Read Ngiemboon Matio 8 Bible Online

Matio 8 - Ngiemboon bible

Matio 8

¹Yěsô piŋ, ńgwaa fó ndùm lekwɔ’ɔ́ sẅɛ́’, menùɔ lá’ tà ńgyɔ́ɔn cʉ́me nzèm yé.

²Àtsɔ̌ ngàŋ nkà’ páb tó ńkẅí’te mvfò yé, ńgɔɔn ngie: Cʉ̀apʉ̀a mèŋ n zsě ngie ɔ̀ lɔɔn ńkwoŋ, mbà ɔ̀ ku’u légÿo mèŋ n zeŋe.

³Yěsô jú’, ńtsege pwó ńkíbe yé, ńgɔɔn né yé ngie: Mèŋ n kwǒŋ pú’u, zeŋe, nkà’ gwóon ḿmaga ná yé, á gwóon ńzeŋe.

⁴Yěsô gɔɔn né yé ngie: Pɔ́ɔn lé ké ńkím tà nyìŋ jú’, tá’ ké ńgʉa ńnyɛ mbùm ɔ̀, á mbwó nùŋe pwɔ́’, ḿbiŋ ńnáa mmó gie *lepʉ̌ Mǒsê ne ńzɛ́te mbwó nyìŋ gẅie nkà’ é magá ná yé, epʉ̀a metsèm lêen ńké ńzsé ngie ɔ̀ zeŋě.

⁵Yěsô gʉa tà ńkúu tÿǒsoŋ Kapernawúm, àtsɔ̌ tándá ncù pà *Roma zá’a yé, ésẅíŋte yé,

⁶ńgɔɔn ngie: Cʉ̀apʉ̀a, mênkʉ́ wɔ̀ɔn nuŋe ndá, mbà kwʉ́’te gwǒon yé, à ne ńgyá ngɔ́’ tɛ’.

⁷Yěsô gɔɔn né yé ngie: Mèŋ n ge gʉa gÿo à zeŋe.

⁸Tá tándá ncù tsɔ́’ ngie: Cʉ̀apʉ̀a, mèŋ n tsẅíle nyìŋ gẅie à lɔɔn ńgwɔ́ ɔ̀ tɔ́g tà ńkúu ndá mèŋ. Tyé pɔ́ pɛ́’ɛ ńtsẅi lê ncwò gú mênkʉ́ wɔ̀ɔn zeŋe.

⁹Mèŋ n gɔɔn pá’ɔɔn ńgwɔ́ yɔ́ɔn nzèm nyìŋ, ńjú’u ncwò wé, ńgíŋ ńgẅiin yɔ́ɔn pà lÿɔ́’ ncù nzèm mèŋ, pɔ́ ne ńjú’u wɔ̀ɔn. N dɔɔn ńgɔɔn né tsɔ̌ ngie gʉa, á gʉa, ńgɔɔn né tsɔ̌ ngie, too, á to, ḿbiŋ ńgɔɔn né nkwɔɔn yɔ̀ɔn ngie gÿo pá’ɔɔn, á gÿo.

¹⁰Yěsô jú’u yɔ̀ɔn shwóŋò gie á kẅɛ̌ ncwò tándá ncù ńgɔ’te yé, ésele nnɛ́ ńgɔɔn mbwo lá’ gie aa nzèm yé ngie: Mèŋ shwóŋó gẅí, kwà’ nénʉ́, mbɔɔ tsɛ̀ɛ ngwòŋ pà Israel, mèŋ n kaa gyá tsɔ́ nyìŋ gẅie à zǎb ntʉ́m ná mèŋ pá’ yé wɔ́.

¹¹Mèŋ n ge zɔɔn gíŋe shwóŋó gẅie ngie: Pʉ̀a tà ńgyɔ́ɔn ge lá’ fó meshÿó meshÿó ndùmo tsetsá’, é tó kúu tsɛ̀ɛ ngwòŋ tÿǒ lepwó, pâ Ábalam, lê Esâg, mbɔɔ Yakwɔ́b temte ńjÿó línɔ́ɔn

¹²Megʉ̀ gwaa gwɔ́ wó, mbà mé kẅilé púɔ ntɔ́’ ńnáa pǐ tsɛ̀ɛ mwòon nzém. Pɔ́ gwɔ́ wó ne ńdʉate, melóŋ pɔ́b ne ffó

¹³Yěsô piŋ ńgɔɔn mbwó tándá ncù ngie: Piŋ nê mbʉ̀a gù! Pá’ ɔ̀ zǎb ntʉ́m ná mèŋ lá, àmmó gie ɔ̀ tsɔ̌ɔn ge gwɔ́ pú’u, ńgɔɔn pú’u, mênkʉ́ tándá ncù leen ńzeŋe pɔ́ fʉ̀’ó, pɔ́ fʉ̀’ó.

¹⁴Yěsô fó jʉ’ó ńgʉa ndá piɛ, ńkúu wó ńgyá màkẅi’ Piɛ nuŋe, nnɛ́ ne ńkwɔ́’ɔ yé.

¹⁵Yěsô kíbe pwó yé, nnɛ́ zá’a. Á nyɛte shúm ńdɔg ńdye yé.

¹⁶Ncwò nzém gÿo ńgwɔ́, mé lɔg pʉ̀a tà ńgyɔ́ɔn pie *messé tepòŋ ne ńgege wɔ́b ńtóo mvfò Yěsô, á gɔɔn nò tà’ legʉa *messé tepòŋ fó ná pʉ̀a ńkẅɛ, megàŋa gûɔ pú ńzeŋe.

