Read Ngiemboon Jâŋ 11 Bible Online

Jâŋ 11 - Ngiemboon bible

Jâŋ 11

¹Atsɔ̌ nyìŋ gÿo ńgwe gùɔ, lezíŋ sé gwɔ́ le Nǎzalo. Pâ mefɛ́ pé pe panzwě mépʉ́a, Mágtà pɔ́ Malîɛ pú ńtsẅê tsɛ̀ɛ lá’a Mbetáni.

²Wɔɔn Malîɛ gwɔ́ gẅie a lǎ’ ńdɔgɔ laméndɔɔn, ńzɔ́’ɔ Ndè tà á kû’, á gíŋe ńdɔg menòŋo twó mé ńtsí’i mekwò mé la. Nǎzalo gwe gùɔ pá’ɔɔn,

³pɔ́b panzwě ŋwɛ́ mépʉ́a túm ńtsẅii mbwo Yěsô ngie: Andè, ashǔ lepyè gù ne ńguɔ tɛ’.

⁴Yěsô jú’ pú’u, ńgɔɔn ngie, yɔɔn guɔ té gie á ge lɔgɔ yé wɔ́. Á ge gÿo mé ná mekù’ mbwo Ssé, ḿbiŋ ńcʉa mǒ ńná mekù’ mbwo Míŋ Ssé.

⁵Yěsô lɔ̌ɔn ńkwoŋo Mágtà, pɔ́ Malîɛ mbɔɔ Nǎzalo tɛ’.

⁶Ńké ńjú’u guɔ pá’ɔɔn, ńgíŋe ńnéŋe jʉ’ gie à laa wó lyɛ̌’ sépʉ́a.

⁷Ńdeen ńké ńgɔɔn mbwo *ngàŋa kwò yé ngie: Pege piŋe Jẅidea.

⁸*Ngàŋa kwò yé tsɔ́’ ngie: Tsítsà, ntyě kaa sag pá’ pà Yuda ka ne fá’a lélɔg metóon ńtéme gú ńzẅé wɔ́. Ɔ̀ ge gíŋe piŋe wó lá.

⁹Yěsô gɔɔn ngie: Tà’a lyɛ’ɛ́ lá’ tè gẅiin menèm ntsɔ̀b pʉ́a nê legém wɔ́ le? Nyìŋ lɔɔn ńgiŋ fʉ̀’e zsó, mbà à tè kwɔɔnte wɔ́, mélà’mie kyɛ̀’ɛ njÿó ne ńgÿo mé gyá jʉ’.

¹⁰Nyìŋ lɔɔn ńké ne ńgiŋe lêtsẅɛ́’, mbà à ge kwɔɔnte, mélà’mie mmó gie á ge kyɛ’ jʉ’ ná né yé á té wó wɔ́.

¹¹Yěsô gɔɔn yɔɔn tà ńtsẅé jʉ’, ńgíŋe ngie: Ashǔ wege Nǎzalo ne ńdyé, tá mèŋ n ge gʉa zyeen yé.

¹²*Ngàŋa kwò yé leen ńké ńgɔɔn né ye ngie: Andè, à lɔɔn ńgwɔ́ gie à lyě, mbà à ge tsẅɛ.

¹³Ńgwaa gwɔ́ pú’u, Yěsô ne shwóŋó wɔ́b ngie Nǎzalo kwě. Tá pɔ́ ne ńkwaŋa yɔ́b pɔ́ ngie à gɔɔn ngie à né ńdyé lyě.

¹⁴Yěsô leen ńké shʉ̀ashʉ̀a, ńgɔɔn mbwo pɔ́b ngie: Nǎzalo kwě.

¹⁵Á pǐŋ ḿboŋo wɔ̀ɔn tɛ’ pá’ à gwǎ kwé, n tè ssé wɔ́. E Ssé zɔ gÿǒ ngie à gwɔ́ pú’u, ńtí gẅí, ńzsé ngie pi ge fó mǒ, é nyɛte záb ntʉ́m ná mèŋ. Tá pege gʉa fʉ̀’ɔɔn tà ńkúu jʉ’ó.

