Read Ngiemboon Malékuse 13 Bible Online

Malékuse 13 - Ngiemboon bible

Malékuse 13

¹Yěsô gÿo ne fóo *jʉ’ʉ Ssé ńkẅɛɛ, atsɔ̌ tà’ *ngàŋa kwò we gɔɔn ngie: Tá weg, ké ńdíe pɔ́ metóon mie mé la lɔg ńkwɛ́ɛ jʉ’ɔɔn tá ńgyá, ajʉ’ɔɔn ŋwɛ́ áa wó tɛ’.

²Yěsô tsɔ́’ɔ mbwo yé ngie: Tè líe pɔ́ pá’ mé la séen ńkwɛ́ é gú’ pɛ́’ɛ̀ lɛ. Atsɔ́ lyɛ̌’ ge gÿo gwɔ́, mé pú ńkem tà tóon le gíŋe ńzébe nà wetsɔ̌ wɔ́.

³Pɔ́ gʉa tà ńkúu lekwɔ’ɔ́ metÿǒ mèvɛ olive, Yěsô ńnéŋe ssé tà ne ńgyá *jʉ’ʉ Ssé. Piɛ pɔ́ Jâg, ńgÿo Jâŋ pɔ́ Ndeléya fág nnɛ́, ńtó ńzɛ́te yé ngie:

⁴Shwóŋo wég fʉ̀’ gie yɔɔn nò ge lá’ gÿo. Shwóŋo wég liŋé gie mé gé lɔg zsé ngie afʉ̀’ kǔ’?

⁵Yěsô zye léshwóŋó wɔ́b ngie: Pi lag twó sí, ḿbɔ́ɔn nyìŋ léfʉʉ gẅí.

⁶Epʉ̀a tà ńgyɔ́ɔn ge gÿo tÿɔ́g lezíŋ sɔ́ɔn mvfò, awɔ̌wɔ́ɔ ná pɔ́b gɔɔn ngie aa *Nzà’nkÿo, é gɔɔn pú’u, lɔg fʉte pʉ̀a tà ńgyɔ́ɔn.

⁷Pi lá’ ńgwɔ́ tà ńjú’ mé ne ńgɔɔn nò nà mencù mie é kẅɛ̌ nà gẅi shÿó, kà ngʉ̀a shʉ̀shʉ̀a wɔ́, tà pi cÿɔ’. Á ne ńzɛ́te ngie sɛ̌ shúm vɔg ńcʉate, tá á lěen ńdɔgɔ ńgwɔ́ ngie njÿó mǎg wɔ́.

⁸Alá’ ge lá’ lu ssé lÿɔ́’ɔ yetsɔ́, afùɔ túm lu ssé ńdÿɔ́’ɔ wetsɔ̌[15], atsetsá’ ge lá’ pú cʉ’e nà mejʉ’ tà ńgyɔ́ɔn, gwáŋa gíŋe ńgwe. Mɔɔn menò lɔgɔ ńgwɔ́ nzyète ngɔ́’. Tá ńké ńgwɔ́ pɔ́ pá’ múɔ gwoon manzwě shwoŋ la.

⁹Tá’, kwà’ pi máŋwɛ́ cwoŋo ńjú’ gí nò gie á ge gÿo tóo ná pi. Mé ge gÿo lɔgɔ gẅi gʉa jʉ’ gie mé tsɔ́’te ntsaŋ wó, é cúa gẅi mbɔɔ tsɛ̀ɛ *mendá cú’tè pà Yuda, é lɔgɔ gẅi gʉa mvfò megúmnɔ́ɔn pâ mefùɔ melá’ mɔɔn, tá à leen ńké ńnáa gẅi shÿɔ́g lélɔg shwóŋó nò yɔ́ɔn mvfò pɔ́b.

¹⁰Á ké ne ńzɛ́te ngie mé vɔg ńtsẅi nkʉ̀ mbòŋo mbwo melá’ ntsèm tá nò yɔɔn njÿó mag.

¹¹Mé lɔɔn ńgÿo ńgwɔ́ tà ńgwoon gẅí, ńgee ńŋǎg pi, tà pi pú’ mbùm gí ngie pi ge tóo wó é gɔɔn ngie kɔ́ wɔ́, pi gʉa gí gʉa. E Ssé ge kúu jʉ’ó fʉ̀’ó, é ńnéŋe nò ncwò pi, pi gɔɔn. Mèŋ n gɔɔn pá’ɔɔn, mélà’mie, pi ge gʉa tà kúu jʉ’ó, pi zɔ̌ le gíŋe ńgɔɔn nò wɔ́. Azẅìge Ssé zɔ cʉ́’ ńgɔɔn nò nà gí jʉ’.

