Read Ngiemboon Matio 22 Bible Online

Matio 22 - Ngiemboon bible

Matio 22

¹Yěsô gíŋe ńdɔg pɔ́ sagá nò, ńgɔɔn mbwó lá’ gie á ne ńzẅí’te shwóŋó yé ngie:

²Pi gyá pá’ *lefùɔ Ssé ée pú’u. Àtsɔ̌ fùɔ lǎ’ ńtáŋte máamáa línɔ́ɔn ná nò lɔ́ɔn ndá míŋ we we mbàŋa.

³Àfʉ̀’ʉ léjÿó shúm gÿo ńku’, á túm mentsìndá pé, ngie pɔ́ gʉa fa’ pʉ̀a pie à ka tsẅii mbwó pɔ́b pá’ pɔ́ ge tó pâ pɔ́ pfɛ́ shúm. Tá’ mentsìndá pé gʉa ńgyá wɛ̌ nyìŋ wɔ́ ná pɔ́b wɔ́, á lʉ’ lʉ’ létó.

⁴Á gíŋe túm petsɔ́ mentsìndá pé, ńtsẅi né pɔ́b ngie: Pi gɔɔn né pʉ̀a pie mèŋ n ka tóŋo wɔ́b ngie mé cwoŋte shúm léjÿó tà ńtÿɔ́gɔ ssé, ngie mèŋ n tsẅi mé zẅé mefòŋ pɔ́ɔn, ńzẅé menɔ̀ɔn pɔ́ɔn pie e fáŋ tɛ’, ngie shúm ně ndá’ ńtyé ssé, pɔ́ tó mé jÿó línɔ́ɔn lɔ́ɔn ndá.

⁵Pʉ̀a pie mé ka tóŋo wɔ́b ná línɔ́ɔn lɔ́ɔn ndá té lɔgɔ nò gie pɔ́ gɔɔn ńtóŋo tsɔ́ nò wɔ́, wɛ̌ nyìŋ wɔ́ pfó pɔ́ ye nzsè. Wetsɔ́ nyìŋ gʉa né nká’ yé, wetsɔ̌ gee ńtaŋ metʉ̌a we.

⁶Petsɔ́ gwoon mentsìndá fùɔ ŋwɛ́, ńgege wɔ́b, ńzẅéte wɔ́b.

⁷Ànò pú ḿbÿɔ́gɔ fùɔ. Á túm pàlÿɔ́’ ncù pé, ngie pɔ́ gʉa ńzẅéte mefÿɛ́ apɛ̌, ńtuɔ tÿǒsoŋ yɔ́b,

⁸ńgíŋe ńtsẅi né mentsìndá pé ngie: Mé ně ńdá’ ńtÿɔ́g shúm léjÿó lɔ́ɔn ndá ssé. Epʉ̀a pie mèŋ n ka zɔɔn ńtóŋo wɔ́b é ka tè pie é ku’u lépfɛ́ wɔ́.

⁹Pi leen ńké ńgʉa fʉ̀’ɔɔn ná metwó nzsè, ńgyá mbaa wɔ̌ nyìŋ wɔ́, pi tóŋo yé tóŋ.

¹⁰Mentsìndá pé pà gʉa ńtyé ná metwó nzsè, ńgyá wɔ̌wɔɔ, ńtóŋo yé, ka à gwɔ́ pɔ́ nyìŋ mbòŋo wɔ́, ka nyìŋ tepòŋ wɔ́. Mé pú ńnéŋe wɔ́b pɔ́ tsɛ̀ɛ lemù, tà é lúe.

¹¹Fùɔ gÿo ńkúu tsɛ̀ɛ lemù légyá lá’ gie á tǒ nà lɔ́ɔn ndá, ńkúu wó, ńgyá tsɔ̌ mámbàŋa, mbà à kaa nzsǒ lɔ́ɔn ndá ma’à[10]

¹²Á gɔɔn né yé ngie: Àshǔ wɔ̀ɔn, ɔ̀ gÿǒ lêkɔ́ ńkúu jʉ’ɔɔn té ma’ nzsǒ lɔ́ɔn ndá? Nyìŋ awɛ̌ tè zsé nò gie à ge gɔɔn wɔ́.

¹³Fùɔ leen ńké gɔɔn mbwó mentsìndá pé ngie: Pi kwɛ́ mekwò mé, ńkwɛ́ mbwó mé, ḿma’a yé pí, á tsɛ̀ɛ nzěm. À ge ńnéŋe jʉ’ó ne lʉa, lóŋ we ne ffó

¹⁴Yěsô cʉ́me ngie: Áa pú’u, nue e Ssé ne ńtóŋo pʉ̀a tà ńgyɔ́ɔn tá pàgʉa tà ńkú té gyɔ́ɔn.

