Read Ngiemboon Jâŋ 18 Bible Online

Jâŋ 18 - Ngiemboon bible

Jâŋ 18

¹Yěsô la gɔɔn pú’u, pâ *ngàŋa kwò yé gʉa, ńkúu tsɛ̀ɛ fú’, ńtúm ntse Sedeloŋ, ńgʉa nà yetsɔ̌ nzǐŋ. Etsɔ́ nká’ gwɔ́ jʉ’ó, pâ *ngàŋa kwò yé kúu tsoló.

²Á la gwaa gwɔ́ Jẅidas gẅie à la sẅiŋe yé ne ńzsé jʉ’ áyɛ̌ kwà’ mboŋó, á nue Yěsô pâ *ngàŋa kwò yé lɔ́ɔn ńnéŋe ńgwá ńcú’te jʉ’ó.

³Jẅidas ńnéŋe tà ńtó, ńgwɔ́ mvfò nùɔ pàlÿɔ́’ ncù pà *Roma pâ pà pyɛ́bɛ *jʉ’ʉ Ssé, é pie metándá pànuŋe pwɔ́’ pâ pà *farisay ně ńtúm. Pɔ́ gẅiinte menkà’ mmɔ̌g, lâ melâm, mbɔɔ shúm ncù.

⁴Yěsô zsé nò gie á ne ńtóo ná yé, ésẅɛ’te nnɛ́ né mvfò pɔ́b ńgɔɔn ngie: Pi fa’a wɔ́?

⁵Pɔ́ tsɔ́’ɔ mbwo yé ngie: Á Yěsô ye Nǎzarɛd. Á tsɔ́’ɔ mbwo pɔ́b ngie: Àa mèŋ. Yěsô gwɔ́ gɔɔn pá’ɔɔn, Jẅidas gẅie à ně sẅiŋe yé gwɔ́ nùɔ.

⁶Yěsô gwɔ́ tà ńgɔɔn mbwo pɔ́b ngie: Àa mèŋ, pɔ́ piŋ nzème nzème, ńgwete ssé.

⁷Yěsô gíŋe ńzɛ́te wɔ́b ngie: Pi fa’a wɔ́? Pɔ́ gɔɔn ngie: Á Yěsô ye Nǎzarɛd.

⁸Yěsô tsɔ́’ɔ mbwo pɔ́b ngie: Mèŋ shwoŋó gẅi ngie aa mèŋ. Á lɔɔn ńké ńgwɔ́ gie pi tóo fǎ’ mèŋ, pi nyé pɔɔn pʉ̀a pɔ́ gʉa.

⁹Á laa pú’u, ashwóŋè gie Yěsô ně ńgɔɔn mbwo Ssé lɔgɔ ḿbumte. À ně ńgɔɔn ngie: Atsɔ̌ tà’ ná pʉ̀a pie ɔ̀ la náa mbwo mèŋ la, kaa pyé.

¹⁰Símo Piɛ gẅie à la gẅiin nně ncù leen ńké soŋ nně mbʉ́a, ńdɔg ńcúa ngàŋa fà’ tándá pànuŋe pwɔ́’, ńjúa letuŋó sé se pwó tʉ̀. Lezíŋ nyìŋ áwɛ̌ laa le Malkus.

¹¹Tá Yěsô gɔɔn né Piɛ ngie: Néŋ nně jù mbʉ́a! Mèŋ n tè nú ntú’ ngɔ́’ gie Tá wɔ̀ɔn nǎ ngie mèŋ n nú wɔ́ ka?

¹²Anùɔ pàlÿɔ́’ ncù, pâ tándá wɔb lâ pà pyɛ́bɛ jʉ’e Ssé, é pie mekěm pà Yuda ně ńtúm, lêen ńké ńgwoon Yěsô, ńkwɛ́ɛ yé.

¹³Pɔ́ kwɛ́ɛ Yěsô pú’u, ńdɔgɔ yé ḿvɔg ńgʉa nɔ’ɔ Ánnɔ́ɔn. Ánnɔ́ɔn gwɔ́ pú’u, ńgwɔ́ tákẅì’ Kaifa gẅie à laa ngù’ áyɛ̌, ńgwɔ́ tándá pànuŋe pwɔ́’.

¹⁴Yé Kaifa aa nyìŋ gẅie à la gɔɔn mbwo mekěm Pà Yuda ngie: Mvfò aa pá’ à lɔɔn ńgwɔ́ tà’ nyìŋ kwé nà twó lá’.

¹⁵Símo Piɛ pɔ́ tsɔ̌ *ngàŋa kwò Yěsô la zse nzèm Yěsô. Pá’ Tándá pànuŋe pwɔ́’ la ne ńzsé wɛ̌ *ngàŋa kwò Yěsô la, mé gwaa lɔgɔ Yěsô tɔ́g né tsɛ̀ɛ nɔ’ɔ tándá pànuŋe pwɔ́’, á gwɔ́ yé pɔ́ nzèm.

