Read Ngiemboon Jâŋ 20 Bible Online

Jâŋ 20 - Ngiemboon bible

Jâŋ 20

¹Á gÿo ńgwɔ́ ndùŋ mvfò lyɛ’ɛ́ lá’ nà ngàba lá’, tà ńnyé ńgwɔ́ pɔ́ leme léme, ejʉ’ nyé té fɔ́g, Malîɛ Magdala gʉa jʉ’e lesyè, ńkúu wó, ńgyá mbà mé ně fó ncwò lesyè, ésẅɛ’te tóon.

²Á kÿote, ńgʉa ńgyá Símo Piɛ pɔ́ wetsɔ̌ *ngàŋa kwò Yěsô gẅie Yěsô lɔ̌ɔn ńkwoŋo yé tɛ’, ńgɔɔn né pɔ́b ngie: Mé ně fó tsɛ̀ɛ lesyè, ńkẅile pfó Cʉ̀apʉ̀a. Peg tè ne ńzsé jʉ’ gie mé ně ńzába wó wɔ́.

³Piɛ pɔ́ wéwɛ̌ *ngàŋa kwò leen ńké ńkẅɛ, ńgʉa jʉ’e lesyè.

⁴Pɔ́ mépʉ́a la pú ne ńkÿo kÿo, tá wetsɔ̌ *ngàŋa kwò Yěsô zá’te mvfò Piɛ, ḿvɔgɔ jʉ’e lesyè.

⁵Ńtéŋe twó yé, ńgyá shúm nzsó, é gwɔ́ tsɛ̀ɛ lesyè, tá’ á ké tè tsoló kú.

⁶Símo Piɛ gẅie à laa nzèm ńjwoŋte lêen ńké ńtó, ńzyɛ́’ ńkúu tsɛ̀ɛ lesyè.

⁷Ńgyá mmó nzsó gie mé la zába nà twó Yěsô, á gwɔ́ ye mbwɔ’té, ńnuŋe nà yé jʉ’.

⁸Wetsɔ̌ *ngàŋa kwò Yěsô gẅie à ně mvɔg ńtó lêen ńké ńkú yé tsoló, ńgyá mmó gie á cʉ̌a, ńzẅíŋ ngie áa nò.

⁹Pɔ́ gwɔ́ mbɔɔ fʉ’ó, pɔ́ té jú’u mmó gie ŋwà’ne Ssé la lɔg ńda’te ngie Yěsô ge lá’ zíme nà legwé wɔ́.

¹⁰*Ngàŋa kwò Yěsô lêen ńké ḿbiŋ nzèm.

¹¹Malîɛ tó ńtyé ngʉ̀ŋe lesyè, ńne ńdʉa, ńdʉa tà ńtéŋe twó yé, ńdíe tsɛ̀ɛ lesyè.

¹²Ńgyá *mecÿɔ́’ Ssé mépʉ́a, pɔ́ ma’ meféfɔ́gɔ nzsǒ, ńnéŋe jʉ’ gie mé ka nuŋo pfó Yěsô wó. Tà’ ńnéŋe ná jʉ’ gie twó yé kaa wó, wetsɔ̌ ńnéŋe ná jʉ’ gie mekwò mé kaa wó.

¹³Pɔ́ gɔɔn né yé ngie: Mɔ̌ɔn ɔ̀ lʉa kɔ́? Á tsɔ́’ɔ mbwo pɔ́b ngie: Mé ně ńkaa pfó Cʉ̀apʉ̀a wɔ̀ɔn, m biŋ tè ne ńzsé jʉ’ gie mé ně ńzába wó wɔ́.

¹⁴Ńnyé ńgɔɔn gɔɔn, ésele nnɛ́, ńgyá Yěsô tyé jʉ’ó, tá’ á ké tè zsé ngie aa Yěsô wɔ́.

¹⁵Yěsô gɔɔn né yé ngie: Mɔ̌ɔn, ɔ̀ lʉa kɔ́? Ɔ̀ fa’a wɔ́? Tá á kwaŋ ngie kà à gwɔ́ pɔ́ nyìŋ gẅie à pyɛ́bɛ nká’a ngale wɔ́, ńgɔɔn né yé ngie: Andè, à lɔɔn ńgwɔ́ gie gù zɔ ně ńkaa pfó Yěsô, ɔ̀ la’te wɔ̀ɔn jʉ’ gie ɔ̀ ně ńnuŋe wó, n gʉa, ńkaa.

¹⁶Yěsô tóŋo yé ngie: Malîɛ, á sele nnɛ́ ńtóŋo yé nà shwóŋè pà Heber ngie: Rabuni, ńdɔgɔ ńgɔɔn ngie Tsítsà.

¹⁷Yěsô gɔɔn né yé ngie: Tè gíŋe ndáte wɔ̀ɔn, á nue mèŋ n nyě tè kwɔ̌’ tà ńkúu lejʉ́ŋ Tá wɔ̀ɔn. Ké ńgʉa ńgyá mefɛ́ pɔ́ɔn, ńgɔɔn né pɔ́b ngie: Mèŋ n ge kwɔ́’ nê lejʉ́ŋ Tá wɔ̀ɔn mie à giŋé ńgwɔ́ Tá gẅi. Á lejʉ́ŋ Ssé yɔ̀ɔn gie e giŋé ńgwɔ́ Ssé gi.

