Read Ngiemboon Lukase 13 Bible Online

Lukase 13 - Ngiemboon bible

Lukase 13

¹Á gwɔ́ fʉ̀’ áyɛ̌, etsɔ́ pʉ̀a tó ne ḿbíte menò mie é lǎ cʉa shwóŋó Yěsô, éshwóŋó yé pá’ *Pilato la gÿo mé zẅéte pʉ̀a Galilea, á fʉ̀’ gie pɔ́ la ne ńnáa shúm pwɔ́’ mbwo Ssé.

²Á zẅí’te tà á ku’, á tsɔ́’ɔ mbwo pɔ́b ngie: Pi lɔgɔ ńkwaŋa ngie pʉ̀a Galilea ápɛ̌ lɔ́ɔn ńkwé pú’u, ńdɔgɔ ńgwɔ́ Megàŋ mefʉ̀a ńcʉa petsɔ́ keen?

³Ngǎŋ, á té nò wɔ́, pi zsé ngie pi lɔɔn ńké tè kúbe gẅi mà wɔ́, mbà pi ge gÿo lége gí pɔ́ pá’ pɔ́b.

⁴Pi zɔɔn ńkímte pʉ̀a ntsɔ̀b lefɔ̌ɔn nê legém pie máa ndá la keme ńzẅéte wɔ́b á Siloé. Pi kwǎŋ ngie pɛ̌ pʉ̀a lɔ́ɔn ńdɔgɔ ńgwɔ́ pʉ̀a tepòŋ ńcʉa petsɔ́ pʉ̀a Yerósalem metsèm lá?

⁵Ngǎŋ, á té nò wɔ́. Pi lɔɔn ńké tè kúbe gẅi mà wɔ́, mbà pi ge lége gí pɔ́ pá’ pɔ́b.

⁶Yěsô leen ńké ńgɔɔn yɔɔn sagá nò ngie: Tsɔ̌ nyìŋ la pye tÿǒ mbÿě ngěm nká’ yé, ńgÿo ńnéŋe tà ńtóo le káb ntɔ̌ɔn ntÿǒ, à tè mmó gyá,

⁷ńgɔɔn mbwo ngàŋa fà’ ngie: Ée fʉ̀’ɔɔn ńdɔgɔ ńgwɔ́ ngù’ tá pá’ mèŋ n ne ńtóo fa’a ntɔ̌ɔn nà tÿǒ yɔɔn mèŋ n tè ńgyá wɔ́, kɔ́’ɔ ḿma’a ssé, ńtí kɔ́ á jÿó jʉ’ʉ tsetsá’ sẅɛ̀ɛ sẅɛ̀ɛ?

⁸Ngàŋa fà’ tsɔ́’ ngie: Andè, mé ná’a ńnyé yé yɔɔn ngù’, mèŋ n ge túŋ letsiŋé sé, é lɔg kʉ̀ŋe tsáb,

⁹pú’u, kà à lɔɔn ńgwɔ́ á lá’a fʉ̀’ pá’ɔɔn ńzém ntɔ̌ɔn wɔ́? Ńké ḿbiŋ tè zém ɔ̀ tsẅi mèŋ n kɔ́’.

¹⁰Á gwɔ́ tsɔ́ *lyɛ’ɛ́ nzsè pà Yuda, Yěsô gwɔ́ *ndá cú’tè pà Yuda ńne ńda’te nò Ssé mbwo lá’.

¹¹Tsɔ̌ manzwě gwɔ́ yé wó, mbà é gÿǒ ngù’ ntsɔ̀b lefɔ̌ɔn nê legém pá’ tsɔ̌ *ssé tepòŋ la gwoon yé ḿbwɔ́’ nkà’ wé. Tà tsɔ̌ légíŋe ḿbʉ’ʉ nnɛ́ ńtyé tyé te wó wɔ́.

¹²Yěsô gyá yé, ńtóŋo yé, ńgɔɔn né yé ngie: Agùɔ jú yɛ magá,

¹³ńgɔɔn pú’u, ńzáb mbwo mé twó manzwě ŋwɛ́. Á gwóon ḿbʉ’ʉ nnɛ́ ńtyé ndʉŋ ndʉŋ, ńgu’te Ssé.

