Read Ngiemboon Jâŋ 1 Bible Online

Jâŋ 1 - Ngiemboon bible

Jâŋ 1

¹Njÿó la gwɔ́ zyète, ashwóŋè gwɔ́ pɔ́ wó, yé shwóŋè pɔ́ Ssé laa wó. Á piŋ ńgwɔ́ pɔ́ Ssé.

²Yé shwóŋè pɔ́ Ssé gwɔ́ tà fó pɔ́ nzyeté.

³Akɔ́ɔkɔ́ɔ gwaa gwɔ́ wó, ńcʉa pɔ́ ná yé. Atsɔ́ mǒ té gwɔ́ wó té gwɔ́ gie á cʉ̌a pɔ́ ná yé wɔ́.

⁴Legwɔ́ à laa ná yé, le gwɔ́ ŋwɛ́ á gwɔ́ kyɛ̀’ gie á kyɛ’ɛ pʉ̀a mesoŋ.

⁵Akyɛ̀’ ne ńkyɛ’ɛ nzěm, nzěm ké tè kúbe[1].

⁶E Ssé gÿo ńtúmo tsɔ̌ nyìŋ, lezíŋ se gwɔ́ lé Jâŋ.

⁷Á tó ńgwɔ́ njÿò ńgyá, á léshwóŋó mmó gie à zsě ńtí kyɛ̀’ ŋwɛ́, légwɔ́ gie wɔ̌wɔ́ɔ ge záb ntʉ́m we ná kyɛ̀’ ŋwɛ́.

⁸À la tè kyɛ̀’ wɔ́, à la tó yé pɔ́ leshwóŋ pʉ̀a nò ná kyɛ̀’.

⁹Yé shwóŋè ŋwɛ́ láa kwà’ kyɛ̀’ gie á tóo tsɛ̀ɛ njÿó lékyɛ’ɛ mânyìŋ ntsèm.

¹⁰Ye shwóŋè laa tsɛ̀ɛ njÿó, tá pʉ̀a mesoŋ ké tè yé zsé. Mbà pɔ́ la ké ńcʉa pɔ́ ná yé tá ńgwɔ́ wó.

¹¹À la tóo kwà’ lá’ pɔ́b, epʉ̀a lá’ pé té yé kúe.

¹²Tá’, etsɔ́ pʉ̀a kúe yé, ńzáb ntʉ́m ná yé, á leen ńké ńnáa wɔ́b tʉ̀ lécʉ́’ púɔ Ssé.

¹³Legwɔ̌ pú’u, à tě fóo nà ntí gie mámbàŋa pɔ́ manzwě kwǒŋ ńzyé wɔ́, ńké tě fóo ná lekwoŋ we nyìŋ mesoŋ wɔ́, mé gɔɔn légwɔ́ púɔ Ssé, mbà Ssé zɔ kwǒŋ yɛ̌ ntí lezyé.

¹⁴Ashwóŋè la cʉ́’ʉ nyìŋ mesoŋ, ńtó ńtsẅé tsetsɛ̀ɛ pege, pege gyá legú’ we, á gwɔ́ legú’ Múɔ wémɔ’ɔ́ gẅie à fóo lejʉ́ŋ Tá, ḿbú ńgẅiin poŋo ntʉ́m, ńnyɛ pɔ́ nò nénʉ́.

¹⁵Jâŋ gÿo ńgɔɔn mmó gie à zsě nà nyìŋ ŋwɛ́, ńdɔg ngyè tetʉ́ʉ ngie: Wɛ̂ áa nyìŋ gẅie n kɔ̌ɔn shwóŋó gẅi la, pá’ mèŋ n kɔ̌ɔn ńgɔɔn ngie: Nyìŋ aa nzèm mèŋ ńne ńtóo, à cʉa wɔ̀ɔn, mélà’mie mé la gwaa zyé wɔ̀ɔn, á gwɔ́ pɔ́ wó.

