Read Ngiemboon Malékuse 12 Bible Online

Malékuse 12 - Ngiemboon bible

Malékuse 12

¹Yěsô tsɔ́’ pú’u, ńzye lélɔg *sagá nò ńgɔɔn né pɔ́b ngie: Atsɔ̌ ndÿò lǎ’ ńgẅiin nká’ wé, ńgʉa wó, ḿbye metÿǒ mie mé kyéen mentɔ̌ɔn ńdɔgɔ ńnyɛte melù’, ḿbwóon nkàŋ nká’ ńdɔg ḿbú ńkíle, ńgʉa tsɛ̀ɛ nká’, ńtúŋo jʉ’ gie mé ge kyéen mentɔ̌ɔn wó, ḿbiŋ ḿbwóon tà’ shʉa ndá gẅie mé ge kwɔ́’ɔ tyé tsoló tá pyɛ́bɛ nká’, ńgÿo pú’u, ńcʉ́me nká’ mbwo pà nyɛte melù’ ńdeen ńgʉa nê legìŋ.

²Afʉ̀’ʉ le káb ntɔ̌ɔn kú’, á túmo tà’ ngàŋa fà’ we mbwo pʉ̀a pie ée nká’ ngie à gʉa ńkẅé mé mentɔ̌ɔn tÿǒ ńdɔg ńtó.

³Pɔ́ kúu wó, ńgwoon ngàŋa fà’ wá, ńcúa yé, ńjwoŋo yé, á piŋ mbwó mesẅɛ̀ɛ.

⁴Angàŋ nká’ gíŋe ńtúmo tsɔ̌ ngàŋa fà’ we mbwo pɔ́b. Á kúu wó, pɔ́ zoonte yé, ńcúa yé twó ye.

⁵Á gíŋe ńtúmo tsɔ̌ tà’. Wɛ̌ nyìŋ tó fʉ̀’ó, pɔ́ zẅé yé. Á gíŋe ńtúm petsɔ́ tà é gyɔ́ɔn. Mé gwoon petsɔ́ ńzẅéte, ńcúa petsɔ́.

⁶Nyìŋ gẅie à la nyé mbwo ye, à la cʉ́’ ńgwɔ́ pɔ́ ndà’ míŋ we gẅie à lɔ̌ɔn ńkwoŋo yé tɛ’. Á gwaa zsote, ńtúmo wɛ̌ múɔ mbwo pɔ́b, ńne ńkwaŋa ngie, á ge gǎ wɔ́, pɔ́ gÿo mekù’ mé.

⁷Tá á fó ńkúu wó, epʉ̀a pá gɔɔn ngie: Anjÿò ndá we wɛ̂ gẅie à tóo lɛ̀, pege zẅé yé, ńjÿó nká’,

⁸ńgɔɔn pú’u, ńgwe ná ye, ńgwoon yé ńzẅé, éshwoŋo pfó yé, ńdɔg fó nká’ ńgʉa ńgwá’.

⁹Yěsô leen ńké ńzɛ́te ngie: Pi gyǎ gí ngie ngàŋ nká’ ge gÿo lêkɔ́ ná pɔ́b? À ge tó gÿo mé zẅéte pɔɔn pànyɛte melù’, à cʉ́me nká’ mbwo pe mendyɛ̀’ɛ.

¹⁰Á lɔɔn tè kɔ́ wɔ́, mbà pi léen ńtóŋo jʉ’e ŋwà’ne Ssé gie á gɔɔn ngie: «Tóon gẅie pàpwóon ndá la gwá’ léen ńcʉ́’ʉ tóon gẅie yé zɔ pi’ ndá».

¹¹Cʉ̀apʉ̀a zɔ la gÿo pú’u. Á gwɔ́ máa nò mbòŋo menÿɔ́g pege[12]

¹²Pasá’a lá’ jú’ pá’ Yěsô gɔɔn yɔɔn sagá nò, ńdiŋ ngie à gɔɔn né pɔ́b, éfa’ shÿó légwoon yé tá’, ḿbɔ́g nÿɔ́g lá’, ésóon, ńnyé yé jʉ’ó, ńgʉate.

¹³Pɔ́ gÿo ńtúm pʉ̀a nà nùɔ pà *farisay, pâ nùɔ ye *Herôd ngie pɔ́ gʉa fa’ pá’ à lɔɔn ńgwɔ́ pɔ́ fó nà nò gie Yěsô gɔ̌ɔn ńgwóon yé.