¹⁶Tomáse gẅie mé lɔ́ɔn ńgíŋe ńtóŋo yé le mélefág, gɔɔn mbwo yetsɔ́ *ngàŋa kwò Yěsô ngie: Pi tó pega pɔ́ gʉa, ḿbúte ńkwé.

¹⁷Yěsô gʉa tà ńkúu wó, ńgyá, mbà Nǎzalo nuŋé tsɛ̀ɛ lesyè lyɛ̌’ lekùa.

¹⁸Pá’ lefǒ Yerósalem ńgʉa Mbetáni la gwɔ́ pɔ́ mmó mekílo méntá la,

¹⁹lelÿò pà Yuda gwaa gwɔ́, mbà pɔ́ tǒ mbʉ̀a Mágtà pɔ́ Malîɛ, létsí’i ntse nÿɔ́g mɔ́b, ńtí fɛ́ wɔb gẅie à ka kwě.

²⁰Mágtà gwɔ́ tà ńjú’ ngie Yěsô né ńtóo, ńgwaa lu ssé gʉa zá’a yé, Malîɛ cʉ́’ ńnéŋe pɔ́ ndá.

²¹Mágtà tó ńgɔɔn né Yěsô ngie: Andè, ɔ̀ kaa pé’e ńgwɔ́ jʉ’ɔɔn, mbà fɛ́ wɔ̀ɔn ka tè kwé.

²²Tá’ tà mbɔɔ fʉ̀’ɔɔn, mèŋ n zsě ngie ɔ̀ lɔɔn ńzɛ́te kɔ́ mbwo Ssé wɔ́, mbà à ge ná ná.

²³Yěsô tsɔ́’ ngie: Afɛ̌ gù ge gÿo zíme nà legwé.

²⁴Mágtà tsɔ́’ ngie: Mèŋ n zsě ngie à ge gÿo zíme nà lyɛ’ɛ́ lá’ nzsò nzèm pá’ mepfó ge lá’ ne zíme.

²⁵Yěsô tsɔ́’ɔ mbwo yé ngie: Mèŋ n gee nyìŋ gẅie à gÿo mé zíme ná legwé, ńgwɔ́ nyìŋ gẅie à gÿo mé gwɔ́ wó. Nyìŋ lɔɔn ńzáb ntʉ́m ná mèŋ ńkwé mbɔɔ kwě, mbà à ge gÿo gwɔ́ wó.

²⁶Nyìŋ gẅie à nyé ntentʉ́, ńzáb ntʉ́m ná mèŋ, à těen ńdá’a ńkwé wɔ́. Tà ɔ̀ zẅiŋé yɔɔn nò?

²⁷Á gɔɔn ngie: Oon me Cʉ̀apùa. Mèŋ, n zẅǐŋ ngie ɔ́ɔ *Nzà’nkÿo, ńgwɔ́ Míŋ Ssé gẅie mé ka né ńzẅí’te ngie à tóo tsɛ̀ɛ njÿó.

²⁸Mágtà gɔɔn pá’ɔɔn, ńgʉa ńtóŋo fɛ́ we Malîɛ, ńdemte yé ngie: Tsítsà aa pǐ ne ngie ɔ̀ tó.

²⁹Malîɛ jú’ pú’u, ńgwóon ńdu ssé lê tʉ̀ légʉa ńgyá yé.

³⁰Yěsô la nyé pɔ́ jʉ’e pɔ́ Mágtà ně ńtyé wó shwóŋe, tà mbà à kaa tɔ́g tà ńkúu tsɛ̀ɛ lá’ gwɔ́.

³¹Pà Yuda pie é ně ńtó létsí’i ntse nÿɔ́g mɔ́b Malîɛ, gyá pá’ à fǒ ndá ńkẅɛ lê tʉ̀, ńcʉ́m yɔ́b nzèm yé, ńne ńkwaŋa ngie à gee twó lesyè ńnéŋe wó tá lʉa.