¹⁷Á lɔgɔ pú’u, ḿbumte ná nò gie à *ntsẅì nkʉ̀ Ssé Esǎya la gɔɔn ngie: «Yé zɔ la kaa *melɔ̌’ mégè ḿbi’, ńgíŋe fó nà pège ńkẅile meguɔ mégè ḿbi’».

¹⁸Yěsô gyá pá’ lá’ cú’te lejʉ́ŋ yé tà ńgyɔ́ɔn, ńtsẅi mbwo *ngàŋa kwò yé ngie pâ pɔ́ túm né yetsɔ́ nzǐŋ ntse.

¹⁹Àtsɔ̌ nkyàgte *lepʉ̌ Mǒsê tóo lejʉ́ŋ yé ńgɔɔn né yé ngie: tsítsà, ɔ̀ ge gʉa nzɔ̌ wɔ́, mèŋ n ké ńgwɔ́ pɔ́ nzèm gù.

²⁰Yěsô tsɔ́’ɔ mbwó yé ngie: Meshʉ̀shʉ̀ gẅiin membÿé, meshʉ́ŋ piŋ ńgẅiin menkʉ̀a mɔ́b. Tá *Míŋ Nyìŋ tè gẅiin jʉ’ gie à lɔɔn ńgwɔ́ á zẅɛte wó wɔ́.

²¹Àtsɔ̌ tà’ ná pʉ̀a pie ee nzèm yé gɔɔn né yé ngie: Àndè cʉ́’ mèŋ n zɔɔn ńgʉa ńtúŋo tá wɔ̀ɔn.

²²Yěsô tsɔ́’ɔ mbwó yé ngie: Cʉ́m pɔ́ nzèm mèŋ, ńnyé mepfó pɔ́ túŋ mepfó pɔ́b.

²³Yěsô kúu tsɛ̀ɛ kanú’, *ngàŋa kwò yé kú yɔ́b tsɛ̀ɛ wó,

²⁴ńně ńgee, tsɔ̌ máamáa fóm gwe ndùm ntse, ńzye lécʉ’ ńkaa ntse kaa tà é cʉ́’ʉ fa’a pɔ́ lékábte kanú’. Á gwaa gwɔ́ Yěsô ne ńdyé.

²⁵Pɔ́ tóo lejʉ́ŋ yé, ńne ńzyeen yé, ńgɔɔn ngie: Cʉ̀apʉ̀a, kẅé wég mbwó legwé. Pège kwě tà ńdem.

²⁶Á gɔɔn né pɔ́b ngie: Pi pɔ́gɔ kɔ́? Pi tè záb ntʉ́m nà Ssé fʉ̀’ ntsèm wɔ́! Ńgɔɔn pú’u, ńdu ssé, ńcÿɔ́gɔ fóm pɔ́ ntse. Ejʉ’ láŋte lê kěm.

²⁷Pɔ́ métsèm pú ḿmɔɔn, ńgɔɔn tsetsɛ̀ɛ pɔ́b ngie: Yɔ̀ɔn ee yɛ̌ ntí nyìŋ tà mbɔɔ fóm pɔ́ ntse jú’u ncwò wé?

²⁸Yěsô gʉa tà ńkúu nà yetsɔ̌ nzǐŋ. É gwɔ́ ngwòŋ pà Garazania, etsɔ̌ pʉ̀a mépʉ́a pie *messé tepòŋ leen ńkúu ná pɔ́b fó jʉ’e mé túŋo pʉ̀a wó ńkẅɛ ńzá’a yé, mbà pɔ́ leen fʉ̀’ nò fʉ̀’ tà nyìŋ tè gíŋe ḿpfó wɛ̌ shÿó wɔ́.

²⁹Pɔ́ ga’te ńgɔɔn né Yěsô ngie: Ɔ̀ fa’a légÿo lêkɔ́ ná peg, Míŋ Ssé? Ɔ̀ ka tóo jʉ’ɔɔn pɔ́ létʉ́ njÿó ńnéŋe wég tsɛ̀ɛ ngɔ́’ ka?

³⁰Á gwaa gwɔ́ àtsɔ́ nùɔ mekúnɔ́ɔn gwɔ́ ngʉ̀ŋe jʉ’ó ńne ńgwá ńkʉ́’ʉ ḿpfɛ́ɛ shúm.

³¹*Messé tepòŋ sẅíŋte Yěsô ngie: Ɔ̀ lɔɔn ńjwoŋo wég, ɔ̀ zẅíŋ peg gʉa ńkúu nà nùɔ mekúnɔ́ɔn pi.

³²Yěsô gɔɔn né pɔ́b ngie: Pi lò. Pɔ́ leen ńké fó nà pʉ̀a pá ńkẅɛ, ńgʉa ńkúu nà mekúnɔ́ɔn. Mé gwaa gyá, ànùɔ mekúnɔ́ɔn pá fóo kenkʉ́ŋe, ńtága, ńzẅɛ ḿbʉle tsɛ̀ɛ letʉŋ, ńnú ntse ńkwéte.

³³Epʉ̀a pie pɔ́ ké ne ḿbyɛ́bɛ mekúnɔ́ɔn gyá pú’u, ńtága ńkÿote, ńgʉa tÿǒsoŋ ḿbú ḿbíte kɔ́ɔkɔ́ wɔ́ gie á cʉ̌a, tà mbɔɔ ye pʉ̀a pie *messé tepòŋ kěen ná pɔ́b la.

³⁴Àlá’ jú’, éfó tÿǒsoŋ ḿbú ńkẅɛ, ńtóo légyá Yěsô, ńgwɔ́ tà ńgyá yé, ésẅíŋte yé ngie à fó lá’ pɔ́b ńgʉa.