Read Ngiemboon Matio 3 Bible Online

Matio 3 - Ngiemboon bible

Matio 3

¹Á zye ńnéŋe, Jâŋ Mbabtis kẅɛɛ nkwòŋo tsẅɛ Jẅidea, ńně sá’a ngie:

²Pi kúbe mà gẅi, á nue àfʉ̀’ gie Ssé ge nyɛ lefùɔ sé tsoté tà ne ḿbɔ́ɔnte.

³Jâŋ lɔgɔ pú’u, ńgwɔ́ nyìŋ gẅie *ntsẅì nkʉ̀ Ssé Esǎya la gɔɔn nò ńtí yé ngie: «Ngyè nyìŋ kwɔ̌’ fó nkwòŋo tsẅɛ, ńgɔɔn ngie: Pi nyɛte mánzsè Cʉ̀apʉ̀a, ńgÿo melyěen nzsè mé e tyé ndʉŋ ndʉŋ».

⁴Jâŋ laa nkwòŋo tsẅɛ, ḿma’ nzsǒ, mbà mé la lɔg menoŋ kamel ḿbá’, ńdɔgɔ *ngùb nɔ̀ɔn ńtʉ́me zẅɛ̌’ yé, àyé mmó léjÿó e gwɔ́ ngǐm ńgÿo nŋwá’ tsẅɛ.

⁵Epʉ̀a ně fóo Yerósalem, éfóo Jẅidea, mbɔɔ ná pàga ngwòŋ gie áa ngʉ̀ŋe ntse Jurdeŋ, ńtóo, ńgyá Jâŋ,

⁶ńtyé mvfò mânyìŋ ntsèm, ńzẅíŋe meno tepoŋ mɔ́b, á nu’u wɔ́b tsɛ̀ɛ ntse Jurdeŋ.

⁷Jâŋ gyá pá’ pʉ̀a ná nùɔ pà *farisay paa pʉ̀a ná nùɔ pà *sadukay tó yɔ́b tà ńgyɔ́ɔn, pá’ à ge nu’u wɔ́b ntse, ńgɔɔn né pɔ́b ngie: ngẅɛ̀ mennú, pàpá’ legye, àwɔ́ zɔ piŋ shwóŋó gẅi lékÿo ngɔ́’ gie pi lyɛbté tà é ne ńge gwe á ná pi.

⁸Pi gÿo pɔ́ menò mbòŋo mie e nyɛɛ ngie pi kubé mà.

⁹Pi pɔ́ɔn lélɔg pɔ́ ndà’ ncwò gẅi ńgɔɔn ngie: Peg ee ngẅɛ̀ Ábalam. Tà mèŋ n ké shwóŋó gẅí, e Ssé ku’u lésele metóon pɔ̀ɔn ńdɔg ńgÿo ngẅɛ̀ Ábalam

¹⁰Mé ně ńzɔɔn ndá’ ńkaa ńzɔɔn lélɔg ńkɔ́’ɔ yɛ̌ yɛ̌ tÿǒ wɔ́ gie á té zém ntɔ̌ɔn mbòŋo wɔ́, éfó ssé kɔ́’ɔ yé, e ké ma’ pɔ́ mmɔ̌g

¹¹Mèŋ, n gẅiin yɔ́ɔn pɔ́ ndà’ lénu’u gẅi tsɛ̀ɛ ntse, lélɔg ńnyɛ ngie pi kubé mà. Tá nyìŋ gẅie aa nzèm mèŋ ńne ńtóo, ge tó yé néŋ pʉ̀a mbwó Zẅìge Ndʉalʉ̌a, é néŋ pʉ̀a tsɛ̀ɛ mmɔ̌g. À cʉa wɔ̀ɔn, tà mèŋ n tè ku’u lésẅɛ melɔ̌ɔn mé wɔ́.

¹²À ge tó tyɛ́te shúm sie mé lagá nká’. E néŋ sé mbòŋo tsɛ̀ɛ nkìŋ. E cʉ́’ kʉ̀ŋe, à pÿɛɛ tsɛ̀ɛ mmɔ̌g gẅie é té ńdá’a ḿbyé wɔ́.

¹³Yěsô leen ńké fó Galilea ńtóo ncwò ntse Jurdeŋ, ńgyá Jâŋ légwɔ́ gie Jâŋ ge nu’u yé ntse.

¹⁴Jâŋ ně ńdʉ’ʉ, ńně ńgɔɔn né yé ngie: Gù zɔ gẅiin lénu’u wɔ̀ɔn ntse, ɔ̀ pǐŋ ńtó ngie mèŋ n nu’u gú tsɛ̀ɛ ntse lá?

¹⁵Tá Yěsô tsɔ́’ɔ mbwo yé ngie: Zẅíŋ ngie á gwɔ́ pú’u, fʉ̀’ɔɔn, mélà’mie pɔ́gɔ lɔɔn ńgÿo pú’u, tá á lɔgɔ ńgwɔ́ mmó gie e Ssé né ńzɛ́te. Jâŋ leen ńké ńzẅíŋ,

¹⁶ńnu’u yé ntse. Yěsô gwɔ́ tá ńkẅɛ, ncwò tÿǒ lepwó tsɔ́’ɔ ńtyé. Á gyá Zẅìge Ssé fó tÿǒ ésẅɛ́’ ńgwɔ́ pá’ kàpʉŋ la, ńtó ńnéŋe ná yé.

¹⁷Ngyè fó tÿǒ lepwó ngie: Wɔɔn aa Míŋ wɔ̀ɔn, mèŋ n kwoŋo yé tɛ’, aa wɔ̀ɔn lekág