¹⁶Angàŋ keen ńtó, à lɔg pá’ à gẅiin poŋo ntʉ́m, ńcÿó gʉm yégè metsèm tɛ̀’, ńcÿó sele ńcÿó, mélà’mie à gẅiin nkwòŋe tɛ’.

¹⁷E Ssé la cʉa ná Mǒsê, ńná *lepʉ̌, anò nénʉ́ pɔ́ nò lécÿó gʉm yégè piŋ ńcʉa pɔ́ nà Yěsô Kristo.

¹⁸Atsɔ̌ nyìŋ laa Ssé gyá, tà ndà’ Múɔ wémɔ’ɔ́ gẅie aa Ssé ńgwɔ́ léjʉ́ŋ Tá, à la gÿo mé zsé yé.

¹⁹Jâŋ gÿo ńgɔɔn nò ńtí Yěsô. Á gwɔ́ tsɔ́ fʉ̀’, pàsá’a lá’ pà Yuda pie ée Yerósalem túm pànuŋe pwɔ́’ lâ pʉ̀a nà ngẅɛ̀ Lěvi, ńgie pɔ́ gʉa ńzɛ́te Jâŋ ngie: À gwɔ́ pɔ́ wɔ̌?

²⁰Jâŋ shʉ̀ashʉ̀a ńgɔɔn mbwo mânyìŋ ntsèm té mʉ́’te ngie: Mèŋ n tè *Nzà’nkÿo gẅie Ssé la ka’ wɔ́.

²¹Pɔ́ zɛ́te yé ngie tà ɔ̀ gwɔ́ pɔ́ wɔ̌? Ɔ̀ gwɔ́ pɔ́ *Elîɛ keen? Jâŋ gɔɔn ngie ngǎŋ. Pɔ́ gɔɔn ngie, ɔ̀ gwɔ́ pɔ́ *ntsẅì nkʉ̀ Ssé gẅie mé ne ńzẅí’te lá keen? Jâŋ gɔɔn ngie ngǎŋ.

²²Pɔ́ leen ńké ńgɔɔn né yé ngie: Shwóŋo wég nyìŋ gẅie ɔ́ɔ wɛ̌, ńzsé ngie peg ge gẅiin nò gie peg ge tó shwóŋ pʉ̀a pie pɔ́ ně ńtúmo wég. Kwà’ gù lê twó ɔ́, ɔ̀ kwǎŋ ngie ɔ́ɔ wɔ̌?

²³Jâŋ lɔgɔ shwóŋè gie *ntsẅì nkʉ̀ Ssé Esǎya la gɔɔn ńtsɔ́’ ngie: Mèŋ n gee nyìŋ gẅie aa nkwòŋo tsẅɛ, ésá’a ńgɔɔn ngie: «Pi siŋte mánzsè Cʉ̀apʉà à tyé ndʉŋ ndʉŋ».

²⁴Pʉ̀a pie mé la túmo wɔ́b mbwo Jâŋ la, lâ pà *farisay.

²⁵Pɔ́ gíŋe ńzɛ́te Jâŋ ngie, tà ɔ̀ tè *Nzà’nkÿo wɔ́, ńké tè *Elîɛ́ wɔ́, ńké tè *ntsẅì nkʉ̀ Ssé gẅie mé ne ńzẅí’te wɔ́, tà mélà’a kɔ́ ɔ̀ nu’u pʉ̀a ntse?

²⁶Jâŋ tsɔ́’ɔ mbwo pɔ́b ngie à gʉa ná mèŋ, mbà mèŋ n nu’u pʉ̀a pɔ́ ndà’ tsɛ̀ɛ ntse. Atsɔ̌ nyìŋ ké ńgwɔ́ tsetsɛ̀ɛ pi, pi nyé té zsé yé.

²⁷Ayé nò ge pɔ́ɔnte yɔ́ɔn, mèŋ fǒ tè kú’u léŋwé’e ssé ńkyɛ́’ nkÿo melɔ̌ɔn mé wɔ́.

