Read Ngiemboon Malékuse 7 Bible Online

Malékuse 7 - Ngiemboon bible

Malékuse 7

¹Á gwɔ́ tsɔ́ lyɛ̌’, etsɔ́ pʉ̀a pie é fóo Yerósalem tó ńcú’te lejʉ́ŋ Yěsô, ńgwɔ́ pà *farisay pâ *pàkyàgte lepʉ̌ Mǒsê,

²ńgyá *ngàŋa kwò Yěsô ne ńjÿó mmó nê *lɔ̌’ nà mbwó mɔ́b, é mbwó mie pɔ́ kaa tsabte.

³Pà *farisay pâ pà Yuda metsèm té pfɛ́ɛ mmó té vɔg ńzate ntse nà mbwó mɔ́b tà ńkúu nà ntsìŋe pwó yɔ́b, pá’ nùŋe pà mvfò wɔb ne ńzɛ́te wɔ́,

⁴ńgʉa sɔ̌ɔn tà ḿbiŋ, ḿvɔg ńkẅile *lɔ̌’ ná pɔ́b, tá ńjÿó mmó. Pɔ́ gíŋ ńkú’te tsɔ́ mbʉ̌ tà é gyɔ́ɔn, é mie nùŋe ngwòŋ la záb, ńdɔg ńnyɛɛ wɔ́b ntí lesɔgɔ *lɔ̌’ nà mentú’ mbɔɔ nà mekʉ̀ŋ, mbɔɔ ná mekáŋ, (tà mbɔɔ nà mekǔ).

⁵Á cʉa pú’u, tá pà *farisay pâ pàkyàgte *lepʉ̌ Mǒsê ŋwɛ́ zɛ́te Yěsô ngie: *Ngàŋa kwò jú jÿó mmó nê *lɔ̌’ nà mbwó mɔ́b. Pɔ́ té giŋe ná nùŋe pà mvfò wɔ́ ńdɔgɔ ngǎ?

⁶Yěsô tsɔ́’ɔ mbwo pɔ́b ngie: Pi ee pà nkwòŋ menÿɔ́g. Esǎya, *ntsẅì nkʉ̀ Ssé lɔ̌ɔn fóon ńgɔɔn pá’a shwóŋó nò, pá’ à la ŋwe’e ńtí mà gẅi ńgɔɔn ngie: Epʉ̀a pɛ̂ lɔgɔ pɔ́ ndà’ ncwò wɔ́b ńgu’te wɔ̀ɔn, ntʉ́m wɔ́b té ná mèŋ wɔ́.

⁷Pɔ́ ne ńgu’te wɔ̀ɔn, tá nò té mǒ wɔ́, ńtí nò gie pɔ́ ne ńzí’i menò pʉ̀a mesoŋ mbwo pʉ̀a ngie áa nò yɔ́ɔn[5]

⁸Yěsô leen ńké ńgɔɔn mbwo pɔ́b ngie: À yɛ̂ gie pi pe’e *lepʉ̌ Ssé ńnáa nzèm, ńcʉ́’ʉ ńkú’te pɔ́ se pʉ̀a mesoŋ lɛ.

⁹Pi zsé légwá’ *lepʉ̌ Ssé, ńcwoŋo ńkú’te pɔ́ nùŋe lá’ gẅi mboŋó.

¹⁰Mèŋ n gɔɔn nue Mǒsê la gɔ́ɔn ngie: «Gÿo mekù’ tá gù pɔ́ má gù, ńgíŋe ńgɔɔn ngie nyìŋ lɔɔn ńzoonte tá we kà pɔ́ má we wɔ́, mé zẅé ngàŋ[6]».

¹¹Tà á gʉa ná pi, pi gɔɔn gí ngie: Nyìŋ lɔɔn ńgɔɔn mbwo tá we kà má we wɔ́ ngie: Akɔ́ɔkɔ́ɔ gie à lɔɔn ńgwɔ́ á lɔg ńkẅéte yé cʉ́’ ńgwɔ́ pɔ́ “Korban”, ńdɔgɔ ńgɔɔn ngie: Á cʉ́’ʉ ye Ssé,

¹²mbà pi ge zẅíŋ ngie à té gíŋe ńgẅiin lékẅéte tá we pɔ́ má we wɔ́.