¹⁸Malîɛ Magdala lêen ńké ńgʉa ńgyá megàŋa kwò Yěsô, éshwóŋó wɔ́b ngie à gyǎ Cʉ̀apʉ̀a, ńdeen ńké ńtsẅii nò gie à gɔ̌ɔn mbwo yé.

¹⁹Á gwɔ́ fʉ̀’ʉ ncwò nzém, pɔ́ lyɛ’ó gie á laa ndùŋ mvfò lyɛ’ɛ́ lá’ nà ngàba lá’, *ngàŋa kwò Yěsô ńnéŋe ndá, mbà pɔ́ ně ḿbú ńjÿɔ́’ mencwò ndá, ḿbɔ́gɔ pà Yuda. Yěsô kẅɛ ńtyé tsetsɛ̀ɛ pɔ́b, ńgɔɔn né pɔ́b ngie: Mbʉ́lè gwɔ́ né pi.

²⁰Á gɔɔn pú’u, ńnyɛɛ wɔ́b mbwó mé, mbɔɔ gwoŋó nnɛ́ yé. *Ngàŋa kwò yé gyá yé, ḿbú ńkág tɛ’.

²¹Yěsô gíŋe ńgɔɔn né pɔ́b ngie: Mbʉ́lè gwɔ́ né pi. Pá’ Tá wɔ̀ɔn la túmo wɔ̀ɔn la, mèŋ n tumó gẅi yɔ́ɔn.

²²Ńgɔɔn pú’u, éfÿɔ́g fÿɔ́g ncwò ye ná pɔ́b, ńgɔɔn ngie: Pi kẅé Zẅìge Ndʉalʉ̌a.

²³Pi lɔɔn ńdege menò tepòŋ pʉ̀a ńnáa mbwo pɔ́b, mbà Ssé ge lege yé lege. Pi lɔɔn ńdʉ’ʉ lélege menò tepòŋ pʉ̀a ńnáa mbwo pɔ́b, mbà Ssé ge lʉ’ yé lʉ’ lélege.

²⁴Tsɔ̌ nyìŋ ná nùɔ pʉ̀a ntsɔ̀b pʉ́a, lezíŋ sé gwɔ́ le Tomáse, ńdɔgɔ ngie mélefág, à la tè ssé fʉ̀’ gie Yěsô la tó wɔ́.

²⁵Á gÿo ńtó, yetsɔ́ *ngàŋa kwò Yěsô gɔɔn né yé ngie: Peg ně ńgyá Cʉ̀apʉ̀a. Tomáse tsɔ́’ɔ mbwo pɔ́b ngie: N dɔɔn ńnyé tè gyǎ lǎga fʉ̌ŋ gie membàŋ ka ńnéŋe nà mbwó mé, ńnyé tè shÿɔgɔ́ tepwó wɔ̀ɔn á nà jʉ’e membàŋ, ńnyé tè shÿɔgɔ́ pwó yɔ́ɔn nà gwoŋó nnɛ́ yé, mèŋ ń de zẅíŋ.

²⁶É lêen ńké ńgÿo ńcʉa lyɛ̌’ lefɔ̌ɔn, *ngàŋa kwò Yěsô gíŋe ńcú’te ssé, Tomáse gwɔ́ yé nùɔ pɔ́b, á gwaa gwɔ́, mbà pɔ́ pǔ ńjÿɔ́’ mencwò ndá, Yěsô kẅɛ ńtyé tsetsɛ̀ɛ pɔ́b ńgɔɔn né pɔ́b ngie: Mbʉ́lè gwɔ́ né pi.

²⁷Ńdeen ńké ńgɔɔn né Tomáse ngie: Tsíŋe múɔ tepwó gù jʉ’ɔɔn. Líe mbwó mɔ́ɔn. Tsíŋe pwó jú, éshÿɔ́gɔ nà gwoŋó nnɛ́ yɔ́ɔn. Tè gíŋe ḿmʉ́’te, zẅíŋ ngie aa kwà’ mèŋ.

²⁸Tomáse tsɔ́’ɔ mbwo yé ngie: Cʉ̀apʉ̀a wɔ̀ɔn, ńgwɔ́ Ssé yɔ̀ɔn.

²⁹Yěsô tsɔ́’ɔ mbwo yé ngie: Ɔ̀ lěen ńké ńzẅíŋ, mélà’mie ɔ̀ gyǎ wɔ̀ɔn. Pàshÿó mbòŋo ée pʉ̀a pie pɔ́ zẅíŋ té zɔɔn ńgyá.

³⁰Yěsô la gíŋe ńgÿo menò mmɔɔn mmɔɔn tà é gyɔ́ɔn gyɔ̌ɔn á mvfò *ngàŋa kwò yé. Mé kaa mɛ̌ tsɛ̀ɛ yɔɔn ŋwà’ne ŋwe’e.

³¹Tá mé la ké ńŋwe’e mɔɔn pá’ɔɔn légwɔ́ gie pi ge zẅíŋ ngie Yěsô aa *Nzà’nkÿo, ńgwɔ́ Míŋ Ssé, ńgwɔ́ gie pi lɔɔn ńzẅíŋ, á gÿo pi gẅiin le gwɔ́ tèmì.