Read Ngiemboon Jâŋ 14 Bible Online

Jâŋ 14 - Ngiemboon bible

Jâŋ 14

¹Yěsô giŋe ńgɔɔn mbwo *ngàŋa kwò ye ngie: Tà ntʉ́m gẅi gíŋe ḿvɛ. Pi záb ntʉ́m gẅi nà Ssé, ńgíŋe ńzáb ntʉ́m gẅi ná mèŋ.

²Mejʉ’ʉ leńnéŋe, ée ndá Tá wɔ̀ɔn tà ńgyɔ́ɔn. Mèŋ n ge gʉa cwoŋte jʉ’ʉ gí. Á kě tè pú’u wɔ́, mbà n tè gẅi shwóŋ. Mèŋ n ge gʉa cwoŋte jʉ’ʉ gí.

³Mèŋ n dɔɔn ńgÿo ńgʉa tà cwoŋte jʉ’ʉ gí, mbà mèŋ n ge piŋ nzèm fa’a gẅi pege gʉa. À cʉa pú’u, ajʉ’ gie mèŋ n ge lé wó, pi gíŋe ńgwɔ́ gí wó.

⁴Á gʉa nà jʉ’ gie mèŋ ńgee né wó, mbà pi ne ńzsé mánzsè.

⁵Tomáse gɔɔn né yé ngie: Andè, peg tè ne ńzsé jʉ’ gie ɔ̀ gee né wó wɔ́. Peg ge gǎ tá zsé mánzsè?

⁶Yěsô tsɔ́’ɔ mbwo yé ngie: Mèŋ n ge mánzsè, mèŋ n ge nò nénʉ́, mèŋ n ge legwɔ̌ wó. À lɔɔn ńgwɔ́ nyìŋ á le gʉa mvfò Tá wɔ̀ɔn té cʉa pɔ́ ná mèŋ wɔ́.

⁷Pi gwɔ́ pé’e ńzsé wɔ̀ɔn, mbà pi zsé Tá wɔ̀ɔn yé. Mèŋ n kě ńgɔɔn pá’ɔɔn pi gwɔ́ fʉ̀’ɔɔn ńne ńzsé yé. Mbà pi gyǎ yé.

⁸Filib jú’, ńgɔɔn né Yěsô ngie: Andè, nyɛɛ weg Tá gù ŋwɛ́ à ku’ pú’u.

⁹Yěsô gɔɔn né yé ngie: Filib, pege neŋé nzẅìŋ wɔɔn, ɔ̀ nyé pɔ́ tè zsě wɔ̀ɔn la? Nyìŋ gẅie à gyǎ wɔ̀ɔn la, à gyǎ Tá wɔ̀ɔn. Ɔ̀ gǎ tá ngie nyɛɛ wég Tá gù ŋwɛ́?

¹⁰Ɔ̀ tè ne ńzẅíŋe ngie mèŋ n ge nê Tá wɔɔn, peg yé pú ńgwɔ́ pɔ́ tà’a mmó wɔ́ ka? Anò gie mèŋ shwóŋó gẅi téen fóo mbwo mèŋ wɔ́. Tá wɔ̀ɔn gẅie aa nê mèŋ zɔ lɔgɔ wɔ̀ɔn fa’a mefà’ mé.

¹¹Mèŋ n dɔɔn shwóŋó gẅi ngie mèŋ n ge nê Tá wɔɔn, peg yé pú ńgwɔ́ pɔ́ tà’a mmó, pi zẅíŋ ngie áa pú’u, éfó ńgwɔ́ gie pi tè zẅíŋe nò gie n gɔɔn wɔ́, pi fó ńdíe pɔ́ mefà’ mie pi gyǎ mèŋ fa’, ńzẅíŋ.

¹²Tà mèŋ shwóŋó gẅí, kwà’ nénʉ́, nyìŋ záb ntʉ́m ná Mèŋ, mbà à ge fa’ yé mefà’ mie mèŋ ne fa’a, tà mé fáŋ ńtɔ́g mɔ́ɔn, á nue mèŋ n gee né lejʉ́ŋ Tá.

¹³Pi gÿo ńdɔg lezíŋ sɔ́ɔn ńdúɔ kɔ́ mbwo Ssé wɔ́, mbà mèŋ n ge gÿo. Á cʉa pú’u, mèŋ múɔ n da’te legú’ Tá wɔ̀ɔn.

¹⁴Pi lɔɔn ńdɔg lezíŋ sɔ́ɔn ńdúɔ mmó mbwo Ssé, mbà mèŋ n ge gÿo yɛ̌ mmó.

¹⁵Pi lɔɔn ńkwoŋo wɔ̀ɔn, mbà pi ge gÿo kú’te mbʉ̌ mɔ́ɔn.

¹⁶Mèŋ n dêen ńké sẅíŋte Tá wɔ̀ɔn, à náa wetsɔ̌ Ntàg Nzèm né pi, á gẅie pi lâ pɔ̌ zɔ ge cʉ́’ʉ gwɔ́ fʉ̀’ ntsèm.

¹⁷Antàg Nzèm wéwɛ̌ à gwɔ́ pɔ́ Zẅìge Ssé, à la’te nò nénʉ́. Epʉ̀a njÿó té ku’u lékúe Zẅìge ŋwɛ́ wɔ́, mélà’mie pɔ́ té ne ńgyá mefà’ mé wɔ́, ḿbiŋ ńké tè ne ńzsé yé wɔ́. Tá pi ne ńzsé yé, mélà’mie aa lejʉ́ŋ pi, ḿbiŋ ńgwɔ́ ná pi.

