Read Ngiemboon Matio 26 Bible Online

Matio 26 - Ngiemboon bible

Matio 26

¹Yěsô la zí’i nò Ssé mbwó pʉ̀a tà ńcÿé jʉ’, ńgɔɔn mbwó *ngàŋa kwò yé ngie:

²Pi zsé ngie, é cʉ́’ʉ ńzága pɔ́ lyɛ̌’ sépʉ́a mé jÿó línɔ́ɔn *Páskà. Mé ge sẅiŋe *Míŋ Nyìŋ, mé kime yé ná tÿǒ nkǐ.

³Á gwɔ́ pɔ́ ná melyɛ̌’ amɛ̌, *mentándá pànùŋe pwɔ́’ pâ mekěm lá’ cú’te nɔ’ Kaifa, á gwɔ́ *nùŋe pwɔ́’ we lÿò,

⁴ńcú’te pú’u, ńzáb ngie pɔ́ ge shúte gwoon Yěsô, é zẅé yé.

⁵Tá tà mé ké ńgwoon yé lyɛ’ɛ́ línɔ́ɔn, ḿbɔ́gɔ lá’ létág jʉ’.

⁶Yěsô gÿo ńgwɔ́ Mbetáni, á ndá Símo, *ngàŋ nkà’ pǎb,

⁷ńnéŋe ssé ne ḿpfɛ́ɛ mmó, àtsɔ̌ manzwě kú yé ndá, ńgwɔ́ tóo lejʉ́ŋ Yěsô ńgẅiin tsɔ̌ tʉ nzẅiŋ ndoŋ, tsɔ́ lèméndɔ́ɔn gie á cÿɔ́g nkáb tɛ’ gwɔ́ tsolo, á pfɛte twó Yěsô.

⁸*Ngàŋa kwò Yěsô gyá, á pÿɔ́gɔ wɔ́b tɛ’, pɔ́ zẅɛ́te ngie: À sěen ńcʉŋte yɔɔn làméndɔ́ɔn mélà’a kɔ́?

⁹Á ké ńgwɔ́ mé sẅiŋ, ńkẅé máa nkáb, ńnáa mbwó mepóŋ.

¹⁰Yěsô zsé nkwaŋá wɔ́b, ńgɔɔn mbwó pɔ́b ngie: Pi zẅɛ́te mélà’a kɔ́? À gÿǒ pɔ́ nò mbòŋo ná mèŋ.

¹¹Pi ge ne gyá mepóŋ pɔ́ fʉ̀’ ntsèm, tá ńgʉa ná mèŋ, mbà pege tè gwɔ́ pɔ́ fʉ̀’ ntsèm wɔ́.

¹²Manzwě wɔɔn lɔgɔ yɔɔn làméndɔ́ɔn ńzɔ́’ɔ mbùm yɔ̀ɔn, ńdɔgɔ ńtʉ́ʉ njÿó ńzɔ́’ɔ wɔ̀ɔn tá mé taa ńnéŋe wɔ̀ɔn lesyè.

¹³Mèŋ shwóŋó gẅí, kwà’ nénʉ́, nzɔ̌ nzɔ̌ wɔ́ gie mé ge lá’ tsẅi nkʉ mbòŋo wɔɔn wó tsɛ̀ɛ njÿó wɔ́ɔ, mé ge lá’ gíŋe ne gɔɔn mmó gie manzwě wɛ̂ gÿǒ, é lɔgɔ kímte yé.

¹⁴Àtsɔ̌ tà’ nyìŋ ná pʉ̀a ntsɔ̀b pʉ́a nê legém, lezíŋ sé gwɔ́ Jẅidas Iskariod, a gʉa ńgyá *metándá pànùŋe pwɔ́’,

¹⁵ńgɔɔn né pɔ́b ngie: N dɔɔn ńnyɛɛ gẅi pá’ pi ge gÿo tá gwoon Yěsô, pi náa kɔ́ né mèŋ? Pɔ́ ná nkáb pàg móm ntá né yé.

¹⁶Á kẅé, ńzye léfa’ shÿó pá’ à ge sẅiŋe Yěsô mbwó pɔ́b.

