Read Ngiemboon Lukase 24 Bible Online

Lukase 24 - Ngiemboon bible

Lukase 24

¹Ndùŋ mvfò lyɛ̌’, á nà ngàba lá’ gÿo ńgwɔ́, pànzwě ŋwɛ́ mʉ́ʉ tsɛ̀ɛ mba’ámba’, ńdɔgɔ làméndɔ́ɔn gie pɔ́ lá táŋte ńgʉa né jʉ’ʉ lesyè.

²Ńgʉa tà ńkúu wó, ńgyá, mbà mé kà fó ncwò lesyè, ńtsó máamáa tóon gẅie à kaa wó.

³Pɔ́ zyɛ́’ ńkúu tsòló, ńké tè pfó Ndè Yěsô gyá.

⁴Pɔ́ la tyé ńdíe jʉ’ é ne ńkʉ́’ʉ wɔ́b, pɔ́ gwoon ńgyá pʉ̀a mépʉ́a kẅɛ, ḿma’ menzsǒ é fɔ́g tà ńŋwʉŋe.

⁵Pɔ́ cÿɔ’ tà ńcʉ́’ ńdíe pɔ́ ssé, tá pʉ̀a ŋwɛ́ zɛ́te wɔ́b ngie: Pi tóo tsetsɛ̀ɛ mepfó ssé, éfa’a nyìŋ gẅie aa ntentʉ́ mélà’a kɔ́?

⁶À cʉ’ʉ́ jʉ’ɔɔn wɔ́, à zimé nà legwé. Pi zɔɔn ńkímte nò gie à la ne ńgɔɔn mbwo pi fʉ̀’ gie pi lâ pɔ́ la nyé Galilea.

⁷À la gɔɔn ngie: Á ne ńzɛ́te ngie mé sẅiŋe *Míŋ Nyìŋ mbwo pʉ̀a tepòŋ, pɔ́ kime yé nà tÿǒ nkǐ, à zíme nà legwé nà mbɔ́ɔntè lyɛ̌’ tá.

⁸Pɔ́ jú’ pú’u, ńdeen ńké ńkímte ngie, ée menò mie Yěsô la zɔɔn shwóŋó wɔ́b,

⁹éfó jʉ’ó, ńgʉa ḿbú ḿbíte menò ntsèm mie é cʉ̌a, éshwóŋ *ngàŋa kwò yé ntsɔ̀b yémmɔ’ɔ́ nê legém mbɔɔ mbwo petsɔ́ pʉ̀a nà nùɔ yɔ́b.

¹⁰Pànzwě ŋwɛ́ lâ Malîɛ Magdala, ńgÿo Jâne, mbɔɔ Malîɛ má pà Jâg, pâ petsɔ́ pànzwě. Pɔ́ píte menò ŋwɛ́ éshwóŋ *ngàŋa kwò Yěsô.

¹¹Pɔ́ jú’ é gwɔ́ pɔ́ pá’ njÿòon la, pɔ́ té zẅíŋ.

¹²Tá’, Piɛ lu ssé, ńkÿote tà ńkúu jʉ’ ye lesyè, ńŋwe’e ssé, ńgyá pɔ́ ndà’ shúm nzsǒ sie mé la lɔg ńzémte pfó Yěsô, ńgwɔ piŋ, á giŋe ńkʉ’ʉ yé, à tè ne ńzsé mmó gie á cʉ̌a wɔ́.

¹³Á la gíŋe ńgwɔ́ pɔ́ lyɛ’ó, etsɔ́ pʉ̀a mépʉ́a, á nà nùɔ Yěsô lu ssé Yerósalem, ńně ńgee nê tsɔ́ lá’ gie mé tóŋo le Emawẅis. Ntyě gwɔ́ pá’ mmó mekilo ntsɔ̀b yémɔ’ɔ́ nê legém.

