Read Ngiemboon Lukase 17 Bible Online

Lukase 17 - Ngiemboon bible

Lukase 17

¹Yěsô gíŋe ńgɔɔn né ngàŋa nkwò yé ngie: Ammó gie ńgwɔ́ mé fó mǒ fʉa nò, á lɔɔn ńgwɔ́ á le zág. Tá’, ashÿó tepòŋ, aa nyìŋ gẅie à ge gÿo nyìŋ fʉa nò.

²Mvfò ee pá’ ńgwɔ́ mé cʉŋe máamáa tóon lóŋ ngàŋ, ḿma’a yé tsɛ̀ɛ mmí, ńcʉa pá’ à lɔɔn ńgwɔ́ mé nyé yé, á gÿo tà tsɔ̌ tà’ ná mecʉ̀cʉ̀ŋ pɔ́ɔn cʉa ná yé tá fʉa nò.

³Pi ké ńdaga twó gí nà shwóŋè gí. Mémá nyìŋ lɔɔn ńgÿo nò tepòŋ ná yé, á pʉ́le pʉlé shwóŋó yé, á zẅíŋe mefʉ̀a, á lege ńnáa mbwo yé.

⁴Efó ńzɔ́gɔ ta’a lyɛ̌’ ńgÿo nò tepòŋ ná yé pɔ́ ngʉ̀a sɔɔn mbʉ́a, ḿbiŋ ńtó ngʉ̀a sɔɔn mbʉ́a, ńzẅíŋ mefʉ̀a mbwo yé, á lege ńnáa mbwo yé.

⁵Megàŋa kwò Yěsô gɔɔn né yé ngie: Cʉ̀apʉ̀a, kẅéte wég lékẅi’i ńzáb ntʉ́m nà Ssé.

⁶Yěsô gɔɔn ngie, lesɔɔn sésɔg ée mmó ńkɔ́g tɛ’, nyìŋ gẅi zɔɔn ńzáb ntʉ́m wé nà Ssé mbɔɔ méjʉ’ pú’u, mbà à ge gɔɔn né tÿǒ gie á tyé lɛ ngie: Tsɔ́’ɔ ńgʉa ńtyé tsɛ̀ɛ mmí, à jú’ ncwò wé.

⁷Pege pí fʉ̀’ ngie nyìŋ gẅi gẅiin ngàŋa fà’, à lɔɔn ńzɔ́gɔ tsẅɛ ńjʉ́’ ngwóŋ, kà ńzɔ́g ḿpféle pɔ́ menɔ̀ɔn wɔ́, ńgÿo ḿbiŋ nzèm, mbà yé gẅie aa tá fà’ ge gɔɔn mbwo yé ngie: Gʉa ńnéŋe ssé letʉ ḿpfɛ́ɛ mmó?

⁸Né ngie à ge gɔɔn né yé pɔ́ ngie: Kúbe menzsǒ, ńcwoŋte shúm léjÿó sɔ́ɔn ńtÿɔ́g né mèŋ, ńzẅí’te mèŋ m pfɛ́, ńnú melù’ tá ɔ̀ lêen ńké ḿpfɛ́ shú shúm ḿbiŋ ńnú mú melù’ lá?

⁹À tè séen gíŋe ná ndǎg mbwo ngàŋa fà’, mélà’mie à gÿǒ mmó gie à tsẅǐ wɔ́.

¹⁰Mbɔɔ gí fà’ ké ńgíŋe ńgwɔ́ pɔ́ pú’u. Pi lɔɔn ńdá’ fa’a fà’ gie mé tsẅǐ mbwo pi tà ḿmag, pi gɔɔn pɔ́ ndà’ ngie: Peg gwɔ́ yég pɔ́ megàŋa fà’ sẅɛ̀ɛ sẅɛ̀ɛ, peg gÿǒ pɔ́ mmó gie mé ně ńtsẅi ngie peg gÿo.

¹¹Yěsô la nyé ńgwɔ́ pɔ́ mánzsé ńne ńgee Yerósalem, ńcʉa nà pàa lá’ pà Samalîɛ pâ pà Galilea.

¹²Ńgʉa tà ńkúu tsɛ̀ɛ tsɔ́ lá’, megàŋ nkà’ pǎb legém zá’a yé, tà ńtyé pɔ́ ngʉ̀a shʉ̀shʉ̀a,

¹³ńga’te lê tʉ ńgɔɔn ngie: Yěsô, Andè, tsɔ́ɔn mezìŋe még.

¹⁴Yěsô gyá wɔ́b, ńgɔɔn né pɔb ngie pi gʉa ńnyɛ mbùm gi mbwo *pànùŋe pwɔ́’. Pɔ́ cʉ́me mánzsé, ńně ńgee, ńgyá, mbà nkà’ magá ná pɔ́b.

¹⁵Atsɔ̌ tà’ ná pɔ́b gyá pá’ à zeŋé, ḿbiŋ nzèm, ńkwé’e ngyè ye ńnáa tÿǒ ńdɔg ńgú’te Ssé.

¹⁶Ńtó ńnuŋe mekwò Yěsô, ńcÿɔ’ɔ zí yé ssé, ńná ndǎg mbwo yé. Angàŋ laa nyìŋ Samalîɛ.

¹⁷Yěsô leen ńké ńgɔɔn ngie: Pʉ̀a legém pǔ ńzeŋe, pe lepfwɔ’ɔ́ gwɔ́ pɔ́ nzɔ̌?

¹⁸Pɔ́ pǔ ńzeŋe metsèm, tà ndà’ gù wɔɔn zɔ tǒ lénná ndǎg mbwo Ssé ká?