¹⁵Pʉ̀a *farisay gwɔ́ lyɛ̌’, ńgÿo cú’tè, éfa’ pá’ à lɔɔn ńgwɔ́ pɔ́ fó ná nò gie Yěsô gɔ̌ɔn ńgwoon yé,

¹⁶ńtúm tsɔ́ ntá’ pʉ̀a ná *ngàŋa kwò yɔ́b, mbɔɔ tsɔ́ ntá’ pʉ̀a ná kwò pʉ̀a *Herôd ngie: Pɔ́ gʉa ńgɔɔn né Yěsô ngie: Tsítsa, peg ne ńzsé ngie ɔ̀ gɔɔn nò, ḿbiŋ ńda’te pɔ́ nò gie á tyé ndʉŋ ndʉŋ, ńgɔɔn té pɔ́gɔ nyìŋ, ḿbiŋ ńké tè líe nyìŋ mesoŋ pɔ́ ná shÿó wɔ́, ńda’te nò nénʉ́ pɔ́ pá’ Ssé ne ńzɛ́te ngie mé gÿó pú’u.

¹⁷Shwóŋo weg pá’ ɔ̀ kwǎŋ jú ná yɔɔn nò: *Lepʉ̌ ségè ée pé’e ńzẅíŋ ngie pege ma’ ncùb Kása pà *Roma ka ngǎŋ?

¹⁸Tá Yěsô zsé nkwaŋá tepòŋ wɔ́b, ńgɔɔn né pɔ́b ngie: Pànkwòŋ menÿɔ́g, pi kwa’te wɔ̀ɔn mélà’a kɔ́?

¹⁹Pi nyɛɛ wɔ̀ɔn nkáb gie mé lɔgɔ ńnáa ncùb. Pɔ́ lɔgɔ pàga nkáb ńtó, ńnyɛɛ yé.

²⁰Á zɛ́te wɔ́b ngie: Wɔɔn ée shÿó wɔ́ gẅie ée ná nkáb? Sɔɔn gwɔ́ lezíŋ wɔ́ sie ée mǒ?

²¹Pɔ́ tsɔ́’ɔ mbwó yé ngie: Ée we Kása, lezíŋ gíŋ ńgwɔ́ pɔ́ sé. Yěsô leen ńké ńgɔɔn né pɔ́b ngie: Á lɔɔn ńgwɔ́ pú’u, pi náa mmó gie áa yé Kása á mbwó Kása, ńnáa yé Ssé á mbwó Ssé.

²²Pɔ́ jú’ pá’ à tsɔ̌’ pú’u, á cʉa wɔ́b. Pɔ́ nyé yé jʉ’ó, ńgʉa.

²³Á gíŋe ńgwɔ́ pɔ́ lyɛ̌’o, tsɔ́ ntá’ pʉ̀a ná nùɔ pà *sadukay leen ńké tóo lejʉ́ŋ Yěsô. Pà *sadukay ée pʉ̀a pie pɔ́ té zẅíŋ ngie mepfó ge gÿo zíme nà legwé wɔ́. Pɔ́ zɛ́te mbwó Yěsô ngie:

²⁴Tsítsà, Mǒsê la gɔɔn ngie: «Nyìŋ lɔɔn ńzɔ́’ɔ manzwě, ńkwé té cʉa mmó, mbà fɛ́ we gẅiin lesɔgɔ mpfɔ́g, pɔ́ yé zyé penkʉ́, ńdɔg ńnuŋe ngẅɛ̀ fɛ́ we».

²⁵Pú’u, etsɔ́ mefɛ́ laa wɔ́, ńgwɔ́ mbàŋa sɔɔn mbʉ́a, ndùŋ mvfò zɔ́’, ńkwé té cʉa mmó, mbɔ́ɔntè sɔgɔ mpfɔ̌g, ńgíŋe ńkwé yé té cʉ́a mmó,

²⁶mbɔ́ɔntè yétá gíŋe sɔgɔ mpfɔ̌g wa, ńkwé pɔ́ tè cʉa mmó, pɔ́ pú’u, tà pɔ́b sɔɔn mbʉ́a pú ńzɔ́’ɔ wɛ̌ manzwě, ńké ńkwé pɔ́ tè cʉa mmó.

²⁷Á gwaa zso, manzwě kwé yé.

²⁸Pá’ pʉ̀a pɔɔn sɔɔn mbʉ́a la pú ńzɔ́’ɔ manzwě wɔɔn ŋwɛ́ lɔɔn, mé ge lá’ zíme ná legwé, à gwɔ́ nzwě wɔ́?

