Read Ngiemboon Malékuse 3 Bible Online

Malékuse 3 - Ngiemboon bible

Malékuse 3

¹Yěsô gÿo ńgíŋe ńgʉa tsɛ̀ɛ tsɔ́ *ndá cú’tè pà Yuda, atsɔ̌ nyìŋ gwɔ́ yé ndá ŋwɛ́, mbà pwó yé léen ńkwé.

²Epʉ̀a gwɔ́ jʉ’ó, ńně ńdeŋe yé légyá kà à ge gÿo nyìŋ ŋwɛ́ zeŋe *lyɛ’ɛ́ nzsè wɔ́, pɔ́ fó mǒ, ésẅiŋe yé.

³Yěsô gɔɔn mbwo kwè pwó ŋwɛ́ ngie: Lu ssé ńtó ńtyé mvfò,

⁴ńdeen ńké ńgɔɔn mbwo pʉ̀a ŋwɛ́ ngie: *Lepʉ̌ ségè ée pé’e ńtsẅi ngie mé gÿo kɔ́ lyɛ’ɛ́ nzsè? Ńgie mé gÿo nò mbòŋo kà nò tepòŋ? Ńgie mé gÿo nyìŋ tsẅɛ́ kà pɔ́ ngie mé zẅé yé? Tsoon nyìŋ wɔ́b tè tsɔ́b.

⁵Yěsô paŋ lejÿɔ́g ńdɔg ńdíe wɔ́b, mbùm yé ne ńtsyɛte ńtí tʉʉ twó yɔ́b, á leen ńké ńgɔɔn mbwo mámbàŋa ŋwɛ́ ngie: Siŋe pwó ɔ, á siŋ. Mé gyá á tʉte.

⁶Pà *farisay leen fó *ndá cú’tè ńkẅɛ, pâ pʉ̀a *Herôd gwóon ńcú’te léfa’ shÿó pá’ pɔ́ ge gÿo tá zẅé Yěsô.

⁷Yěsô pâ *ngàŋa kwò yé gÿo ńgʉa lê ngʉ̀ŋe máamáa letʉ̀ŋ Galilea. Menùɔ lá’ tà ńgyɔ́ɔn cʉ́me nzèm yé, éfóo ngwòŋ Galilea mbɔɔ ngwòŋ Jẅidea,

⁸tà mbɔɔ tÿǒsoŋo Yerósalem. Petsɔ́ fóo gwoŋó Idẅime, etsɔ́ fóo tà mbɔɔ nzǐŋ ntse Jurdeŋ, ńgÿo pʉ̀a pie é ńnéŋe ḿbɔ́ɔnte Tir pɔ́ Sidoŋ. Pɔ́ tóo pú’u, légyá Yěsô, mélà’mie pɔ́ la ne ńjú’u kɔ̀ɔkɔ́ɔ gie à ne ńgÿo.

⁹Yěsô gyá pú’u, ńgɔɔn mbwo *ngàŋa kwò yé ngie, pɔ́ cwoŋte mûɔ mékanú’, à kúu tsoló, ḿbɔ́gɔ lá’ lésẅɛ́ɛ yé.

¹⁰Á gwaa gwɔ́, mbà à pǔ ńgÿo pʉ̀a tà ńgyɔ́ɔn sẅéte, tà pʉ̀a metsèm pie guɔ laa ná pɔ́b nɔ́ɔnte yé, ńzába pwó nà yé, mélà’mie à la ne gÿo pʉ̀a tà ńgyɔ́ɔn zeŋe.

¹¹Epʉ̀a pie *messé tepòŋ la ne ḿbue wɔ́b lɔ́ɔn ńgwɔ́ tà ńgyá Yěsô, ńnuŋe mekwò yé, ńdɔgɔ ngyè tetʉʉ ńgɔɔn ngie: «Ɔɔ Míŋ Ssé».

¹²Tá’ Yěsô ne ńtɔ’ɔ wɔ́b tà ḿbʉ́ʉ tɛ’ ngie pɔ́ pɔ́ɔn légÿo mé zsé nyìŋ gẅie aa wɛ̌.

¹³Yěsô gÿo ńkwɔ́’ɔ ndùm lekwɔ’ɔ́, ńtóŋ pʉ̀a pie à tsɔ’ɔ́ wɔ́b. Pɔ́ tó,

¹⁴á gʉa tsetsɛ̀ɛ pɔ́b ńdɔg pʉ̀a ntsɔ́b pʉ́a nê legém, légwɔ́ gie pâ pɔ́ ge gwɔ́, ḿbiŋ ńtsẅi lezíŋ sɔ́b lé *ngàŋ ntúm, léneŋe ńtúmo wɔ́b pɔ́ shwóŋó nò Ssé,

¹⁵ḿbiŋ ńku’u léjwoŋ *messé tepòŋ mie é pue pʉ̀a.

¹⁶Pʉ̀a pie à la tsɔ́’ɔ wɔ́b, e pɔɔn: Wɔɔn laa Símo, á tsẅi lezíŋ sé lé Piɛ,

¹⁷wɔɔn gwɔ́ Jâg pɔ́ fɛ́ we Jâŋ, é gwɔ́ gubé zebede. Yěsô tsẅi lezíŋ sɔ́b lé Mboanergès, é lɔgɔ ńgɔɔn ngie, epúɔ lefàŋ sie é vɛ́te.

