Read Ngiemboon Lukase 23 Bible Online

Lukase 23 - Ngiemboon bible

Lukase 23

¹Ngàŋa cú’tè gɔɔn pú’u, ńdu ssé métsèm, ńdɔgɔ Yěsô ńgʉa nê mvfò *Pilato.

²Ńzye lésẅiŋe yé ngie: Peg gyǎ nyìŋ wɔɔn ne ngwá ńkʉ́’ʉ tsɛ̀ɛ ngwòŋ wég ńcʉŋte twó lá’, ńtɔ’ɔ wɔ́b léma’ ncùb ntÿɔ́’, nnáa mbwo Kása pà *Roma. A giŋé ne ńgɔɔn ngie aa *Nzà’nkÿo gẅie e Ssé la ka’a mbwo peg, ńdɔgɔ ńgɔɔn ngie aa fùɔ.

³*Pilato zɛ́te Yěsô ngie: Ɔɔ fùɔ pà Yuda la? Yěsô tsɔ́’ɔ mbwo yé ngie: Ɔ̀ gɔ̌ɔn pú’u.

⁴*Pilato gɔɔn mbwo *metándá pànùŋe pwɔ́’ mbɔɔ mbwo lá’ ngie: Mèŋ n tè ne ńgyá mmó gie nyìŋ wɔɔn fʉ̌a tà ńgwɔ́ mé gɔɔn ngie à gwě ntsàŋ wɔ́.

⁵Tá pɔ́ cwoŋo ńkẅi kẅi, ńgɔɔn ngie: A ne ńgwáa ńkʉ́’ʉ ésẅite pʉ̀a ngie pɔ́ tʉʉ twó. À la zye Galilea, ńkúu Jẅidea, à gie à lɔ̌g ńtó tó tà ńkúu jʉ’ɔɔn lɔɔn.

⁶*Pilato jú’ pú’u, ńzɛ́te ngie: Aa nyìŋ Galilea wá?

⁷Pɔ́ gɔɔn ngie oon. Á túmo Yěsô ńná né fùɔ *Herôd, mélà’mie yé zɔ lɔ̌ɔn sá’a yɛ̌ pàga ngwòŋ, ńgwaa gwɔ́, mbà à kà tǒ tà ńgwɔ́ Yerósalem ná mɛ̌ melyɛ̌’.

⁸*Herôd gyâ Yěsô, ḿbú ńkág tɛ’, mélà’mie à lɔ̌ɔn ńtsẅé ńjú’u mé píte menò ná ye tɛ’, á ne ńtsɔ́ɔn légyá yé. Á gyá yé pú’u, ńkwaŋ ngie, ndyɛ̀’ Yěsô gÿo tsɔ̌ ndàa gyá nò, à gyá.

⁹Ńzɛ́te yé menò tà é gyɔ́ɔn tɛ’, à tè tsɔ́ tsɔ́’.

¹⁰*Metándá pànùŋe pwɔ́’ pâ *pàkyagte lepʉ̌ Mǒsê gwɔ́ jʉ’ó, ḿbú ne ńzába menò twó Yěsô tɛ’.

¹¹*Herôd pâ pàmékɔ́ɔn pé zoonte Yěsô, ńnyime yé tà ńkaa nzsǒ lefùɔ éshuu ná yé, ńtúm ngie, mé gíŋe ńdɔgɔ yé ḿbiŋ ńnáa mbwo *Pilato.

¹²Á la gwaa gwɔ́ *Pilato pɔ́ *Herôd gwɔ́ lê mbù, ḿbiŋ fó lyɛ̌’ó pɔ́ cʉ́’ mesǒ.

¹³Mé lɔgɔ yé ńkúu wó, *Pilato tóŋ *metándá pànùŋe pwɔ́’, mbɔɔ pàsá’a lá’ lâ lá’,

¹⁴ńgɔɔn né pɔ́b ngie: Pi ně ńgwɔ́ lɔgɔ nyìŋ wɔɔn tóo mvfò mèŋ, ńgɔɔn ngie à ne ńcʉŋte twó lá’. N ŋagá yé pɔ́ mvfò pi. N gʉ̌a nà menò mie pi ně ńgɔɔn ná yé, n tè gyá tsɔ́ mefʉ̀a wɔ́.