¹⁶Piɛ zso nzème pǐ ńtyé, á ncwò nɔ’. Wetsɔ̌ *ngàŋa kwò Yěsô wá gẅie tándá pànuŋe pwɔ́’ la ne ńzsé yé la, á gʉa ńgɔɔn nò né manzwě gẅie à pyɛ́bɛ ncwò nɔ’, ńgÿo Piɛ kúu tsɛ̀ɛ nɔ’.

¹⁷Manzwě ŋwɛ́ gẅie à pyɛ́bɛ ncwò nɔ’ gɔɔn né Piɛ ngie: Ɔ̀ tè jú tsɔ̌ tà’ nà *ngàŋa kwò nyìŋ wɛ̂ wɔ́ le? Piɛ tsɔ́’ ngie: Mèŋ n tè *ngàŋa kwò we wɔ́.

¹⁸Á gwaa gwɔ́, mbà megàŋa fà’ lâ pàpyɛ́bɛ jʉ’e Ssé ně ńnyɛte mmɔ̌g. Efÿág ne ńkúu, pɔ́ ne ńzɔ́gɔ. Piɛ tyé yé pâ pɔ̌ ne ńzɔ́gɔ mmɔ̌g.

¹⁹Yěsô gwɔ́ fʉ̀’ó ńgwɔ́ mvfò *nùŋe pwɔ́’ we lÿò[8]. Á ne ńzɛ́te yé nò ná ngàŋa kwò yé, mbɔɔ ná mmó gie à zí’i pʉ̀a.

²⁰Yěsô tsɔ́’ɔ mbwo yé ngie: Mèŋ n kɔ̌ɔn shʉ̀ashʉ̀a ńgɔɔn nò mbwo lá’, mèŋ n kɔ̌ɔn ńzí’i pʉ̀a mmó tsɛ̀ɛ *mendá cú’tè, mbɔɔ tsɛ̀ɛ jʉ’e Ssé, á jʉ’ gie pà Yuda cú’te wó. Mèŋ n kɔ̌ɔn tě ńgɔɔn tsɔ́ nò pɔ́ ńdÿoon lÿoon wɔ́.

²¹Mélà’a kɔ́ ɔ̀ zɛ́te wɔ̀ɔn menò? Zɛ́te nò gie n ka gɔɔn mbwo pʉ̀a pie é ka ne ńjú’u. Pɔ́ ne ńnyɛte ńzsé mmó gie n da gɔɔn.

²²Yěsô gɔɔn pú’u, atsɔ̌ tà’ ná pàpyɛ́bɛ jʉ’e Ssé gẅie á kě jʉ’ó téme pwó letuŋó yé, ńgɔɔn ngie: Wɛ̂ aa pá’ ɔ̀ tsɔ́’ɔ nò mbwo *Nùŋe pwɔ́’ we lÿò?

²³Yěsô tsɔ́’ɔ mbwo yé ngie: À lɔɔn ńgwɔ́ gie n gɔ̌ɔn té poŋ, ɔ̀ shwóŋó wɔ̀ɔn mmó gie áa mǒ ńgwɔ́ ye tepòŋ, ńké ńgwɔ́ gie mèŋ n gɔ̌ɔn mboŋó, mbà ɔ̀ piŋe ńcúa wɔ̀ɔn mélà’a kɔ́?

²⁴Ánnɔ́ɔn lêen ńké ńtsẅi, tà Yěsô nyé pɔ́ menkÿo, mé lɔgɔ yé ńgʉa náa mbwo Kaifa, á *nùŋe pwɔ́’ we lÿò.

²⁵Piɛ ké ńnyé ne ńzɔ́gɔ pɔ́ mmɔ̌g, mé gɔɔn né yé ngie: Gù jú, ɔ̀ tè tsɔ̌ tà’ *ngàŋa kwò nyìŋ wɛ̂ wɔ́ le? Piɛ moŋe, ńgɔɔn ngie mèŋ n tè *ngàŋa kwò we wɔ́.

²⁶Atsɔ̌ tà’ ngàŋa fà’ *Nùŋe pwɔ́’ we lÿò, ńgwɔ́ fɛ́ nyìŋ wá gẅie Piɛ ka júa letuŋó sé la, á gɔɔn né Piɛ ngie: Mèŋ n ka tè gyá gẅi lâ pɔ̌ tsɛ̀ɛ nká’ wáa?

²⁷Piɛ gíŋe ḿmoŋe. Mênkɔ́’ gwóon ńtóŋ.

