Read Ngiemboon Jâŋ 2 Bible Online

Jâŋ 2 - Ngiemboon bible

Jâŋ 2

¹É cʉa lyɛ̌’ pʉ́a, atsɔ́ lɔ́ɔn ndá gwɔ́ tÿǒsoŋo Kána, á tsɛ̀ɛ pàga ngwòŋ Galilea, má pà Yěsô gwɔ́ wó.

²Mé gíŋe ńtóŋo Yěsô yé pâ ngàŋa nkwò yé, á jʉ’ʉ lɔ́ɔn ndá ŋwɛ́.

³Melù’ gÿo ḿmag, má pà Yěsô gɔɔn né yé ngie: Epʉ̀a té gíŋe ńgẅiin melù’ mie pɔ́ ge nú wɔ́.

⁴Yěsô tsɔ́’ɔ mbwo yé ngie: Má wɔ̀ɔn, ɔ̀ kẅé kɔ́ mbwo mèŋ? À yɔ́ɔn fʉ̀’ nyé tè ku’.

⁵Má we gʉa ńgɔɔn né pàlyè pʉ̀a ngie à lɔɔn ńgɔɔn ngie pi gÿo pɔ́ kɔ́ wɔ́ pi gÿo.

⁶Etsɔ́ mekʉŋ tóon gwɔ́ jʉ’ó ntɔgɔ́. Pà Yuda kúu ntse tsoló ńdɔgɔ sɔgɔ pʉ̀ tá ńgú’te Ssé pá’ *lepʉ̌ lá’ sɔ́b la ne ńzɛ́te. É la gwɔ́ tà ńgwaa ńgwɔ́ mé néŋ ntse tsoon lítà nkÿo tsɛ̀ɛ tà’.

⁷Yěsô gɔɔn né pàlyè pʉ̀a ngie: Pi néŋ ntse tsɛ̀ɛ mekʉŋ ŋwɛ́ tà é lúe. Pɔ́ néŋ ntse tsoló tà é lúe.

⁸Yěsô leen ńké ńgɔɔn né pɔ́b ngie: Pi kú tsɔ́ fʉ̀’ɔɔn, ńgʉa ńnáa mbwo nyìŋ gẅie à táŋte línɔ́ɔn. Pɔ́ kú ńgʉa ná né yé.

⁹Á zẅí’ ntse gẅie é selé ńcʉ́’ melù’, à te ne ńzsé jʉ’ gie mɛ̌ melù’ fóo wó wɔ́, tá pàlyè pʉ̀a pie pɔ́ ně ńtú’ ntse ne ńzsé. Nyìŋ gẅie à táŋte línɔ́ɔn, á tóŋo nyìŋ gẅie mé gÿo lɔ́ɔn ndá yé,

¹⁰ńgɔɔn né yé ngie: Mé ée ḿvɔgɔ ńnáa pɔ́ melù’ mbòŋo, tà mé núu tɛ̀’, tá mé náa mie é ná’a ḿmeen meen. Tá ńgʉa ná gù, mbà yɔɔn áa jú fʉ̀’ gie ɔ̀ náa melù’ mbòŋo mbwo pʉ̀a lá?

¹¹Wɔɔn aa pá’ Yěsô la zye légÿo menò mmɔɔn mmɔɔn. Á laa Kána, á tsɛ̀ɛ pàga ngwòŋ Galilea, Yěsô lɔg pú’u, ńda’te legú’ we. *Ngàŋa kwò yé záb ntʉ́m ná yé.

¹²Yɔɔn nò tɔ́g, Yěsô pâ má we, lâ mefɛ́ pé, ńgÿo *ngàŋa kwò yé, gʉa ne tÿǒsoŋo Kapernawúm, ńkúu wó, ńnéŋe pɔ́ lyɛ̌’ shÿɔ́’ɔ tsɔ́ wɔ́.

