Read Ngiemboon Jâŋ 12 Bible Online

Jâŋ 12 - Ngiemboon bible

Jâŋ 12

¹É gÿo ńcʉ́’ʉ ńzága lyɛ̌’ ntɔgɔ́, à gwɔ́ lyɛ’ɛ́ línɔ́ɔn *Páskà pà Yuda. Yěsô gʉa né Mbetáni, á jʉ’ gie Nǎzalo gẅie à la zíme yé nà legwé la lɔ̌ɔn ńtsẅé wó.

²Mé gÿo ńtóŋo línɔ́ɔn nà lezíŋ sé, Nǎzalo gwɔ́ tsɔ́ tà’ nyìŋ ná pʉ̀a pie pâ Yěsô la ne ńjÿó shúm, Mágtà ne ńgaba shúm léjÿó.

³Malîɛ ńnéŋe tà kaa kème líta laméndɔɔn gie á cÿɔ́g nkáb tɛ’, mbà mé la lɔgɔ tsɔ̌ legǐ gẅie mé tóŋo le nard ńnyɛte. Á lɔg ńzɔ́’ mekwò Yěsô, ńdɔg menòŋo twó mé ńtsí’i. Agyě laméndɔɔn kwɔ́’ ḿbú ńjÿó ndá.

⁴Atsɔ̌ *ngàŋa kwò Yěsô, Jẅidas Iskariod gẅie à lɔ̌ɔn nge gÿo sẅiŋe Yěsô gɔɔn ngie:

⁵Mélà’a kɔ́ mé ně tè sẅiŋe yɔɔn laméndɔɔn ńkẅé *mendenie nkÿo tá, ńná né mepóŋ wɔ́?

⁶Jẅidas lɔ̌ɔn tě ńgɔɔn pú’u, séen ńtsɔ́ɔn pɔ́ mezìŋe mepóŋ wɔ́, à laa ntsǒŋ, á nue yé zɔ lɔ̌ɔn ńgẅiin mûɔ pɔ̀ɔn nkáb wɔba Yěsô, mé ńnéŋe nkáb tsoló á jʉʉ.

⁷Yěsô leen ńké ńgɔɔn ngie: Nyé manzwě wɛ̂ pɛ́’ɛ̀, nyé yé, à tʉ́ njÿó ńzɔ́’ɔ pfó yɔ́ɔn, tá mé gÿo ńnéŋe wɔ̀ɔn tsɛ̀ɛ lesyè.

⁸Mepóŋ ge gwɔ́ tsetsɛ̀ɛ pi pɔ́ fʉ̀’ ntsèm. Tá ńgʉa ná mèŋ, mbà pege tě ge gwɔ́ pɔ́ fʉ̀’ ntsèm wɔ́.

⁹Á gwaa gwɔ́, mbà pà Yuda tà ńgyɔ́ɔn jǔ’ ngie Yěsô aa Mbetáni, ńtóo wó, ńké tě séen ńtóo pɔ́ légyá Yěsô wɔ́, ńtóo pɔ́ légyá Nǎzalo gẅie Yěsô ka zíme yé nà legwé la.

¹⁰Metándá pànuŋe pwɔ́’ gyá pú’u, ńzáb ngie mé fa’ shÿó lézẅé mbɔɔ Nǎzalo.

¹¹Ńgɔɔn pú’u, mélà’mie lelÿò pà Yuda ka fǒ pɔ́ nà nò Nǎzalo, ńcʉ́’ʉ ńkÿo wɔ́b kÿo, ńzába ntʉ́m pɔ́ ná Yěsô.

¹²Njÿó gÿo ńdʉ́a, alá’ gie á tǒ línɔ́ɔn Páska jú’ ngie Yěsô ne ńtóo né Yerósalem,

¹³ńdeen ńké ńkɔ́’ meyáŋa letÿǒon, ńdɔg ńkẅɛɛ tÿǒsoŋ, ńgʉa ńzá’a yé, ńne ńgɔɔn né ngyè tetʉ́ʉ ngie: Gùugẅî[6] E Ssé gwɔ́ né fùɔ gẅie à lɔgɔ lezíŋ Ssé ńtóo. E Ssé gwɔ́ né fùɔ pà Israel.

