Read Ngiemboon Malékuse 5 Bible Online

Malékuse 5 - Ngiemboon bible

Malékuse 5

¹Yěsô pâ *ngàŋa kwò yé túm ntse tà ńkúu nà yetsɔ́ nzǐŋ, é gwɔ́ ngwòŋ pà Garazania,

²ńně fóo tsɛ̀ɛ kanú’ ńkẅɛɛ, atsɔ̌ nyìŋ gwóon ńkẅɛ ńtóo mvfò yé, éfóo mvwɔ́’ metóon, á gwɔ́ jʉ’ gie mé túŋo mepfó wó, ńgwɔ́ nyìŋ, mbà *ssé tepòŋ léen ńgwoon yé, ńně ḿbue yé.

³À lɔ̌ɔn ńtsẅé pɔ́ mvwɔ́’ metóon ŋwɛ́, nyìŋ piŋ tè wó gẅie à lɔɔn ńgwɔ́ á gíŋe ńku’u lékwɛ́ɛ yé wɔ́, tà mbɔɔ lê tsên wɔ́.

⁴Á gwɔ́, mbà mé lǎ zye ńnéŋe *kɔ̌’ mekwò yé, ńdɔgɔ tsɛ̂n ńkwɛ́ mbwó mé, á pú ḿbwɔ́’te *kɔ̌’, ńzá’te metsɛ̂n tà tsɔ̌ nyìŋ tè gíŋe ńku’u ná yé wɔ́.

⁵Á gwɔ́ kà zsǒ wɔ́, kà tsẅɛ́’ wɔ́, ńgwá ḿbúu, éfóo mvwɔ́’ metóon ńgee ndùm lekwɔ’ɔ́ ńga’te, ńně ńdɔgɔ metóon ńgwate mbùm ye.

⁶Á tyé ngʉ̀a shʉ̀shʉ̀a, ńgyá Yěsô pú’u, ńnɔ́ɔnte yé ńtó ńnuŋe mekwò yé,

⁷ńdɔg ngyè tetʉ́ʉ ńga’te ngie: Yěsô Míŋ Ssé gẅie à pi’i kɔ̀ɔkɔ́ɔ, ɔ̀ kẅé kɔ́ mbwo mèŋ? Tsétsɔ’, mèŋ n dɔ̌g lezíŋ Ssé sẅíŋte gú ngie, ɔ̀ pɔ́ɔn lé ńnéŋe wɔ̀ɔn tsɛ̀ɛ ngɔ́’?

⁸Nyìŋ ŋwɛ́ la gwaa gɔɔn pú’u, á gwɔ́, mbà Yěsô tsẅǐ né *messé tepòŋ ngie pɔ́ fó ná yé ńkẅɛ.

⁹Yěsô zɛ́te nyìŋ ŋwɛ́ ngie: Lezíŋ shú ée le wɔ̌? Á tsɔ́’ɔ mbwo yé ngie: Lezíŋ sɔ́ɔn ée le menùɔ, mélà’mie peg *messé tepòŋ gyɔ́ɔn gyɔ̌ɔn,

¹⁰ńnyɛte sẅíŋte Yěsô ngie: Tsétsɔ’, tà á jwoŋ messé ŋwɛ́ tà pɔ́ fóo lá’ ayɛ̌ ńgʉa.

¹¹Á la gwaa gwɔ́, atsɔ́ nùɔ mekúnɔ́ɔn gwɔ́ jʉ’ó, á ndùm lekwɔ’ɔ́ ńně ńgwá ńkʉ́’ʉ fa’a shúm ḿpfɛ́ɛ.

¹²*Messé tepòŋ sẅíŋte Yěsô ńgɔɔn ngie: Gÿo peg kú pɔ́ nà mekúnɔ́ɔn pɛ̂.

¹³Yěsô zẅíŋ, *messé tepòŋ leen ńké fóo ná nyìŋ ŋwɛ́, ńkẅɛ ńkúu nà mekúnɔ́ɔn. Anùɔ mekúnɔ́ɔn pú ńtága fó ndùm lekwɔ’ɔ́ ḿbʉle ntse, ńnú ntse ńkwéte. Pɔ́ laa mmó ntsá’ yépʉ́a.

