Read Ngiemboon Malékuse 2 Bible Online

Malékuse 2 - Ngiemboon bible

Malékuse 2

¹É cʉa lyɛ̌’ shÿɔ́’ɔ tsɔ́ wɔ́, Yěsô gíŋ ḿbiŋe Kapernawúm. Mé jú’ ngie aa ndá,

²alá’ pú ńcú’te wó tà ntÿɔgɔ́ kwò tè gíŋe ńgwɔ́ wó wɔ́, tà mbɔɔ ncwò ndá, Yěsô zye léshwóŋó wɔ́b nò Ssé.

³Tsɔ́ pʉ̀a tó, ńgẅiin ngàŋa kwʉ́’te, mbà mbàŋa lekùa tsetsɛ̀ɛ pɔ́b leŋé yé, lélɔg ńtó ńgyá Yěsô.

⁴Alá’ piŋ ńgyɔ́ɔn gyɔ́ɔn, tà pɔ́ té ku’u lényɛɛ yé mbwo Yěsô wɔ́, ńgyá kékáŋ, ńcʉ́’ ḿpfó pɔ́ nzsè gie e gee tÿǒ ndá, ńdeŋte ńtsɔ́’ɔ jʉ’, á gwɔ́ jʉ’ gie Yěsô aa wó, éfó wó sẅé’e nguɔ wɔ́b nê kǔ wé, ńtÿɔ́gɔ mvfò yé.

⁵Yěsô gyá ntí gie mbàŋa ŋwɛ́ lɔ̌g ńzáb ntʉ́m ná yé, ńgɔɔn né ngàŋa kwʉ́’te ngie: Míŋ wɔ̀ɔn, mé legé menò tepòŋ mú ńnáa mbwo gù.

⁶Etsɔ́ *pàkyàgte lepʉ̌ Mǒsê gwɔ́ jʉ’ó, ńjú’, ńkwaŋte lóŋ pɔ́b ngie:

⁷Nyìŋ wɔɔn shwóŋó lêkɔ́ lɛ? À zoonté Ssé. E Ssé gílé yé zɔ ku’u lélege menò tepòŋ nyìŋ.

⁸Yěsô gwóon ńzsé mmó gie pɔ́ ne ńkwaŋa, ńzɛ́te wɔ́b ngie: Pi gǎ ńgẅiin yɛ̂ ntí nkwaŋá ntʉ́m pi?

⁹Pi gyǎ gí ngie á zeŋe pɔ́ légɔɔn né ngàŋa kwʉ́’te ngie mé legé menò tepòŋ mé, kà pɔ́ légɔɔn ngie à lu ssé ńkaa kǔ wé ńdɔg ńgʉa?

¹⁰Mèŋ n ge ké nyɛɛ gẅi ngie, áa ndùmo Ssé tsetsá’, mbà mé la ná tʉ̀ né *Míŋ Nyìŋ, lélɔg ńdege menò tepòŋ pʉ̀a mesoŋ ńnáa mbwó pɔ́b. Yěsô zɛ́te pɛ́’ɛ̀, ńdeen ńké ńgɔɔn né ngàŋa kwʉ́’te ngie:

¹¹Lu ssé, ńkaa páŋte gù ńdɔg ńgʉa né mbʉ̀a gù.

¹²Á gwóon ńdu ssé, ńkaa páŋte we, ńdɔg ńně ńgee, alá’ ne ńdíe, á pú ńně ńkʉ’ʉ wɔ̌ɔwɔ́ɔ. Pɔ́ ne ńgu’te Ssé ńgɔɔn ngie: Peg laa zɔɔn ńgyá yɔɔn ntí nò wɔ́!

¹³Yěsô la gíŋe ḿbiŋ nzèm nkwɔ’ɔ́ ntse Galilea. Alá’ ne ńtóo ńkẅɛ́te yé, á ne ńzí’i wɔ́b nò Ssé.

¹⁴Á ne ńgiŋe, ńgyá Lěvi míŋ Alfe, á ńnéŋe jʉ’ gie mé kẅé ncùb pà *Roma wó. Yěsô gɔɔn né yé ngie: Tóo pɔgɔ zɔ cʉ́’ʉ ńgiŋe. Lěvi lu ssé ńcʉ́me nzèm yé.

¹⁵Yěsô pâ *ngàŋa kwò yé gÿo ńgʉa mbʉ̀a Lěvi léjÿó mmó, pâ pʉ̀a tà ńgyɔ́ɔn ne ńjÿó mmó, lelÿò gwɔ́ *pàkẅé ncùb, tà mbɔɔ pʉ̀a pie pà Yuda lɔ́ɔn ńtóŋo wɔ́b lé pʉ̀a tepòŋ, ńtí pʉ̀a ápɛ̌ laa nzèm Yěsô tɛ’.

¹⁶*Pàkyàgte lepʉ̌ Mǒsê pie é laa nà nùɔ pà *farisay, gyá pá’ Yěsô pâ pʉ̀a ápɛ̌ ne ńjÿó mmó, ńzɛ́te *ngàŋa kwò yé ngie: Á gÿo lêkɔ́ tá gẅi pâ ńtí pʉ̀a pɛ̂ tem ngwʉ̌ŋ?