¹²Nyìŋ ge gÿo gwoon fɛ́ we ná mé zẅé, tá múɔ gwoon míŋ we ńná mé zẅé, egubé ge lá’ lu ssé cʉ́’ megàŋ mbù metá pɔ́b, é gÿo mé zẅé wɔ́b.

¹³Epʉ̀a metsèm ge lá’ pú pʉ̀a gẅi mélà’ mɔ́ɔn, tá’, tá nyìŋ gẅie à kě shÿɔg shÿɔg té kʉ́a zɔ ge gÿo ńtsẅɛ́.

¹⁴Á ge lá’ gwɔ́ fʉ̀’ó, pi gyá nyìŋ gẅie mé tóŋo yé le «nkʉ̀’ʉ ntàgte jʉ’ gẅie mé nyiŋe nyiŋe», à tó ńtyé jʉ’ gie á kɔ’ɔ tè tyé wó wɔ́. (Nyìŋ tóŋo jʉ’ʉ ŋwà’ne yɔɔn, á kag tʉ̀ lényɛte ńjú’). Á poŋ ngie, mé lɔɔn ńdá’ ńgwɔ́ tà ńgyá yé, pʉ̀a pie ée Jẅidea kÿo ńdɔg ye mekwɔ’ɔ́ ńgʉa ńdyeen.

¹⁵Nyìŋ gẅie à ge lá’ gwɔ́ nà tetʉ́a gie áa ntsɔ̀’ ndá, á pɔ́ɔn lésẅɛ́’ ngie à ge píi mmó ndá tá kÿo.

¹⁶Nyìŋ gẅie à ge lá’ gwɔ́ nká’, à pɔ́ɔn lé gɔɔn ngie à ge piŋe ndá ye pí nzsǒ fÿɔ́g ye.

¹⁷Yěe ngɔ́’ le! Tà panzwě pie é ge lá’ gwɔ́ shwoŋ, mbɔɔ pie é ge lá’ ne nóŋe púɔ mepÿɛ́ ná mɛ̌ melyɛ̌’ ge lá’ gwá’a la!

¹⁸Pi sẅíŋte Ssé ngie yɔɔn nò gwaa tó, á le gwɔ́ fʉ̀’ʉ mbʉ̀ŋ wɔ́.

¹⁹Á nue ngʉ̀ngʉ̀ gie e ge lá’ kú pʉ̀a lyɛ’ó ge lá’ pú gyɔ́ɔn tɛ’, tà mbà mé laa zɔɔn ńgyá tsɔ̌ pú’u wɔ́. Tà fó pá’ Ssé la nuŋe njÿó, ńgʉa ńkú fʉ̀’ɔɔn, mé té lá’ gíŋe gyá tsɔ̌ ngɔ́’ pú’u wɔ́.

²⁰Tá ńgwɔ́ gie Ssé laa pé’e ńzɔɔn tè gyá ngie à ge tsẅɛ́te mɛ̌ melyɛ̌’ wɔ́, mbà à lɔɔn ńgwɔ́ tsɔ̌ nyìŋ lá’ le tsẅɛ́. Tá à la lɔgɔ nò pʉ̀a pie à la tsɔ́’ɔ wɔ́b ńdɔg ńgÿo pʉ̀a pé, tá ńtsẅɛ́te melyɛ̌’ amɛ̌.

²¹Pú’u la, nyìŋ ké ńdá’ ńgɔɔn né pi ngie gyá, à *Nzà’nkÿo wɔɔn jʉ’ɔɔn, kà ngie gyá, à gẅi jʉ’e wɔ́, pi pɔ́ɔn lézẅíŋ.

²²Á nue tsɔ́ megàŋ cÿɔ nò ge gÿo kẅɛ, etsɔ́ gɔɔn ngie pɔ́ ée pà *Nzà’nkÿo, petsɔ́ ne ngie pɔ́ ée pà*ntsẅì nkʉ̀ Ssé, é nyɛ meliŋé, é gÿo menò mmɔɔn mmɔɔn lélɔg ńcʉŋte twó pʉ̀a, tà ńgwáa ńgwe pɔ́ lɔg ńcʉŋte mbɔɔ ye pʉ̀a pie Ssé la tsɔ́’.