³²Malîɛ gʉa tà ńkúu jʉ’ gie Yěsô laa wó, ńgwɔ́ tà ńgyá yé, ńkẅí’te mvfò ye, ńgɔɔn ngie: Andè, ɔ̀ kaa pé’e ńgwɔ́ jʉ’ɔɔn, mbà fɛ́ wɔ̀ɔn ka tè kwé.

³³Yěsô gyá pá’ à ne ńdʉa, pà Yuda pie pâ pɔ̌ pǔ ńtó gíŋ ne ńdʉa yɔ́b, ńzẅi, mbùm ye pú ńtsyɛte.

³⁴Á gɔɔn ngie: Pi ka le’e pfó yé nzɔ̌? Pɔ́ tsɔ́’ɔ mbwo yé ngie: Andè, tóo ńgyá.

³⁵Yěsô lʉa.

³⁶Pà Yuda gɔɔn ngie, pi gyá pá’ à kɔ̌ɔn ńkwoŋo yé.

³⁷Yetsɔ́ ntá’ tsetsɛ̀ɛ pɔ́b ne ńgɔɔn yɔ́b pɔ́ ngie: Yé gẅie à la nyɛ́’ menÿɔ́g mefʉ̀, akɔ́ ka gÿo, à tè ku’u légÿo wɔɔn nyìŋ le kwé wɔ́?

³⁸Yěsô gíŋe ńzẅi, ńgʉa jʉ’e lesyè, é gwɔ́ tsɔ̌ mvwɔ́’ɔ jʉ’, mbà mé la lɔgɔ tóon ńjÿɔ́’ ncwò.

³⁹Yěsô gɔɔn ngie: Pi sẅɛ́’te tóon wɛ̂. Mágtà, á fɛ́ mpfó tsɔ́’ ngie: Andè, à ge gwɔ́ fʉ̀’ɔɔn cʉ́’ʉ leme lem. Á nue ée fʉ̀’ɔɔn ńgwɔ́ lyɛ̌’ lekùa pá’ à la kwé.

⁴⁰Yěsô tsɔ́’ɔ mbwo yé ngie: Mèŋ n ně tè gɔɔn né gù ngie ɔ̀ lɔɔn ńzáb ntʉ́m ná mèŋ, mbà ɔ̀ ge gyá legú’ Ssé wɔ́ le?

⁴¹Mé gwɔ́ tà sẅɛ’te tóon, Yěsô pʉ’ʉ twó yé, ńdíe tÿǒ, ńgɔɔn ngie: Tá wɔ̀ɔn, mèŋ n nǎ ndǎg pá’ mèŋ sẅíŋte gú, ɔ̀ jú’.

⁴²Mèŋ n kɔ’ɔ́ ńne ńzsé ngie, n gɔɔn nò fʉ̀’e kɔ́ wɔ́, ɔ̀ jú’ ngyè yɔ̀ɔn. Tá’ mèŋ n gɔɔn pá’ɔɔn ńtí pɔ́ pʉ̀a pie pɔ́ tyéte lejʉ́ŋ mèŋ lɔɔn, ńgie pɔ́ zẅíŋ ngie gù zɔ la túmo wɔ̀ɔn.

⁴³Ńgɔɔn pú’u, ńdɔg ngyè tetʉ́ʉ ngie: Nǎzalo, kẅɛɛ.

⁴⁴Ampfó kẅɛ. Mbà mé ka lɔg shúm nzsǒ ńzém mekwò mé mbàa mbwó mé, lâ shÿó wé. Yěsô gɔɔn né pɔ́b ngie: Pi kyɛ́’te yé, ńkyɛɛ yé ńnyé à gʉa.

⁴⁵Lelÿò pà Yuda pie pɔ́ ně ńtóo mbʉ̀a pà Malîɛ, é pie pɔ́ gyǎ mmó gie Yěsô gÿǒ, záb ntʉ́m wɔ́b ná Yěsô.