¹³Pi zí’i nùŋe lá’ gẅi pú’u, ńdɔgɔ ńgwá’a shwóŋè Ssé. Pi giŋé ńne ńgÿo lìi menò ámɛ̌ tà é gyɔ́ɔn gyɔ̌ɔn.

¹⁴Yěsô gíŋe ńtóŋo lá’ ńgɔɔn né pɔ́b ngie: Pi metsèm téŋe tuŋó, ńcwoŋo ńjú’u nò gie mèŋ n gee ngɔ̌ɔn.

¹⁵Atsɔ́ mmó gie ńgwɔ́ á fó nzème pǐ, ńkúu ná nyìŋ tà ńnéŋe *lɔ̌’ ná yé á té wó wɔ́, a gie á fó tsɛ̀ɛ ntʉ́m yé zɔ̌ ńnéŋe *lɔ̌’ ná ye.

¹⁶[Nyìŋ lɔɔn ńgẅiin metuŋó lélɔg ńjú’u nò, á jú’]

¹⁷Yěsô gÿo nyé lá’, ńgʉa tà ńkúu ndá, *ngàŋa kwò yé zɛ́te yé ngie à kyagte nò gie à foo légɔɔn, éshwóŋó wɔ́b.

¹⁸Á gɔɔn né pɔ́b ngie, ńzsé ngie sí legyè nyé ḿvɔ́g vɔ́g pá’ se petsɔ́ pʉ̀a gwâ? Ammó gie á fó nzème pǐ ńkúu ná nyìŋ, á té *lɔ̌’ ná ye néŋ.

¹⁹Á té kúu tsɛ̀ɛ ntʉ́m ngàŋ wɔ́, á kú pɔ́ tsɛ̀ɛ lepfòm sé, ńkẅɛ ńkúu tsɛ̀ɛ kwɛ. Yěsô lɔgɔ ńgɔɔn ngie: ammó gie mé jÿó jÿǒ zɔ̌ té gie áa mvfò Ssé ńgwɔ́ gie á ńnéŋe *lɔ̌’ ná nyìŋ wɔ́,

²⁰ńgíŋe ńgɔɔn ngie, ammó gie á kẅɛɛ ntʉ́m nyìŋ zɔ̌ ńnéŋe *lɔ̌’ ná ye.

²¹Menkwaŋá tepòŋ zɔɔn fó pɔ́ tsɛ̀ɛ ntʉ́m nyìŋ mesoŋ, tá ńtsóte mbàŋa pɔ́ fa’a panzwě, epanzwě fa’a mbàŋa, ńtsóte nyìŋ á gwáa ńjʉ, ńtsóte nyìŋ á zẅé wetsɔ̌,

²²ńne ńgÿo gÿɛ́, ńne ńgẅiin kegɔ̀’, ńgẅiin ssé ntʉ́m, ńgẅiin fʉ̀te, ńkúu zɔgɔ́ tepòŋ, ńkwɔ́’ɔ lóŋ, ńtÿɔ́gɔ sóon twó nyìŋ, ńŋá’te nnɛ́, ńdʉ’ʉ ntÿɔgɔ́ ntsèm.

²³Ngwòŋ menò tepòŋ mɔɔn kẅɛɛ pɔ́ tsɛ̀ɛ ntʉ́m nyìŋ mesoŋ, tá ńnéŋe *lɔ̌’ ná ye.

²⁴Yěsô gÿo fóo jʉ’ó ńgee nà tsɔ́ pàga ngwòŋ, á shÿó tÿǒsoŋo Tir pɔ́ Sidoŋ, ńkúu tsɛ̀ɛ tsɔ́ ndá, ńké tè ne ńkwoŋo ngie mé zsé ngie aa jʉ’ó wɔ́. Tá’ mé ké ńzsé zsé.

