Read Ngiemboon Jâŋ 19 Bible Online

Jâŋ 19 - Ngiemboon bible

Jâŋ 19

¹*Pilato lêen ńké ńnáa Yěsô ngie mé lɔg ngwɔɔn ńcúa yé.

²Pàlÿɔ́’ ncù lɔg menzóŋ ḿbá’a cÿɔ́’ɔ lefùɔ, éshuu twó Yěsô, ḿbíi pepaŋ nzsǒ ḿma’a ná yé.

³Ńne sẅɛ́’te nnɛ́ ńtóo lejʉ́ŋ yé, ésíe yé ngie: Mé tsyɛ’té fùɔ pà Yuda! Ńtéme mbwó metuŋó yé.

⁴*Pilato gíŋe ńkẅɛ́ɛ pǐ ńgɔɔn né mekěm pà Yuda ngie: Mèŋ n ge lɔgɔ nyìŋ ŋwɛ́ tó ná né pi. Pi ké ńzsé ngie mèŋ n kaa gyá tsɔ́ mmó gie à fʉ̌a wɔ́.

⁵Yěsô leen ńké ńgwaa kẅɛ, ńtɔ’ɔ cÿɔ́’ɔ menzóŋ, ḿma’a paŋ nzsǒ. *Pilato gɔɔn né mekěm pà Yuda ngie: Nyìŋ ŋwɛ́ wɛ̂.

⁶Tá metándá pànuŋe pwɔ́’ lâ pà pyɛ́bɛ *jʉ’ʉ Ssé gyá Yěsô, ńzye lénáa gwá ngie: Kime yé nà tÿǒ nkǐ, kime yé nà tÿǒ nkǐ. *Pilato gɔɔn né pɔ́b ngie pi kɔ yé, kwà’ pi zɔ kime yé nà tÿǒ nkǐ. Mèŋ n tě ně ńgyá mmó gie mé ge cʉa mǒ, tá zẅé yé wɔ́.

⁷Mekěm tsɔ́’ɔ mbwo yé ngie: À fʉ̌a *lepʉ̌ ség. Mé ge zẅé yé ńtí *lepʉ̌ sie à fʉ̌a. À gɔ̌ɔn ngie aa Míŋ Ssé.

⁸*Pilato gwɔ́ tà ńjú’ pú’u, éfó ḿmege ńcÿɔ’.

⁹MÀbiŋe ndá, ńzɛ́te Yěsô ngie: Ɔ̀ɔ nyìŋ zsɔ̌? Tá Yěsô fó tè tsɔ́b.

¹⁰*Pilato lêen ńké ńgɔɔn né yé ngie: Mèŋ n gɔɔn nò ɔ̀ tě ńtsɔ́’ɔ wɔ́ la? Ɔ̀ tè ne ńzsé ngie mèŋ n ku’u légÿo mé nyé gú, pá’ mèŋ n giŋé ńku’u légÿo, mé kime gú nà tÿǒ nkǐ wɔ́ ka?

¹¹Yěsô tsɔ́’ɔ mbwo yé ngie: E Ssé lɔɔn ńnyé té ńná metʉ̀ mbwo gù, ɔ́ le ku’u légÿo tsɔ́ mmó ná mèŋ wɔ́. Áa mmó gie á ka gÿo tá nyìŋ gẅie à ka sẅiŋe wɔ̀ɔn mbwo gù, à yé nò tepòŋ cʉa jú.

¹²*Pilato zye fʉ̀’ó léfa’ shÿó pá’ à ge nyé Yěsô. Tá’ pà Yuda zye lénáa gwá ngie: Ɔ̀ lɔɔn ńnyé yé, mbà ɔ̀ tè shǔ Kása pà *Roma wɔ́. Wɛ̌ nyìŋ wɔ́ gẅie à gɔɔn ngie yé aa fùɔ, à gwɔ́ pɔ́ ngàŋ mbù Kása.

¹³*Pilato jú’ pú’u, ńdɔgɔ Yěsô fóo ndá ńkẅɛ, ńnéŋe nà lʉ̀ŋe nzà’ ntsaŋ, á jʉ’ gie mé la lɔg metóon ńnuŋe, mé tóŋo ná shwóŋè pa Heber ngie Gabata.

¹⁴Á gwɔ́ lyɛ̌’ gie mé cwoŋte línɔ́ɔn *Páskà, ńgwɔ́ mmó tsɛ̀ɛ zsǒ. *Pilato gɔɔn né pà Yuda ngie: Afùɔ gẅi wɛ.

¹⁵Pà Yuda náa gwá ngie: Mé zẅé yé, mé zẅé yé. Gÿo mé kime yé nà tÿǒ nkǐ. *Pilato gɔɔn né pɔ́b ngie: Mèŋ n zɔ ge kime fùɔ gẅi ná tÿǒ nkǐ ka? Mentándá pànuŋe pwɔ́’ tsɔ́’ ngie: É té ndà’ Kása wɔ́, mbà peg tè tsɔ̌ fùɔ gẅiin.

