Read Ngiemboon Lukase 14 Bible Online

Lukase 14 - Ngiemboon bible

Lukase 14

¹Á gwɔ́ tsɔ́ *lyɛ’ɛ́ nzsè pà Yuda, Yěsô gʉa mbʉ̀a tsɔ̌ tá ndá pà *farisay léjÿó mmó. Epʉ̀a pie é laa wó ne ńdeŋe yé leŋ,

²ńgwɔ́ gwɔ́ tsɔ̌ nyìŋ tyé mvfò yé, mbà kwɔ́’te lěen ńgwoon yé.

³Yěsô zɛ́te pà *farisay pâ pàkyàgte mbʉ̌ Ssé pie é laa ndá ngie: Áa nà *lepʉ̌ ségè pé’e, ńgwáa ngwe mé gÿo nyìŋ zeŋe lyɛ’ɛ́ nzsè yégè kà ngǎŋ?

⁴Tá pɔ́ pú tè tsɔ́b, Yěsô kíbe ngùɔ ŋwɛ́, ńgÿo á zéŋe, ńtsẅi á gʉa.

⁵Á zɛ́te wɔ́b ngie, awɔ̌ aa tsetsɛ̀ɛ pi pɛ́’ɛ̀ ńgwɔ́ gie míŋ we kà foŋ we wɔ́ lɔɔn ńgwe tsɛ̀ɛ ntse ntǔŋ lyɛ’ɛ́ nzsè yégè, á nyé té sẅɛte fóo tsɛ̀ɛ wó ńkẅile yé?

⁶Á cʉa wɔ́b, pɔ́ zága pÿɛ.

⁷Yěsô gyá pá’ pʉ̀a pie mé ně ńtóŋo wɔ́b ne ńkúu ndá, éfa’a pɔ́ jʉ’ ye melÿò tá ńnéŋe, ésaga mbwo pɔ́b ngie:

⁸Nyìŋ lá’ ńtóŋo ɔ́ jʉ’e línɔ́ɔn lɔ́ɔn ndá, ɔ̀ kúu wó, ɔ̀ pɔ́ɔn léfa’ pɔ́ léńnéŋe nà jʉ’ ye melÿò, ḿbɔ́gɔ tsɔ̌ nyìŋ gẅie à cʉa ɔ́ lépiŋ ńtó nzèm.

⁹Ngàŋ ndá gẅie à toŋó línɔ́ɔn leen ńtó ńgɔɔn né gù ngie: Lu ssé, andÿò wɔɔn ńnéŋe, mbà shʉ́ ge kú ɔ́ légʉa ńnéŋe nzèm.

¹⁰Áa yɛ̌ ŋwɛ́ tá ńgwɔ́ gie nyìŋ lá’ ńtóŋo gú nà línɔ́ɔn, ɔ̀ tó ńnéŋe jú pɔ́ nzèm. Ɔ̀ ńnéŋe jʉ’ó, nyìŋ gẅie à ně ńtóŋo ɔ́ kúu ndá, ńgyá ɔ̀ gwɔ́ nzèm, á gɔɔn né gù ngie: Ashǔ wɔ̀ɔn, tó lê mvfò, mbà à lɔgɔ ńkwé’e nzẅìŋ ɔ́ mvfò pʉ̀a metsèm pie pi lâ pɔ̌ ee ndá.

¹¹Áa pú’u, tá ńgwɔ́ gie nyìŋ lɔɔn ńŋá’te nnɛ́, mbà Ssé ge sẅé’e yé náa ssé, ésẅé’e mbùm ye ńnáa ssé, mbà Ssé ge pʉ’ʉ yé tÿɔ́g tÿɔ́g.

¹²Yěsô gíŋe ńgɔɔn mbwo nyìŋ gẅie à ně ńtóŋo yé ngie: Ɔ̀ lá’ ne ńtóŋo línɔ́ɔn, fʉ̀’e zsǒ kà ncwò nzém wɔ́, tè tóŋ meshǔ pú, kà mefɛ́ pú wɔ́, kà pʉ̀a nà tsìŋe ndá gí wɔ́, kà megàŋ nkwɔ’ɔ́ mbʉ̀a pú pie ée megàŋ nkáb wɔ́, á nue pɔ́ ge gÿo gíŋe tóŋo gú jú, é lɔg tsɔ́’ shʉ́’ gú.