¹⁷Á gÿo ńgwɔ́ ndùŋ mvfò lyɛ’ɛ́ lá’ ná ngàb gie mé lɔɔn ḿpfɛ́ɛ *mbelég té mvòŋ, ńdɔgɔ ńjÿó línɔ́ɔn *Páskà, *ngàŋa kwò Yěsô tó ńzɛ́te yé ngie: ɔ̀ kwǒŋ ngie peg gʉa nzɔ̌, ńcwoŋte jʉ’ gie ɔ̀ ge jÿó *Páskà wó?

¹⁸Yěsô gɔɔn né pɔ́b ngie: Pi gʉa tÿǒsoŋ, ńgyá mákyè, ńgɔɔn né ye ngie: Tsítsà tsẅǐ ngie peg shwóŋó ɔ̀ ngie e ye njÿó ee pá’ɔɔn ne ńku’u, a ne ńkwoŋo ngie pâ *ngàŋa kwò yé jÿó yɔ́b línɔ́ɔn *Páskà pɔ́ mbʉ̀a gù.

¹⁹*Ngàŋa kwò yé gÿo pɔ́ ndʉŋ ndʉŋ pá’ à tsẅǐ, ńcwoŋte shúm léjÿó *Páskà jʉ’ó.

²⁰Á gÿo ńgwɔ́ ncwò nzém, Yěsô pâ *ngàŋa kwò yé ntsɔ̀b pʉ́a nê legém ńnéŋe ssé lépfɛ́ɛ mmó.

²¹Pɔ́ ne ḿpfɛ́ɛ mmó, Yěsô gɔɔn ngie: Mèŋ shwóŋó gẅí, kwà’ nénʉ́, àtsɔ̌ tà’ nyìŋ tsetsɛ̀ɛ pi gee sẅiŋ mèŋ.

²²Pɔ́ jú’, ḿbú ḿmÿɔg, àwɔ̌wɔɔ ná pɔ́b wɔ́ zɛ́te ngie: À Ndè, ńgwɔ́ á gwɔ́ wɔ̀ɔn?

²³Yěsô tsɔ́’ɔ mbwó pɔ́b ngie: Nyìŋ gẅie pwó yég yé fóo lépumte tsɛ̀ɛ ngwʉ̌ŋ, aa nyìŋ gẅie à ge sẅiŋe wɔ̀ɔn.

²⁴*Míŋ Nyìŋ ge kwé, à gwɔ́ pá’ mé la gɔɔn tsɛ̀ɛ ŋwà’ne Ssé, tá’, àndù té poŋ aa nyìŋ gẅie à sẅiŋé yé. Mbòŋo laa pá’ mé lɔɔn tè zyé yé wɔ́.

²⁵Jẅidas, ngàŋ menáŋ wɛ̌, zɛ́te yé Yěsô ngie: Tsítsà ɔ̀ gɔɔn wɔ̀ɔn ka? Yěsô tsɔ́’ɔ mbwó yé ngie: Gù zɔ kě ńgɔɔn!

²⁶Pâ pɔ́ ne njÿó shúm léjÿó, Yěsô pí mbelég, ńná ndǎg mbwó Ssé, ḿbwɔ́’te ńgwaa náa mbwó *ngàŋa kwò yé, ńgɔɔn ngie: Pi kɔ̀ ḿpfɛ́, yɔɔn ee mbùm nnɛ́ yɔ̀ɔn,

²⁷ńgíŋe ńkaa ntú’ melù’, ńná ndǎg mbwó Ssé, ńgwaa náa mbwó *ngàŋa kwò yé, ńgɔɔn ngie: Pi kɔ̀ ḿbú ńnú metsèm.

²⁸Á nue mɔɔn ée metse mɔ́ɔn, é metse mie Ssé lɔgɔ ńgwaa kʉa, é mie é pfɛte ná twó pʉ̀a tà ńgyɔ́ɔn, pá’ e Ssé ge lɔg lege meno tepoŋ mɔ́b.