¹⁸Yěsô gíŋe ńtsɔ́’ɔ Ndeléya, pɔ́ Filib, ńgÿo Patelemî nê Matio, pɔ́ Tomáse, ńgÿo Jâg míŋ Alfe, ńgÿo Tadé nê Símo mûɔ ngwòŋ,

¹⁹ḿbiŋ ńgÿo Jẅidas Iskariod gẅie à la táa sẅiŋe Yěsô.

²⁰Yěsô kúu ndá, alá’ gíŋe ńcú’te ńgyɔ́ɔn gyɔ́ɔn tà pâ *ngàŋa kwò yé té gyá fʉ̀’ tà ḿpfɛ́ɛ mmó wɔ́.

²¹Epʉ̀a tsìŋe ndá pà Yěsô jú’u yɔɔn nò, ńdu ssé, ńcʉ́me mánzsè pá’ pɔ́ ge gʉa gwoon yé, ńně ńkwaŋa ngie twó yé cʉŋté.

²²Mbà tsɔ́ *pàkyàgte lepʉ̌ Mǒsê ně fó Yerósalem ńcwóŋ ńtó, ńgɔɔn yɔ́b ngie: E *Ssé tepòŋ gie mé tóŋo lé Mbelzebùl zɔɔ ná yé. À lɔgɔ pɔ́ metʉ̀ tándá *messé tepòŋ.

²³Yěsô tóŋo wɔ́b pɔ́ tó, á saga mbwo pɔ́b ngie: Tà áa nénʉ́ ngie à lɔɔn ńgwɔ́ Sátà sele ńjwoŋo twó mbùm yé lá?

²⁴Epʉ̀a tà’a lá’ lɔɔn sele ńdÿɔ́’ ncù tsetsɛ̀ɛ pɔ́b, mbà yɛ̌ lá’ ge pyé.

²⁵Epʉ̀a tà’a tsìŋe ndá piŋ sele ńtág mélà’ tsetsɛ̀ɛ pɔ́b, mbà yɛ̌ tsìŋe ndá ge tága.

²⁶Sátà lɔɔn sele ńdÿɔ́’ɔ twó mbùm yé, kà fagte zɔ̌ gwɔ́ tsɛ̀ɛ sé lefùɔ wɔ́, mbà lefùɔ sé ŋwɛ́ té ge tyé wɔ́, mbà à yé nò ge mag.

²⁷Atsɔ̌ nyìŋ té wó gẅie à lɔɔn ńgwɔ́, á pwɔ́’ ndá tántʉ̀, ńkaa shúm sé té gwɔ́ gie à vɔg ńkwɛ́ɛ yé wɔ́. À vɔg tà ńkwɛ́ɛ yé, á ku’u lékúu ndá, ḿbú ńkaa shúm sé ntsèm.

²⁸Tà mèŋ ńke shwóŋó gẅí, kwà’ nénʉ́, à lɔɔn ńgwɔ́ Ssé lá’ ḿbú ńdege menò tepòŋ pʉ̀a mesoŋ ntsèm ńnáa mbwo pɔ́b, tà mbɔɔ meshwóŋè ntsèm mie pɔ́ lɔgɔ ńzoonte yé.

²⁹Tá’, nyìŋ lɔɔn ńzoonte Zẅìge Ndʉalʉ̌a, mbà tsɔ̌ lélá’ ńdege ńnáa mbwo ngàŋ à tè gíŋe ńgwɔ́ wó wɔ́, mélà’mie à gẅiin menò tepòŋ mie é téen ńdá’a ḿmaga wɔ́.

³⁰Yěsô lɔ̌ɔn ńgɔɔn mbwo pɔ́b pú’u, mélà’mie pɔ́ la ne ńgɔɔn ngie metʉ̀ mé fóo pɔ́ mbwo *Ssé tepòŋ.

³¹Má pà Yěsô pâ mefɛ́ pé leen ńke ńtó, ńtyé ncwò ndá, ńtúmo nyìŋ ngie à gʉa ńtóŋo yé ńná né pɔ́b.

³²Alá’ pú ńnéŋe Ssé, ńtÿɔ́’te Yěsô ńnéŋe soŋ, mé gɔɔn mbwo yé ngie: Mé gɔ̌ɔn ngie má ɔ pâ mefɛ́ pú ée pi ńně fa’a ɔ.

³³Á tsɔ́’ ngie, má wɔ̀ɔn aa wɔ̌, mefɛ́ pɔ́ɔn gwɔ́ pàwɔ̌?

³⁴Ńgɔɔn pú’u, ésele ńdíe pʉ̀a pie é tÿɔ́’te yé ńnéŋe soŋ, ńgɔɔn ngie: Má wɔ̀ɔn pâ mefɛ́ pɔ́ɔn pɔ̀ɔn pie pɔ́ ńnéŋe lɔɔn.

³⁵Pi zsé ngie nyìŋ lɔɔn ńgÿo mmó gie Ssé ne ńkwoŋo, mbà ngàŋ aa má wɔ̀ɔn, mbà aa fɛ́ wɔ̀ɔn, we mámbàŋa mbɔɔ we manzwě.