Read Ngiemboon Lukase 2 Bible Online

Lukase 2 - Ngiemboon bible

Lukase 2

¹Mé la gwaa zyé Jâŋ, mbà Áwúse, Kása pà *Roma ŋwe’é ŋwà’ne, ńzáb ngie mé pú sáŋ ngwòŋ pʉ̀a metsèm pie à ne sá’a wɔ́b.

²Wɛ̌ lɔ́gɔ ńgwɔ́ ndùŋ mvfò lesǎŋ pʉ̀a pú’u. Kirinus gwɔ́ fʉ̀’ó ńgwɔ́ ngúmnɔ́ɔn á tsɛ̀ɛ ngwòŋ Siria.

³Awɔ̌wɔ́ɔ lêen ńké ńně ḿbiŋe lesa’á pɔ́b, ńgÿo mé sáŋa yé.

⁴Yesyɛ̂b fó tÿǒsoŋ Nǎzarɛd, á tsɛ̀ɛ ngwòŋ Galilea, ńtóo tsɛ̀ɛ pàga ngwòŋ Jẅidea, á tÿǒsoŋ Mbetélehem, á jʉ’ gie mé la zyé fùɔ Ndavíd wó, ńgee wó pú’u, mélà’mie aa nyìŋ nà ngẅɛ̀ ndá fùɔ Ndavíd.

⁵Pɔ́ nzwě we Malîɛ gwɔ gʉa me sáŋa wɔ́b yé á gwɔ́ shwoŋ,

⁶ńkúu wó múɔ gwoon Malîɛ.

⁷Á zyé mûɔ letwó we, á gwɔ́ mûɔ mbàŋa, á lɔg shúm nzsǒ ḿbwóte yé, ńnéŋe tsɛ̀ɛ ngwʉ̌ŋ shúm léjÿó menɔ̀ɔn, mbà pɔ́ ně ńzága yɔ́b jʉ’e lela’á tsɛ̀ɛ ndá megʉ̀.

⁸Á gwɔ́ fʉ̀’ó pàpyɛ́b mvfó shÿó jʉ’ó ne ńdá’a pǐ ḿbyɛ́bɛ mvfó yɔ́b,

⁹ńgwaa gyá, *cÿɔ́’ Ssé kẅɛɛ mvfò pɔ́b, shéshÿɔ́g Cʉ̀apʉ̀a gwoon wɔ́b, ejʉ’ pú ńkyɛ́’ɛ, pɔ́ cʉ́’ʉ ḿbɔ́gɔ pɔ̌g.

¹⁰Tá *cÿɔ́’ Ssé ŋwɛ́ gɔɔn né pɔ́b ngie: Tà pi pɔ́g, mèŋ n tóo pɔ́ lépÿé gẅi nò mbòŋo, á gwɔ́ gie á ge náa máa lekág tsɛ̀ɛ ngwòŋ gẅí.

¹¹Mé la’á tÿǒsoŋ fùɔ Ndavíd lyɛ̌’ɔɔn, ńzyé Nyìŋ gẅie à ge gÿo pi tsẅɛ́. Aa Kristo gẅie Cʉ̀apʉ̀a Ssé la ka’.

¹²Ammó gie pi ge tó lɔg zsé yé á gwɔ́ pɔ́ ngie: Pi ge tó gyá mûɔ mbÿɛ, mbà mé lɔ̌g shúm nzsó ḿbwóte yé, ńnuŋe yé tsɛ̀ɛ ngwʉ̌ŋ shúm léjÿó menɔ̀ɔn.

¹³Á gɔɔn tà ńgwaa cʉ́me, anùɔ *mecÿɔ́’ Ssé tà ńgyɔ́ɔn gíŋe fóo tÿǒ ńtó ńkẅi’i ná yé, pâ pɔ̌ zɔb, ńgu’te Ssé, ńgɔɔn ngie:

¹⁴Legu’ gwɔ́ mbwo Ssé á tàa tÿǒ lepwó, asẅétè gwɔ́ mbwo pʉ̀a mesoŋ ndùmo Ssé tsetsá’. E Ssé kwoŋo wɔ́b.