²³Tá á ké ńgʉa ná pi, mbà mèŋ n kě ńtʉ́ njÿó shwóŋó gẅi nò gie á ne ńtóo, pi laga twó gí.

²⁴Tá’, á ge lá’ gwɔ́ nà mɛ̌ melyɛ̌’, tà mbà yɔɔn ngʉ̀ngʉ̀ tɔ̌g, mé gyá nèm sele síŋ, saŋ le gíŋe ńtʉ́a wɔ́.

²⁵Mecÿɔ́’ saŋ fóo tÿǒ lefaŋ ńgwete ssé, Yɛ̌ mmó ntʉ̀ tʉ̀ wɔ́ gie áa lefaŋ pú ńtága

²⁶Mé leen ńké ńgyá «*Míŋ Nyìŋ gwɔ́ tsɛ̀ɛ melɔ́ɔn, ńne ńtóo», ńgẅiin shʉ́shÿɔ́g mbɔɔ máamáa metʉ̀.

²⁷É túm *mecÿɔ́’ Ssé, pɔ́ cú’te pʉ̀a pé pie à la tsɔ́’ɔ tsɛ̀ɛ njÿó mesǎg lekùa, pɔ́ fó meshÿó meshÿó ńtó.

²⁸Pi pí fʉ̀’ nà tÿǒ tsɔ̀ɔn nzsó. Pi gwɔ̌ tà ńgyá meffò mé kwoe, tà á gíŋe ńzye létáb, pi gɔɔn ngie: Afʉ̀’ʉ lùm ne ńtóo.

²⁹Ndʉŋ ndʉŋ pú’u, pi la’ ńgwɔ́ tà ńgyá mɔɔn menò zye lécʉate, pi zsé ngie afʉ̀’ gie *Míŋ Nyìŋ ge tó, tsoté tà ne ḿbɔ́ɔnte, á tǒ tà ńgwɔ́ ncwò ndá.

³⁰Mèŋ shwóŋó gẅi kwà’ nenʉ́, akwò pʉ̀a pie ée tsɛ̀ɛ njÿó fʉ̀’ɔɔn, té ge lá’ kwéte tà mag, té gwɔ́ gie mɔɔn menò ntsèm tǒ wɔ́.

³¹Lefaŋ pɔ́ tsetsá’ ge gÿo mag, tá’ ashwóŋè yɔ́ɔn lá’ le pyé.

³²Tá’, á ké ńgʉa nà yɛ̌ lyɛ̌’, pɔ́ fʉ̀’ gie mɔɔn menò ge gÿo cʉa, mbà sɔɔn nyìŋ tè zsé, tà mbɔɔ *mecÿɔ́’ Ssé pie ée tÿǒ lepwó, tà mbɔɔ Míŋ Ssé. Ndà’ Tá gílé yé zɔ zsě.

³³Pi ké ńdaga twó gi, tà pi gwá’a lÿɔg, ńdyé. Á nue pi tè ne ńzsé fʉ̀’ gie mɛ̌ menò ge gÿo tó wɔ́.

³⁴Menò fʉ̀’ ayɛ̌ ge gÿo gwɔ́ pá’ nò nyìŋ gẅie à cʉ́’ʉ légʉa legìŋ, ńcʉ́me ndá ye mbwo ngàŋa fa’ yé, ńnáa fà’ gie wɛ̌ nyìŋ wɔ́ ge cʉ́’ ne fa’a, ńdeen ńké ńtsẅii mbwo nyìŋ gẅie à pyɛ́bɛ ncwò nká’ ngie tà á gwá’a lÿɔg ńdyé.

³⁵Mbɔɔ pi gí, tà pi gwá’a lÿɔg ńdyé. Á nue pi tè ne ńzsé fʉ̀’ gie ngàŋ mbʉ̀a ne ńtóo wɔ́. Kà à ge tó pɔ́ mbÿɛ̀ njÿó wɔ́? Kà pɔ́ tsɛ̀ɛ tsẅɛ́’ wɔ́? Kà pɔ́ ntóŋ nkɔ́’ wɔ́? Kà pɔ́ mba’ámba’ wɔ́?

³⁶À vege vege ńtó fʉ̀’ʉ kɔ́ wɔ́, mbà á kaa poŋ ngie à gwaa kẅɛ́te gẅí, pi ne ńdyé wɔ́.

³⁷Anò gie mèŋ n gɔɔn né pi lɔɔn, mèŋ n gɔɔn mbɔɔ mbwo mânyìŋ ntsèm. Tà nyìŋ gwá’a lÿɔg ńdyé.