¹⁹Yěsô leen ńké ńgɔɔn mbwo nyìŋ Samalîɛ ŋwɛ́ ngie: Lu ssé ńgʉa, e Ssé gÿǒ ɔ̀ tsẅɛ́, ńtí pá’ ɔ̀ zǎb ntʉ́m ɔ́ ná mèŋ.

²⁰Tsɔ́ pà *farisay gÿo ńzɛ́te Yěsô ngie: E Ssé ge lá’ zye lésá’ njÿó pɔ́ síŋe? Á tsɔ́’ɔ mbwo pɔ́b ngie: *Lefùɔ Ssé té gwɔ zye mé ne ńdɔgɔ menÿɔ́g ńgyá wɔ́.

²¹Ngwɔ́ mé le gɔɔn ngie: E sɔɔn jʉ’ɔɔn kà pɔ́ lé gɔɔn ngie, e si jʉ’e wɔ́. N zɔɔn ńgɔɔn pá’ɔɔn, mbà Ssé ně ńdá’ ńgwɔ́ tsetsɛ̀ɛ pi tà pi ne ńzẅíŋe lefùɔ sé.

²²Yěsô gíŋe ńgɔɔn mbwo *ngàŋa kwò yé gílé pɔ́b ngie: Atsɔ́ fʉ̀’ ge gÿo gwɔ́ pi tsɔ́ɔn pá’ pi lâ *Míŋ Nyìŋ ge fó gíŋe zɔ́g pɔ́ ndà’ tà’a lyɛ̌’, pi ké le gyá[9].

²³Epʉ̀a ge lá’ ne gɔɔn né pi ngie: Yé wɔɔn jʉ’ɔɔn kà pɔ́ ngie yé gẅi jʉ’ e wɔ́. Pi pɔ́ɔn léjwoŋte, tà pi gwá ńkÿo mendʉ́.

²⁴*Míŋ Nyìŋ ge zɔɔn lá’ tó mé pú ńgyá yé pá’ nně mbʉ̀ŋ gie e lěen ngie ŋwâŋ, ḿbú ńkyɛ’ jʉ’ ntsèm tsèm.

²⁵Tá’, á ge ké zɔɔn gwaa gwɔ́ pú’u, *Míŋ Nyìŋ zɔɔn ḿvɔg ńgyá ngɔ́’ pá’ɔɔn tɛ’, pʉ̀a pie ée tsɛ̀ɛ njÿó fʉ̀’ɔɔn lʉ’ʉ yé.

²⁶À ge lá’ gwaa tó menò mie é la gÿo fʉ̀’e Noá gíŋe ńgÿo.

²⁷Á laa fʉ̀’ó, epʉ̀a mesoŋ ně ḿpfɛ́ɛ shúm, ńnúu melù’, ńně ńdɔ́ɔn ndá, ńnáa púɔ pɔ́b lɔ́ɔn ndá, tà ńkú lyɛ̌’ gie Noá la kúu tsɛ̀ɛ páŋ. Ntse kwɔ́’ ḿbú ḿbyága wɔ́b metsèm.

²⁸Á ge lá’ gíŋe gwɔ́ pɔ́ pá’ menò mie é la gÿo nà fʉ̀’e Lod: Epʉ̀a mesoŋ la ne ḿpfɛ́ɛ, ńnúu, ńně ńjúu, ńně sẅiŋe, ńně ḿbye shúm, ńně ńkwɛ́ɛ mendá.

²⁹Tà ńdá’ ńkúu nà lyɛ̌’ gie Lod la fó tÿǒsoŋo Sodom tà ńkẅɛ. E Ssé fóo tÿǒ lepwó, ńtúm mbʉ̀ŋ mmɔ̌g pâ *mekʉ̀a, é pú ḿbyága lá’ tà á mag.

³⁰Pi gyá nò gie á ge lá’ gíŋe gÿo pʉ̀a, á nà lyɛ̌’ gie *Míŋ Nyìŋ ge lá’ vege vege tó.

³¹À gwɔ́ lyɛ̌’ó, nyìŋ gẅie à ge lá’ gwɔ́ nà tetʉ́a gie áa ntsɔ̀’ ndá le fó wó sẅɛ́’ ngie à ge píi mmó tá kÿo wɔ́. Nyìŋ gẅie aa nká’ le mbʉ̀a yé piŋ.

³²Pi kímte nzwě Lod.

³³Nyìŋ gẅie à ge gÿo fà’a lépɔ́ɔn we le gwɔ́, à ge gÿo pyé, nyìŋ gẅie à zẅiŋé lépyé, yé zɔ gÿo ńgwɔ́ wó.

³⁴Oon mèŋ shwóŋó gẅí, á ge lá’ gwɔ́ lêtsẅɛ́’ lyɛ̌’ áyɛ̌, ńgwɔ́ gie pʉ̀a nuŋé kǔ mépʉ́a, mbà mé ge lɔgɔ tà’ nyìŋ gʉa nyé wetsɔ̌,

³⁵ńgwɔ́ gie pànzwě mépʉ́a ne ńgwɔ’ɔ ngesáŋ lùŋo ńkẅéte, mbà mé ge lɔgɔ tà’ gʉa, é nyé wetsɔ̌,

³⁶[ńgwɔ́ gie mbàŋa ée nká’ yépʉ́a, mbà mé ge lɔgɔ tà’ gʉa, é nyé wetsɔ̌].

³⁷Megàŋa kwò Yěsô leen ńké ńzɛ́te yé ngie, Andè, yɔɔn ntí nò ge lá’ gÿo nzɔ̌ jʉ’? Á tsɔ́’ɔ mbwo pɔ́b ngie: Apfó mmó ge gÿo gwɔ́ nzɔ̌ wɔ́, megúm cú’te jʉ’ó.