Read Ngiemboon Jâŋ 13 Bible Online

Jâŋ 13 - Ngiemboon bible

Jâŋ 13

¹Á la cʉ́’ pɔ́ pá’ njÿó ge lʉ́a mé jÿó línɔ́ɔn *Páskà, Yěsô ne ńzsé ngie ayé fʉ̀’ kǔ’ pá’ à ge fó tsɛ̀ɛ yɔɔn njÿó é gʉa kẅɛ́te Tá we. Pá’ yé Yěsô lɔ̌ɔn ńkwoŋo pʉ̀a pie ée tsɛ̀ɛ njÿó ńgwɔ́ pé la, á kẅi’i ńkwoŋo wɔ́b tà ńcʉ́me.

²Ncwò nzém gÿo ńgwɔ́, pâ pɔ̌ ńnéŋe ssé léjÿó shúm. Á gwaa gwɔ́, mbà Sátà ně ńdá’ ńnéŋe kwàŋte lésẅiŋe Yěsô tsɛ̀ɛ ntʉ́m Jẅidas Iskariod, míŋ Símo.

³Yěsô ne ńzsé ngie Tá we la pú ńnéŋ shúm ntsèm mbwo yé, ńgíŋe ne ńzsé ngie à la fó mbwo Ssé, à piŋ ne ńgee né lejʉ́ŋ Ssé.

⁴Ńńnéŋe tà ńdu ssé, ésẅɛ nzsǒ fÿɔ́g ye, ńnuŋe ssé, ḿbíi tágwele ńtʉ́me zẅɛ̌’ yé.

⁵Ńnéŋ ntse tsɛ̀ɛ káŋ, ńzye lélɔg sɔg mekwò *ngàŋa kwò yé, ńdɔgɔ tágwele gẅie à la tʉ́me zẅɛ̌’ yé ńtsí’i.

⁶Ńgʉa tà ńkúu ná Símo Piɛ, á gɔ́ɔn né yé ngie: Andè zɔ ge sɔg mekwò mɔ́ɔn lá!

⁷Yěsô tsɔ́’ɔ mbwo yé ngie: Ammó gie mèŋ n ne ńgÿo, à lɔɔn ńgwɔ́ ɔ́ le jú’ fʉ̀’ɔɔn wɔ́. Tá ké gÿo jú’.

⁸Piɛ gɔɔn né yé ngie: Azeŋe yɔ́ɔn, à lɔɔn ńgwɔ́ ɔ́ le mekwò mɔ́ɔn sɔg. Yěsô tsɔ́’ɔ mbwo yé ngie: Mèŋ n dɔɔn tè sɔg, mbà pɔgɔ tè gíŋe ńgwɔ́ nà tsɔ́ nò wɔ́.

⁹Símo Piɛ gɔɔn né yé ngie: Á lɔɔn ńgwɔ́ pú’u, me Nde, tè sɔg pɔ́ ndà’ mekwò mɔ́ɔn, ɔ̀ pú sɔg mbwo mɔ́ɔn pâ twó yɔ́ɔn.

¹⁰Yěsô gɔɔn né yé ngie: Á té ne ńzɛ́te ngie mé gíŋe sɔg mbùm nyìŋ gẅie à sɔ̌g nnɛ́ wɔ́. Á nue ngàŋ pǔ ńdʉ́a. Pi ee pɛ́’ɛ̀, mbà mbùm gi lʉ̌a, e ké tè gi metsèm wɔ́,

¹¹ńgɔɔn pú’u, mélà’mie à la ne ńzsé nyìŋ gẅie à ge gÿo sẅiŋe yé tá ńgɔɔn ngie mbùm gi metsèm kaa lʉ́a.

¹²Yěsô sɔg mekwò mɔ́b tà ńtsẅé jʉ’, ḿma’ nzsǒ ye, ńgíŋe ńnéŋe ssé léjÿó mmó, ńgɔɔn né pɔ́b ngie tà pi ju’ú mmó gie mèŋ fóo légÿo ná pi?