¹⁴Tá ndÿò tsɛ̀ɛ *ndá cú’tè pà Yuda gyá pú’u, anò gyáŋa yé, mélà’mie Yěsô gÿǒ nyìŋ zeŋe lyɛ’ɛ́ nzsè. Á gɔɔn mbwo lá’ ngie, melyɛ’ɛ́ fà’ ée pá’a ńgwɔ́ ntɔgɔ́, pi ńnéŋe ńdɔgɔ megùɔ mí ńtóo ná mɛ̌ melyɛ̌’ mé zoŋo gẅí, tà pi tó lyɛ’ɛ́ nzsè!

¹⁵Tá Yěsô tsɔ́’ɔ mbwo yé ngie: Pi ee ngàŋa cÿɔ̌ nò, awɔ̌ ná pi tè gʉa lyɛ’ɛ́ nzsè yégè, ńkyɛ́’ɛ foŋ we, ka pɔ́ nzikáase ye wɔ́, ńdɔg ńgʉa á nú ntse wɔ́?

¹⁶Ńgʉa ná manzwě wɔɔn gẅie aa nà ngẅɛ̀ Ábalam, mbà Sátà la leen ńkwɛ́ɛ yé, tà ée fʉ̀’ɔɔn ńdɔgɔ ńgwɔ́ ngù’ ntsɔ̀b lefɔ̌ɔn nê legém, mèŋ n kɔ’ɔ́ le kyɛ́’ nkÿo ná yé lyɛ̌’ɔɔn wɔ́, mélà’mie yɔɔn lyɛ̌’ɛ́ nzsè lá!

¹⁷Yěsô ně ńgɔɔn pú’u, eshʉ́ pú ńkú Megàŋ mbù pé, tá lelÿò pʉ̀a jʉ’ó ne ńkága kǎg ná mɔɔn menò mbòŋo ntsèm mie Yěsô ne ńgÿo.

¹⁸Yěsô gÿo ngie: *Lefùɔ Ssé ée pé’e ńgwá’a lá, à lɔɔn ńgwɔ́ mèŋ n dɔgɔ kɔ́ ḿbí fʉ̀’?

¹⁹É leen ńgwá’a tsɔ̌ ntí lesɔ́ɔn sésɔg sie nyìŋ la pí ḿma’a nká’ yé, é gÿo sá’, ńgú’, tà ńcʉ́’ʉ tÿǒ, ńtɔ́g mbwo, meshʉ́ŋ tó ḿbá’ menkʉ̀a mɔ́b tsɛ̀ɛ wó.

²⁰Yěsô gíŋe ńgɔɔn ngie: Mèŋ n gíŋe ńdɔgɔ kɔ́ ḿbí fʉ̀’ nà *lefùɔ Ssé?

²¹É gíŋe ńgwɔ́ pɔ́ pá’ méjʉ’ʉ *mvòŋ gẅie manzwě lɔg ḿvoŋo faline gie à *kɔ̌’ loŋgáa sétá, ńtsab, ḿbú ḿbú’ pú’ tà méjʉ’ʉ *mvòŋ ŋwɛ́ gÿo faline ntsàb ŋwɛ́ á pú ńkwɔ́’.

²²Yěsô la gíŋ ńtyé mánzsé ńne ńgee Yerósalem, ńcʉa nà metÿǒsoŋ lâ melá’ tà ńgyɔ́ɔn, ńgiŋe ńda’te nò Ssé mbwo pʉ̀a.

²³Ńkúu tsɔ́ jʉ’, atsɔ̌ nyìŋ zɛ́te yé ngie: Andè, tà á pá’ɔɔn, e Ssé lá’ ńgÿo ntá’ pʉ̀a zɔ tsẅɛ́ keen? Yěsô tsɔ́’ɔ mbwo pʉ̀a metsèm ngie:

²⁴Pi fa’ shÿó pɔ́ létɔ́gɔ nà ncwò ndá gẅie é kʉ́mte kʉmté. Pi zsé mboŋó ngie pʉ̀a tà ńgyɔ́ɔn ge lá’ fa’a lékúu wó, é piŋ ké le ku’.

²⁵Afʉ̀’ ge lá’ ku’, ngàŋ ndá lu ssé ńjÿɔ́’ ncwò ndá, pi pie pi nyé pi la, pi zye lékwá’te ncwò ndá, ńne sẅíŋte yé ngie: Andè, tsɔ́’ ncwò ndá peg kúu ndá. Tá’, à gɔɔn né pi ngie: Mèŋ, n tè ne ńzsé pʉ̀a pie pi ee pɛ̌ wɔ́!