¹⁶*Pilato leen ńké ńnáa Yěsô né pɔ́b, pá’ mé ge gʉa kime yé nà tÿǒ nkǐ. Mé lêen ńké ńdɔgɔ Yěsô ńgʉa.

¹⁷Ńgwɔ fóo tÿǒsoŋ kẅɛ, kwà’ yé zɔ̌ kaa tÿǒ nkǐ yé, pâ pɔ̌ ne ńgee nê tsɔ́ jʉ’, mé tóŋ lê kẅǐ twó. Á gwɔ́ ná shwóŋè pà Heber, ńgwɔ́ Golgota.

¹⁸Pɔ́ kúu wó, ńkime yé nà tÿǒ nkǐ, ńgíŋe ńkim petsɔ́ pʉ̀a mépʉ́a nà mɔ́b metÿǒ nkǐ. Tà’ gwɔ́ nà gwoŋó pwó Yěsô ye tʉ̀, wetsɔ́ gwɔ́ nà gwoŋó ye kyɛ̀bɛ. Yěsô gwɔ́ tsetsɛ̀ɛ.

¹⁹*Pilato gÿo mé ŋwe’e mmó, ńkime nà tÿǒ nkǐ. Á gwɔ́ mǒ ńgwɔ́ ngie: Yěsô nyìŋ Nǎzarɛd, fùɔ pà Yuda.

²⁰Ajʉ’ gie mé la kime Yěsô wó laa ngʉ̀ŋe tÿǒsoŋo Yerósalem. Pà Yuda tà ńgyɔ́ɔn ne ńcʉa jʉ’ó ńtóŋo mmó gie mé ŋwe’é. Á gwɔ́ ná shwóŋè pà Heber, ńgwɔ́ ná shwóŋè pà *Roma mbɔɔ ná shwóŋè pà Gelekia.

²¹Mentándá pànuŋe pwɔ́’ pà Yuda lêen ńké ńgʉa ńgyá *Pilato ńgɔɔn né yé ngie: Á té poŋo léŋwe’e ngie fùɔ pà Yuda wɔ́, ŋwe’e pɔ́ ngie à la gɔɔn ngie yé aa fùɔ pà Yuda.

²²*Pilato tsɔ́’ ngie: Ammó gie mèŋ n ŋwe’é, n ně ńdá’ ŋwe’e.

²³Pàlÿɔ́’ ncù la kime Yěsô ná tÿǒ nkǐ tà ńtsẅé jʉ’, ḿbí menzsǒ mé, ńgabte nzsè lekùa. Awɔ̌wɔ́ɔ pí ye nzsè, tà é cʉ́’ nzsǒ ye ye lÿò, é gie mé la tè vfo vfo wɔ́. Mé la pú ḿbá’ pá’, éfó tÿǒ ńtyé ssé.

²⁴Palÿɔ́’ ncù gɔɔn tsetsɛ̀ɛ pɔ́b ngie: Tà pege shʉa yɔɔn. Pege tyéente, nyìŋ gẅie à jÿǒ, pege náa mbwo yé. Á lɔgɔ ḿbumte ná nò gie mé la ŋwe’e tsɛ̀ɛ ŋwà’ne Ssé ngie: «Pɔ́ ně ńgabte menzsǒ mɔ́ɔn tsetsɛ̀ɛ pɔ́b, ḿma’a tyèente nà nzsǒ yɔ̀ɔn ye lÿò». Yɔɔn áa mmó gie pàlÿɔ́’ ncù la gÿo.

²⁵Má pà Yěsô pɔ́ mémá má we we manzwě, ńgÿo Malîɛ nzwě Kelopàs, mbɔɔ Malîɛ Magdala la tyé ngʉ̀ŋe tÿǒ nkǐ Yěsô.

²⁶Yěsô gyá pá’ má we tyé lejʉ́ŋ *ngàŋa kwò we gẅie à lɔ̌ɔn ńkwoŋo yé tɛ’, ńgɔɔn né má we ngie: Má wɔ̀ɔn, mìŋ gù wɛ.

²⁷Ńgíŋe ńgɔɔn mbwo *ngàŋa kwò we wá ngie: Má gù wɛ. Á fó fʉ̀’ áyɛ̌, *angàŋa kwò we wá lɔgɔ má pà Yěsô ńgʉa né mbʉ̀a yé.

²⁸Mɔɔn menò la tɔ́g, Yěsô zsé fʉ̀’ɔɔn ngie akɔ́ɔkɔ́ɔ kǔ’, ńgɔɔn ngie: Agág yɔ́ɔn shÿǒ, ńgɔɔn pá’ɔɔn légwɔ́ gie mmó gie mé la ŋwe’e tsɛ̀ɛ ŋwà’ne Ssé ge pumte.

²⁹Etsɔ́ lekʉ̀ŋ laa jʉ’ó, mbà mé neŋé kikíi melù’ tsoló. Mé tsaba kusá tsoló, éshÿɔ́gɔ nà twó kekà’a, ńtsege ńnéŋe ncwò Yěsô.