²⁹Mèŋ shwóŋó gẅí, mèŋ n tě ńdá’a ńgíŋe ńnúu mɔɔn melù’ wɔ́, tà lá’ cʉ́’ʉ núu pɔ́ me sẅé fʉ̀’ gie pege cʉ̌’ ńgwɔ́ pɔ́ tsɛ̀ɛ lefùɔ Tá wɔ̀ɔn.

³⁰Pâ pɔ́ leen ńké ńzɔb mentse ńdɔg ńgu’te Ssé, àfʉ̀’ ku’ pɔ́ kẅɛ, ńgʉa né ndùm lekwɔ’ɔ́ metÿǒ mèvɛ olive.

³¹Pɔ́ ne ńgee, Yěsô gɔɔn né pɔ́b ngie: Á ge gÿo gwɔ́ letsẅɛ́’ lyɛ̌’ yɔɔn, pi metsèm pú ńgwá’a wɔ̀ɔn ńkÿo, á pumte pá’ mé la ŋwe’e tsɛ̀ɛ ŋwà’ne Ssé ngie: «Mèŋ n ge lá’ zẅé mbyɛ̀b mvfó, *menjʉ̀njÿò mé saa tsẅɛ».

³²Yěsô gíŋe ńgɔɔn ngie: Mèŋ n ge gÿo gwɔ́ tà zíme nà legwé, e vɔgɔ Galilea zẅí’te gẅí.

³³Piɛ gɔɔn né yé ngie: Petsɔ́ pʉ̀a lɔɔn ńgwá’a gú ńkÿo metsèm, mbà à lɔɔn ńgwɔ́ mèŋ n de gú gwá’.

³⁴Yěsô tsɔ́’ɔ mbwó yé ngie: Tà mèŋ n ké shwóŋó gú, kwà’ nénʉ́, mênkɔ́’ ge gÿo gwaa tóŋ letsẅɛ́’ lyɛ̌’ yɔɔn, mbà ɔ̀ moŋé wɔ̀ɔn ngʉ̀a ntá.

³⁵Piɛ gɔɔn né yé ngie: Mé lɔɔn fó ḿbúte wɔ́gɔ́ ne ńdɔgɔ ńge pɔ́ nzẅě, mbà à lɔɔn ńgwɔ́ n de gú moŋe! Yetsɔ́ *ngàŋa kwò yé metsèm gíŋe ńgɔɔn yɔ́b pɔ́ pú’u.

³⁶Yěsô pâ *ngàŋa kwò yé gʉa tà ńkúu tsɔ́ jʉ’ gie mé tóŋo lê Getsemane, á gɔɔn né pɔ́b ngie: Pi ńnéŋe jʉ’ɔɔn, mèŋ n gʉa jʉ’ʉ sẅíŋte Ssé,

³⁷éfaga piɛ pâ penkʉ́ Zebede mépʉ́a, pâ pɔ̌ gʉa, á zye lé jú’ kekáŋ ntʉm ye, legwé pfɛ́ɛ yé,

³⁸ńdeen ńké ńgɔɔn né pɔ́b ngie: Ntʉ́m wɔ̀ɔn ée pá’ɔɔn ne ḿmÿɔgɔ pɔ́ nà ntí gie ńgwɔ́ mèŋ n kwé kwě. Pi ńnéŋe jʉ’ɔɔn, ḿbɔ́ɔn nyìŋ wege légwá’a lÿɔ̀g ńdyé,

³⁹ńgɔɔn pú’u, ńná’a ńgʉa mvfò, e sẅɛ’ nuŋe ssé, ésɔb shÿó wé ssé, ńne sẅíŋte Ssé ńgɔɔn ngie: Tá wɔ̀ɔn, á lɔɔn ńgwɔ́ gie ńgwɔ́ á gwɔ́ pú’u, ɔ̀ gÿo yɔɔn ntú’ ngʉ̀ngʉ̀ fó lejʉ́ŋ mèŋ ńtsíŋte! Tá’, tè gÿo wɔ̀ɔn lekwoŋ, gÿo pɔ́ gù lekwoŋ.

