Read Ngiemboon Jâŋ 5 Bible Online

Jâŋ 5 - Ngiemboon bible

Jâŋ 5

¹Yɔɔn nò tɔ́g, á fʉ̀’e tsɔ́ línɔ́ɔn pà Yuda ne ńku’u, Yěsô pʉ ńgʉa né Yerósalem.

²Á gwaa gwɔ́, atsɔ́ gÿǒon ntse sɔ́g nnɛ́ gwɔ́ Yerósalem, mé tóŋo nà shwóŋè pà Heber le Betzata, á gwɔ́ ngʉ̀ŋe ncwò ndá *menjʉ̀njÿò, mbà mé la lɔg metóon ḿbwóon mekɔ́’ méntʉ̀a ńdɔg ńkéle.

³Megàŋ meguɔ ntí ntí nuŋte tsɛ̀ɛ mekɔ́’. Pàfʉ̀ menÿɔ́g, pà pwɔ́’te mekwò, mbaa megàŋ kwʉ́’te nuŋte wó, [ńne ńzẅí’te pá’ ntse gé cʉ’ʉ.

⁴Á nue, atsɔ̌ *cÿɔ́’ Ssé lɔ̌ɔn ńnéŋe ńgwá sẅɛ́’ɛ ḿbʉe ntse, angùɔ gẅie à vɔ̌g ńkúu tsɛ̀ɛ ntse fʉ̀’ gie e cʉ’ʉ́, á zeŋe nà yé gùɔ tà pá’ á lɔɔn ńgwɔ́ pɔ́ yɛ̌ ntí wɔ́.]

⁵Atsɔ̌ nyìŋ gwɔ́ jʉ’ó, mbà à gǔɔ guɔ ngù’ ntsɔ̀b lefɔ̌ɔn né móm ntá.

⁶Yěsô gyá pá’ à nuŋe, ńzsé ngie à tsẅě jʉ’ó tɛ’, ńzɛ́te yé ngie tà ɔ̀ ne ńkwoŋo lézeŋe?

⁷Anguɔ tsɔ́’ ngie: Andè, awɔ̀ɔn nyìŋ gẅie à lɔɔn ńgwɔ́ á kaa wɔ̀ɔn ńnéŋe tsɛ̀ɛ ntse fʉ̀’ gie é ne cʉ’ʉ à tè gwɔ́ wɔ́. Mèŋ n ŋege tà ńgwaa tó, mbà tsɔ̌ nyìŋ vɔgɔ́ ntse.

⁸Yěsô gɔɔn né yé ngie: Lu ssé, ḿbíi mátà gù, ńgiŋ.

⁹Nyìŋ wá gwóon ńzeŋe pɔ́ fʉ’ó, ḿbíi mátà we, ńzye légiŋ. Yɔɔn nò gwaa tɔ́g pá’ɔɔn, á gwɔ́ *lyɛ’ɛ́ nzsè pà Yuda.

¹⁰Pàsá’a lá’ pà Yuda leen ńké ńgɔɔn né nyìŋ gẅie à zeŋé ŋwɛ́ ngie: Ɔ̀ tè gẅiin lékaa mátà ńdɔg ńgiŋ pɛ́’ɛ̀ wɔ́. Á nue yɔɔn áa lyɛ’ɛ́ nzsè.

¹¹Á tsɔ́’ɔ mbwo pɔ́b ngie: Nyìŋ gẅie à gÿǒ mèŋ n zeŋe gɔ̌ɔn né mèŋ ngie: Píi mátà gù, ńgiŋ.

¹²Pɔ́ zɛ́te yé ngie: Nyìŋ gẅie à gɔ̌ɔn né gù ngie píi mátà gù ńgiŋ aa wɔ̌?

¹³Tá nyìŋ gẅie á ně ńzeŋe la ké tè ne ńzsé ngàŋ wɔ́. Á nue Yěsô ně ńgɔɔn pú’u, ḿbyéte tsetsɛ̀ɛ lá’ gie á ke ńgwɔ́ jʉ’ó.