¹³Alínɔ́ɔn *Páskà pà Yuda la ne ḿbɔ́ɔnte, Yěsô leen ńké ḿbʉ né Yerósalem,

¹⁴ńkúu tsɛ̀ɛ *jʉ’ʉ Ssé, ńgyá pʉ̀a gwɔ́ tsoló ńne sẅiŋe mefòŋ, petsɔ́ ne sẅiŋe *menjʉ̀njÿò, petsɔ́ ne sẅiŋe mekàpʉ̀ŋ, mbɔɔ pàkúbe nkáb néŋte ssé.

¹⁵Yěsô leen ńké ńdɔg menkÿo ńcwoŋte ngwɔɔn, éfó tsɛ̀ɛ *jʉ’ʉ Ssé, ńjwoŋ pʉ̀a apɛ̌ lâ *menjʉ̀njÿò mɔ́b, lâ mefòŋ, ńtsó metápele ńgwá’, nkáb pʉle ssé,

¹⁶ńgɔɔn mbwo pàsẅìŋ mekàpʉ̀ŋ ngie: Pi lɔg shúm sɛ̂ éfó jʉ’ɔɔn ńgʉa! Pi pɔ́ɔn lélɔgɔ jʉ’ʉ Tá wɔ̀ɔn ńgÿo jʉ’ʉ metʉ̌a.

¹⁷*Ngàŋa kwò Yěsô leen ńké ńkímte jʉ’ʉ ŋwà’ne Ssé gie á gɔɔn ngie: «Mèŋ, n kwoŋo jʉ’ jú kwoŋ tà mèŋ n ge lá’ kwé pɔ́ mǒ».

¹⁸Pàsá’a lá’a pà Yuda leen ńké ńgɔɔn né Yěsô ngie: Gÿo ndàa gyá nò mvfò peg ńdɔg ńnyɛɛ wég ngie mé la náa gú tʉ̀ légÿo mmó gie ɔ̀ gÿo lɛ̂.

¹⁹Yěsô tsɔ́’ɔ mbwo pɔ́b ngie: Pi keme *jʉ’ʉ Ssé yɔɔn, mèŋ n dɔg lyɛ̌’ sétá, ḿbʉ’ʉ ńtÿɔ́g tÿɔ́g.

²⁰Pɔ́ gɔɔn né yé ngie: Mé la lɔg ngù’ ntsɔ̀b ntɔgɔ́ nê móm lekùa, ńkwɛ́ɛ *jʉ’ʉ Ssé yɔɔn, ńgʉa ná gù, ɔ̀ gɔɔn ngie ńgwɔ́ ɔ̀ lɔg lyɛ̌’ sétá ḿbʉ’ʉ ńtÿɔ́g lá?

²¹Yěsô gɔɔn pá’ɔɔn, *jʉ’ʉ Ssé gie à kime é gwɔ́ pɔ́ mbùm ye.

²²Áa yɛ̌ tá à la gÿo ńzíme nà legwé, *ngàŋa kwò yé kímte ngie à la gɔɔn yɔɔn nò, ńdeen ńké ńzẅíŋ, ńgíŋe ńzẅíŋe gie ŋwà’ne Ssé la gɔɔn ná yé.

²³Yěsô nyé ńgwɔ́ pɔ́ Yerósalem, mé ne ńjÿó línɔ́ɔn *páskà, alá’ gyá menò mmɔɔn mmɔɔn mie à ne ńgÿo, pʉ̀a tà ńgyɔ́ɔn záb ntʉ́m ná yé.

²⁴Tá’ Yěsô tè gwá’ mbùm ye mbwo pɔ́b wɔ́, mélà’mie à né ńzsé pá’ pɔ́ gwɔ́ metsèm.

²⁵À la tè ne ńtsɔ́ɔn ngie mé kyagte kyagte éshwóŋó yé wɔ́. Kwà’ yé lê twó yé à zsé mmó gie áa tsɛ̀ɛ ntʉ́m nyìŋ mesoŋ.