¹⁴Ńgiŋe shwóŋe nà menò ntsèm mie é ka pǔ ńcʉa.

¹⁵Afʉ̀’e pɔ́ la ne shwóŋe, ńně ńzoŋo la, Yěsô lê twó yé kẅɛ́te wɔ́b mánzsè, pâ pɔ̌ ne ńgiŋe.

¹⁶Tá’, atsɔ́ mmó táte, pɔ́ té yé liŋ.

¹⁷Yěsô zɛ́te wɔ́b ngie: Pi sěen ńgiŋe ńzoŋo pɔ́ kɔ́ pɛ́’ɛ̀? Pɔ́ jú’ ńtyé, ḿma’ mezìŋe, éshʉ́ŋe twó.

¹⁸Atsɔ̌ tà’ ná pɔ́b, lezíŋ sé gwɔ́ le Kélopàs zɛ́te yé ngie: Mânyìŋ ntsèm Yerósalem zsě mmó gie á kà gÿo Yerósalem nà melyɛ̌’ mɔɔn, tà é cʉ́’ ndà’ gú la?

¹⁹Á zɛ́te wɔ́b ngie akɔ́ kà gÿo? Pɔ́ gɔɔn ngie, peg kě ḿmɔɔn pɔ́ menò mie é kà gÿo Yěsô nyìŋ Nǎzarɛd. À kaa kwà’ *ntsẅì nkʉ̀ Ssé we lÿò, á nà mefà’ mé, mbɔɔ nà shwóŋè yé á mvfò Ssé mbɔɔ mvfò pʉ̀a mesoŋ.

²⁰Pá’ *metándá pànùŋe pwɔ́’ pâ pàsá’a lá’ peg ka tsege yé mbwo *Pilato ngie mé gʉa ńŋaga yé, ńzẅé yé. Mé ka leen ńké ńkime yé nà tÿǒ nkǐ.

²¹Mbà peg ka ne ńkwaŋa ngie yé zɔ ge lá’ zá’ nkÿo ngɔ́’, á lóŋ Israel à tsẅɛ́. Mɔɔn menò ka gÿo, ée fʉ̀’ɔɔn ńgwɔ́ lyɛ’ɛ́ lá’ sétá.

²²É té ndà’ pú’u wɔ́, etsɔ́ pànzwě tsetsɛ̀ɛ peg ně ńkʉ’ʉ wég. Pɔ́ ně ḿmʉ́ melém njÿó lyɛ̌’ɔɔn, ńgʉa jʉ’ gie mé ka le’e yé wó,

²³pɔ́ té pfó yé gyá, ḿbiŋ nzèm shwóŋó wég ngie: Pɔ́ kǔ wó, *Mecÿɔ́’ Ssé kẅɛɛ mvfò pɔ́b, ńgɔɔn ngie Yěsô gwɔ́ pɔ́ ntentʉ́!

²⁴Etsɔ́ pʉ̀a pég ně ńju’ pú’u, ńdu ssé, ńgíŋe ńgʉa yɔ́b lesyè, ńgyá á gwɔ́ pɔ́ ndʉŋ ndʉŋ pá’ pànzwě ně shwóŋó wɔ́b, tá pɔ́ ké tè Yěsô gyá.

²⁵Yěsô leen ńké ńgɔɔn né pɔ́b ngie: Pi gwě gígyé. Pi tè ne ńdwo ńzẅíŋe menò ntsèm mie *pàntsẅi nkʉ̀ Ssé la ŋwé’e wɔ́.

²⁶Pi kaa zsé ngie, á ka ne ńzɛ́te ngie *Nzà’nkÿo vɔg ńgyá ngɔ́’ tá ńkúu tsɛ̀ɛ legú’ we wɔ́ ka?