¹⁴Yěsô gyá mûɔ nzìkásè, ńkwɔ́’ ńnéŋe ndùmó. Á gwɔ́ pá’ mé la ŋwe’e tsɛ̀ɛ ŋwà’ne Ssé ngie:

¹⁵«Epʉ̀a tÿǒsoŋo Sioŋ, tà pi pɔ́g, Pi gyá pá’ fùɔ gẅi ne ńtóo, À ńnéŋe ndùm mûɔ Nzìkásè».

¹⁶*Ngàŋa kwò Yěsô gyá yɔɔn nò, pɔ́ té gwóon ńdwo ńjú’ wɔ́. Yěsô gÿo ńgwɔ́ tà ńkúu tsɛ̀ɛ legú’ we á tÿǒ lepwó, tá pɔ́ leen ńké ńkímte ngie mé la tʉ́ njÿó ńŋwe’e yɛ̌ nò ńtí yé, ńgíŋ ńkímte ngie alá’ la gÿo ná yé pɔ́ pá’ mé la ŋwe’e.

¹⁷Alá’ la gwaa tó zá’a Yěsô, mbà pʉ̀a pie pɔ́ laa ssé fʉ̀’ gie Yěsô la gɔɔn né Nǎzalo ngie à fó tsɛ̀ɛ lesyè ńkẅɛ, á zíme ná legwé, la gwá ńdɔgɔ yɛ̌ nò ésa jʉ’.

¹⁸Áa mmó gie á la gÿo tá lá’ kẅɛ, ńgʉa ńzá’a Yěsô, mélà’mie pɔ́ la jú’ pá’ à gÿǒ yɔɔn nò mmɔɔn mmɔɔn.

¹⁹Pà *farisay gyá pú’u, ńgɔɔn tsetsɛ̀ɛ pɔ́b ngie: pi kaa gyá ka. Atsɔ́ mmó gie à lɔɔn ńgwɔ́ pege gÿo á té wó wɔ́. Alá’ cʉ́’ ńgwɔ́ pɔ́ nzèm ye.

²⁰Etsɔ́ ntá’ pʉ̀a Gelekia, lá pʉ ńtóo Yerósalem léjÿó línɔ́ɔn, ńgu’te Ssé.

²¹Pɔ́ tó ńgyá Filib, á nyìŋ Mbetsayida nà pàga ngwòŋ Galilea, ńgɔɔn né ye ngie: Andè, peg ne ńtsɔ́ɔn légyá Yěsô.

²²Filib gʉa shwóŋó Ndeléya, pɔ́ yé mépʉ́a gʉa ńgɔɔn mbwo Yěsô.

²³Yěsô tsɔ́’ɔ mbwo pɔ́b ngie afʉ̀’ gie mé ge gyá legú’ we *Míŋ Nyìŋ á kǔ’.

²⁴Tà mèŋ shwóŋó gẅí, kwà’ nénʉ́, mvòm ngesáŋ lɔɔn tè gwe ssé tà ńkwé wɔ́, mbà e ge gwɔ́ pɔ́ yémɔ’ɔ́. Tá ńké ńkwé, mbà e ge sá’, é ná memvòm tà é gyɔ́ɔn gyɔ́ɔn.

²⁵Nyìŋ lɔɔn ńkwoŋo we le gwɔ́, mbà à ge pyé le gwɔ́ ŋwɛ́. Nyìŋ ké ńgwága nò ná we le gwɔ́ tsɛ̀ɛ yɔɔn njÿó, mbà à ge lá’ gẅiin le gwɔ́ tèmì.

²⁶Nyìŋ lɔɔn ne fa’a mbwo mèŋ, á cʉ́me nzèm mèŋ. Àjʉ’ gie mèŋ n gee wó la, ngàŋa fà’ wɔ̀ɔn gÿo ńgwɔ́ yé wó. Nyìŋ lɔɔn ne fa’a mbwo mèŋ, mbà Tá wɔ̀ɔn ge gÿo ná mekù’ mé.