²⁵Atsɔ̌ manzwě gwɔ́ yé wó, mbà *ssé tepòŋ ka gwoon míŋ we we manzwě, ńne ḿbue yé. Á jú’ yé mé gɔɔn ngie Yěsô tǒ, á nɔ́ɔnte yé, ńnuŋe mekwò yé,

²⁶ésẅíŋte yé ngie à jwoŋ *ssé tepòŋ ŋwɛ́, e kyɛɛ míŋ we ńnyé. Manzwě awɛ̌ la piŋ tè mûɔ Yuda wɔ́. A laa mûɔ Fénisi, á tsɛ̀ɛ ngwòŋ Siria.

²⁷Yěsô tsɔ́’ɔ mbwo yé ngie: Zɔɔn ńcʉ́’ pènkʉ́ jÿó mmó tà ńzẅɛ́, á té poŋo lékẅé shúm léjÿó pènkʉ́ ḿma’a mbwo ngwé wɔ́.

²⁸Manzwě ŋwɛ́ tsɔ́’ ngie: Andè, ɔ̀ gɔɔn shwóŋó nò, tá’ ngwé ké ńdagte mesɔ́ɔn shúm sie pènkʉ́ ne ḿpfɛ́ɛ mmó, é gwete ssé.

²⁹Yěsô gɔɔn né ye ngie: Mèŋ n jǔ’ ntí gie ɔ̀ lɔ̌g ńtsɔ́’, lo ńgʉa, à cʉa nà shwóŋè jú, *essé tepòŋ fó ná míŋ gù ńkẅɛ.

³⁰Á leen ńké ḿbiŋe mbʉ̀a ye, ńgwaa gyá, múɔ pʉ́le ńnuŋe ndùm kǔ mbà *ssé tepòŋ fǒ ná ye ńkẅɛ.

³¹Yěsô fó Tir, ńne ḿbiŋe né ngʉ̀ŋe letʉ̀ŋ Galilea, ńdɔg ye tÿǒsoŋ Sidoŋ, ńne ńcʉa tsɛ̀ɛ pàga lá’ Metÿǒsoŋ Legém.

³²Mé lɔgɔ tsɔ̌ nyìŋ ńtóo mvfò yé, á gwɔ́ mbǔ’ metuŋó, ńgíŋe tè zsé léshwóŋe tà á kẅɛ wɔ́, megàŋ sẅíŋte Yěsô ngie à záb mbwó mé ná yé à zeŋe,

³³Yěsô lɔgɔ yé fó tsɛ̀ɛ nùɔ pʉ̀a ńkẅɛ, ńnéŋ púɔ tepwó pé tsɛ̀ɛ metuŋó mé, ńtsaba tepwó we lê metyé, ńzába nà lʉ́m yé,

³⁴ńdeen ńké ḿbʉ’ʉ menÿɔ́g mé ńdíe tÿǒ, ńzẅi, ńgɔɔn ngie: “Effata”! Ńdɔgɔ ńgɔɔn ngie: Tsɔ́’ɔ!

³⁵Metuŋó mé gwóon ńtsɔ́’ɔ, alʉ́m yé kyɛ́’ɛ, á zye légɔɔn nò té mʉ́’te.

³⁶Yěsô gɔɔn né pʉ̀a pie pɔ́ ně ńdɔgɔ yé ńtó ngie: Tà pi gɔɔn tà nyìŋ jú’. Tá ńké ne ńtɔ’ɔ wɔ́b lêkɔ́ wɔ́, pɔ́ ké ne sá’a yɔɔn nò sǎ’.

³⁷Pʉ̀a metsèm ne ńjú’u, ḿbú ḿmɔɔn tà ńgɔɔn ngie à gÿo yé kɔ̀ɔkɔ́ɔ, á gwɔ́ pɔ́ mbòŋ. À gÿo pà mbǔ’ metuŋó jú’u nò, mbɔɔ pa támbǎ’ gíŋe shwóŋe.