²⁷Ńgɔɔn pú’u, ńzye lékyagte menò ntsèm mie ée tsɛ̀ɛ ŋwà’ne Ssé ńne ńdíe yé, éshwóŋó wɔ́b, ńzye nà meŋwà’ne Mǒsê, ḿbɔ́ɔnte ńkúu tsɛ̀ɛ me *pàntsẅì nkʉ̀ Ssé.

²⁸Pâ pɔ̌ gʉa tà ne ńkúu lá’ gie pɔ́ mépʉ́a lɔ́ɔn ńgee wo. Pɔ́ gyá á fa’a pɔ́ pá’ à giŋé ńge giŋ tà ngʉ̀a sag.

²⁹Tá pɔ́ kú’te yé, ńgie pâ pɔ̌ pú ńdá’, mélà’mie nzèm cʉ’ʉ́ síŋe sǐŋ, zà’ cʉ̌a. Á zẅíŋ pâ pɔ̌ kúu ndá gie pɔ́ lɔ́ɔn ńgee nê wó.

³⁰Afʉ̀’ʉ léjÿó shúm gÿo ńku’, pɔ́ ńnéŋe ssé, á pí mbelég, ńná ndǎg mbwo Ssé, ḿbwɔ́’te ńná né pɔ́b.

³¹Tá menÿɔ́g mɔ́b leen ńké ńnyɛ́’ɛ pɔ́ liŋe yé, á gwoon ḿbyé.

³²Pɔ́ sele ńgɔɔn tsetsɛ̀ɛ pɔ́b ngie: Yɔɔn lɔgɔ ńgwɔ́ mmó gie á kɔ’ɔ ńgÿo tá shwóŋè yé kúte wɔ́gɔ́ fʉ̀’ gie pege kɔ’ɔ ńgwɔ́ mánzsè á ne ńkyagte nò Ssé shwóŋó wɔ́gɔ́ la!

³³Pɔ́ lu ssé pɔ́ fʉ̀’ó, ńcʉ́me mánzsè, ńgíŋ ḿbiŋe Yerósalem, ńkẅɛ́te *ngàŋa kwò Yěsô ntsɔ̀b yémɔ’ɔ́ nê legém, mbà pâ petsɔ́ pʉ̀a Yěsô cu’té.

³⁴Ńkẅɛ́te wɔ́b pú’u, pɔ́ shwóŋó wɔ́b ngie: Áa nénʉ́ ngie Ndè zimé nà legwé, Símo ně ńgyá yé.

³⁵Pɔ́ gíŋe ḿbíte yɔ́b mmó gie pɔ́ ně ńtóo mánzsè ńgyá, ńgie pɔ́ ně ńgwaa liŋe yé, mbà à pǐ mbelég tà ne ńgaba.

³⁶Pɔ́ nyé shwóŋó shwoŋó, Yěsô gwóon ńkẅɛɛ tsetsɛ̀ɛ pɔ́b, ńtsyɛ’te wɔ́b ngie: Mbʉ́lè gwɔ́ ne pi!

³⁷Aléme yɔ́b tsɔ́’ɔ. Pɔ́ cÿɔ’, ńzɔɔn ne ńkwaŋa pɔ́ ngie áa gegÿɛ́ nyìŋ.

³⁸Tá Yěsô gɔɔn né pɔ́b ngie: Aléme gí séen ńtsɔ́’ɔ tsɔ’ɔ́ mélà’a kɔ? Pi mʉ’te mʉ’té mélà’a kɔ́?

³⁹Pi líe mbwó mɔ́ɔn nê mekwò mɔ́ɔn tá ńgyá, aa kwà’ mèŋ. Pi mwoonte wɔ̀ɔn tá ńjú’, gegÿɛ́ nyìŋ té mbàb nnɛ́ gẅiin, ńké tè mekẅǐ gẅiin, pi ké ńgyá pá’, m biŋ ńgẅiin mbàb nnɛ́ nê mekẅǐ.

⁴⁰Á gwaa gɔɔn ńne nyɛɛ wɔ́b mbwó mé lâ mekwò mé.