²⁶Pi leen ńké ńzye légɔɔn né yé ngie, ńzsé ngie pege zɔ kɔ̌ɔn ńteme shúm ḿpfɛ́ɛ, ńtéme melù’ ńnúu pé’e? Ɔ̀ lɔ̌ɔn tè ńgiŋe ná pàmánzsé pég mbɔɔ tsɛ̀ɛ metÿǒsoŋ még, ńda’te nò Ssé wâ?

²⁷Tá’, à gíŋe ńgɔɔn mbwo pi ngie: N tè ne ńzsé pʉ̀a pie pi ee pɛ̌ wɔ́. Pi fó ncwò ndá mèŋ ńgʉate, pi ee pàfʉate menò!

²⁸Pi leen ńké ńzye lélʉa, lóŋ gẅi ne ffó. À gwɔ gwɔ́, mbà pi mǎ’ nÿɔ́g ńgyá Ábalam, ńgyá Esâg, mbɔɔ Yakwɔ́b, mbɔɔ *pàntsẅì nkʉ̀ Ssé métsèm. Pɔ́ gwɔ́ tsɛ̀ɛ ngwòŋ Ssé. Mbà mé jÿɔ’ɔ́ gẅi pi.

²⁹Á ge lá’ gwɔ́ fʉ̀’ó, mé fóo sá’ nèm, éfó mbyě nèm, éfó twó, éfó ntsíŋ, ḿbú ńtó ńcú’te tsɛ̀ɛ ngwòŋ Ssé, ńně ńjÿó máamáa línɔ́ɔn.

³⁰Pi zsé ngie tsɔ́ pà gwɔ́ mvfò fʉ̀’ɔɔn ge lá’ cʉ́’ pà gwɔ́ nzèm, etsɔ́ pà gwɔ́ nzèm fʉ̀’ɔɔn lá’ ńgwɔ́ pà gwɔ́ mvfò.

³¹Yěsô ne ńgɔɔn pú’u, etsɔ́ pʉ̀a *farisay tó ńgɔɔn né yé ngie: Fó jʉ’ɔɔn ńgʉa, mélà’mie fùɔ *Herôd ne fa’a lézẅé ɔ́.

³²Yěsô gɔɔn né pɔ́b ngie: Pi gʉa ńgɔɔn né mengyé shʉ̀shʉ̀ áwɛ̌ ngie: Mèŋ, n kě ńnyé ńgẅiin lyɛ̌’ɔɔn, mbɔɔ jǔɔ lélɔg ńjwoŋ *messé tepòŋ mie é pue pʉ̀a, é piŋ gíŋ gÿo megàŋa gùɔ zeŋe. À gwɔ́ nà mbɔ́ɔntè lyɛ̌’ tá, m mege fà’ yɔ́ɔn.

³³Tá’, á poŋ, n zɔɔn ńcʉ́me mánzsé lyɛ̌’ɔɔn. Ajǔɔ n gíŋe ńgwɔ́ pɔ́ mánzsé, tà mbɔɔ wetsɔ̌ júɔ. Á ne ńzɛ́te ngie n gʉa tà ńkúu Yerósalem, mélà’mie á té poŋ ngie mé zẅé *ntsẅì nkʉ̀ Ssé jʉ’e ndyɛ̀’ɛ té gwɔ́ pɔ́ Yerósalem wɔ́.

³⁴Afʉ̀’ ku’, á mɔɔn ngie: Pà Yerósalem, pà Yerósalem, pi pie pi ee ńzẅé *pàntsẅì nkʉ̀ Ssé zẅé, ńdɔgɔ metóon ńtémte pʉ̀a pie Ssé tumó mbwo pi ńzẅéte, ée ngʉa shÿɔ́’ɔ pá’ mèŋ fa’á lécú’te púɔ pí, pá’ mêngáb cú’tè púɔ pé lepàb ye, pi ké ńdʉ’ lʉ’?

³⁵Cʉ́’ tà mèŋ n ké shwóŋó gẅí, *jʉ’ʉ Ssé gi ge cʉ́’ʉ fomo ndá, mbà Ssé gwa’á gẅí. Pi le gíŋe ńgyá wɔ̀ɔn mɔ́, tà lá’ kúu lyɛ̌’ gie pi ge gɔɔn ngie: E Ssé gwɔ́ lé nyìŋ gẅie à tóo nà lezíŋ sé.