⁴⁶Tá tsɔ́ ntá’ tsetsɛ̀ɛ pɔ́b gʉa ḿbíte mmó gie Yěsô gÿǒ, éshwóŋ pà *farisay.

⁴⁷Mentándá pànuŋe pwɔ́’, pâ pà *farisay leen ńtóŋo cú’tè lÿò, ńtóo tsoló ngie: Pege ge gÿo lêkɔ́? Nyìŋ wɔɔn né ńgÿo menò mmɔɔn mmɔɔn tɛ’.

⁴⁸Pege lɔɔn ńnyé yé á lɔg ńgʉa mvfò, mbà mânyìŋ ntsèm ge záb ntʉ́m ná ye. Pà *Roma tó ńgwɔ́ tɔ’, ńtága *jʉ’ʉ Ssé Yerósalem, mbɔɔ ngwòŋ wégè.

⁴⁹Atsɔ́ tà’ nyìŋ laa tsetsɛ̀ɛ pɔ́b, lezíŋ sé gwɔ́ Kaifa. Á gwɔ́ tándá pànuŋe pwɔ́’ ná yɛ̌ ngù’. Á gɔɔn ngie: Pi pǔ kaa tsɔ́ mmó nà nò gie pi gɔɔn lɛ̂ jú’u!

⁵⁰Pi kaa gyá ngie áa mboŋó mbwo pi pá’ à lɔɔn ńgwɔ́ tà’ nyìŋ wémɔ’ɔ́ kwé nà twó lá’, ńcʉa lá’a ntsèm lépú ńdége wɔ́ keen?

⁵¹À lɔ̌ɔn ńgɔɔn pú’u, yé zɔ tě ńgɔɔn wɔ́, pá’ á la gwaa gwɔ́ yé zɔ́ gwɔ́ tándá pànuŋe pwɔ́’ ná yɛ̌ ngù’ la, á tsẅi nkʉ̀ Ssé ngie Yěsô ge kwé nà twó lá’ pà Yuda.

⁵²Á le gwɔ́ pɔ́ ndà’ nà twó pà Yuda gílé pɔ́b wɔ́, á gíŋe ńgwɔ́ lélɔg ńtemte púɔ Ssé pie ée jʉ’ ntsèm, pɔ́ cʉ́’ʉ tà’ nùɔ.

⁵³Á fó lyɛ’ó, mekěm pà Yuda záb ngie pɔ́ ge fa’ shÿó tà zẅé Yěsô.

⁵⁴Yěsô fó fʉ̀’ó à tè gíŋe shʉ̀ashʉ̀a ńcʉa tsetsɛ̀ɛ pà Yuda wɔ́. Á lɔg tsɔ́ shÿó lá’ gẅie ée lelyěen, á nkwòŋo tsẅɛ, ńgʉa tsɛ̀ɛ tsɔ́ tÿǒsoŋ gie mé tóŋo le Efalaim, pâ *ngàŋa kwò yé ńnéŋe jʉ’ó.

⁵⁵Alínɔ́ɔn Páska pà Yuda la ne ńtóo, lelÿò pà Yuda ne fóo tsɛ̀ɛ lá’ ńtʉ́ʉ njÿó ḿvɔgɔ Yerósalem, á lésɔg *melɔ̌’ ná pɔ́b.

⁵⁶Pɔ́ ne fa’a Yěsô, ḿbiŋ ńgwɔ cú’te tsɛ̀ɛ jʉ’e Ssé Yerósalem, ńne sele ńzɛ́te tsetsɛ̀ɛ pɔ́b ngie: Pi kwǎŋ ngie à ge tóo línɔ́ɔn yɔɔn? Ngwɔ́ à zɔɔn le tó.

⁵⁷Á la gwaa gwɔ́, mbà mentándá pànuŋe pwɔ́’, pâ pà *farisay ka gɔɔn ngie, nyìŋ lɔɔn ne ńzsé jʉ’ gie Yěsô aa wɔ́, á kem, mé gʉa ńgwoon yé.