Read Ngiemboon Jâŋ 3 Bible Online

Jâŋ 3 - Ngiemboon bible

Jâŋ 3

¹Á gwaa gwɔ́ pú’u, atsɔ̌ nkěm pà Yuda gwɔ́ nà nùɔ Pà *farisay, mé tóŋo yé le Nikodem.

²Á gÿo ńtó tsɔ̌ lêtsẅɛ́’, ńgyá Yěsô, ńgɔɔn né yé ngie: Tsítsà, peg zsě ngie e Ssé zɔ la túmo gú ngie ɔ̀ gʉa ńzí’i pʉ̀a mmó. Á nue à lɔɔn ńgwɔ́ nyìŋ le gÿo menò mmɔɔn mmɔɔn mie ɔ̀ gÿo lɛ̂ té gwɔ́ gie e Ssé zɔ túmo yé wɔ́.

³Yěsô tsɔ́’ɔ mbwo yé ngie: Tà mèŋ shwóŋó gẅí, kwà’ nénʉ́, à lɔɔn ńgwɔ́ nyìŋ le gyá *lefùɔ Ssé té gwɔ́ gie mé giŋé ńzyé yé tsɔ́ legʉ̀a wɔ́.

⁴Nikodem gɔɔn ne Yěsô ngie: À lɔɔn ńgwɔ́ nyìŋ gwɔ́ ndÿò mé zyé yé lêkɔ́? Tà à lɔɔn ńgwɔ́ á gíŋe ńkúu lepfòm má we mé gíŋe ńzyé yé?

⁵Yěsô tsɔ́’ ngie tà mèŋ shwóŋó gẅí, kwà’ nénʉ́, à lɔɔn ńgwɔ́ nyìŋ le kúu tsɛ̀ɛ nò *lefùɔ Ssé té gwɔ́ gie mé lɔ̌g ntse ńzyé yé, ńgíŋe ńdɔgɔ zẅìge ńzyé yé wɔ́.

⁶Nyìŋ gẅie mámbàŋa pɔ́ manzwě zyě yé, à gwɔ́ pɔ́ nyìŋ mesoŋ, nyìŋ gẅie à Zẅìge Ssé zyě yé, á gẅiin le gwɔ́ gẅie à gwɔ́ pɔ́ we Zẅìge Ssé.

⁷Pɔ́ɔn lémɔɔn pá’ mèŋ n gɔ̌ɔn né gù ngie mé gẅiin légíŋe ńzyé gẅi tsɔ́ legʉ̀a.

⁸Fèfà cʉa jʉ’ gie à kwǒŋ, ɔ̀ jú’ pá’ à cʉa, tá ńké tè zsé jʉ’ gie à fóo wó wɔ́, ńké tè zsé jʉ’ gie à gee nê wó wɔ́. Á gíŋe ńgwɔ́ pɔ́ pú’u, ná nyìŋ gẅie à Zẅìge Ssé zyě yé.

⁹Nikodem leen ńké ńzɛ́te Yěsô ngie, á gwaa gwɔ́ pú’u, ńcʉa lêkɔ́?

¹⁰Yěsô tsɔ́’ɔ mbwo yé ngie: Ɔ̀ɔ Israel ńgwɔ́ tà’ tsítsà tà mé zsé gú tɛ’, ɔ̀ piŋ tè yɔɔn nò zsé la?

¹¹Tà mèŋ shwóŋó gú, kwà’ nénʉ́, peg gɔɔn nò nà mmó gie pèg ne ńzsé, ńgɔɔn gie peg ne ńzsé nà mmó gie peg la gyá, tá’ pi ké tè zẅíŋe nò gie peg gɔɔn wɔ́.

¹²Mèŋ shwoŋó gẅi nò ná shúm sie é cʉaté ndùmo ssé tsetsá’, pi tè zẅíŋ. N dɔɔn shwóŋó gẅi nò fʉ̀’ɔɔn ná shúm sie é cʉaté tÿǒ lepwó, mbà pi ge gÿo lêkɔ́ tá zẅíŋ?