²⁷Yěsô gíŋe ngie mèŋ n gee pá’ɔɔn, mbà lém yɔ́ɔn tsɔ’ɔ́. Mèŋ n ge ké gɔɔn ngie kɔ́? É gɔɔn ngie Tá wɔ̀ɔn gÿo mèŋ n tsẅɛ́ɛ yɔɔn fʉ̀’ la? Mèŋ n dɔ̌ɔn ńzɔɔn ńtóo ńtí pɔ́ yɔɔn fʉ̀’.

²⁸Tá wɔ̀ɔn, gÿo mé gu’te lezíŋ shú. Ngyè nyìŋ leen ńké fó lepwó ńgɔɔn ngie: Mèŋ n gÿǒ pú’u. Mèŋ n ge gíŋe gÿo sẅé sẅé.

²⁹Àlá’ gie á laa jʉ’ó jú’ yɛ̌ ngyè ngie: Ée lefàŋ sie é vɛ́te. Petsɔ́ pʉ̀a gɔɔn ngie *cÿɔ́’ Ssé gɔ̌ɔn nò mbwo yé.

³⁰Yěsô gɔɔn né pɔ́b ngie: Yɛ̂ ngyè kaa gɔɔn nò pɛ́’ɛ̀ ńdɔgɔ ńnyɛɛ liŋé mbwo mèŋ wɔ́, e nyɛɛ pɔ́ mbwo pi.

³¹Afʉ̀’ kǔ’ pá’ e Ssé ge ŋag yɔɔn njÿó. Á fʉ̀’ gie Ssé ge kẅile mûɔ ntɔ́’ yɔɔn njÿó, é náa yé pǐ.

³²Á gʉa ná mèŋ, mbà mé lɔɔn ńgÿo ńkwé’e wɔ̀ɔn tà náa tÿǒ, mbà mèŋ n ge shwoŋte pʉ̀a metsèm náa lejʉ́ŋ mèŋ.

³³Yěsô lɔ̌ɔn ńdɔgɔ yɔɔn shwóŋè, ńda’te ntí legwé gie à ge gÿo kwé yɛ̌.

³⁴Alá’ tsɔ́’ɔ mbwo yé ngie: Peg la jú’u tsɛ̀ɛ ŋwà’ne Ssé ngie: *Nzà’nkÿo ge lá’a gwɔ́ pɔ́ wó. Ɔ̀ piŋ ngǎ ńgɔɔn ngie, mé ge kwé’e *Míŋ Nyìŋ náa tÿǒ? *Míŋ Nyìŋ ŋwɛ́ aa wɔ̌?

³⁵Yěsô tsɔ́’ɔ mbwo pɔ́b ngie: Akyɛ̀’ té ge gíŋe gwɔ́ tsetsɛ̀ɛ pi tà ntyě sag wɔ́. Akyɛ̀’ nyé ssé, pi giŋ, ḿbɔ́g nzěm lékẅɛ́te gẅí. Á nue nyìŋ ne ńgiŋe tsɛ̀ɛ nzěm, á le zsé jʉ’ gie à gee né wó wɔ́.

³⁶Akyɛ̀’ lɔɔn ńnyé tsetsɛ̀ɛ pi, pi záb ntʉ́m nà kyɛ̀’, ńdɔg ńcʉ́’ púɔ kyɛ̀’. Yěsô gɔɔn yɔɔn nò tà á ku’, á gʉa ńdyeen jʉ’ gie pɔ́ té ge gyá yé wɔ́.

³⁷Yěsô la tsɛ ńgÿo menò mmɔɔn tɛ’ mvfò pʉ̀a tá’, pɔ́ ké tè záb ntʉ́m ná yé wɔ́.

