Read Ngiemboon Malékuse 11 Bible Online

Malékuse 11 - Ngiemboon bible

Malékuse 11

¹Yěsô pâ *ngàŋa kwò yé gʉa tà ne ńkúu Yerósalem, ńnyé ńgwɔ́ pɔ́ lepàa Mbedfajé pɔ́ Mbetáni, á jʉ’ʉ lekwɔ’ɔ́ metÿǒ mèvɛ olive, Yěsô túm *ngàŋa kwò yé yépʉ́a,

²ńgɔɔn né pɔ́b ngie: Pi gʉa tsɛ̀ɛ lá’ yɛ̂ gie áa mvfò pi lɛ. Pi ge leen kúu wó, é gyá mûɔ nzikáasè gie mé ně ńcʉŋ, e gwɔ́ gie nyìŋ laa mǒ ńnéŋe, pi kyɛ́’, ńdɔg ńtó.

³Pi lɔɔn ne ńkyɛ́’ɛ nyìŋ zɛ́te gẅi ngie: Pi kyɛ́’ɛ nzìkáasè yɛ ńdɔgɔ ńgee nzɔ̌, pi tsɔ́’ ngie: Andè zɔ ne ńtsɔ́ɔn, mbà ngàŋ ge gwóon nyé pi lɔg ńtó.

⁴Ngàŋ ntúm yɛ̌ gʉa ńkúu wó, ńgyá nzìkáasè, mbà mé ně ńcʉŋe yé ncwò mbu’, á ngʉ̀ŋe mánzsè, pɔ́ kyɛ́’ɛ yé.

⁵Tsɔ́ pʉ̀a pie é kɔ’ɔ́ jʉ’ó zɛ́te wɔ́b ngie: Pi kyɛ́’ɛ nzìkáasè yɛ̂ ńdɔgɔ ńgee nzɔ̌ wɔ́?

⁶Pɔ́ tsɔ́’ pá’ Yěsô ně ńtsẅi né pɔ́b pú’u. Mé nyé wɔ́b pɔ́ lɔg ńgʉa.

⁷Pɔ́ lɔg nzìkáasè ŋwɛ́ ńtó, ńgwaa náa yé mbwo Yěsô, ńzáb menzsǒ fÿɔ́g mɔ́b nkà’ yé, Yěsô kwɔ́’ ńnéŋe mo,

⁸ńně ńdɔgɔ ńgiŋe, pʉ̀a tà ńgyɔ́ɔn sáŋte menzsǒ mɔ́b mánzsè. Petsɔ́ pʉ̀a fagte yɔ́b pɔ́ meffò tÿǒ nká’, ńdɔg ńtó ńzá’a yé.

⁹Alá’ gwɔ́ mvfò, ńgwɔ́ nzèm yé ńzɔbɔ ngie: Gùugẅî[11] mbʉ́lè gwɔ́ né nyìŋ gẅie, à tóo nà lezíŋ Cʉ̀apʉ̀a.

¹⁰Mbʉ́lè gwɔ́ né nyìŋ gẅie à tóo ńjÿó lefùɔ tá wege fùɔ Ndavíd. Gùugẅî gwɔ́ mbwo Ssé tàa tÿǒ lepwó!

¹¹Yěsô kúu Yerósalem, ńgʉa *jʉ’ʉ Ssé, ńgwá ńkʉ́’ʉ, ḿbú ńgyá kɔ̀ɔkɔ́ɔ wɔ́ gie mé ée wó ńgÿo. Pâ *ngàŋa kwò yé ntsɔ̀b pʉ́a nê legém gwóon ḿbiŋ nzèm ne Mbetáni, á nue á la gwaa gwɔ́, mbà zà’ cʉ̌a.

¹²Njÿó gÿo ńdʉ́a, pɔ́ gwɔ́ fó Mbetáni piŋ, ńgiŋ tà nzyè gyáŋa Yěsô.

¹³Á mma’ lejÿɔ́g, ńgyá tÿǒ mbÿě ngem, meffo mé ne sẅéte, á gʉa letsìŋe ngie kà à ge gyá ntɔ́ɔn mǒ wɔ́, ńkúu jʉ’ó, ńgyá é gwɔ́ pɔ́ ndà’ meffo. Á zɔɔn ńgwaa gwɔ́ á té fʉ̀’ gie mbÿě ngém áa ńzéme wɔ́.

¹⁴Á gɔɔn né tÿǒ ŋwɛ́ ngie: Nyìŋ tě ńdá’a ńgíŋe ńjÿó mentɔ̌ɔn mú wɔ́, ńgwaa gɔɔn, *ngàŋa kwò yé ne ńjú’u.

¹⁵Pɔ́ gʉa tà ńkúu Yerósalem, Yěsô gʉa *jʉ’ʉ Ssé, ńzye létág pʉ̀a pie ée wó sẅiŋe shúm pâ pàjúu, ńtsó mekǔ metʉ̌a pàkúbe nkáb ḿma’a ssé, ńtág mekwɔ́’ɔ pàsẅiŋ mekàpʉ̀ŋ,

¹⁶ńgwá ńtɔ’ tà tsɔ̌ tà’ nyìŋ tè gíŋe ńkaa mmó ńdɔgɔ ńtɔ́gɔ *jʉ’ʉ Ssé wɔ́,

¹⁷ńdeen ńké ńzye lézí’i wɔ́b ngie: Pi legé ngie Ssé la gɔɔn tsɛ̀ɛ ŋwà’ne yé ngie: «Mé ge lá’ tóŋ ndá yɔ̀ɔn ngie ndá gie ngwòŋo ngwòŋ sẅíŋte Ssé wó». Tá pi leen sele ńdɔg ńgÿo nkʉ̀a metsǒŋ.