¹³Nyìŋ laa zɔɔn ńkwɔ́’ɔ tÿǒ lepwó wɔ́, ndà’ *Míŋ Nyìŋ gẅie à la fó wó sẅɛ́’.

¹⁴Ndʉŋ ndʉŋ pá’ Mǒsê la kwɛ́ nnú ná tà’a tÿǒ, ńkwé’e ńnáa tÿǒ, á nkwòŋo tsẅɛ̀ la, á ne ńzɛ́te ngie mé gÿo ńkwé’e *Míŋ Nyìŋ pɔ́ pú’u.

¹⁵À cʉa pú’u, nyìŋ gẅie à zǎb ntʉ́m wé ná yé, à gẅiin le gwɔ́ tèmì.

¹⁶Á nue ntí gie e Ssé la lɔg ńkwoŋ njÿó pú’u la gwɔ́ tà á náa Míŋ we wémɔ’ɔ́, légwɔ́ gie wɛ̌ nyìŋ wɔ́ gẅie à zǎb ntʉ́m wé ná Míŋ we ŋwɛ́, à tě ńdá’a ńkaa ndòon tèmì wɔ́, à ge lá’ gẅiin le gwɔ́ tèmì.

¹⁷E Ssé la tè zɔɔn ńtúmo Míŋ we tsɛ̀ɛ njÿó ngie à gʉa ńnéŋ ndòon twó njÿó wɔ́. À la túmo yé pɔ́ légwɔ́ gie à ge gʉa gÿo njÿó tsẅɛ́ ndòon.

¹⁸Nyìŋ lɔɔn ńzáb ntʉ́m wé ná yé, ndòon le yé gwoon. Nyìŋ gẅie à ké kaa záb ntʉ́m wé ná yé wɔ́ zsé ngie à kǎ ndòon, á nue à kaa záb ntʉ́m wé ná Míŋ Ssé wémɔ’ɔ́ wɔ́.

¹⁹Pɔ́ gẅiin lékaa ndòon ńtí nò kyɛ̀’ gie á léen ńtóo tsɛ̀ɛ njÿó, tá pʉ̀a mesoŋ kwoŋ pɔ́ nzěm ńcʉa kyɛ̀’ ŋwɛ́, mélà’mie ngÿǒ menò mɔ́b té poŋ.

²⁰Ngÿǒ menò nyìŋ lɔɔn ńzɔɔn tè ne ḿboŋo wɔ́, mbà ngàŋ ge pʉa kyɛ̀’ pʉa, á le kwoŋo légiŋe jʉ’ gie kyɛ̀’ áa wó wɔ́, ḿbɔ́gɔ nue ngÿǒ menò mé ge kẅɛɛ mángyɛ̌.

²¹Tá’, nyìŋ gẅie à ne ńgiŋe nà mánzsè nò nénʉ́, à tóo jʉ’ gie kyɛ̀’ áa wó, ńzsé ngie mé ge gyá ngie ngÿǒ menò mé fóo pɔ́ ná pá’ à ne ńjú’u ncwò Ssé.

²²Yɔɔn nò tɔ́g, Yěsô pâ *ngàŋa kwò yé gʉa ne tsɛ̀ɛ pàga ngwòŋ Jẅidea, pâ pɔ̌ ná’a ńzye ńnéŋe, à ne ńnu’u pʉ́a ntse.

²³Jâŋ gwɔ́ yé Ainon, á ngʉ̀ŋe Salim ńne ńnu’u pʉ̀a ntse, á nue ntse laa jʉ’ó tɛ’. Epʉ̀a ne ńtóo, á nu’u wɔ́b ntse.

²⁴Á la gwaa gwɔ́, mé nyé té ńnéŋe Jâŋ ndá tsǎŋ.