¹⁴Pɛ̌ pʉ̀a tó ńgɔɔn né yé ngie: Tsítsà, peg ne ńzsé ngie ɔ̀ gɔɔn nò, á gwɔ́ nénʉ́, ḿbiŋ ńgɔɔn té pɔ́gɔ nyìŋ, ɔ̀ tè líe nyìŋ mesoŋ pɔ́ nà shÿó wɔ́, ńda’te nò nénʉ́ pɔ́ pá’ Ssé ne ńzɛ́te ngie mé gÿo pú’u, shwóŋó wég, tà áa pé’e *lepʉ̌ lá’ ségè zẅíŋ ngie pege ma’ ncùb ńnáa mbwo Kása pà *Roma kà ngǎŋ?

¹⁵Yěsô gyá pá’ pɔ́ gwɔ́ pɔ́ pà nkwòŋ menÿɔ́g, ńtsɔ́’ɔ mbwo pɔ́b ngie: Pi kwà’te wɔ̀ɔn mélà’a kɔ́? Pi lɔgɔ pàga nkáb ńtó ńnyɛɛ wɔ̀ɔn, pɔ́ lɔgɔ pàga nkáb ńtó, á zɛ́te wɔ́b ngie:

¹⁶Wɔɔn ée shÿó wɔ́ gẅie ée nà nkáb? Sɔɔn gwɔ́ lezíŋ wɔ́ sie ée mǒ? Pɔ́ tsɔ́’ɔ mbwo yé ngie: Ée we Kása, lezíŋ gíŋ ńgwɔ́ pɔ́ sé.

¹⁷Á gɔɔn né pɔ́b ngie: Á lɔɔn ńgwɔ́ pú’u, pi náa mmó Kása mbwo Kása, ńnáa ye Ssé mbwo Ssé. Pɔ́ jú’ ntí gie à lɔ̌g ńtsɔ́’, á pú ńkʉ’ʉ wɔ́b tɛ’. Ncwò wɔ́b júm.

¹⁸Etsɔ́ ntá’ pʉ̀a nà nùɔ pà *sadukay leen ńké ńtóo lejʉ́ŋ Yěsô. Pà *sadukay ée pʉ̀a pie pɔ́ té zẅíŋ ngie mepfó ge gÿo zíme nà legwé wɔ́. Pɔ́ zɛ́te mbwo Yěsô ngie:

¹⁹Tsítsà, Mǒsê la ŋwe’e tsɛ̀ɛ *lepʉ̌ ségè ngie: «Nyìŋ lɔɔn ńzɔ́’ɔ manzwě, ńkwé té cʉa mmó, mbà fɛ́ we gẅiin lésɔgɔ mpfɔ́g ńdɔg ńnuŋe ngẅɛ̀ fɛ́ we».

²⁰Etsɔ́ mefɛ́ laa wó, ńgwɔ́ mbàŋa sɔ̀ɔn mbʉ́a, ndùŋ mvfò zɔ́’, ńgÿo ńkwé té cʉa mmó.

²¹Mbɔ́ɔntè sɔgɔ mpfɔ́g, ńgíŋe ńkwé yé pɔ́ tè cʉa mmó. Mbɔ́ɔntè wɛ̌ tó ńgíŋe sɔg yé mpfɔ́g, ńdá’ ńkwé pɔ́ tè cʉa mmó.

²²Pɔ́b sɔ̀ɔn mbʉ́a lá’ ńzɔ́’ɔ manzwě ŋwɛ́, ńdá’ ńkwé pɔ́ tè cʉa mmó. Á gwaa zsote manzwě kwé yé.

²³Pá’ pɔ́b sɔ̀ɔn mbʉ́a la pú ńzɔ́’ɔ manzwě wɔɔn lɔɔn, mé ge lá’ *zíme nà legwé à gwɔ́ we wɔ̌?

²⁴Yěsô tsɔ́’ɔ mbwo pɔ́b ngie: Tà legyè sí gwá fʉʉ gẅi pɛ́’ɛ̀, á té gwɔ́ pɔ́ nò gie pi tè mmó gie áa tsɛ̀ɛ ŋwà’ne Ssé zsé, ḿbiŋ ńké tè zsé pá’ metʉ̀ Ssé ée pú’u, wɔ́ wɔ́?

