Read Ngiemboon Lukase 20 Bible Online

Lukase 20 - Ngiemboon bible

Lukase 20

¹Yěsô gwɔ́ tsɔ́ lyɛ̌’, ńnyé ńgwɔ́ pɔ́ tsɛ̀ɛ *jʉ’ʉ Ssé ńně ńzí’i pʉ̀a mmó ńdɔgɔ ńtsẅii Nkʉ̀ Mbòŋo mbwo lá’, *metándá pànùŋe pwɔ́’ pâ *pàkyàgte lepʉ̌ Mǒsê lâ melÿò tsɛ̀ɛ lá’ tó.

²Ńzɛ́te yé ngie: Shwóŋo wég, ɔ̀ lɔgɔ lezíŋ wɔ́ ńgÿo mɔɔn menò? Kwà’ wɔ̌ zɔ tumó ɔ́ ngie ɔ̀ gÿo pú’u?

³Yěsô tsɔ́’ɔ mbwo pɔ́b ngie: Mbɔɔ mèŋ yɔ́ɔn, mèŋ, n ge zɛ́te gẅi tà’a nò. Pi shwóŋó wɔ̀ɔn:

⁴Awɔ̌ la túmo Jâŋ Mbabtis? E Ssé kà pɔ́ pʉ̀a mesoŋ?

⁵Pɔ́ jú’, ńkwaŋte tsetsɛ̀ɛ pɔ́b ngie: Pege lɔɔn ngie e Ssé zɔ la túmo yé, mbà à ge zɛ́te wégè ngie tà mélà’a kɔ́ pege la tè zẅíŋe nò gie Jâŋ lɔ̌ɔn ńgɔɔn wɔ̂?

⁶MÀbiŋ ngie pʉ̀a mesoŋ zɔ̌ la túmo yé, mbà lá’ ge lɔg metóon téme wégè zẅé, mélà’mie pɔ́ ée nà yɔ́b twó ńne ńzsé ngie Jâŋ laa *ntsẅì nkʉ̀ Ssé.

⁷Ńkwaŋ pá’ɔɔn, ńcʉ́’ ńtsɔ́’ pɔ́ ngie pɔ́ kaa zsé.

⁸Yěsô gɔɔn yé né pɔ́b ngie: Mbɔɔ mèŋ yɔ́ɔn, n tè shwóŋó gẅi nyìŋ gẅie n dɔgɔ lezíŋ sé ńgÿo mɔɔn menò wɔ́.

⁹Ńgɔɔn pú’u, ńzye lélɔg sagá nò ńgɔɔn né lá’ ngie: Atsɔ̌ ndÿò lǎ’ ńgẅiin nká’ wé, ńgʉa tsòló ḿbye metÿǒ mie mé kyéen mentɔ̌ɔn ńdɔgɔ ńnyɛte melù’, ńdu ssé ńgee legìŋ, ńgee tóo wó ńnéŋe tɛ’.

¹⁰Afʉ̀’e lékáb ntɔ̌ɔn tÿǒ gÿo ńku’, á túmo tsɔ̌ nyìŋ na pafa’a fa’ pe mbwo pʉ̀a pie ée nká’ ngie à gʉa ńkẅé mé mentɔ̌ɔn tÿǒ ńdɔg ńtó. Pɔ́ nkúu wó, ńgwoon yé ńcúa, ńjwoŋo yé á piŋ mbwó mesẅɛ̀ɛ.

¹¹Á gíŋe ńtúmo wetsɔ̌, pɔ́ gíŋe wéwɛ̌ ńcúa, ńzoonte yé, ńjwoŋo yé á piŋ mbwo mesẅɛ̀ɛ.

¹²Angàŋ nká’ gíŋe ńtúmo mbɔ́ɔntè yétá, pɔ́ gíŋe ńnéŋ mefʉ̌ŋ ná wéwɛ̌, ńjwoŋo yé.

¹³Ngàŋ nká’ leen ńké ńkwaŋte ngie: Mèŋ n gÿo lêkɔ́ pé’e? Ńńnéŋe tà ngie: Mèŋ, n ge túmo Míŋ wɔ̀ɔn mie n kwoŋo yé tɛ’. Pɔ́ ge gǎ wɔ́ gÿo mekù’ mé.

¹⁴Múɔ gʉa ńkúu wó, pànyɛte melù’ gyá yé, ńgɔɔn tsetsɛ̀ɛ pɔ́b ngie: Njÿò ndá wɛ̂ gẅie à tóo lɛ, pege zẅé yé, ńjÿó nká’.

¹⁵Ńgɔɔn pú’u, éshwóŋó yé ńdɔg fó nká’ ńkẅɛ, ńzẅé yé. Yěsô leen ńké ńzɛ́te ngie, pi gyǎ gí ngie ngàŋ nká’ ge tó gÿo lêkɔ́ ná pɔ́b?

¹⁶À ge tó gÿo mé zẅéte pɔɔn pànyɛte melù’, à cʉ́me nká’ mbwo pe mendyɛ̀’ɛ. Alá’ jú’ pá’ Yěsô cʉmé yɔɔn nò pú’u, ńgɔɔn ngie ngǎŋ ńgwɔ́ á le pɛ́’ɛ wɔ́!