²⁵Atsɔ̌ nyìŋ pà Yuda pâ tsɔ̌ ngàŋa nkwò Jâŋ ńnéŋe tà ńzye lézoŋo nò ná nò lésɔgɔ pʉ̀ tá ńgu’te Ssé.

²⁶*Ngàŋa kwò Jâŋ gʉa ńgyá Jâŋ, ńgɔɔn né yé ngie Tsítsà, ɔ̀ ne ńkímte nyìŋ wá gẅie pi yé kaa ná yétsɔ̌ nzǐŋ ntse Jurdeŋ la? Á nyìŋ wá gẅie ɔ̀ ka gɔɔn nò gie ɔ̀ zsé ná yé la? À ne ńnu’u yé pʉ̀a ntse fʉ̀’ɔɔn, tà lá’ menùɔ menùɔ ne ńgee ńgyá pɔ́ yé.

²⁷Jâŋ tsɔ́’ɔ mbwo pɔ́b ngie: E Ssé gẅie aa tÿǒ lepwó zɔ náa fà’ ye wɔ̌wɔ́ɔ.

²⁸Kwà’ pi gí ne ńnyɛte ńzsé ngie mèŋ n ka gɔɔn ngie mèŋ n tè *Nzà’nkÿo wɔ́. Mèŋ n gwɔ́ pɔ́ nyìŋ gẅie mé ka túmo wɔ̀ɔn ngie mèŋ n gwɔ́ mvfò yé.

²⁹Nyìŋ gẅie à zɔ́’ɔ manzwě zɔ aa ndǔm manzwě. Ashǔ ndǔm tyé lejʉ́ŋ ndǔm, á gɔɔn nò, á jú’ ngyè ye, anò poŋo yé tɛ’. Mèŋ n ne ńkága yɔ́ɔn pɔ́ pú’u, ḿbiŋe ńkága tà ḿmaga ntʉ́m wɔ̀ɔn.

³⁰Á ne ńzɛ́te ngie yé nò gwaa kẅi’i gee mvfò, ayɔ́ɔn ne ḿbiŋe né nzèm.

³¹Nyìŋ gẅie à fóo tÿǒ lepwó, à cʉa pʉ̀a metsèm. Nyìŋ gẅie aa ndùmo ssé tsetsá’ aa nyìŋ tsetsá’, ḿbiŋ ńgɔɔn nò pɔ́ nà menò mie ée ndùmo ssé tsetsá’. Tá’, nyìŋ gẅie à fóo tÿǒ lepwó à cʉa pʉ̀a metsèm.

³²À gɔɔn nò gie à zsé nà shúm sie à la gyá mbɔɔ sie à la jú’, tá nyìŋ tè zẅíŋ.

³³Nyìŋ gẅie à zẅíŋe nò gie à gɔɔn, lɔgɔ ńnyɛɛ ngie e Ssé ee nénʉ́ nà kɔ̀ɔkɔ́ɔ.

³⁴Nyìŋ gẅie e Ssé túmo yé, à gɔɔn menò mie é fóo mbwo Ssé, á nue e Ssé gÿo Zẅìge yé gwɔ́ pɔ́ ná yé fʉ̀’ ntsèm.

³⁵E Ssé Tá kwoŋo Míŋ we, mbà à léen ńnéŋ shúm ntsèm á nà lɔ̌ɔn pwó Míŋ we.

³⁶Nyìŋ lɔɔn ńzáb ntʉ́m we ná Míŋ Ssé, mbà ngàŋ ge gẅiin le gwɔ́ tèmì. Nyìŋ gẅie à kě kaa záb ntʉ́m wé ná Míŋ Ssé wɔ́, á le lá’ ńgẅiin kwà’ le gwɔ́ wɔ́. E Ssé ké ńnyé ńkẅi’i ńgyáŋa lóŋ ná yé gyáŋ.