³⁸Á lɔgɔ ḿbumte ná nò gie *ntsẅì nkʉ̀ Ssé Esǎya la gɔɔn ngie: «Cʉ̀apʉ̀a, awɔ̌ la ké ńzáb ntʉ́m nà nò gie peg la gɔɔn? Tà Cʉ̀apʉ̀a kɔ̌ɔn ńnyɛ metʉ̀ mé pɔ́ mbwo pà wɔ̌»?

³⁹Esǎya la gíŋe ńgɔɔn mmó gie á ge gÿo tá pà Yuda le záb ntʉ́m nà Ssé wɔ́, à la gɔɔn ngie:

⁴⁰«E Ssé kéen ńgÿo menÿɔ́g mɔ́b fʉ. À kéen ńjÿɔ́’ legyè sɔ́b, légwɔ́ gie pɔ́ té lɔg menÿɔ́g gyá jʉ’ wɔ́, pɔ́ le lɔg legyè sɔ́b ńzsé nò wɔ́; à cʉa pú’u, pɔ́ le kúbe mà wɔb à gÿo pɔ́ zeŋe wɔ́».

⁴¹Esǎya gɔɔn nò jʉ’ɔɔn ná Yěsô, á nue à la tʉ́ njÿó ńgyá legú’ Yěsô.

⁴²Mé la tsɛ ne ńgwága Yěsô gwǎg tá’, tsɔ̌ lelÿò mekěm pà Yuda záb ntʉ́m ná yé. Tá ńgÿo pɔ́ ndyeen lyeen, ḿbɔ́gɔ pà *farisay léjwoŋo wɔ́b *ndá cú’tè.

⁴³Á laa pú’u, mélà’mie pɔ́ la kwoŋ mekù’ mie pʉ̀a mesoŋ náa mbwo pɔ́b, ńtɔ́g mie é fóo mbwó Ssé.

⁴⁴Yěsô ńnéŋe tà ńgɔɔn nê ngyè tetʉ́ʉ ngie: Nyìŋ lɔɔn ńzáb ntʉ́m ná mèŋ, mbà ngàŋ tě ńzába pɔ́ ndà’ ná mèŋ wɔ́. À giŋé ńzába ná nyìŋ gẅie à la túmo wɔ̀ɔn.

⁴⁵Nyìŋ gẅie à gyǎ wɔ̀ɔn, à giŋé ńgyá nyìŋ gẅie à la túmo wɔ̀ɔn.

⁴⁶Mèŋ, n gee kyɛ̀’, n ka tóo tsɛ̀ɛ njÿó légwɔ́ gie nyìŋ lɔɔn ńzáb ntʉ́m ná mèŋ, á le gwɔ́ tsɛ̀ɛ nzěm wɔ́.

⁴⁷Nyìŋ lɔɔn ńjú’u shwóŋè yɔ́ɔn à tè kú’te, mbà mèŋ n zɔ tè ŋaga yé wɔ́. Á nue n da tè tóo tsɛ̀ɛ njÿó léŋag pʉ̀a wɔ́. N da tó légÿo pʉ̀a tsẅɛ́.

⁴⁸Nyìŋ lɔɔn ńgwá’a wɔ̀ɔn, ńdʉ’ʉ shwóŋè yɔ́ɔn, mbà ngàŋ gẅiin nyìŋ gẅie à ge ŋaga yé. Ashwóŋè gie mèŋ n ka gɔɔn zɔ̌ ge lá’ ŋaga yé lyɛ’ɛ́ nzsò nzèm.

⁴⁹Á nue n da tè gɔɔn pɔ́ nò gie á fóo né mèŋ wɔ́, n da gɔɔn pɔ́ nò gie Tá wɔ̀ɔn mie à la túmo wɔ̀ɔn la tsẅi ngie mèŋ n gɔɔn, mbɔɔ nò gie mèŋ n ge gɔɔn nò mǒ.

⁵⁰Mèŋ m biŋ ne ńzsé ngie nkʉ̀ gẅie à la cʉ́me mbwo mèŋ àa le gwɔ́ tèmì. Áa pú’u, anò gie mèŋ n gɔɔn, n gɔɔn pɔ́ pá’ Tá wɔ̀ɔn la tsẅi.