¹³Pi tóŋo wɔ̀ɔn lê Tsítsà, ńtóŋo wɔ̀ɔn lê Ndè, ńgɔɔn shwóŋó nò á nue mèŋ n gee wɛ̌.

¹⁴Á lɔɔn ńgwɔ́ gie mèŋ Ndè, ńgwɔ́ Tsítsà, mèŋ sɔ̌g mekwò mí, mbà á zɛ́te ngie pi gí, pi ne sɔgɔ mekwò mí pi né pi.

¹⁵Mèŋ n nyɛɛ gẅi fʉ̀’ légwɔ́ gie pi gí pi ge gÿo pá’ pi gyǎ mèŋ n gÿo.

¹⁶Tà mèŋ shwóŋó gẅí, kwà’ nénʉ́, anzì’i fà’ tè fáŋ ńtɔ́gɔ tá fà’ we wɔ́, angàŋ ntúm ké tè fáŋ ńtɔ́gɔ nyìŋ gẅie à ne ńtúmo yé wɔ́.

¹⁷Pá’ pi né ńzsé fʉ̀’ɔɔn la, pi lɔɔn ńgÿo pú’u, mbà pi ee pà shÿó mbòŋo.

¹⁸Mèŋ n kě tě ńgɔɔn yɔɔn nò mbwo pi metsèm wɔ́, mèŋ n ne ńzsé pʉ̀a pie mèŋ n da tsɔ́’ɔ wɔ́b. Tá á poŋ ngie ammó gie mé la ŋwe’e tsɛ̀ɛ ŋwà’ne Ssé à pumte. Mé la ŋwe’e ngie nyìŋ gẅie peg yé né ńteme shúm léjÿó ńjÿó kéen ńcʉ́’ʉ ngàŋ mbù wɔ̀ɔn.

¹⁹Mèŋ n tʉʉ njÿó shwóŋó gẅi fʉ̀’ɔɔn tà mɔɔn menò gÿo ńtó, pi zẅíŋ ngie mèŋ n gee N gee gwɔ́.

²⁰Tà mèŋ shwóŋó gẅí, kwà’ nénʉ́, nyìŋ lɔɔn ńkúe nyìŋ gẅie mèŋ n tumó yé, mbà à kúe pɔ́ wɔ̀ɔn. Nyìŋ gẅie à pǐŋ ńkúe wɔ̀ɔn, à kúe pɔ́ nyìŋ gẅie à túmo wɔ̀ɔn.

²¹Yěsô gɔɔn pú’u, além yé tsɔ́’ɔ tɛ’, á shʉ̀ashʉ̀a ńgɔɔn ngie: Tà mèŋ shwóŋó gẅí, kwà’ nénʉ́, atsɔ̌ tà’ nyìŋ ná pi ge sẅiŋe wɔ̀ɔn.

²²*Ngàŋa kwò Yěsô jú’, awɔ̌wɔ́ɔ sele ńdíe fɛ́ we, pɔ́ té zsé nyìŋ gẅie à gɔɔn yé wɔ́.

²³Atsɔ̌ tà’ ná *ngàŋa kwò yé gẅie à lɔ̌ɔn ńkwoŋo yé tɛ’, á gwɔ́ lejʉ́ŋ yé ńne ńjÿó mmó.

²⁴Símo Piɛ myɛ’ lejÿɔ́g ńdɔg ńtsẅi ngie à zɛ́te ngie à gɔɔn wɔ́ wɔ́.

²⁵Á lemte letuŋó Yěsô, ńzɛ́te yé ngie: Andè, angàŋa aa wɔ̌?

²⁶Yěsô tsɔ́’ ngie, aa nyìŋ gẅie mèŋ n ge cÿɔ’ɔ pwɔ́’ɔ mmó léjÿó, é náa mbwo yé. Ńgɔɔn pú’u, ḿbíi pwɔ́’ɔ mmó, ńcÿɔ’. Ńnáa mbwo Jẅidas Iskariod, míŋ Símo.