¹³Ɔ̀ la’ ne ńtóŋo línɔ́ɔn, ɔ̀ tóŋ pàtèmmó, ńtóŋ menkÿǒon, ńtóŋ pànkème kwò, ńtóŋ pàfʉ̀ menÿɔ́g.

¹⁴Ɔ̀ gÿo pú’u, mbà ɔɔ shÿó mbòŋo, mélà’mie à lɔɔn ńgwɔ́ pɔ́ le tsɔ́’ shʉ́’ gú wɔ́, pú’u, e Ssé lá’ ńtsɔ́’ɔ fà’ ɔ́, á fʉ̀’ gie pʉ̀a pé ge lá’ zíme nà legwé.

¹⁵Mé jú’u yɔɔn shwóŋè tà tsɔ̌ nyìŋ gẅie pâ pɔ̌ la ńnéŋe ssé ńně ńjÿó mmó gɔɔn mbwo Yěsô ngie: Ashÿó mbòŋo aa nyìŋ gẅie à ge lá’ jÿó yé mmó tsɛ̀ɛ ngwòŋ Ssé!

¹⁶Yěsô tsɔ́’ɔ mbwo yé ngie: Tsɔ̌ nyìŋ lǎ’ ńtáŋte máamáa línɔ́ɔn, ńtsẅii mbwo pʉ̀a tà ńgyɔ́ɔn.

¹⁷Afʉ̀’e léjÿó shúm gÿo ńku’, á túmo ménkʉ́ we ngie à gʉa ńtóŋo wɔ́b ngie pɔ́ leen ńké ńtó fʉ̀’ɔɔn.

¹⁸Tá’, pɔ́ metsèm pú fa’ ndiletáŋ lélɔg ńtsó línɔ́ɔn. Amvɔ́g mvfò gɔɔn ngie: Mèŋ, n ka jú nká’, á poŋ n gʉa ńgyá, tsétsɔ́’, shwóŋó yé ngie n tè tó wɔ́.

¹⁹Atsɔ̌ gɔɔn ngie: N ka jú mefòŋ legém lélɔg fa’a fà’, mèŋ n ně fa’a légʉa ńzẅí’ ńgyá, tsétsɔ’ gɔɔn ngie à pɔ́ɔn lé la’a wɔ̀ɔn.

²⁰Wetsɔ̌ ye: Mèŋ, n ka nyě ńzɔ́’ɔ, ńgwɔ́ n de tó.

²¹Ménkʉ́ wá piŋ nzèm, éshwóŋó tá we pá’ pɔ́ gɔ̌ɔn, á pú ńgyáŋa yé tɛ’, á gíŋe ńtúmo ménkʉ́ ŋwɛ́, ńgɔɔn né yé ngie: Kÿote lêtʉ̀, ńgʉa tÿǒsoŋ ńtyé metwó nzsè, ńgiŋe nà melyěen nzsè, ńtóŋ pàtèmmó, ńtóŋ menkÿǒon, mbɔɔ mefʉ̀ menÿɔ́g pâ pànkème nkwò pia pɔ́ tó.

²²Á gʉa tà ḿbiŋ, ńgɔɔn né tá we ngie: Andè, mèŋ, m bǔ ńgÿo mmó gie ɔ̀ ně ńtsẅi, n něŋ pʉ̀a ndá tá’, ajʉ’ nyé pɔ́ wó.

²³Tá we jú’ ńgɔɔn né yé ngie: Gʉa metwó nzsè fʉ̀’ɔɔn, mbɔɔ nà melyěen nzsè tsɛ̀ɛ mbʉ̀a, wɛ̌ nyìŋ wɔ́ gẅie ɔ̀ gyǎ, ɔ̀ lɔg tʉ̀, ńtóŋo yé ngie à tó, ńnéŋe wɔ́b tà ndá yɔɔn lúe.