²⁸Mé fóo nɔ’ɔ Kaifa, ńdɔgɔ Yěsô ńgʉa né mbʉ̀a ngúmnɔ́ɔn Pà *Roma. Á gwɔ́ mba’ámba’. Mekěm pie pɔ́ lɔgɔ́ Yěsô ńtó ké tè yɔ́b ndá ngúmnɔ́ɔn kú, ḿbɔ́gɔ lékaa *lɔ̌’, á tɔ’ɔ wɔ́b léjÿó línɔ́ɔn *Páskà.

²⁹*Pilato kẅɛ́te wɔ́b pǐ, ńgɔɔn ngie: Pi sẅiŋe nyìŋ wɔɔn mélà’a kɔ́?

³⁰Pɔ́ tsɔ́’ ngie: Nyìŋ áwɛ̌ ně ńgwé’e tè nò tepòŋ gÿo, mbà peg kaa lɔgɔ yé ńtóo mvfò gù wɔ́.

³¹*Pilato leen ńké ńgɔɔn né pɔ́b ngie: Pi lɔgɔ yé ńgʉa ńŋaga yé gílé pi, pá’ *lepʉ̌ sí kwoŋ pú’u. Mekěm tsɔ́’ ngie: *Lepʉ̌ ség té zẅíŋ ngie peg zẅé nyìŋ wɔ́.

³²Á lɔgɔ ḿbumte ná nò gie Yěsô la cʉ́’ʉ léshwóŋ ntí gie à ge gÿo kwé ńgɔɔn.

³³*Pilato leen ńké ḿbiŋe ndá, ńgÿo Yěsô tó, á zɛ́te yé ngie: Ɔ̀ɔ fùɔ pà Yuda lá?

³⁴Yěsô tsɔ́’ ngie: Kwà’ gù zɔ kwaŋte ńgɔɔn, kà tsɔ́ pʉ̀a zɔ̌ shwoŋó gú ngie mèŋ n gee fùɔ?

³⁵*Pilato tsɔ́’ ngie, ɔ̀ jǔ’ ngie mèŋ n gee nyìŋ pà Yuda ka? Pàlá’ pí pâ mekěm pànuŋe pwɔ́’ sẅiŋé gú mbwo mèŋ. Ɔ̀ ka gÿo kɔ́?

³⁶Yěsô tsɔ́’ ngie: Esɔ́ɔn lefùɔ té se yɔɔn njÿó wɔ́. Lefùɔ sɔ́ɔn ke ńgwɔ́ se yɔɔn njÿó, mbà pʉ̀a pɔ́ɔn ně ńtág nzèm yɔ̀ɔn, tà mé té wɔ̀ɔn mbwo mekěm pà Yuda néŋ. Tá’, mèŋ n kě ńgɔɔn ngie sɔ́ɔn lefùɔ ké tè se yɔɔn njÿó wɔ́.

³⁷*Pilato leen ńké ńzɛ́te yé ngie: Ɔ̀ lɔgɔ ńgwɔ́ fùɔ wɔ́? Yěsô tsɔ́’ ngie, ɔ̀ gɔ̌ɔn pú’u, mèŋ n gee fùɔ. Jú’u mmó gie á la gÿo mé zyé wɔ̀ɔn, ńgíŋe ńjú’u mmó gie á la gÿo mèŋ n tóo tsɛ̀ɛ njÿó. N da tó légɔɔn mmó gie mèŋ n zsé nà nò nénʉ́. Nyìŋ gwɔ́ ná nò nénʉ́, á jú’ ngyè yɔ̀ɔn.

³⁸*Pilato gɔɔn né yé ngie: Anò nénʉ́ áa yɛ̌? Ńgɔɔn pú’u, ńgíŋe fó ndá ńkẅɛ, ńgʉa ńgyá mekěm pà Yuda pǐ. Ńgɔɔn né pɔ́b ngie, mèŋ n tě ně ńgyá mmó gie mé ge cʉa mǒ tá gɔɔn ngie nyìŋ wɔɔn gwě ntsaŋ wɔ́.

³⁹Tá’, pá’ aa mà mbwo pege légwɔ́ fʉ̀’e línɔ́ɔn *páskà, ńtsɔ́’ɔ tà’ ngàŋa tsǎŋ la, pi kwǒŋ ngie mèŋ n tsɔ́’ɔ fùɔ pà Yuda ńná né pi?

⁴⁰Pɔ́ gíŋe ḿbú ńnáa gwá, ńgɔɔn ngie: Ngǎŋ, tè tsɔ́’ɔ wɛ̂ nyìŋ, tsɔ́’ pɔ́ Panepâse, ńgɔɔn pá’ɔɔn Panepâse ŋwɛ́ gwɔ́ kwà’ ntʉ̀ ntsǒŋ.