¹⁸Mèŋ n těen ńge ńnyé gẅi pi gwɔ́ púɔ metsé wɔ́. Mèŋ n ne ńtóo ne lejʉ́ŋ pi.

¹⁹Á cʉ́’ pɔ́ méjʉ’, pʉ̀a njÿó le gíŋ ńgyá wɔ̀ɔn mɔ́, tá ńgʉa ná pi, pi ne ńgyá wɔ̀ɔn gyǎ, mélà’mie n gwɔ̌ pɔ́ ntentʉ́. Pi gÿo ńgíŋe ńgwɔ́ gí ntentʉ́.

²⁰À gwɔ́ lyɛ̌’ó, pi zsé ngie peg Tá wɔ̀ɔn pǔ ńgwɔ́ pɔ́ tà’a mmó, é gíŋe zsé ngie pi ee nê mèŋ, mèŋ n gwɔ́ ntʉ́m pi.

²¹Nyìŋ lɔɔn ńkú’te mbʉ̌ mɔ́ɔn, ńne ńgíŋe mǒ, mbà ngàŋ aa nyìŋ gẅie à ne ńkwoŋo wɔ̀ɔn. Tá wɔ̀ɔn ge kwoŋo nyìŋ gẅie à kwoŋo wɔ̀ɔn, mbɔɔ mèŋ yɔ́ɔn n gíŋe ńkwoŋo wɛ̌ nyìŋ, ńgÿo à zsé wɔ̀ɔn.

²²Jẅide, mé ké tě ńgɔɔn Iskariod wɔ́, gɔɔn né Yěsô ngie: Andè, á ge gwɔ́ lêkɔ́ tá ɔ̀ gÿo peg ndà’ zɔ gyá gú, epʉ̀a metsèm le gyá gú wɔ́?

²³Yěsô tsɔ́’ɔ mbwo yé ngie: Nyìŋ lɔɔn ńkwoŋo wɔ̀ɔn, mbà à ge kú’te shwóŋè yɔ́ɔn. Tá wɔ̀ɔn piŋ ńkwoŋo yé, peg Tá wɔ̀ɔn tó ńtsɛ́ɛ yé, ńcʉ́’ʉ ńnéŋe pɔ́ tsɛ̀ɛ ntʉ́m ye.

²⁴Nyìŋ lɔɔn tè wɔ̀ɔn kwoŋ, mbà à tè kú’te shwóŋè yɔ́ɔn mɔ́. Ashwóŋè ŋwɛ́ zɔɔn tě fóo pɔ́ mbwo mèŋ wɔ́. Á fóo pɔ́ mbwo Tá wɔ̀ɔn gẅie à ka túmo wɔ̀ɔn.

²⁵Mèŋ shwóŋó gẅi mɔɔn menò á fʉ̀’ gie pege nyě ńgwɔ́ lɔɔn.

²⁶Pi ge cʉ́’ nzèm, Tá wɔ̀ɔn lɔg lezíŋ sɔ́ɔn, ńtúmo Ntàg Nzèm gẅi, à gwɔ́ Zẅìge Ndʉalʉ̌a. À tó ńzí’i gẅi shúm ntsèm, ńgÿo pi kímte kɔ̀ɔkɔ́ɔ gie mèŋ n dǎ shwóŋó gẅí.

²⁷Tà pi cʉ́’ nzèm ntʉ́m gẅi gíŋe ḿvɛ, tà pi cÿɔ’. Mèŋ n ge néŋ mbʉ́lè tsɛ̀ɛ ntʉ́m gẅí, e gwɔ́ mbʉ́lè gie e fóo ná mèŋ, e tè gie mé fa’a tsɛ̀ɛ yɔɔn njyó wɔ́.

²⁸Pi jǔ’ pá’ mèŋ n gɔ̌ɔn ngie: Mèŋ n ge gʉa tá gíŋe piŋ nzèm gyá gẅí. Pi é kě ńgwɔ́ pé’e ńne ńkwoŋo wɔ̀ɔn, mbà pi kág kǎg pá’ mèŋ n gee né lejʉ́ŋ Tá, á nue Tá à fǎŋ ńcʉa wɔ̀ɔn.

²⁹Mèŋ tʉ́ʉ njÿó shwóŋó gẅi tá yɛ̌ nò gÿo tó, á gÿo ńgwɔ́ tá ńtó, pi záb ntʉ́m ná mèŋ.

³⁰Tà fó fʉ̀’ɔɔn pege tè gíŋe ńgee shwóŋe wɔ́. Á nue fùɔ gẅie à sá’a yɔɔn njÿó ne ńtóo. À tè gẅiin shÿó légÿo mmó ná mèŋ wɔ́.

³¹Tá mé zẅǐŋ ngie à tó pú’u, epʉ̀a mesoŋ tsɛ̀ɛ njÿó lêen ńke ńzsé ngie mèŋ kwoŋo Tá wɔ̀ɔn, n ne ńgÿo pɔ́ mmó gie à tsẅǐ ngie mèŋ n gÿo. Pi lu ssé pege fó jʉ’ɔɔn ńgʉa.