⁴⁰Yěsô sẅíŋte Ssé pú’u, ḿbiŋ nzèm né lejʉ́ŋ *ngàŋa kwò yé, ńgyá pɔ́ ne ńdyé. Á gɔɔn né Piɛ ngie: Pi fǒ kaa ku’ pá’ ńgwɔ́ pege pú shÿɔgɔ lelɔ́g mbɔɔ ná tá’ ném wɔ́ la!

⁴¹Tà pi gíŋe ńdyé, pi sẅíŋte Ssé, ḿbɔ́g menò njÿó lékwà’te gẅí, pi fʉa nò. Ntʉ́m nyìŋ tʉte tɛ’ tá’, mbùm nnɛ́ pÿɛ́ pÿɛ̌.

⁴²Yěsô gíŋe fó lejʉ́ŋ pɔ́b ńgʉa nà mbɔ́ɔntè yépʉ́a, ésẅíŋte Ssé ńgɔɔn ngie: Tɔ́ɔnme, á lɔɔn ńgwɔ́ gie tsɔ̌ légÿo tà sẅɛ’te yɔɔn ntú’ lejʉ́ŋ mèŋ à tè gwɔ́ wɔ́, ńke ńgwɔ́ gie mèŋ n ké ńnú nú, ɔ̀ gÿo pá’ ɔ̀ kwǒŋ,

⁴³ńgɔɔn pú’u, ńgíŋ ḿbiŋ nzèm, ńgyá pɔ́ ne ńdyé lyě, mélà’mie á la gwaa gwɔ́, mbà lelɔ́g pǔ ńgwoon wɔ́b tɛ’.

⁴⁴Yěsô nyé wɔ́b, ńgíŋe ńgʉa nà mbɔ́ɔntè yétá sẅíŋte Ssé, ńgíŋe ńgɔɔn pɔ́ nò gie à zɔ̌ɔn ńgɔɔn,

⁴⁵ńgÿo pú’u, ńgíŋe fó jʉ’ó ḿbiŋ nzèm, ńkẅɛ́te *ngàŋa kwò yé, ńgɔɔn né pɔb ngie: Pi cwoŋo ńdyé, ńzẅɛte mboŋó. Pi leen ńké ńgyá, áfʉ̀’ ku’ú! Mé ge sẅiŋe *Míŋ Nyìŋ á mbwó pʉ̀a tepòŋ.

⁴⁶Pi lu ssé pege gʉa! Nyìŋ gẅie à sẅiŋé wɔ̀ɔn mbwó pɔb wɛ̂ gẅie à tóo lɛ̂!

⁴⁷Yěsô nyé ńgɔɔn gɔɔn, Jẅidas, gẅie aa tsɔ̌ tà’ ná *ngàŋa kwò yé ntsɔ̀b pʉ́a nê legém tó, àlá’ gwɔ́ nzèm yé tà ńgyɔ́ɔn, ńgẅiin menně ncù lâ mekésiŋ, ńgwɔ́ pʉ̀a pie *mentándá pànùŋe pwɔ́’ pâ mekěme lá’ é tumó wɔ́b.

⁴⁸Á gwaa gwɔ́, mbà Jẅidas la shwóŋó wɔ́b pá’ à ge gÿo tá pɔ́ liŋe Yěsô, yɛ̌ liŋé gwɔ́ ngie yé lɔɔn ńtsyɛ’te nyìŋ, ńtáŋte yé pɔ́ zsé ngie aa yé ḿbiŋ ńgwoon yé.

⁴⁹Jẅidas gwóon ńtsíŋte nnɛ́, ńtóo lejʉ́ŋ Yěsô, ńgɔɔn ngie: À Ndè, n tsyɛ’té, ńdeen ńgwóon ńtáŋte yé.

⁵⁰Yěsô tsɔ́’ɔ mbwó yé ngie: À shǔ wɔ̀ɔn, gÿo pɔ́ mmó gie ɔ̀ tǒ ngÿǒ. Àlá’ leen ńké ńtó ńgwoon Yěsô.