¹⁷Yěsô jú’, ésaga mbwo pɔ́b ngie: Ńgwɔ́ nyìŋ le gwɔ́ ntentʉ́, ńgʉa fa’a ngÿo meffò wɔ́. Nyìŋ guɔ tá fa’a yé. Mèŋ n ka tè tó pɔ́ létóŋ pʉ̀a pie pɔ́ kwaŋ ngie pɔ́ ée pʉ̀a membòŋo ngie pɔ́ piŋe mbwo Ssé wɔ́. Mèŋ n ka tǒ ńtí pɔ́ megàŋ mefʉ̀a.

¹⁸Á láa tsɔ́ lyɛ̌’, *ngàŋa kwò Jâŋ Mbabtis pâ pà *farisay ne *ńkwoŋo kwoŋ ńnéŋe nzyè, ésẅíŋte Ssé. Etsɔ́ pʉ̀a tó ńzɛ́te Yěsô ngie: *Ngàŋa kwò Jâŋ pâ pé pà *farisay kwoŋ kwoŋ ńnéŋe nzyè, ésẅíŋte Ssé. E pú piŋ ńké tè gÿo yɔ́b pú’u wɔ́, mélà’a kɔ́?

¹⁹Yěsô tsɔ́’ɔ mbwo pɔ́b ngie: Tà à lɔɔn ńgwɔ́ mé gʉa ńzíŋ leluŋó nyìŋ, á nyé ńnéŋe ńnéŋe, pʉ̀a pie mé ně ńtóŋ ńnéŋe nzyè lêkɔ́? Pâ pɔ̌ lɔɔn ńnyé ńnéŋe ńnéŋe, mbà pɔ́ ge ké pfɛ́ pɔ́ mmó.

²⁰Tá’, mé ge lá’ fó mbwo pɔ́b tsɔ́ lyɛ̌’, ésa’a yé, pɔ́ leen ńké ńnéŋe nzyè fʉ̀’ó.

²¹À lɔɔn ńgwɔ́ nyìŋ le lɔgɔ mmó nzsǒ sẅé, ńdɔg ńtsɛ́ lepÿé ná nzẅìŋe nzsǒ wɔ́. Nyìŋ gÿo pú’u, mbà mmó nzsǒ sẅé ge kẅi’i shʉa nzsǒ, lepÿé pú fáŋ.

²²Mé lɔɔn ne ńgee ńde’e melù’ tsɛ̀ɛ ntú’ *ngùb[2], mbà mé té néŋ melù’ mie mé nyé ńtsɔ́’ɔ tsɛ̀ɛ nzẅìŋe ntú’ wɔ́. Mé lɔɔn ńgÿo pú’u, mbà melù’ sẅé ge fu’, éshʉ́a nzẅìŋe ntú’, mé sɔ́ɔn melù’, ésɔ́ɔn ntú’. Á ne ńzɛ́te ngie mé néŋ mélù’ me sẅé pɔ́ tsɛ̀ɛ ntú’ ye sẅé.

²³Á gÿo ńgwɔ́ *lyɛ’ɛ́ nzsè pà Yuda, Yěsô pâ *ngàŋa kwò yé ne ńcʉa tsɛ̀ɛ nká’a ngesáŋ ntsíŋ, *ngàŋa kwò yé zye lésẅe ngesáŋ.

²⁴Tsɔ́ pà *farisay gyá, ńgɔɔn né Yěsô ngie: Líe jú tá ńgyá! *Ngàŋa kwò ɔ́ gÿo mmó gie *lepʉ̌ ségè tɔ’ɔ légÿo nà lyɛ’ɛ́ nzsè mélà’a kɔ́?

²⁵Yěsô tsɔ́’ɔ mbwo pɔ́b ngie: Pi laa fó ńtóŋo jʉ’ʉ ŋwà’ne Ssé gie á la’te mmó gie fùɔ Ndavíd la gÿo wɔ́ kà? Mèŋ n gɔɔn fʉ̀’ gie nzyè la gyáŋa yé, anò cʉa wɔ́ba pʉ̀a pé.

²⁶Á laa fʉ̀’ó, Abiatar gwɔ́ *tándá pànùŋe pwɔ́’, Ndavíd kúu jʉ’ gie mé nuŋo pwɔ́’ wó, ḿbí mbelég gie mé náa mbwó Ssé, ḿpfɛ́ tà ńná ye pʉ̀a pé, tá *lepʉ̌ ségè zɛ́te ngie ndà’ *pànùŋe pwɔ́’ zɔ pfɛ́. Tá’, fùɔ Ndavíd la pí ḿpfɛ́ tà ńná yé *ngàŋa kwò yé.

²⁷Yěsô gíŋe ńgɔɔn né pɔ́b ngie: E Ssé la gÿo lyɛ’ɛ́ nzsè ńnáa mbwo nyìŋ mesoŋ, à lɔ̌ɔn tě ńgÿo nyìŋ mesoŋ ńnáa mbwo lyɛ’ɛ́ nzsè wɔ́.

²⁸Áa pú’u, tá *Míŋ Nyìŋ zɔ zɔɔn ńgẅiin légɔɔn mmó gie à lɔɔn ńgwɔ́ mé gÿo tà mbɔɔ ná *lyɛ’ɛ́ nzsè pà Yuda.