¹⁷Yěsô leen ńké ńdíe wɔ́b tà ńgɔɔn ngie: Tà wɔɔn nkaŋ ŋwà’ne gẅie ée tsɛ̀ɛ ŋwà’ne Ssé ée pá’ɔɔn ńdɔgɔ ńgɔɔn ngie kɔ́: «Tóon gẅie pàpwóon ndá la gwá’, léen ńcʉ́’ʉ tóon gẅie yé zɔ pǔ ḿbi’ ndá[11]»?

¹⁸Tóon ŋwɛ́ aa gẅie mbɔɔ wɛ̌ nyìŋ wɔ́ lɔɔn ńgwe mǒ, mbà ngàŋ ge pwɔ́’te. Á píŋ ńgwe ná nyìŋ, mbà à ge pú gwɔ’ɔ ngàŋ.

¹⁹Pá’ *metándá pànùŋe pwɔ́’ lâ *pàkyàgte lepʉ̌ Mǒsê, la jú’ yɔɔn sagá nò, ńdiŋ ngie à gɔɔn pɔ́ ne pɔ́b la, pɔ́ fa’ shÿó légwoon yé, tá ḿbɔ́g nÿɔ́g lá’.

²⁰Ńdeen ńké ńzye légwá ḿbáte yé, ńtúm pà mánáŋ nzèm yé, tà pɔ́ gwɔ́ yɔ́b nzèm yé pɔ́ pá’ pʉ̀a mbòŋo, tá ne ńzẅí’te pá’ nò ge kẅɛ pɔ́ cwo ye tá mé lɔg ńgwoon yé ńnáa mbwo ngúmnɔ́ɔn pà *Roma.

²¹Pɔ́ tó ńzɛ́te Yěsô ngie: Tsítsà, peg ne ńzsé ngie ɔ̀ gɔɔn nò, ḿbiŋ ńda’té pɔ́ nò gie á tyé ndʉŋ ndʉŋ, ɔ̀ tè líe pʉ̀a pɔ́ nà shÿó wɔ́, ńda’te nò nénʉ́, pɔ́ pá’ Ssé ne ńzɛ́te ngie mé gÿo pú’u.

²²Shwóŋo wég: *Lepʉ̌ ségè ée pé’e ńzẅíŋ ngie pege má’ ncùb Kása pà *Roma kà ngǎŋ?

²³Yěsô zsé ngie pɔ́ zẅí’i pɔ́ ncwò we, ńgɔɔn né pɔ́b ngie:

²⁴Pi nyɛɛ wɔ̀ɔn pàga nkáb. Wɔɔn ée shÿó wɔ̌ gẅie ée nà nkáb? Sɔɔn é gwɔ́ lezíŋ wɔ́ sie ée mǒ? Pɔ́ tsɔ́’ɔ mbwo yé ngie ée we Kása, lezíŋ gíŋ ńgwɔ́ pɔ́ sé.

²⁵Yěsô lêen ńké ńgɔɔn né pɔ́b ngie: Á lɔɔn ńgwɔ́ pú’u, pi náa mmó gie áa ye Kása mbwo Kása, ńnáa ye Ssé mbwo Ssé.

²⁶Pɔ́ jú’ pá’ à tsɔ̌’ pú’u, á kʉ’ʉ wɔ́b, pɔ́ té gyá tsɔ́ *lɔ̌’ nà shwóŋó gie à gɔ̌ɔn mbwo lá’ gwɔ́, ńdáŋte.

²⁷Etsɔ́ ntá’ pʉ̀a ná nùɔ pà *sadukay leen ńké ńtóo lejʉ́ŋ Yěsô, pà *sadukay ée pʉ̀a pie é té zẅíŋ ngie mepfó ge gÿo zíme nà legwé wɔ́.

²⁸Ńgɔɔn ngie: Tsítsà, Mǒsê la ŋwe’e tsɛ̀ɛ *lepʉ̌ ségè ngie: Nyìŋ lɔɔn ńzɔ́’ɔ manzwě, ńkwé té cʉa mmó, mbà fɛ́ we gẅiin lésɔgɔ mpfɔ́g, pɔ́ yé zyé pènkʉ́ ńdɔg nuŋe ngẅɛ̀ fɛ́ awɛ̌.

²⁹Shwóŋo wég: Etsɔ́ mefɛ́ laa wó, ńgwɔ́ mbàŋa sɔɔn mbʉ́a, ndùŋ mvfò zɔ́’, ńgÿo ńkwé té cʉa mmó.

³⁰Mbɔ́ɔntè sɔgɔ mpfɔ́g, ńgíŋe ńkwé yé té cʉa mmó.

³¹Mbɔ́ɔntè yétá gíŋe sɔ́gɔ mpfɔ̌g wa, ńkwé pɔ́ tè cʉa mmó. Pɔ́ pú’u, tà pɔ́b sɔɔn mbʉ́a pu ńzɔ́’ɔ wɛ̌ manzwě, ńké ńkwé pɔ́ tè cʉa mmó.