²⁴Zsé mboŋó ngie, ńgwɔ́ tsɔ̌ tà’ ná pʉ̀a pie n ka vɔg ńtsẅii mbwo pɔ́b la, à lɔɔn ńgwɔ́ á le mmó léjÿó yɔ́ɔn zẅí’.

²⁵Yěsô gwɔ́ lyɛ̌’, ńcʉ́me mánzsé ńne ńgiŋe, pʉ̀a tà ńgyɔ́ɔn gwɔ́ nzèm yé, á kúu tsɔ́ jʉ’, ésele nnɛ́ ńgɔɔn né pɔ́b ngie:

²⁶Nyìŋ lɔɔn ńcʉ́me nzèm mèŋ, à tè kwoŋo wɔ̀ɔn ńcʉa tá we, ńcʉa má we, ńcʉa nzwě we, ńcʉa pènkʉ́ pé, ńcʉa mefɛ́ pé pe mbàŋa mbɔɔ pe pànzwě, ńcʉa mbɔɔ kwà’ twó mbùm yé wɔ́, mbà à tè ku’u légwɔ́ *ngàŋa kwò wɔ̀ɔn mɔ́.

²⁷Nyìŋ lɔɔn tè kaa yé tÿǒ nkǐ ńdɔgɔ ńzẅíŋe lékwé, tá ńcʉ́me nzèm mèŋ wɔ́, mbà ńgwɔ́ á le ku’u légwɔ́ *ngàŋa kwò wɔ̀ɔn mɔ́.

²⁸Nyìŋ gẅi lɔɔn ne ńgee ńkwɛ́ máa ndá, mbà à ge zɔɔn ńnéŋe ssé kwaŋte shúm fà’, é zsé nzẅìŋ nkáb gie ńgwɔ́ á lɔg ńkwɛ́ tà ńgyá é ku’u ná ye,

²⁹ḿbɔ́gɔ lénuŋe cÿó, ndá ńcʉa yé. Mé lá’a ńzɔ́gɔ ńgyá ńgẅe yé ngie:

³⁰Gyá pá’ tsɔ̌ nyìŋ wá la zye ndá, à tè ku’u lémege wɔ́.

³¹Kà pɔ́ fùɔ túm gẅie à ne ńcwoŋte mbùm ye légʉa ńdÿɔ́’ɔ wetsɔ̌ fùɔ túm gẅie à kěm ncù wɔ́, mbà à ge sáŋ pé pʉ̀a gyá ngie kà à lɔɔn ńgwɔ́ á lɔg pʉ̀a ntsá’ legém, ńgʉa ńdÿɔ́’ɔ wetsɔ̌ fùɔ gẅie à ne ńdɔgɔ pʉ̀a ntsá’ móm mbʉ́a ńtóo wɔ́?

³²À lɔɔn ńgyá, epé pʉ̀a kɔ́g, mbà fùɔ gẅie à ne ńdɔgɔ ncù ńtóo ge nyé pɔ́ ngʉ̀a shʉ̀shʉ̀a, à túmo mamekěm, à gʉa sẅíŋte yé ngie à shwóŋó yé mmó gie à lɔɔn ńgwɔ́ á ná tá ńgẅiin sẅétè.

³³Yěsô ma’a twó ngie: Áa ndʉŋ ndʉŋ pú’u, nyìŋ lɔɔn ńgwɔ́ tsetsɛ̀ɛ pi, à tè vɔg ńnyé shúm sie à gẅiin wɔ́, mbà à tè ku’u légwɔ́ *ngàŋa kwò wɔ̀ɔn mɔ́.

³⁴Ngwáŋ ée mmó mbòŋo, tá ńgwɔ́ gie é lɔɔn ńcʉ́’ ńdebe lebe, mbà à lɔɔn ńgwɔ́ mé gÿo lêkɔ́ tà é gíŋe ńdʉm?

³⁵Mɛ̌ ngwáŋ ńgwɔ́ é ke le tsetsá’ kẅéte, à lɔɔn ńgwɔ́ mé le lɔg ńgÿo kʉ̀ŋe wɔ́, mé ŋwa ḿma’a pǐ. Nyìŋ lɔɔn ńgẅiin metwoŋó lélɔg ńjú’u nò, á jú’.