¹⁵*Cÿɔ́’ Ssé gwɔ́ tà ḿbiŋ nê tÿǒ lepwó, pàpyɛ́b mvfó gɔɔn tsetsɛ̀ɛ pɔ́b ngie: Pege gʉa tà ńkúu Mbetélehem, tá ńgyá nò gie á kẅɛ̌ wó li, á nò gie á kẅɛ̌ tà Cʉ̀apʉ̀a túm ngie mé tó shwóŋó wégè lɔɔn.

¹⁶Pɔ́ gɔɔn pɛ́’ɛ, ńdêen ńdu Ssé ńgʉa lêtʉ tà ńkúu wó, ńgyá Malîɛ pɔ́ Yesyɛ̂b, ńgyá mûɔ mbÿɛ́, á núŋe tsɛ̀ɛ ngwʉ̌ŋ shúm léjÿó menɔ̀ɔn,

¹⁷ńgwɔ́ tà ńgyá yé, ńzye lépíte ngwòŋ menò ntsèm mie *cÿɔ́’ Ssé shwóŋó wɔ́b ńtíi yé.

¹⁸Awɔ̌wɔ́ɔ ně ńjú’u mɔɔn menò, á ncwò pàpyɛ́b mvfó, ḿmɔɔn tɛ’,

¹⁹ńgʉa ná Malîɛ, á pú ńde’e menò amɛ̌ pɔ́ tsɛ̀ɛ ntʉ́m yé, ńně ńkwaŋa nò mǒ fʉ̀’ ntsèm.

²⁰Pàpyɛ́b mvfó gwaa piŋ nzèm, ńgiŋe ńzɔbɔ ńdɔgɔ ńgu’te Ssé, ésíe yé ńtí menò mie pɔ́ ně ńjú’, pɔ́ pǐŋ ńgyá kɔ̀ɔkɔ́ɔ gwɔ́ pɔ́ pá’ *cÿɔ́’ Ssé ně shwóŋó wɔ́b.

²¹Mé la zyé múɔ, é cʉa lyɛ̌’ lefɔ̌ɔn, mé pú’u yé, ńtsẅi lezíŋ sé le Yěsô, é gwɔ́ lezíŋ sie *cÿɔ́’ Ssé la ná tá má we lá’ shwóŋó yé.

²²Alyɛ̌’ɛ lésɔgɔ *lɔ’ɔ́ mápfò ná Malîɛ la gwɔ́ tà ne ńku’u, pá’ *lepʉ̌ Mǒsê la ne ńzɛ́te, Yesyɛ̂b pɔ́ Malîɛ kaa múɔ ńdɔg ńgʉa lé Yerósalem lényɛɛ yé mbwo Cʉ̀apʉ̀a.

²³Á zɔɔn ńgwaa gwɔ́, mbà mé la ŋwe’e tsɛ̀ɛ sɛ̌ *lepʉ̌ ngie: Nyìŋ zyé mûɔ letwó we, á gwɔ́ mûɔ mbàŋa, á náa yé mbwo Cʉ̀apʉ̀a

²⁴Malîɛ pɔ́ Yesyɛ̂b tó yɔ́b lénuŋe pwɔ́’ pá’ *lepʉ̌ Ssé ne ńzɛ́te ngie mé ná kapʉ̀ŋ sépʉ́a kà ngáb mánzsé yépʉ́a wɔ́

²⁵Á gwɔ́ fʉ̀’ó, tsɔ̌ nyìŋ gwɔ́ Yerósalem, lezíŋ sé gwɔ́ le Simeon, á gwɔ́ nyìŋ, ńkú’te *lepʉ̌ Ssé ḿbiŋ ńjú’ ncwò wé. Mbà aa ńzɔ́gɔ ńzẅí’te nyìŋ gẅie à ge lá’ tó, pà Israel lɔgɔ yé ńtʉ, à Zẅìge Ndʉalʉ̌a gwɔ́ ntʉ́m yé.

²⁶Mbà à la lá’ ńtʉ́ njÿó shwóŋó yé ngie à těen ńdá’a ńkwé té gwɔ́ gie à zabá léjÿɔ́g ná *Nzà’nkÿo gẅie à tǔm wɔ́.