²⁵Pi zsé ngie mé ge lá’ zíme nà legwé, mbàŋa mbɔɔ panzwě le gíŋe ńzɔ́’ wɔ́. Pɔ́ cʉ́’ ńgwɔ́ pɔ́ pá’ *mecÿɔ́’ Ssé pie ée tÿǒ lepwó.

²⁶Á gʉa nà mepfó pie é zimé nà legwé, mbà pi laa fó ńtóŋo mmó gie Mǒsê la ŋwe’e, ńda’te mmó gie e Ssé la gɔɔn né yé, á jʉ’ gie tsɔ̌ mûɔ métÿǒ laa wó, mmɔ̌g gwɔ́ mǒ wɔ́ kà? E Ssé la ne ńgɔɔn ngie: «Mèŋ, n gee Ssé Ábalam, ńgwɔ́ Ssé Esâg, ńgwɔ́ Ssé Yakwɔ́b»

²⁷Yěsô gíŋe ńgɔɔn ngie: E Ssé tè Ssé mepfó pʉ̀a wɔ́, ee Ssé pʉ̀a metʉ̀. Pi lɔɔn ńkwaŋ pá’ pi kwaŋa lɛ̂, mbà pi fʉ̌a tɛ’[13].

²⁸Yěsô pâ pɛ̂ pʉ̀a ne ńzoŋo pɛ́’ɛ̀, atsɔ̌ nyìŋ nà nùɔ *pàkyàgte lepʉ̌ Mǒse gwɔ́ yé jʉ’ó, ńgwɔ́ tà ńjú’ pá’ Yěsô tsɔ̌’ mboŋó, ńdeen ńtó nê lejʉ́ŋ ye, ńzɛ́te yé ngie: *Lepʉ̌ sie é pú ḿbi’ metsɔ́ ntsèm, ée sɛ̌?

²⁹Yěsô tsɔ́’ ngie: *Lepʉ̌ sie é pú ḿbi’ metsɔ́, ésɔɔn: «Pà Israel, pi jú’, Cʉ̀apʉ̀a aa Ssé yege, yé gílé ye zɔɔ Cʉ̀apʉ̀a.

³⁰Kwoŋo Cʉ̀apʉ̀a Ssé ɔ̀ lê ngwòŋ ntʉ́m ɔ́ ntsèm, ńtÿɔ́g pɔ́ yé mvfò nà jú kɔ̀ɔkɔ́ɔ, ńzáb nkwaŋá gú ndà’ ná yé, ḿbiŋ ńdɔg metʉ̀ mú ntsèm fa’a mbwo yé»

³¹*Lepʉ̌ mbɔ́ɔntè yépʉ́a gwɔ́ ngie: «Á ne ńzɛ́te ngie ɔ̀ kwoŋo fɛ́ gù nyìŋ mesoŋ pá’ twó mbùm jú», etsɔ́ *lepʉ̌ té gíŋe ńgwɔ́ wó tà ńtɔ́g mɔɔn mémbʉ́a wɔ́.

³²Ankyàgte *lepʉ̌ Mǒsé gɔɔn mbwo Yěsô ngie: À yɛ̂, Tsítsà, ɔ̀ lɔgɔ shwóŋó nò ngie Ssé ee gílé yé, atsɔ́ cʉ̀apʉ̀a tè gíŋé ńgwɔ́ wó wɔ́.

³³Á poŋ ngie nyìŋ kwoŋo yé lê ngwòŋ ntʉ́m wé ntsèm, ńdɔgɔ zsé nò yé pâ metʉ̀ mé ntsèm tsèm, éfa’ pɔ́ ndà’ mbwó yé, ḿbiŋ ńkwoŋo fɛ́ we nyìŋ mesoŋ pá’ twó mbùm yé. Angàŋ gÿo pú’u, á pú ḿboŋ ńcʉa ye létuɔ menɔ̀ɔn ńnáa mbwo Ssé, ńcʉa mbɔɔ sɛ̌ shúm pwɔ́’ wɔ́ sie à lɔɔn ńgwɔ́ á náa mbwo Ssé.

³⁴Yěsô gyá pá’ à lɔgɔ́ zsé nò ḿbÿɛ, ńgɔɔn mbwo ye ngie: Egú ngʉ̀a lékúu tsɛ̀ɛ *Lefùɔ Ssé té nyé ság wɔ́. Á fó fʉ̀’ó nyìŋ tè gíŋe fʉ’ʉ lézɛ́te Yěsô tsɔ́ nò wɔ́.