³²Á gwaa zsote manzwě kwé yé.

³³Pá’ pɔ́b sɔɔn mbʉ́a la pú ńzɔ́’ɔ manzwě wɔɔn lɔɔn, mé ge lá’ zíme nà legwé, à gwɔ́ we wɔ̌ fʉ̀’ó?

³⁴Yěsô tsɔ́’ɔ mbwo pɔ́b ngie: Áa nà fʉ̀’ɔɔn, mbàŋa lâ pànzwě ne ńzɔ́’ɔ.

³⁵Tá ńgʉa ná pʉ̀a pie Ssé gyǎ ngie à ge zíme wɔ́b, pɔ́ kú yɔ́b tsɛ̀ɛ ngwòŋ sẅé, mbà tsɔ̌ lézɔ́’ à tè gíŋe ńgwɔ́ wó mbwo pɛ̌ mbàŋa lâ pɛ̌ pànzwě wɔ́.

³⁶Ńzɔɔn ńgwaa gwɔ́ pɔ́ té gíŋe ńgee nkwě wɔ́. Mélà’mie pɔ́ cʉ́’ ńgwɔ́ pɔ́ pá’ *mecÿɔ́’ Ssé la, ńcʉ́’ púɔ Ssé, ńtí nò gie Ssé kẅě wɔ́b mbwo legwé.

³⁷Kwà’ Mǒsê la shʉ̀ashʉ̀a ńda’te ngie epʉ̀a ge lá’ zíme nà legwé. Áa nà jʉ’e ŋwà’ne gie à la ŋwe’e nà nò mûɔ métÿǒ gẅie à la gyá mmɔ̌g mǒ, á tóŋo Cʉ̀apʉ̀a le, e Ssé Ábalam, ńgwɔ́ Ssé Esâg, ńgwɔ́ Ssé Yakwɔ́b,

³⁸Yěsô gíŋe ńgɔɔn ngie, e Ssé tè Ssé mepfó pʉ̀a wɔ́, e Ssé ee Ssé pʉ̀a metʉ̀. Pi zsé ngie pʉ̀a mesoŋ metsèm cʉa nzèm Ssé ńgwɔ́ pʉ̀a metʉ̀.

³⁹Yěsô tsɔ́’ pú’u, tsɔ́ *pàkyàgte lepʉ̌ Mǒsê tóontè ńgɔɔn ngie: Tsítsà ɔ̀ tsɔ̌’ kwà’ mboŋó.

⁴⁰Á fo fʉ̀’ó nyìŋ tè gíŋe ńgẅiin shÿɔ́g légíŋe ńzɛ́te yé tsɔ́ nò wɔ́.

⁴¹Yěsô piŋ ńgɔɔn né pɔ́b ngie: Pi kwáŋ gí ngie mé zí’i pʉ̀a ngie *Nzà’nkÿo gẅie Ssé la ka’ à ge lá’ gwɔ́ nyìŋ nà ngẅɛ̀ fùɔ Ndavíd pɛ́’ɛ̀ á lɔgɔ ńgwɔ́ lêkɔ́?

⁴²Fùɔ Ndavíd yé máŋwɛ́ gɔɔn tsɛ̀ɛ ŋwà’ne mezɔ́bɔ ntse ngie: Cʉ̀apʉ̀a Ssé gɔ̌ɔn mbwo wɔɔn Ndè ngie: Tóo ńnéŋe nà gwoŋó pwó yɔ́ɔn ye tʉ̀,

⁴³ńzẅí’te mèŋ n dɔg megàŋ mbù pú, ńgÿo ntÿɔgɔ́ mekwò mú

⁴⁴Tà fùɔ Ndavíd tóŋo yé le we Ndè pá’ɔɔn, *Nzà’nkÿo piŋ ńgwɔ́ nyìŋ nà ngẅɛ̀ ye lêkɔ́?

⁴⁵Yěsô gÿo ńtsẅe ńně náa ntÿɔgɔ́ mbwo *ngàŋa kwò yé, alá’ ntsèm gie á laa jʉ’ó ne ńjú’u. Á gɔɔn ngie:

⁴⁶Pi lÿɔ́’ *pàkyagte lepʉ̌ Mǒsê. Pɔ́ kwoŋo léma’ meshʉ̀shʉ̀a nzsǒ ńdɔg ńgwáa ńkʉ́’ʉ, ḿbiŋ ńkwoŋ ngie me tsyɛ’te wɔ́b á ndùmo gyɛ̌. Ńkú *mendá cú’tè, ńkaŋa yɔ́b jʉ’ pɔ́ mvfò. Pɔ́ kúu jʉ’e melínɔ́ɔn, ńnéŋé pɔ́ nà jʉ’e melÿò.

⁴⁷Pɔ zɔ̌ gíŋe ńdɔgɔ legyè ńkẅé shúm mepfɔ̌g, ńcʉ́’ʉ létsyɛ’te Ssé, ńdɔgɔ légɔɔn nò á sag ḿbaba menÿɔ́g pʉ̀a. E Ssé ge lá’ záb yɔb ngʉ̀ngʉ̀ e tʉ tɛ’.