⁵¹Àtsɔ̌ tà’ nyìŋ ná pʉ̀a pie pâ Yěsô kě ńgwɔ́, soŋ nně ncù á tsɛ̀ɛ mbʉ́a lélɔg ńkɔ́’ɔ ngàŋa fà’ we *nùŋe pwɔ́’ we lÿò, é kẅɛ́te letwoŋó sé, ńjúɔ.

⁵²Yěsô gɔɔn né yé ngie: Néŋ nně jù tsɛ̀ɛ mbʉ́a, nyìŋ gẅie à soŋo nně ge lá’ kwé pɔ́ nně.

⁵³Ɔ̀ tè ne ńzsé ngie á kě ńgwe’e ńgwɔ́ nò ncù, mbà mèŋ n ně ńtóŋo Tá wɔ̀ɔn á gwóon ńtúm mecÿɔ́’ pé, tà e tɔ́g ntsɔ̀b pʉ́a nê legém pɔ́ tág nzèm yɔ̀ɔn mɔ́ keen.

⁵⁴N dɔɔn ńké ńgÿo pú’u, àmmó gie mé la ŋwe’e tsɛ̀ɛ ŋwà’ne Ssé gǎ tà ḿbumte? Á nue mé la ŋwe’e tsɛ̀ɛ wó ngie: Menò ge lá’ cʉate pɔ́ pá’ é cʉate fʉ̀’ɔɔn lɔɔn.

⁵⁵Yěsô leen ńké ńgɔɔn mbwó lá’ ngie: Pi gwǎ tó légwoon wɔ̀ɔn, ńgẅiin menně ncù lâ mekésiŋ pá’ fʉ̀’ gie pi ge ńgwoon ntsǒŋ pá’ɔɔn lêkɔ́? Mèŋ n kaa lyɛ̌’ ntsèm ńgwɔ́ pɔ́ tsetsɛ̀ɛ pi *jʉ’ʉ Ssé, ńne ńzí’i pʉ̀a nò Ssé! Pi ké tè wɔ̀ɔn gwoon.

⁵⁶Tá menò mie é cʉate lɔɔn lɔgɔ ḿbumte ná nò gie pà *ntsẅì nkʉ̀ Ssé la ŋwe’e. Mé gwoon Yěsô pá’ɔɔn, *ngàŋa kwò yé metsèm pú ńgwá’a yé ńkÿo.

⁵⁷Pʉ̀a pie é gwǒon Yěsô lɔgɔ yé ńgʉa né nɔ’ɔ Kaifa. Á gwɔ́ *nùŋe pwɔ́’ we lÿò. Mbà *pàkyagte lepʉ̌ Mǒsê pâ mekěme lá’ pǔ ńcú’te wó.

⁵⁸Piɛ zse nzèm ye tá ńké ńgwɔ́ pɔ́ ngʉ̀a shʉ̀shʉ̀a, ńgʉa tà ńtɔ́g ńkú tetʉ́a *nùŋe pwɔ́’ we lÿò, ńgʉa ńnéŋe ssé á tsetsɛ̀ɛ megàŋa fà’, ńně fa’a légyá pá’ yɔɔn nò ge zsote pú’u.

⁵⁹*Mentándá pànùŋe pwɔ́’ lâ pàsá’a lá’, é ne fa’a cÿɔ̌ nò gẅie pɔ́ ge zába twó Yěsô tá lɔg gÿo mé zẅé yé.

⁶⁰Ńké tè ne ńgyá wɔ́. Tà mbɔɔ pá’ megàŋa cÿɔ̌ nò la tó tà ńgyɔ́ɔn ne ńzába menò twó Yěsô. Á cʉ́’ nzsotě, etsɔ́ pʉ̀a mépʉ́a tó ńgɔɔn ngie:

⁶¹Nyìŋ wɛ̂ ka gɔɔn ngie: À ku’u lékeme *jʉ’ʉ Ssé, ńdɔg lyɛ̌’ sétá ńkwɛ́.

⁶²*Nùŋe pwɔ́’ we lÿò leen ńké ńdu ssé ńzɛ́te Yěsô ngie: Ɔ̀ laŋte laŋté ka? Ɔ̀ tè ne ńjú’u menò mie mé gɔɔn ná gù lɛ wɔ́ ka?