²⁷À Zẅìge Ndʉalʉ̌a gÿo, á gʉa *jʉ’ʉ Ssé, á gíŋe ńgwɔ́ pɔ́ fʉ̀’ó, mbà Yesyɛ̂b pɔ́ Malîɛ lɔgɔ́ mûɔ ńtó légÿo mmó gie *lepʉ̌ la ne ńzɛ́te.

²⁸Símeon kẅé yé ńgẅiin mbwo yé, ńně síe Ssé, ńgɔɔn ngie:

²⁹Cʉ̀apʉ̀a, áa fʉ̀’ɔɔn pá’ɔɔn, ngwɔ́ ɔ̀ nyé ngàŋa fà’ gù á pʉ́lè ńkwé pá’ ɔ̀ la gɔɔn.

³⁰Oon n dɔ̌g nÿɔ́g mɔ́ɔn ńgyá pá’ ɔ̀ ge gÿo pʉ̀a mesoŋ tsẅɛ́.

³¹Aa letsẅɛ́ gẅie ɔ̀ la lá’ nyɛte ńzáb lényɛɛ mbwo ngwòŋo ngwòŋ.

³²Á gwɔ́ kyɛ̀’ gie á ge gÿo mé zsé ɔ́ tsɛ̀ɛ njÿó ntsèm. Pú’u, ɔ̀ lɔg ńnáa legú’ mbwo Israel, á lá’ ɔ́.

³³Yesyɛ̂b pɔ́ Malîɛ jú’ menò mie Símo gɔ̌ɔn ná múɔ á kʉ’ʉ wɔ́b.

³⁴Simeon cʉ́me wɔ́b mbwo Ssé ńdêen ńké ńgɔɔn né Malîɛ ngie: Míŋ ɔ̀ wɔɔn aa pá’ɔɔn ńké ńgwɔ́ gẅie Ssé ge cʉa nzèm yé gÿo eshʉ́ kú pʉ̀a tà ńgyɔ́ɔn Israel wɔɔn, é piŋ gÿo mé ná mékù’ lelÿò pʉ̀a, mélà’mie aa nyìŋ gẅie Ssé lɔgɔ yé ńnyɛɛ mmó gie à ne ńgÿo, tá pʉ̀a mesoŋ ke ńgwága yé gwág.

³⁵À cʉa pú’u, tá mekwaŋte mie ée melóŋ pʉ̀a kẅɛɛ mángyɛ̌. Á gʉa ná gù Malîɛ, mbà nò ge lá’ gÿo ɔ́ tà ɔ̀ jú’ à gwá’a fʉ̀’e mé lɔgɔ́ pù’ sɔbɔ tʉ́m ɔ́ la.

³⁶Atsɔ̌ méndÿò manzwě la gíŋe ńgwɔ́ yé Yerósalem fʉ̀’ó, lezíŋ sé gwɔ́ le Ánɔ́ɔn, á gwɔ́ míŋ Fanuel á nà ngẅɛ̀ ndá Asɛ̀ɛ. À lɔ̌ɔn ńjú’u nò mbwo Ssé é shwóŋó lá’. Á la gwaa gwɔ́, mbà à la lêen ńzɔ́’ yé ńgÿo ndà’ ngù’ sɔɔn mbʉ́a andǔm we kwé.

³⁷A la cʉ́’ʉ mpfɔ̌g pú’u, ńké těen ńtsó *jʉ’ʉ Ssé wɔ́, ńnéŋe *ńkwoŋo kwoŋ ńnéŋe nzyè, ésẅíŋte Ssé, ńtsẅé ńgu’te yé fʉ̀’e zsǒ pɔ́ lêtsẅɛ́’, ńdá’ ńgẅiin ngù’ ntsɔ̀b lekùa lê móm lefɔ̌ɔn,

³⁸ńtóo *jʉ’ʉ Ssé tsɔ́ lyɛ̌’ pá’ à zɔ̀ɔn ńtóo, ńgwaa kúu wó fʉ̀’ó, mbà mé lɔgɔ́ múɔ ńtó, á gyá yé, ésíe Ssé, ńdêen ńké ńzye léshwóŋó nò wɔɔn múɔ mbwo pʉ̀a metsèm pie é la ne ḿbyɛ́bɛ lyɛ̌’ gie Ssé ge lá’ cu’u Yerósalem.