³⁰Á sẅíte ńgɔɔn ngie: Ayɔ́ɔn fà’ magá, ńdeen ńké ńcʉ́ŋe twó yé, ńkwé.

³¹Mé laa lyɛ’ó ńne ńcwoŋte *lyɛ’ɛ́ nzsè pà Yuda, á piŋ tè poŋ ngie à gwɔ́ lyɛ’ɛ́ nzsè, mepfó pʉ̀a gwɔ́ nà metÿǒ nkǐ wɔ́, yɛ̌ ge zɔɔn gwɔ́ lyɛ’ɛ́ nzsè lÿò tɛ’. Mekěm pà Yuda gʉa ńgyá *Pilato, ésẅíŋte yé ngie à gÿo mé pwɔ́’te mekwò pʉ̀a pie ée nà metÿǒ nkǐ, pɔ́ kwéte, mé fó nà metÿǒ nkǐ ésẅí’i wɔ́b.

³²Pàlÿɔ́’ ncù lêen ńké ńtó ḿbwɔ́’te mekwò ndùŋ mvfò, mbɔɔ me mbɔ́ɔntè nyìŋ gẅie mé pǔ ńkime wɔ́ba Yěsô.

³³Ńgʉa tà ńkúu ná Yěsô, ńgyá, mbà à ně ńdá’ ńkwé. Pɔ́ té gíŋe ḿbwɔ́’te mekwò mé wɔ́.

³⁴Tá tsɔ̌ tà’ ná pàlÿɔ́’ ncù lɔg lekwòŋ, ésɔbɔ gwoŋó nnɛ́ Yěsô. Metse pɔ́ ntse gwóon ńkẅɛɛ jʉ’ó.

³⁵Nyìŋ gẅie à shwóŋó gẅi aa njÿò ńgyá nà kɔ̀ɔkɔ́ɔ gie á la cʉa. Á gwɔ́ kwà’ pá’ á la cʉa. Kwà’ yé lê twó yé ne ńnyɛte ńzsé ngie à gɔɔn nò nénʉ́, ńgɔɔn pá’ɔɔn légwɔ́ gie pi gí ge záb ntʉ́m ná yɔɔn nò.

³⁶Mɔɔn menò lɔ́ɔn ńcʉate pá’ɔɔn pá’ mmó gie mé la ŋwe’e tsɛ̀ɛ ŋwà’ne Ssé ge pumte. Mé la ŋwe’e ngie: «Mé la tè pwɔ́’ɔ tsɔ́ kẅǐ mbùm yé wɔ́».

³⁷Mé la gíŋ ńŋwe’e ngie: «Pɔ́ ge lá’ ne líe nyìŋ gẅie pɔ́ lɔ̌g lekwòŋ ésɔbɔ yé».

³⁸Mɔɔn menò la tɔ́g, Yesyɛ̂b, nyìŋ tÿǒsoŋ Arimaté, á gʉa ńgyá *Pilato, ésẅíŋte yé ngie à zẅíŋ, à sẅí’i pfó Yěsô ná tÿǒ nkǐ. Yesyɛ̌b ŋwɛ́ laa tsɔ́ *ngàŋa kwò Yěsô, tá shúte shuté, ńne ḿbɔ́gɔ pà Yuda. *Pilato zẅíŋ, Yesyɛ̂b gʉa sẅí’i pfó Yěsô.

³⁹Nikodem gẅie à lǎ’ tsɔ̌ letsẅɛ́’, ńtó ńgʉa ńgyá Yěsô la, tó yé, ńgẅiin tsɔ̌ ntí laméndɔ́ɔn gie mé la cub metwó megǐ ńdɔg ńgwɔ’, mɛ̌ megǐ gwɔ́ myrre pɔ́ aloes. Á gwɔ́ mmó kilo móm ntá.

⁴⁰Pɔ́ Yesyɛ̂b lêen ńké ńkaa pfó Yěsô, ńne ńkemte laméndɔ́ɔn mǒ, ńdɔgɔ shúm nzsǒ ńzémte, pá’ pà Yuda lɔ́ɔn ńgwɔ le’e pfó nyìŋ, ńgÿo pú’u.

⁴¹Etsɔ́ nká’ laa ngʉ̀ŋe jʉ’ gie mé la kime Yěsô ná tÿǒ nkǐ wó. Etsɔ́ lesyè se sẅé gwɔ́ tsɛ̀ɛ nká’ áwɛ̌, mbà mé laa zɔɔn ńnéŋe nyìŋ tsoló wɔ́.

⁴²Pá’ pà Yuda la ne ńnyɛte mbùm yɔb ńtí lyɛ’ɛ́ nzsè yɔ́b la, zà’ ne ńcʉa, mé kaa pfó Yěsô ńdɔg ńgʉa ńnéŋe tsɛ̀ɛ lesyè ŋwɛ́. Á nue é la gwɔ́ pɔ́ ngʉ̀ŋe jʉ’ó.