⁶³Tá Yěsô pú tè tsɔ́b. *Nùŋe pwɔ́’ we lÿò gɔɔn né yé ngie: Lɔg lezíŋ Ssé gẅie aa ntentʉ́, ńkʉa ngie ɔ́ɔ *Nzà’nkÿo gẅie aa Míŋ Ssé ka ɔ̀ tè wɛ̌ wɔ́?

⁶⁴Yěsô tsɔ́’ɔ mbwó yé ngie: Ɔ̀ gɔ̌ɔn, tà mèŋ n ké nyɛte shwóŋó gẅí, tà fó fʉ̀’ɔɔn, pi ge gÿo gyá «*Míŋ Nyìŋ ńnéŋe nà gwǒŋo pwó tʉ̀ ye Ngàŋa tʉ̀ ntsem, é gíŋe gyá à ne fóo tsɛ̀ɛ melɔ́ɔn tÿǒ lepwó ńtóo».

⁶⁵*Nùŋe pwɔ́’ we lÿò jú’ pú’u, ésele *shʉate menzsǒ mé, ńgɔɔn ngie: À zoonté Ssé, pege giŋé fa’a pɔ́ yɛ̌ ntí pàjÿò ngyá. Kwà’ pi gí jǔ’ pá’ à zoonté Ssé.

⁶⁶Pi Kwǎŋ gí ngie kɔ́? Àlá’ tsɔ́’ ngie: Aa nyìŋ gẅie ńgwɔ́ mé zẅé yé zẅé.

⁶⁷Pɔ́ leen ńké ńtsɔg metyé shÿó Yěsô, ńtsẅiŋe yé, petsɔ́ pʉ̀a ne ńtéme mbwó letuŋó yé,

⁶⁸ńgɔɔn ngie: À *Nzà’nkÿo, keme nyìŋ gẅie à cúɔ gú.

⁶⁹Á gwaa gwɔ́ pú’u, Piɛ ńnéŋe tetʉ́a. Àtsɔ̌ ngàŋa fà’ we manzwě tó, ńgɔɔn né yé ngie: Mbɔɔ gù jú pi lâ Yěsô nyìŋ Galilea wɛ̂ kaa nùɔ.

⁷⁰Piɛ tyé mvfò mânyìŋ ntsèm, ḿmoŋe ńgɔɔn ngie: N kaa zsé nò gie ɔ̀ fa’a légɔɔn wɔ́!

⁷¹Ńdeen ńké ńgʉa ńnéŋe né ncwò nká’. Wetsɔ̌ ngàŋa fà’ we manzwě gyá yé, ńgɔɔn né pʉ̀a pie é laa jʉ’ó ngie: Nyìŋ wɔɔn pɔ́ Yěsô nyìŋ Nǎzarɛd ka gwɔ̌.

⁷²Piɛ gíŋe ḿmoŋe, ńgɔɔn tà ńkʉa ngie: Mèŋ n te nyìŋ wɛ̂ zsé.

⁷³Mé ná’a ńnéŋe, pʉ̀a pie kě ńgwɔ́ jʉ’ó tóo lejʉ́ŋ Piɛ, ńgɔɔn ngie: Á té nò fa’ fa’ wɔ́, ɔ́ɔ tsɔ̌ nyìŋ wɔb. E jù ntí leshwóŋe zɔ gÿo tà peg gɔɔn pú’u.

⁷⁴Á leen ńké ńzye lé ye: E Ssé zẅé wɔ̀ɔn, à zeŋe yɔ́ɔn me, mèŋ n te ne ńzsé nyìŋ wɛ̂ wɔ́. Mênkɔ́’ gwóon ńtóŋ.

⁷⁵Piɛ leen ńkímte pá’ Yěsô ně ńgɔɔn né yé ngie mênkɔ́’ ge gÿo gwaa tóŋ, mbà ɔ̀ moŋé wɔ̀ɔn ngʉ̀a ntá, éfó tetʉ́a ńkẅɛ, ḿbú ńdʉa tɛ’.