²⁷Jẅidas gwɔ́ tà ńkẅé, Sátà kúu tsɛ̀ɛ ntʉ́m yé. Yěsô leen ńké ńgɔɔn né yé ngie: Lwo sẅɛte ńgÿo mmó gie ɔ̀ gẅiin légÿo.

²⁸Atsɔ̌ sɔɔn nyìŋ ná pʉ̀a pie é lâ jʉ’ó, tè jú’u nò gie Yěsô fa’a légɔɔn wɔ́.

²⁹Tsɔ́ pʉ̀a ne ńkwaŋa ngie à gɔɔn ngie Jẅidas gʉa ńjú sɔ́ba pɔ̌ shúm línɔ́ɔn, ka pɔ́ ngie à náa mmó mbwo mepóŋ wɔ́, á nue yé zɔ lɔ̌ɔn ńgẅiin mûɔ pɔ̀ɔn nkáb wɔba pɔ̌.

³⁰Jẅidas kẅé pú’u, ńgwóon fó ndá ńkẅɛ. Mbà nzěm ně síŋ.

³¹Jẅidas gwɔ́ tà fó ndá ńkẅɛ, Yěsô gɔɔn ngie: Áa fʉ̀’ɔɔn pá’ɔɔn, mbà mé nǎ legú’ mbwo *Míŋ Nyìŋ. Mbà *Míŋ Nyìŋ ka náa legú’ mbwo Ssé.

³²Pá’ *Míŋ Nyìŋ ka nǎ legú’ mbwo Ssé la, E Ssé lê twó mbùm yé ge gÿo náa legú’ mbwo yé, tà á cʉ́’ pɔ́ méjʉ’ à ná.

³³Pènkʉ́ pɔ́ɔn, pege tè gíŋe ńnéŋe tà ntyě sag wɔ́. Pi ge gÿo ne gwá fa’a wɔ̀ɔn pá’ mèŋ n ka gɔɔn mbwo pà Yuda ngie: Ajʉ’ gie mèŋ n gee nê wó, pi tè ku’u létóo wó wɔ́. Mèŋ n giŋé ńgɔɔn yɛ̌ nò mbwo pi fʉ̀’ɔɔn.

³⁴Mèŋ n ge ná *lepʉ̌ se sẅé né pi, e gwɔ́ ngie: Pi kwoŋe pi né pi. Pá’ mèŋ n da kwoŋo gẅi lá, pi gí kwoŋe pi né pi.

³⁵Pi lɔɔn ńkwoŋe pi né pi, mbà mânyìŋ ntsèm ge zsé ngie pi ee *ngàŋa kwò yɔ́ɔn.

³⁶Símo Piɛ zɛ́te yé ngie: Andè, ɔ̀ gee pɔ́ ne nzɔ̌. Yěsô tsɔ́’ɔ mbwo yé ngie: Ajʉ’ gie mèŋ n gee nê wó, ɔ̀ tè ku’u lécʉ́me nzèm mèŋ fʉ̀’ɔɔn wɔ́. Ɔ̀ ge táa tá cʉ́me nzèm mèŋ.

³⁷Piɛ gɔɔn né Yěsô ngie: Andè, akɔ́ ge gÿo tá mèŋ n de gwóon ńcʉ́me nzèm gù wɔ́? Mèŋ n ge náa twó yɔ́ɔn e tí gú.

³⁸Yěsô tsɔ́’ ngie: Ɔ̀ gɔɔn ngie ɔ̀ ge náa twó jú é tí wɔ̀ɔn? Tà mèŋ shwóŋó gú, kwà’ nénʉ́, mênkɔ’ ge gÿo gwaa tóŋ lyɛ̌’ɔɔn, mbà ɔ̀ moŋé wɔ̀ɔn ngʉ̀a ntá.