¹⁴Pʉ̀a pie pɔ́ la ne ḿpféle mekúnɔ́ɔn gyá pú’u, ńkÿo, ńgʉa ḿbú ńdɔgɔ nò gie pɔ́ gyǎ, ésaa tÿǒsoŋ, tà mbɔɔ lá’. Alá’ kwɔ́’, ńtó ńgyá mmó gie á gÿǒ,

¹⁵ńgʉa tà ńkúu lejʉ́ŋ Yěsô, ńgyá nyìŋ gẅie *messé tepòŋ laa ná yé tà ńgyɔ́ɔn gyɔ́ɔn la, á ńnéŋe ḿma’ menzsǒ, mbà legyè sé pǐŋ, pɔ́ pú ḿbɔ́g tɛ’.

¹⁶Tsɔ́ pʉ̀a gwɔ́ jʉ’ó, mbà pɔ́ ně ńgyá mmó gie á gÿǒ nyìŋ awɛ̌ mbàa mekúnɔ́ɔn. Pɔ́ ne ḿbíte shwóŋó pʉ̀a pie é tǒ nzèm.

¹⁷Mé jú’, ńzye lésẅíŋte Yěsô ngie à fó lá’ pɔ́b ńgʉa.

¹⁸Yěsô ne ńkúu tsɛ̀ɛ kanú’ pá’ à ge cʉ́’ gʉa yé gʉa, nyìŋ wá gẅie à zeŋé la, sẅíŋte yé ngie à zẅíŋ, pɔ́ ye gʉa.

¹⁹Yěsô lʉ’, ńgɔɔn né yé ngie: Piŋ nê mbʉ̀a gù, ńkẅɛte pʉ̀a pú, éshwóŋó wɔ́b máa nò mbòŋo gẅie Cʉ̀apʉ̀a gÿǒ ná gú, éshwóŋó wɔ́b pá’ à tsɔ̌ɔn mezìŋe mú.

²⁰Nyìŋ ŋwɛ́ leen ńké ńgʉa ńgwá ńgiŋe tsɛ̀ɛ melá’ ŋwɛ́ ntsèm, ńně shwóŋó nò gie Yěsô ně ńgÿo ná yé. Pʉ̀a metsèm jú’u á kʉ’ʉ wɔ́b tɛ’. Mé tóŋo yɛ̌ pàga lá’ lê Metÿǒsoŋ Legém.

²¹Yěsô lɔgɔ kanú’ ńtúm ntse tà ńkúu nà yetsɔ́ nzǐŋ. Máamáa nùɔ lá’ cú’te lejʉ́ŋ ye. Á nyé ńgwɔ́ pɔ́ nkʉ̀ŋ ntse,

²²atsɔ̌ nyìŋ tó, lezíŋ sé gwɔ́ le Yayelo, á gwɔ́ tsɔ̌ tà’ nà melÿò tsɛ̀ɛ *ndá cú’tè pà Yuda, ńgwɔ́ tà ńgyá Yěsô, ńdeen ńnuŋe mekwò ye,

²³ḿbú’ mbwó ngie: Tsétsɔ’ míŋ wɔ̀ɔn we manzwě à cʉ̌’ ńgwɔ́ pɔ́ ncwò legwé, tóo, ńzáb mbwó mú ná ye, à sẅéte ńtsẅɛ́.

²⁴Yěsô zẅíŋ, pɔ́ yé cʉ́me mánzsè ńně ńgee, alá’ pú ńgwɔ́ mánzsè tɛ’, ḿbú ne sẅɛ́ɛ Yěsô.

²⁵Atsɔ̌ manzwě gwɔ́ yé nùɔ, ńně ńguɔ, ńgẅiin guɔ máshúɔ, mbà á gegé yé gege ngù’ ntsɔ̀b pʉ́a lê legém.

²⁶Mbà à lǎ giŋe mbʉ̀a megàŋa ffo tà ńkʉ́a, ḿbú ńcʉŋte ye nkáb tà é mag, ńké tè sẅéte, tà ńcʉ́’ pú’u, aguɔ kẅi’i kẅi’i.

²⁷À la jú’ pá’ mé gɔɔn ngie Yěsô ne ńgÿo pʉ̀a zeŋe, á ná’te fó nzèm ńtó ńkíbe nzsǒ Yěsô,

²⁸ńně ńgɔɔn ntʉ́m yé ngie: N dɔɔn ńkíbe pɔ́ ndà’ nzsǒ Yěsô, mbà n ge zeŋe,

²⁹ńdeen ńkíbe, aguɔ yé gwóon ńzá’a, á gíŋe ńjú’, mbà à zeŋé.