¹⁵Tà mbɔɔ fùɔ *Herôd kaa mefʉ̀a ná yé gyá, tà à piŋé yé ńná né mèŋ. N dɔgɔ ńgɔɔn ngie nyìŋ wɔɔn kàa fʉa tsɔ́ nò, tà ńgwɔ́ mé zẅé yé zẅé wɔ́.

¹⁶Áa pú’u, tá mèŋ n ge cʉ́’ tsẅi mé cúa ye cúa, n deen ńké ńnyé yé à gʉa. [

¹⁷Á lɔ́ɔn ńgwɔ́ fʉ̀’e línɔ́ɔn *Páskà, *Pilato gẅiin lékẅile tà’ ngàŋa tsǎŋ ńnáa mbwo lá’].

¹⁸Tá, alá’ zye lézẅɛɛ shwǒŋ ngie: Gÿo mé zẅé nyìŋ wɛ, ɔ̀ nyé Panepâse né peg.

¹⁹Panepâse ŋwɛ́ laa tsǎŋ ńtí và’ gie à la ma’a tÿǒsoŋ, ḿbiŋ ńgíŋ ńtí pá’ à la zẅé nyìŋ.

²⁰*Pilato ne fa’a lékyɛɛ Yěsô ńnyé, tá á cʉa pú’u, á gíŋe ńgɔɔn nò mbwo lá’ gɔɔn.

²¹Tá lá’ ntsèm ké ne ńkẅi’i ḿbége pɔ́ shwǒŋ ńgɔɔn ngie: Kime yé nà tÿǒ nkǐ, ké ńkime yé pɔ́ nà tÿǒ nkǐ.

²²*Pilato gɔɔn nò ná mbɔ́ɔntè yétá ngie: Nò tepòŋ gie áa pá’ɔɔn, mbà à gÿǒ áa kɔ́? Mèŋ n kaa gyá tsɔ́ nò gie à fʉ̌a tà ńgwɔ́ mé zẅé yé zẅé wɔ́. Mèŋ n ge tsẅi mé lɔg ngwɔ̀ɔn ńcúa yé, n nyé yé à gʉa.

²³Alá’ ké ńdɔg pɔ́ ngyè tetʉ́ʉ, ńkẅi kẅi ngie mé kime yé nà tÿǒ nkǐ, tà á cʉa *Pilato.

²⁴Á zá’ ntsàŋ pá’ lá’ ne ńkwoŋo.

²⁵Ńnyé nyìŋ gẅie pɔ́ la ne ńzɛ́te. Á nyìŋ gẅie à la kúu tsǎŋ ńtí và’ mbɔɔ lézẅé nyìŋ, ḿbiŋ ńkúu ná Yěsô, ńcʉ́’ ńnáa yé né pɔ́b ngie pɔ́ lɔgɔ yé ńgʉa ńgÿo mmó gie pɔ́ ke ne ńkwoŋo légÿo.

²⁶Pɔ́ lɔgɔ Yěsô ńcʉ́me mánzsè, ńgiŋ tà ḿbumte tsɔ̌ nyìŋ Sirɛne, gẅie mé lɔ́ɔn ńtóŋo yé lê Símo, á ne fóo nká’. Pàlÿɔ́’ ncù gwoon yé, ńdɔg tʉ̀ ńnáa tÿǒ nkǐ Yěsô ngie à kaa ńdɔg ńcʉ́me nzèm.

²⁷Alá’ laa nzèm tà ńgyɔ́ɔn, pànzwě gwɔ́ nùɔ ńdʉa ńtʉ́ʉ ngɔ́’ Yěsô.

²⁸Yěsô giŋ tà sele nnɛ́, ńdíe wɔ́b ńgɔɔn ngie: Anzwě we Yerósalem, tà pi lʉa wɔ̀ɔn, pi lʉa pɔ́ gí twó mbɔɔ ye gubé gí.

²⁹Pi zsé ngie melyɛ’ɛ́ lá’ ne ńtóo, mie mé ge gɔɔn ngie: Pàshÿó mbòŋo ée mekǐŋ pànzwě, pá’ pɔ́ laa zɔɔn ńzyé wɔ́, mbà pɔ́ laa múɔ nóŋe.

