ge kwɔ́’ɔ tyé tsɛ̀ɛ wó tá pyɛ́bɛ nká’, ńgÿo pú’u, ńcʉ́me nká’ mbwó pànyɛte melù’, ńdeen ńké ńgʉa lé túm

³⁴Àfʉ̀’ʉ lékáb ntɔ̌ɔn tÿǒ gÿo ńku’, á túm megàŋa fà’ pé mbwó pʉ̀a pie ée nká’ ngie pɔ́ gʉa ńkẅé mé mentɔ̌ɔn tÿǒ ńdɔg ńtó.

³⁵Pɔ́ gʉa tà ńkúu wó, pʉ̀a pie ée nká’ yé la gwe ná mvɔ́g mvfò ńcúɔ yé, ńzẅé mbɔ́ɔntè, ḿbiŋ ńdɔg metóon ńtémte mbɔ́ɔntè yétá ńzẅé.

³⁶Àndÿò wa gíŋe ńtúm petsɔ́ megàŋa fà’ tà pɔ́ gyɔ́ɔn ńcʉa pe mvfò. Tá pʉ̀a pa gíŋe ńgÿo pé pá’ pɔ́ zɔ̌ɔn ńgÿo ná petsɔ́ megàŋa fà’ la.

³⁷Àndÿò leen ńké ńtúmo kwà’ míŋ we, ńne ńkwaŋa ngie á ge gǎ wɔ́, pɔ́ gÿo mekù’ mé.

³⁸Tá pʉ̀a pa gyá míŋ ndÿò wa, ńgɔɔn tsetsɛ̀ɛ pɔ́b ngie: Ànjÿò ndá we wɛ̂ gẅie à tóo lɛ̂. Pi tó pege zẅé yé ńjÿó nká’,

³⁹ńgɔɔn pú’u, ńgwoon yé, éshwoŋo yé ńdɔg fó nká’ ńkẅɛ, ńgʉa ńzẅé!

⁴⁰Yěsô zɛ́te ngie: Tà ndÿò wɔɔn ge gÿo tó, é gÿo lêkɔ́ ná pʉ̀a pie à la cʉ́me nká’ né pɔ́b?

⁴¹Mé tsɔ́’ ngie: À ge tó gÿo mé zẅéte mefÿɛ́ apɛ̌, é piŋ cʉ́me nká’ mbwó petsɔ́ pʉ̀a mendyɛ̀’ɛ, pie á ge gÿo ku’ fʉ̀’ gie mé kyéen melù’, pɔ́ ná mé.

⁴²Yěsô gɔɔn né pɔ́b ngie: Á lɔɔn tè kɔ́ wɔ́, mbà pi leen ńtóŋo jʉ’ʉ ŋwà’ne Ssé gie á gɔɔn ngie: «Tóon gẅie pàpwóon ndá la gwá’, leen ńcʉ́’ʉ tóon gẅie yé zɔ pi’ ndá. Cʉ̀apʉ̀a zɔ la gÿo pú’u, á gwɔ́ máa nò mbòŋo á menÿɔ́g pege»?

⁴³Áa pú’u, tá mèŋ shwóŋó gẅi ngie mé ge kẅé jʉ’ʉ gí tsɛ̀ɛ *lefùɔ Ssé, é náa mbwó tsɔ́ túm gie á ge gÿo mmó gie e Ssé ne ńkwoŋo. [

⁴⁴Tóon ŋwɛ́ aa gẅie nyìŋ lɔɔn ńgwe mǒ, mbà ngàŋ ge pwɔ́’te, á piŋ ńgwe ná nyìŋ, mbà à ge pú gwɔ’ɔ ngàŋ.]

⁴⁵*Metándá pànùŋe pwɔ́’ pâ pà *farisay jú’ yɔɔn sagá nò, ńdiŋ ngie à gɔɔn né pɔ́b,

⁴⁶éfa’ shÿó légwoon yé, tá ḿbɔ́g nÿɔ́g lá’, á nue lá’ la ne ńzsé ngie Yěsô aa *ntsẅì nkʉ̀ Ssé.