³⁰Yěsô gwóon ńjú’ pá’ tsɔ́ metʉ̀ kẅɛ̌ mbùm yé, ésele nnɛ́ ńdíe lá’, ńzɛ́te ngie: À wɔ̌ kibé nzsǒ yɔ̀ɔn?

³¹*Ngàŋa kwò yé tsɔ́’ ngie: Ɔ̀ gyǎ alá’ pú ne sẅɛ́ɛ gú zẅìŋ wɔɔn, ɔ̀ gíŋe ńzɛ́te ngie à wɔ̌ kibé nzsǒ jù wɔ́ la?

³²Yěsô ké sele pɔ́ nnɛ́ ńně ńnáŋte, éfa’a lézsé nyìŋ gẅie à kibé yé.

³³Manzwě ŋwɛ́ cʉ́’ʉ ḿvɛɛ vɛ, ńtí nue à la zsé mmó gie á cʉ̌a ná ye, ńdeen ńké ńtó, ńnuŋe mekwò Yěsô, ḿbú shwóŋó yé kwà’ nò gie á cʉaté ntsèm.

³⁴Yěsô gɔɔn né ye ngie: Míŋ wɔ̀ɔn, pá’ ɔ̀ zǎb ntʉ́m ná mèŋ la, ɔ̀ zeŋé, gʉa lê mbʉ́lè, aguɔ jú mǎg.

³⁵Yěsô nyé ńgɔɔn nò né manzwě ŋwɛ́ gɔɔn, etsɔ́ ntá’ pʉ̀a fóo mbʉ̀a Yayelo, ńtó shwóŋó yé ngie míŋ we ně ńdá’ ńkwé, ngie tà á gíŋe ḿbége Ndè.

³⁶Yěsô jú’ pá’ fʉ̀’ gie à kaa jú’u la, ńgɔɔn né Yayelo ngie: Tè pɔ́g, záb pɔ́ ntʉ́m ná mèŋ.

³⁷Yěsô pɔ́ Yayelo ne ńgee, Yěsô tè zẅíŋ ngie tsɔ̌ nyìŋ cʉ́me nzèm pɔ́b wɔ́, ndà’ Piɛ ńgÿo Jâg pɔ́ fɛ́ we Jâŋ.

³⁸Pɔ́ gʉa tà ńkúu ndá Yayelo, Yěsô gyá mé pú ńgwɔ́ wó ńně ḿbége jʉ’, epʉ̀a ne ńdʉate, petsɔ́ ne ńga’te.

³⁹Yěsô kúu ndá ńgɔɔn né pɔ́b ngie: Pi pǔ ḿbége jʉ’, ńdʉa nzẅìŋ wɛ̂ mélà’a kɔ́? Múɔ kaa kwé, à lye lyě.

⁴⁰Pɔ́ jú’, ńgẅe yé gẅe. Á gÿo pʉ̀a metsèm fóo ndá ńkẅɛ, tà é cʉ́’ ndà’ tá múɔ pɔ́ má múɔ, ńgÿo *ngàŋa kwò yé yɛ̌. Pâ pɔ̌ kúu tsɛ̀ɛ lûm ndá, á jʉ’ gie múɔ nuŋe wó.

⁴¹Yěsô kú’te pwó múɔ, ńgɔɔn né yé ngie: Talita kum, ńdɔgɔ ńgɔɔn ngie: Múɔ manzwě, lu ssé.

⁴²Múɔ gwóon ḿbʉ’ʉ nnɛ́, ńdu ssé ńzye légiŋ. Pɔ́ gyá á pú ńkʉ’ʉ wɔ́b tɛ’. Múɔ laa mûɔ ngù’ ntsɔ̀b pʉ́a nê legém.

⁴³Yěsô pú ńtɔ’ɔ wɔ́b ngie pɔ́ pɔ́ɔn légÿo tà tsɔ̌ nyìŋ ndyɛ̀’ɛ zsé mmó gie à gÿǒ, ḿbiŋ ńtsẅi ngie mé náa mmó à jÿó.