²⁸Mé lɔ́ɔn ńzɛ́te yé mɔɔn menò pá’ɔɔn á Mbetáni, á nà yétsɔ́ nzǐŋ ntse Jurdeŋ á jʉ’ gie à lɔ̌ɔn ńnu’u pʉ̀a ntse wó.

²⁹Njÿó gÿo ńdʉ́a, Jâŋ gyá Yěsô ne ńtóo, á gɔɔn ngie: Wɔɔn aa Mûɔ *Njʉ̀njÿò gẅie Ssé lɔgɔ sẅɛ’ɛ ndòon menò mie pʉ̀a la gÿo.

³⁰Àa yé gẅie mèŋ n kɔ̌ɔn shwóŋó gẅi la, pá’ mèŋ n kɔ̌ɔn ńgɔɔn ngie: Nyìŋ aa nzèm mèŋ ńne ńtóo, à cʉa wɔ̀ɔn, mélà’mie mé la gwaa zyé wɔ̀ɔn, á gwɔ́ pɔ́ wó.

³¹Kwà’ mèŋ n da tè ne ńzsé nyìŋ gẅie à ge gÿo gwɔ́ wɛ̌ wɔ́. Tá mèŋ n ka tǒ yɔ́ɔn, ńne ńnu’u pʉ̀a ntse lélɔg ńgÿo pà Israel zsé yé.

³²Jâŋ gíŋe ńgɔɔn tsɔ́ nò gie à zsé ná Yěsô, ńgie: Mèŋ n da gyá zẅìge Ssé sẅɛ́’ ńnéŋe ná yé, ńgwɔ́ pá’ Kàpʉ̀ŋ.

³³Kwà’ mèŋ n da zɔɔn tè ne ńzsé yé wɔ́, tá Ssé gẅie à la túmo wɔ̀ɔn ńgie mèŋ n gʉa ńnu’ pʉ̀a ntse, yé zɔ̌ gɔɔn né mèŋ ngie: Ɔ̀ ge gÿo gyá zẅìge Ssé tó ńnéŋe ná nyìŋ. Àa yé gẅie à ge ná pʉ̀a mbwo zẅìge Ssé.

³⁴Mèŋ n da gyá, tà mèŋ n ne sá’a shwóŋó pʉ̀a ngie aa Míŋ Ssé.

³⁵Njÿó gÿo ńdʉ́a, Jâŋ pâ tsɔ́ *ngàŋa kwò yé yépʉ́a nyé ńgwɔ́ pɔ́ jʉ’ gie à kaa wó.

³⁶Á má’ lejÿɔ́g, ńgyá Yěsô pá’ à ne ńcʉa, ńgɔɔn ngie: Wɔɔn aa Mûɔ *Njʉ̀njÿò Ssé.

³⁷Ngáŋa kwò Jâŋ yépʉ́a jú’u yɔ̀ɔn shwóŋè, ńcʉ́me nzèm Yěsô.

³⁸Yěsô sele nnɛ́, ńgyá pá’ pɔ́ ée nzèm yé, ńzɛ́te wɔ́b ngie: Pi fa’a kɔ́? Pɔ́ tsɔ́’ɔ mbwo yé ngie: Rabbi (ńdɔgɔ ngie tsítsà), ɔ̀ tsẅé nzɔ̌?

³⁹Yěsô gɔɔn ngie: Pi tó, pi ge gyá. Pɔ́ leen ńké ńgʉa ńgyá jʉ’ gie à tsẅé wó. Á gwɔ gwɔ́ ńgwɔ́ nèm tá mbÿɛ̀ njÿó, pâ pɔ́ ńnéŋe tà yɛ̌ lyɛ’ɛ́ lá’ mag.

⁴⁰Á la gʉa ná pʉ̀a mépʉ́a pie pɔ́ la jú’u shwóŋè Jâŋ, ńcʉ́me nzèm Yěsô la, lezíŋ tsɔ̌ tà’ nyìŋ láa le Ndeléya, á gwɔ́ fɛ́ Símo Piɛ.