³⁰Á ge lá’ gwɔ́ gwɔ́ tà pʉ̀a tsẅi né mekwɛ́ ngie: Pi kwɔgɔ sẅɛ́ɛ wég, é tsẅi né mekwɔ’ɔ́ ngie: Pi sẅɛ́’ ḿbwoon wég.

³¹É tsɔ́ɔn lékwé pú’u, á nue mé lɔɔn ńgÿo pá’ɔɔn nà tÿǒ gie á ne ńzéme ntɔ̌ɔn, mbà mé ge tó kúu nà tÿǒ gie á té ne ńzéme ntɔ̌ɔn wɔ́ é gÿo lêkɔ́?

³²Mé la gwaa lɔgɔ Yěsô gʉa, ḿbéle metsǒŋ mépʉ́a ná ye, pá’ mé ge pú zẅé wɔ́b apɔ̌.

³³Ńgʉa tà ńkúu nà tsɔ́ jʉ’ gie mé lɔɔn ńtóŋo le kẅǐ twó, ńkime Yěsô nà tÿǒ nkǐ, ḿbiŋ ńkim mbɔɔ metsǒŋ pá mépʉ́a, nà mɔ́b metÿǒ nkǐ. Tà’ gwɔ́ nà gwoŋó pwó Yěsô ye tʉ̀, wetsɔ̌ gwɔ́ nà gwoŋó pwó kyɛ̀bɛ.

³⁴Yěsô gɔɔn ngie: Tá wɔ̀ɔn, lege mefʉ̀a mɔ́b, mélà’mie pɔ́ té ne ńzsé mmó gie pɔ́ gÿo wɔ́. Pàlÿɔ́’ ncù pie é laa jʉ’ó ma’a tyeente tá ńdɔg ńgabte menzsǒ mé.

³⁵Alá’ la tyé ńne ńdíe pá’ mé kime Yěsô. Pàsá’a lá’ ne ńzoonte Yěsô ńgɔɔn ngie: À la kẅé petsɔ́ pʉ̀a ncwò legwé, à gíŋe ńkẅé kwà’ yé twó, pá’ à lɔɔn ńgɔɔn tà shwóŋó nò ngie aa *Nzà’nkÿo gẅie Ssé la tsɔ́’.

³⁶Pàlÿɔ́’ ncù lá ne ńgíŋe ńyime yé yɔ́b, ésẅɛ’te nnɛ́ ńtóo lejʉ́ŋ yé, ńnáa kikíi melù’ né yé.

³⁷Ńně ńgɔɔn ngie: Ɔ̀ lɔɔn ńgwɔ́ kwà’ fùɔ pà Yuda, ɔ̀ kẅé twó ɔ̀ mbwo legwé.

³⁸Mé la ŋwe’e mmó, ńkime nà tÿǒ á twó Yěsô ngie: Wɔɔn aa pá’ɔɔn ńgwɔ́ fùɔ pà Yuda.

³⁹Atsɔ̌ tà’ nà metsǒŋ pie mé la pú ńkime wɔ́ba Yěsô nà metÿǒ nkǐ ne ńzoonte yé ngie: Mé gɔɔn ngie ɔɔ *Nzà’nkÿo pù’ ká? Kẅé twó ɔ̀ mbwo legwé, ńkẅé yég la.

⁴⁰Wetsɔ̌ jú’ pú’u, ńkaga yé ngie: Mé pǔ ńkime wégè lâ nyìŋ wɛ̂ nà tÿǒ nkǐ, ɔ̀ gyá pú’u, ɔ̀ tè Ssé pɔ́g la. Á gʉa ná pɔgɔ, mbà mé kime wɔ́gɔ́, á gwɔ́, kwà’ nénʉ́.

⁴¹Pɔgɔ kwé menò mɔ́gɔ. Tá ńgʉa ná yé, mbà à kaa tsɔ́ nò fʉa.

⁴²Á kaga yé pú’u, ḿbiŋ sẅíŋte Yěsô ngie: Yěsô, ɔ̀ lɔɔn ńdá’ ńtóo nà lefùɔ shú, ɔ̀ pɔ́ɔn lélege wɔ̀ɔn.

⁴³Yěsô tsɔ́’ ngie: Mèŋ shwóŋó gú, áa kwà’ nénʉ́, ngie, pé lyɛ̌’ɔɔn pɔgɔ ge gwɔ́ tsɛ̀ɛ lekág mvfò Ssé.