³⁵Yěsô nyé *jʉ’ʉ Ssé ńne ńzí’i pʉ̀a nò Ssé, ńgɔɔn ngie: Pi kwaŋ gí ngie *pàkyàgte lepʉ̌ Mǒsê zí’i pʉ̀a ngie: *Nzà’nkÿo gẅie Ssé la ka’ ge lá’ gwɔ́ nyìŋ nà ngẅɛ̀ fùɔ Ndavíd pé’e, á lɔgɔ ńgwɔ́ lêkɔ́?

³⁶Mèŋ n ne ńzsé ngie: A Zẅìge Ssé la tsóte fùɔ Ndavíd, kwà’ yé lê twó mbùm yé gɔɔn nò ńtí *Nzà’nkÿo ngie: «Cʉ̀apʉ̀a Ssé gɔ̌ɔn mbwo wɔ̀ɔn Ndè ngie: Tóo ńnéŋe nà gwoŋó pwó yɔ́ɔn ye tʉ̀, tà à lá’ ńkú fʉ̀’ gie mèŋ sẅǐŋ megàŋ mbù pú mbwo gù, tà ɔ̀ tÿɔ́g mekwò mú twó pɔ́b[14]»

³⁷Kwà’ fùɔ Ndavíd zɔ̌ tóŋo *Nzà’nkÿo le we Ndè, tá á piŋ ńgwɔ́ nyìŋ nà ngẅɛ̀ ye lêkɔ́? Epʉ̀a pie é kě jʉ’ó, jú’u nò gie Yěsô gɔ̌ɔn, á pú ḿboŋo wɔ́b tɛ’.

³⁸Yěsô gíŋe ńzí’i wɔ́b ngie: Pi lÿɔ́’ *pàkyàgte lepʉ̌ Mǒsê pá’ɔɔn tɛ’. Pɔ́ kwoŋo léma’ meshʉ̀shʉ̀a menzsǒ ńdɔg ńgwáa ńkʉ́’ʉ, ńkwoŋ ngie mé tó ńtsyɛ’te wɔ́b ndùmo gyɛ̌,

³⁹ḿbiŋ ńkúu jʉ’ʉ melínɔ́ɔn, ńkwoŋo léńnéŋe pɔ́ nà jʉ’ʉ melÿò, ńkú *mendá cú’tè, ńkaŋa yɔ́b jʉ’ pɔ́ mvfò,

⁴⁰ńgíŋe ńdɔgɔ legyè ńkẅé shúm mepfɔ̌g, ńcʉ́’ʉ létsyɛ’te Ssé, ńdɔgɔ légɔɔn nò á sag, ḿbaba menÿɔ́g pʉ̀a, e Ssé ge lá’ záb yɔb ngʉ̀ngʉ̀ e tʉ tɛ’.

⁴¹Atsɔ́ jʉ’ gwɔ́ *jʉ’ʉ Ssé epʉ̀a gee jʉ’ó ńnéŋe ncùb Ssé. Yěsô gÿo sẅɛ́’ ńnéŋe ssé ńne ńdíe pá’ mé ńnéŋe, lelÿò megàŋa mmó ne ńnéŋe nkáb ngyɔ̌ɔn.

⁴²Atsɔ̌ mpfɔ́g manzwě tó yé, ńgwɔ́ mbóŋ, ńnéŋ pàg nkáb sépʉ́a, é sie é fó tè nà tsɔ́ mmó ku’.

⁴³Yěsô gyá, ńtóŋ *ngàŋa kwò yé, ńgɔɔn né pɔ́b ngie: Mèŋ shwoŋo gẅí, kwà’ nénʉ́, ampfɔ̌g manzwě wɔɔn, ńgwɔ́ mbóŋ něŋ nkáb jʉ’ó, ńcʉa pʉ̀a metsèm.

⁴⁴Petsɔ́ pʉ̀a zɔ̌ɔn ńtó yɔ́b, ńnéŋ pɔ́ metwó nkáb mɔ́b, tá ńgʉa nà mpfɔ̌g manzwě wɛ, à tsɛ ńgwɔ́ pɔ́ mbóŋ tá’, à něŋ wé ndà’a mmó gie á ke ńgẅiin lélɔg ńjú sé shúm.