Read Ngiemboon Matio 28 Bible Online

Matio 28 - Ngiemboon bible

Matio 28

¹Àlyɛ’ɛ́ nzse pa Yuda gÿo ńtɔ́g, á gwɔ́ mba’ámba’ ná ndùŋ mvfò lyɛ̌’ nà ngàba lá’, Malîɛ Magdala pɔ́ wetsɔ̌ Malîɛ gʉa légyá lesyè,

²ńdeen ńkúu wó ńjú’ tsetsá’ pú ńcʉ’ʉ tɛ’. *Cÿɔ́’ Cʉ̀apʉ̀a fó tÿǒ lepwó sẅɛ́’, ńtó ńkite tóon gẅie mé ka lɔg ńjÿɔ́’ ncwò lesyè, ńkwɔ́’ ńnéŋe ná tóon ŋwɛ́.

³À la ne ńkyɛ’ɛ jʉ’ pá’ nně mbʉ̀ŋ la, menzsǒ mé piŋ ne fɔ́gɔ tà ńŋwʉŋe.

⁴Pàpyɛ́b lesyè gyá pú’u, ḿvɛ, ḿbɔ́g, ńgwete ńnuŋte ssé pá’ mepfó la.

⁵Tá *cÿɔ́’ Ssé gɔɔn né pànzwě ngie: Tà pi pɔ́g, n zsě ngie pi tóo fa’ Yěsô gẅie mé ka kime yé ná tÿǒ kǐ la.

⁶À tè gíŋe ńgwɔ́ jʉ’ɔɔn wɔ́, à zimé nà legwé pá’ à la gɔɔn la. Pi tó ńdíe jʉ’ gie pfó yé kaa wó tá ńgyá.

⁷Pi gwóon ńgʉa shwóŋ *ngàŋa kwò yé ngie à zimé nà legwé, ńgie à vɔgɔ́ Galilea ńně ńzẅí’te gẅi lâ pɔ́, pi ge kúu wó tá gyá yé. Yɔɔn aa nò gie mèŋ n kɔ’ɔ́ ńgẅiin léshwóŋó gẅí.

⁸Pànzwě gwóon fó ngʉ̀ŋe lesyè ńgʉa létsẅii yɔɔn nò mbwó *ngàŋa kwò Yěsô. Ecÿɔ’ nyé ńgwɔ́ pɔ́ ná pɔ́b, tá pɔ́ ne ńkága kǎg,

⁹ńtóo légiŋ, ḿbumte Yěsô. Á gɔɔn né pɔ́b ngie. N tsyɛ’té gẅí! Pɔ́ kẅí’te mvfò yé, ńkíbe mekwò mé, ńgu’te yé.

¹⁰Yěsô leen ńké ńgɔɔn né pɔ́b ngie: Tà pi pɔ́g. Pi gʉa ńtsẅi né mefɛ́ pɔ́ɔn, ńgie pɔ́ gʉa né Galilea, ńgie pɔ́ ge gyá wɔ̀ɔn pɔ́ wó.

¹¹Pànzwě gwɔ́ mánzsè ne ńgee, etsɔ́ pàlÿɔ́’ ncù ná pie é la ne ḿbyɛ́bɛ lesyè gʉa tÿǒsoŋ, ḿbú ḿbíte kɔ́ɔkɔ́ gie á cʉ̌a, éshwóŋ *mentándá pànùŋe pwɔ́’.

¹²*Mentándá pànùŋe pwɔ́’, tóŋ mekěme lá’, pâ pɔ̌ cú’te ńnéŋe ssé, ńkwaŋte, ńná ḿbwɔ́’ nkáb mbwó pàlÿɔ́’ ncù,

¹³ńgɔɔn né pɔ́b ngie: Pi gɔɔn pé ngie pi ně ne ńdyé letsẅɛ́’, *ngàŋa kwò Yěsô tó ńjʉʉ pfó yé ńdɔg ńgʉa.

¹⁴Ngúmnɔ́ɔn lɔɔn ńké ńjú’, mbà peg ge zsé nò gie peg ge shwóŋó yé, ḿbɔ́gɔ gẅi légyá ngɔ́’.

¹⁵Pàlÿɔ́’ ncù kẅé nkáb, ńgÿo pá’ mé tsẅǐ né pɔ́b. Áa yɛ̌ tá yɔɔn nò leen sá jʉ’, pà Yuda zsé yɔ́b pɔ́ yɛ̌ nò tà ńkú lyɛ̌’ɔɔn.

¹⁶*Ngàŋa kwò Yěsô ntsɔ̀b yémɔ’ɔ́ nê legém la jú’u nò gie Pànzwě pá gɔ̌ɔn, ńgʉa né Galilea, ńkwɔ́’ɔ ndùm lekwɔ’ɔ́ sie Yěsô la gwɔ gwɔ́, mbà à la la’te mbwó pɔ́b, ngie pâ pɔ́ ge lá’ pumte wó

¹⁷Pɔ́ gwɔ́ tá ńgyá Yěsô, ńkwí’te ssé, ńgu’te yé, tá tsɔ́ pʉ̀a gwɔ́ tsetsɛ̀ɛ pɔ́b, ńně ḿmʉ́’te mʉ’té.

¹⁸Yěsô tóo lejʉ́ŋ pɔ́b, ńgɔɔn né pɔ́b ngie: E Ssé leen ńná tʉ̀ ntsèm né mèŋ lélɔg sá’ shúm sie ée tÿǒ lepwó mbɔɔ sie ée ndùmo ssé tsetsá’.

¹⁹Pú’u la, pi gʉa ngwòŋo ngwòŋ, ńdɔg pʉ̀a mesoŋ ńgÿo *ngàŋa kwò yɔ́ɔn, ńnu’u wɔ́b ntse ná lezíŋ Tá, mbɔɔ Múɔ, mbɔɔ Zẅìge Ndʉalʉ̌a,

²⁰ńzí’i wɔ́b létÿɔ́gɔ kwò ná menò ntsèm mie mèŋ n da zí’i gẅí. Pi zsé ngie, kwà’ mèŋ n ge lá’a gwɔ́ pɔ́ tsetsɛ̀ɛ pi tà njÿó lá’ ḿmag.