⁴⁴Tsɛ̀ɛ zsǒ gÿo ńku’, nèm pyé, nzěm pú síŋe tsɛ̀ɛ ngwòŋ ntsèm tà ńkúu ná nèm tá mbÿɛ njÿó.

⁴⁵Nzsǒ gie mé la lɔg ńkʉŋe jʉ’ gie *pànùŋe pwɔ́’ tyé wɔ́ ndá Ssé, éshʉa tsetsɛ̀ɛ, éfó tÿǒ ńkúu ssé.

⁴⁶Yěsô ńnéŋe nà tÿǒ nkǐ, tà ńga’te lê ngyè tetʉ́ʉ, ńgɔɔn ngie: Tá wɔ̀ɔn, mèŋ n nyě zẅìge yɔ́ɔn, á nà mbwo mú, ńgɔɔn pú’u, ńdeen ńké ńcʉ́m.

⁴⁷Tá ndá pàlÿɔ́’ ncù pà *Roma jʉ’ó la pú ńgyá kɔ̀ɔkɔ́ɔ wɔ́ gie á pǔ ńcʉa, tà ye mbÿɛ̌ gwɔ́ le gɔɔn ngie: Nyìŋ wɔɔn kaa tèfʉa. Ashwóŋè yé ŋwɛ́ ná mekù’ mbwo Ssé.

⁴⁸Epʉ̀a metsèm pie é la nɔ́ɔnte ńgyá mɔɔn menò, la cʉ́’ʉ lépiŋ nzèm, wɔ̌wɔ́ɔ zéme pwó.

⁴⁹Ngwòŋ mesǒ Yěsô, tà mbɔɔ pànzwě pie pɔ́ la fó Galilea ńcʉ́me nzèm yé la tyé pɔ́ tàa nzèm tá ńgyá mɔɔn menò.

⁵⁰Atsɔ̌ nyìŋ gwɔ́ yé jʉ’ó, mé tóŋo yé le Yesyɛ̂b, mbà mé la zyé yé nà tsɔ́ tÿǒsoŋ pà Yuda gie mé tóŋo le Arimaté, ńgwɔ́ nyìŋ mbòŋo, ńkíbe *lepʉ̌ Ssé tɛ’, ḿbiŋ ńtsẅé ne ńzẅí’te fʉ̀’ gie Ssé ge sá’ njÿó. À laa mbɔɔ tsetsɛ̀ɛ melÿò pie pɔ́ lɔ́ɔn sá’a lá’. À la tè zẅíŋe nò gie petsɔ́ melÿò la záb ḿbiŋ ńgÿo nà Yěsô wɔ́.

⁵¹

⁵²Yesyɛ̂b ŋwɛ́ gʉa ńgyá *Pilato, ńdúɔ pfó Yěsô mbwo yé, á zẅíŋ.

⁵³Á gʉa, éfó nà tÿǒ nkǐ sẅé’e yé, ńdɔgɔ pwó nzsǒ ńzémte yé, ńgʉa ńnéŋe tsɛ̀ɛ lesyè sie mé la shʉ’ njʉŋ jʉŋ, á ná tóon kenkʉ́ŋe, tá ḿbiŋ ńnyé té ńnéŋe tsɔ̌ nyìŋ tsòló.

⁵⁴À lɔ̌ɔn ńnéŋe pú’u mbÿɛ̀ njÿó Faladé, mé ne ńtaŋte nnɛ́ pá’ lyɛ’ɛ́ nzsè yɔ́b ne ńgee nzyě.

⁵⁵Pànzwě pie pâ Yěsô laa nùɔ, tà fó Galilea la zse nzèm Yesyɛ̌b tà ńkúu lesyè, ńgyá pá’ à nuŋé pfó Yěsô pú’u,

⁵⁶ńdeen ńké ḿbiŋe tÿǒsoŋ, ńtáŋte laméndɔ́ɔn mbòŋo, mbɔɔ tsɔ́ mèvɛ lélɔg ńtáa ńzɔ́’ɔ pfó Yěsô. Alyɛ’ɛ́ nzsè zye, pɔ́ pʉ́le ńzẅɛte pá’ *lepʉ̌ la ne ńzɛ́te.