¹⁸Metándá pànùŋo pwɔ́’ pâ *pàkyàgte lepʉ̌ Mǒsê gÿo ńjú’, ńzye léfa’ shÿó pá’ pɔ́ ge gÿo tá zẅé yé. Pɔ́ la ne ḿbɔ́gɔ ngie nò yé ge pú jÿó lá’, á nue alá’ ntsèm la ne ńgɔ’te mmó gie à lɔ̌ɔn ńzí’i pʉ̀a.

¹⁹Á gÿo ńgwɔ́ ncwò nzém, Yěsô pâ *ngàŋa kwò yé gíŋe fó tÿǒsoŋ ńkẅɛ.

²⁰Pɔ́ gÿo ńgwɔ́ mba’ámba’ ńne ńcʉa, ńgyá, mbà tÿǒ mbÿé ngem yɛ̌ jǔm tà ńkúu nà menŋaŋ mé.

²¹Piɛ líe tÿǒ ŋwɛ́, ńkímte mmó gie á ka cʉa, ńgɔɔn né Yěsô ngie: Tá weg, gyá pá’ tÿǒ ya gie ɔ̀ kà néŋ ndòon mǒ lá pǔ ńjúm tà ńcʉ́’ ńgwɔ́.

²²Yěsô tsɔ́’ɔ mbwo pɔ́g ngie: Pi záb ntʉ́m gẅi nà Ssé.

²³Mèŋ shwoŋo gẅí, kwà’ nénʉ́, nyìŋ gẅi lɔɔn ńgɔɔn mbwo lekwɛ́ ngie efó jʉ’ɛ̂, ńgʉa ńtyé tsɛ̀ɛ ntse té pàa, ńgɔɔn té ne ḿmʉ́’te, ńzáb ntʉ́m nà Ssé, mbà Ssé ge zẅíŋ à gwɔ́ pú’u.

²⁴Áa mmó gie á gÿo tá mèŋ shwóŋó gẅi ngie: Akɔ́ɔkɔ́ɔ gie pi ne sẅíŋte Ssé ńdúɔ wɔ́, pi zẅíŋ ngie pi ně ńdá’ ńgẅiin, e Ssé náa mbwo pi.

²⁵Afʉ̀’ gie ɔ̀ ne sẅíŋte Ssé lá, ńgwɔ́ gie nyìŋ fʉ̌a nò mbwo gù, ɔ̀ lege ńnáa mbwo ngàŋ. À cʉa pú’u, tá Tá gẅi gẅie aa tÿǒ lepwó, à lege mí mefʉ̀a ńná lé pi.

²⁶[ Pi lɔɔn ńké tè lege mefʉ̀a petsɔ́ pʉ̀a wɔ́, mbà Tá gẅi gẅie aa tÿǒ lepwó kě tè lege mí gí wɔ́.]

²⁷Yěsô pâ *ngàŋa kwò yé gíŋe ńgʉa tà ńkúu Yerósalem, á kúu *jʉ’ʉ Ssé, ńne ńgwá ńgiŋte, metándá pà nùŋe pwɔ́’ pâ *pàkyàgte lepʉ̌ Mǒsê mbɔɔ mekěme lá’ tsóte nnɛ́ ńtó,

²⁸ńzɛ́te yé ngie: Ɔ̀ lɔgɔ lezíŋ wɔ́ ńgÿo mɔɔn menò? Wɔ̌ zɔ túmo ńgÿo sɛ̌ shúm?

²⁹Yěsô peŋe ńná né pɔ́b ngie: Pi cʉ́’ mbɔɔ mèŋ yɔ́ɔn, n zɛ́te gẅi tà’a nò wémɔ’ɔ́, pi tsɔ́’ tá mèŋ n deen ńké shwóŋó gẅi kwà’ nyìŋ gẅie à ka túmo wɔ̀ɔn ńgÿo mɔɔn menò.

³⁰Jâŋ gẅie à lɔ̌ɔn ńnu’u pʉ̀a ntse laa pé’e, e Ssé zɔ̌ túmo yé fa’ mɛ̌ mefà’ ka pʉ̀a mesoŋ? Pi shwóŋó wɔ̀ɔn.

³¹Pɔ́ jú’, ńkwaŋte tsetsɛ̀ɛ pɔ́b ngie: Pege lɔɔn ngie: E Ssé zɔ la túmo yé, mbà à ge zɛ́te wégè ngie: Tà mélà’a kɔ́ pege la tè zẅíŋe nò gie Jâŋ lɔ̌ɔn ńgɔɔn wɔ́?

³²Tá ḿbiŋ ńké ńgɔɔn ngie pʉ̀a mesoŋ, mbà heen! Pɔ́ kwaŋa kékáŋ, mélà’mie pɔ́ la ne ḿbɔ́gɔ lá’, á zɔɔn ńgwaa gwɔ́, mânyìŋ ntsèm ne ńzsé ngie Jâŋ aa kwà’ *ntsẅì nkʉ̀ Ssé.

³³Pɔ́ kwaŋ pú’u, ńcʉ́’ ńtsɔ́’ pɔ́ ngie: Peg kaa zsé. Yěsô gɔɔn né pɔ́b ngie, á lɔɔn ńgwɔ́ pú’u, mbà mbɔɔ mèŋ yɔ́ɔn, n tè shwoŋo gẅi nyìŋ gẅie mèŋ n dɔgɔ lezíŋ sé ńgÿo mɔɔn menò wɔ́.