²⁹Yěsô tsɔ́’ɔ mbwó pɔ́b ngie: Legye sí ne fʉʉ gẅi á nue pi tè mmó gie áa tsɛ̀ɛ ŋwà’né Ssé zsé, ḿbiŋ ńké tè zsé pá’ metʉ̀ Ssé ée pú’u, wɔ́.

³⁰Pi zɔɔn ńzsé ngie: Àfʉ̀’ gie mepfó ge gÿo zím la, mbàŋa nê pànzwě le gíŋe ńzɔ́’ wɔ́. Pɔ́ ge gÿo cʉ́’ ńnéŋe yɔ́b pɔ́ pá’ *mecÿɔ́’ Ssé tÿǒ lepwó,

³¹ńgʉa ná mepfó pá’ pɔ́ ge gÿo zím, mbà pi laa fó ńtóŋo mmó gie Ssé la gɔɔn wɔ́ ka, à la te gɔɔn ngie:

³²«Mèŋ n gee Ssé Ábalam, ńgwɔ́ Ssé Esâg, ńgwɔ́ Ssé Yakwɔ́b wa? E Ssé ee Ssé pʉ̀a metʉ̀[11]». Yěsô gíŋe ńgɔɔn ngie: E Ssé e tè Ssé mepfó pʉ̀a wɔ́, e Ssé ee Ssé pʉ̀a metʉ̀.

³³Menùɔ lá’ mie é laa jʉ’ó la ne ńgɔ’te ntí gie Yěsô lɔgɔ ńzí’i pʉ̀a mmó pú’u.

³⁴Pʉ̀a *farisay gwɔ́ tà ńjú’ pà’ Yěsô jÿɔ̌’ ncwò pʉ̀a *sadukay, ḿbú ńcú’te lejʉ́ŋ Yěsô.

³⁵Àtsɔ̌ nyìŋ tsetsɛ̀ɛ pɔ́b, ńgwɔ́ nkyàgte mbʉ̌ Ssé tà ńgwɔ́ wɛ̌, á tó ńkwa’te Yěsô, ńzɛ́te yé ngie:

³⁶Tsítsà, áa nà mbʉ̌ pé’e sɛ̌ gwɔ́ sé lyò.

³⁷Yěsô tsɔ́’ɔ mbwó yé ngie: «Kwoŋo Cʉ̀apʉ̀a Ssé ɔ̀, nê ngwòŋ ntʉ́m ɔ̀ ntsèm, ńtÿɔ́g pɔ́ yé mvfò ná jú kɔ́ɔkɔ́, ńzába kwàŋte gu ndà’ ná ye»,

³⁸ée *lepʉ̌ sé lÿò ńdɔgɔ ńgwɔ́ ndùŋ mvfò.

³⁹*Lepʉ̌ mbɔ́ɔntè yépʉ́a sie é sẅé sɔɔn gwɔ́ ngie: «Á ne ńzɛ́te ngie ɔ̀ Kwoŋo nyìŋ mesoŋ pá’ twó mbùm jú».

⁴⁰Mbʉ̌ Mǒsê ntsèm mbɔɔ menò mie pà *ntsẅì nkʉ̀ Ssé la gɔɔn éfóo pɔ́ ná mbʉ̌ mɔɔn mémbʉ́a.

⁴¹Pʉ̀a *farisay gwɔ́ tà ńcú’te, Yěsô zɛ́te wɔ́b ngie:

⁴²Pi kwǎŋ gí ngie *nzà’nkÿo aa wɔ̌? Ngie aa míŋ wɔ̌? Pɔ́ tsɔ́’ɔ mbwó yé ngie: Aa nyìŋ na ngẅɛ fùɔ Ndavíd.

⁴³Á piŋ ngǎ, mbà Zẅìge Ndʉalʉ̌a la jÿó fùɔ Ndavíd á tóŋo yé lê Ndè,

⁴⁴tà ńgɔɔn ngie: «Cʉ̀apʉ̀a Ssé gɔ̌ɔn mbwó wɔ̀ɔn Ndè ngie: Tó ńnéŋe ná gwǒŋo pwó yɔ́ɔn yé tʉ̀, tà á lá’ ńkú fʉ̀’ gie mèŋ n gÿǒ ɔ̀ neŋte megàŋ mbù pú».

⁴⁵Tà fùɔ Ndavíd lɔ̌ɔn ńtóŋo yé lê we Ndè pá’ɔɔn, á piŋ ńgwɔ́ míŋ we lêkɔ́?

⁴⁶Á gʉa tsetsɛ̀ɛ pà *farisay, nyìŋ tè ku’u léfó ńtsɔ́’ pɔ́ tà’a nò ná nò gie Yěsô zɛ́te wɔ́. Á fó lyɛ̌’ ŋwɛ́ nyìŋ tè gíŋe, ńgẅiin shÿɔg, lézɛ́te yé tsɔ́ nò wɔ́.