³⁹Yesyɛ̂b pɔ́ Malîɛ gÿo shwóŋó nò gie pɔ́ tǒ mǒ tà ḿmag pá’ *lepʉ̌ Cʉ̀apʉ̀a la ne ńzɛ́te, ḿbiŋ zèm le Galilea, á tÿǒsoŋo pɔ́b Nǎzarɛd.

⁴⁰Múɔ ne ńgú’u, azsé nò yé né ńkẅi’i tɛ’, á gíŋe ne ńzsé mmó gie Ssé ne ńkwoŋo ngie pʉ̀a mesoŋ gÿo, e Ssé piŋ ńgwɔ́ lê yé.

⁴¹Yesyɛ̂b pɔ́ Malîɛ lɔ́ɔn ńgwɔ̂ ngù’ ntsèm, ńgee Yerósalem léjÿó línɔ́ɔn *Páskà.

⁴²Yěsô gÿo ńgwɔ́ tà ńgẅiin ngù’ ntsɔ̀b pʉ́a pâ pɔ́ pú ńgʉa pá’ tsẅé lá’ yɔ́b la ne ńzɛ́te pú’u,

⁴³ńjÿó línɔ́ɔn ta á mag, ńgwɔ piŋ nzèm, múɔ zsô Yerósalem pɔ́ té zsé.

⁴⁴Pɔ́ la ne ńkwaŋa pɔ́ ngie aa tsɛ̀ɛ nùɔ yɔ́b, tà ńgiŋe tà’a lyɛ̌’, ńdíe yé tsetsɛ̀ɛ pʉ̀a ngẅɛ̀ ndá yɔb pâ pʉ̀a pɔ́b,

⁴⁵ńdá’ tè yé gyá, kékáŋ tà ḿbiŋe Yerósalem, ńgiŋe fa’a yé,

⁴⁶é gwɔ́ lẅíŋe lyɛ̌’ tá, pɔ́ gyá yé, á *jʉ’ʉ Ssé, á ńnéŋe tsetsɛ̀ɛ *pàkyàgte mbʉ̌ Ssé, ńné ńjú’u menò mie pɔ́ ne ńgɔɔn ḿbiŋ ńgíŋe ně ńzɛ́te wɔ́b tsɔ́.

⁴⁷Pʉ̀a pie é la jú’u shwóŋè yé ně ḿbúu ńgɔ’te zsé nò yé mbɔɔ yé ntí letsɔ’ɔ́ nò.

⁴⁸Yesyɛ̌b pɔ́ Malîɛ gwɔ́ tà ńgyá yé ḿbú ḿmɔɔn tɛ’. Má we gɔɔn né yé ngie: Míŋ wɔ̀ɔn, ɔ̀ gwǎ zsé ngie ɔ̀ ge gÿo yɔɔn nò ná peg pá’ɔɔn á gwa’á la? Ɔ̀ kéen ńtsɔ́’ɔ léme yeg tá gù, peg zɔ́gɔ léfa’a ɔ́, ńně ḿbɔ́gɔ ngie kà tsɔ́ mmó zɔ̌ kéen ńgÿo ɔ́ wɔ́?

⁴⁹Á tsɔ́’ɔ mbwo pɔ́b ngie: Pi piŋe fa’a wɔ̀ɔn pú’u, mélà’a kɔ́? Pi te ně ńzsé ngie á póŋ mèŋ shwôŋ menò Tá wɔ̀ɔn mɔ́ kà?

⁵⁰À la tsɔ́’ pú’u, pɔ́ ké te jú’u nò gie à lɔgɔ ńgɔɔn wɔ́.

⁵¹À la gɔɔn pú’u, pâ pɔ̌ piŋ nzèm né Nǎzarɛd, á ně ńjú’u ncwò wɔ́b. Má we ké ńde’e mɔɔn menò ntsèm pɔ́ tsɛ̀ɛ ntʉ́m yé.

⁵²Yěsô ne ńgú’u, azsé nò yé né ńkẅi’i, e Ssé gwɔ́ lé yé, pʉ̀a mesoŋ ně ńkwoŋo yé.