⁴¹Pɔ́ ne ńkága tɛ’ tá’ á nyé ńkʉ’ʉ wɔ́b kʉ’ʉ, pɔ́ gɔɔn ngie kà áa nò wɔ́? Yěsô gyá pá’ pɔ́ nyé ḿmʉ́’te mʉ’té la, ńdeen ńké ńzɛ́te wɔ́b ngie: Pi gẅiin mmó mpfɛ̌ jʉ’ɔɔn?

⁴²Pɔ́ fa’a kème ssó ye ntuɔ ńná né yé.

⁴³Á kẅé, ńtyé pɔ́ mvfò pɔ́b ḿpfɛ́.

⁴⁴MÀpfɛ́ tà ḿmag, ńgɔɔn né pɔ́b ngie: Pi gyá mmó gie n kɔ̌ɔn shwóŋó gẅí, á fʉ̀’ gie pege ka nyě ńzɔ́gɔ. Mèŋ n da shwóŋó gẅi ngie á ne ńzɛ́te ngie yɛ̌ kɔ́ wɔ́ gie mé la ŋwe’e ná mèŋ wɔ́ à pumte. Menò ŋwɛ́ ntsèm ntsèm ée tsɛ̀ɛ ŋwà’ne Mǒsê, mbɔɔ tsɛ̀ɛ ye *pàntsẅì nkʉ̀ Ssé lâ ye Mezɔ́bɔ Ntse.

⁴⁵Ńdeen ńké ńtsɔ́’ legyè sɔ́b, ńgÿo pɔ́ jú’ menò mie ée tsɛ̀ɛ ŋwà’ne Ssé.

⁴⁶Ńgɔɔn ngie: Áa tsɛ̀ɛ ŋwà’ne Ssé ńgwɔ́ ngie: *Nzà’nkÿo gẅíin lé lá’ ńgyá ngɔ́’, ńkwé, tá Ssé piŋ ńzíme yé nà legwé nà mbɔ́ɔntè lyɛ̌’ tá.

⁴⁷Á ne ńzɛ́te ngie mé lá’ ńdɔg lezíŋ sɔ́ɔn, ńgɔɔn nò Ssé mbwo lá’a lá’ ngie wɔ̌wɔ́ɔ kúbe mà we, e Ssé lege menò tepòŋ mé. Pú’u, é ké zye Yerósalem.

⁴⁸Pi pɛ zɔ ké ńgwɔ́ pànjÿò ńgyá, á lélɔg menò ŋwɛ́ saa lá’.

⁴⁹Pi zsé ngie mèŋ n ge tó túmo mmó gie Tá wɔ̀ɔn la ka’a lénáa mbwo pi. Pi ké ńzẅí’te pɔ́ tÿǒsoŋ tà ńkúu fʉ̀’ gie metʉ̀ Ssé é ge fó tyǒ lepwó ésẅɛ̌’ kúu ná pi.

⁵⁰Yěsô gɔɔn pú’u, ńdɔgɔ wɔ́b ńkẅɛ, ńgʉa tà ńcʉ́’ʉ lékúu Mbetáni, ńka’ mbwó ńnáa tÿǒ, ńnéŋ mbʉ́lè ná pɔ́b.

⁵¹Á ne ńnéŋe mbʉ́lè ná pɔ́b pú’u, ńně ńkwɔ́’ɔ ńgee nê tÿǒ lepwó.

⁵²Pɔ́ cʉ́’ ńtyé jʉ’ó ńně ńgu’te yé, tà á ku’, pɔ́ lɔgɔ lekág ḿbiŋ nzèm ne Yerósalem.

⁵³Ńgʉa tà ńkúu wó, ńké ńcʉ́’ ńnéŋe pɔ́ tsɛ̀ɛ *jʉ’ʉ Ssé fʉ̀’ ntsèm, ńgu’te Ssé.