⁴¹Ndeléya ŋwɛ́ gʉa ńnyé té shwóŋó tsɔ̌ nyìŋ, ḿvɔg ńgyá fɛ́ we Símo, ńgɔɔn né yé ngie: Peg gyǎ *Nzà’nkÿo, á lɔgɔ ńgíŋe ńgɔɔn ngie Kristo.

⁴²Ńdɔgɔ Símo, ńgʉa lejʉ́ŋ Yěsô, Yěsô cwoŋo ńdíe Símo tà ńgɔɔn né ye ngie: Ɔ̀ɔ Símo míŋ Jâŋ. Mé ge gÿo tóŋo gú le Kéfas. Yěsô tóŋo le Kéfas pá’ɔɔn, á lɔgɔ ńgíŋe ńgɔɔn ngie Piɛ[2].

⁴³Njÿó gÿo ńdʉ́a, Yěsô záb ngie à ge gʉa tsɛ̀ɛ pàga ngwòŋ Galilea, ńne ńgee, ḿbumte Filib, ńgɔɔn né yé ngie cʉ́me nzèm mèŋ.

⁴⁴Filib ŋwɛ́ laa nyìŋ Mbetsayida, á tÿǒsoŋo pà Ndeléya pɔ́ Piɛ.

⁴⁵Filib gʉa ńgyá Natanayɛl, ńgɔɔn né yé ngie: Peg gyǎ nyìŋ gẅie mé la ŋwe’e nò ná yé tsɛ̀ɛ ŋwà’ne mbʉ̌ Mǒsê, mbɔɔ tsɛ̀ɛ meŋwà’ne pà *ntsẅì nkʉ̀ Ssé. Peg gyǎ yé, á gwɔ́ Yěsô, mìŋ Yesyɛ̂b, á mûɔ Nǎzarɛd.

⁴⁶Natanayɛl gɔɔn né yé ngie: Tà mé lǎ zɔɔn ńgyá mmó mbòŋo fó Nǎzarɛd? Filib tsɔ́’ɔ mbwo yé ngie: Tóo, ɔ̀ ge gyá.

⁴⁷Yěsô gyá pá’ Natanayɛl ne ńtóo, ńgɔɔn nò ná yé ngie: Wɔɔn aa kwà’ mûɔ Israel gẅie anò nkÿo nkÿo té ná yé wɔ́.

⁴⁸Natanayɛl zɛ́te Yěsô ngie: Ɔ̀ zsé wɔ̀ɔn nzɔ̌? Yěsô tsɔ́’ɔ mbwo yé ngie: Filib ně ńgwaa tóŋo gú pá’a mèŋ n ně ńgyá gú gyá. Ɔ̀ kěen ńnéŋe le tsìŋe tÿǒ mbÿě ngem.

⁴⁹Natanayɛl tsɔ́’ ngie: Rabbi, ɔ́ɔ Mìŋ Ssé, ɔ́ɔ fùɔ pà Israel.

⁵⁰Yěsô tsɔ́’ɔ mbwo yé ngie: Ɔ̀ zẅíŋe fʉ̀’ɔɔn, mélà’mie mèŋ n gɔ̌ɔn ngie n ně ńgyá pá’ ɔ̀ ńnéŋe le tsìŋe mbÿě ngem. Ɔ̀ ge gìŋe gyá menò mie é fáŋ ńtɔ́g mɛ̌.

⁵¹Yěsô gíŋe ńkẅi’i ńgɔɔn ngie: Tà mèŋ shwóŋó gẅí, kwà’ nénʉ́, pi ge gÿo gyá ncwò tÿǒ lepwó tsɔ́’ɔ ńtyé, *mecÿɔ́’ Ssé ne fóo wó, ésẅɛ́’ɛ ḿbiŋe ńkwɔ́’ɔ, ńtóo ná *Míŋ Nyìŋ.