¹⁴Yěsô gÿo ńgyá yé tsɛ̀ɛ *jʉ’ʉ Ssé, ńgɔɔn né yé ngie: Ɔ̀ kě ńzeŋe mboŋó, tè lá’ ńgíŋ ńgÿo nò tepòŋ ḿbɔ́gɔ tsɔ̌ ngɔ́’ légíŋe ńkúu gú, tà ńtɔ́g gie ɔ̀ kà zɔɔn ńgwɔ́ tsoló.

¹⁵Nyìŋ wá gʉa shwóŋ pàsá’a lá’ ngie nyìŋ gẅie à la zoŋo yé la, à laa Yěsô.

¹⁶Pɔ́ jú’ pú’u, ńzye lépʉa Yěsô, mélà’mie à ně ńgÿo yɔɔn nò, á lyɛ’ɛ́ nzsè yɔ́b.

¹⁷Yěsô tsɔ́’ɔ mbwo pɔ́b ngie: Tá wɔ̀ɔn nyě fa’a pɔ́ fà’ tà ńkú fʉ̀’ɔɔn, mbɔɔ mèŋ yɔ́ɔn mèŋ n giŋé ne fa’a pɔ́ fà’.

¹⁸Á fó fʉ’ó, pà Yuda mege ńgá’a léfa’a mmó gie pɔ́ ge fó mǒ zẅé Yěsô, ńtí nue à la tè fʉa pɔ́ *lepʉ̌ lyɛ’ɛ́ nzsè yɔ́b ndà’ wɔ́, à ka giŋé ńne ńgɔɔn ngie e Ssé aa kwà’ Tá we, ńdɔgɔ pú’u, ńgɔɔn ngie pɔ́ Ssé gwɔ́ pɔ́ ndʉŋ ndʉŋ.

¹⁹Yěsô gíŋe ńgɔɔn né pɔ́b ngie: Tà mèŋ shwóŋó gẅí, kwà’ nénʉ́, Míŋ Ssé tè gÿo tsɔ́ mmó pɔ́ lê yé twó wɔ́, à gÿo pɔ́ mmó gie à ne ńgyá Tá we gÿo. Akɔ́ɔkɔ́ɔ gie Tá gÿo, Múɔ giŋé ńgÿo pɔ́ yɛ̌.

²⁰Á nue Tá à kwoŋo Múɔ tɛ’, ḿbú ńnyɛɛ yé kɔ́ɔkɔ́ɔ gie à ne ńgÿo. À giŋé ge nyɛɛ yé shúm sie é fáŋ tà pi gyá à pú ńkʉ’ʉ gẅí.

²¹Pá’ Tá we gÿo pʉ̀a pie é kwě zím ńgwɔ́ wó la, áa ndʉŋ ndʉŋ pá’ Múɔ giŋé ńku’ yé légÿo nyìŋ gẅie à kwoŋo yé gwɔ́ wó.

²²E Ssé Tá, aa ntě ńzá’a ntsàŋ nyìŋ wɔ́, à léen ńnyé yɛ̌ jʉ’ mbwo Míŋ we.

²³Á cʉa pú’u, mânyìŋ ntsèm ná mekù’ Míŋ we pɔ́ ndʉŋ ndʉŋ pá’ à ne ńnáa me Tá. Nyìŋ gẅie à kaa ná mekù’ Míŋ Ssé wɔ́, angàŋ lɔgɔ tě ńnáa mekù’ Tá we gẅie à la túmo yé wɔ́.

²⁴Tà mèŋ shwóŋó gẅí, kwà’ nénʉ́, nyìŋ jú’u shwóŋè yɔ́ɔn, ḿbiŋ ńzáb ntʉ́m ná Nyìŋ gẅie à la túmo wɔ̀ɔn, mbà ngàŋ gẅiin le gwɔ́ tèmì. Mé té ge gíŋe ŋaga yé wɔ́, à tsẅɛ̌ legwé ńcʉ́’ ńgẅiin pɔ́ le gwɔ́ tèmì.

²⁵Tà mèŋ shwóŋó gẅí, kwà’ nénʉ́, afʉ̀’ ne ńku’u, tà á ně ńzɔɔn ńdá’ ńku’, pá’ mepfó ssé ge jú’ ngyè Míŋ Ssé, epʉ̀a pie pɔ́ jǔ’ yɛ̌ ngyè pɔ́ gwɔ́ wó.

²⁶Áa pú’u mélà’mie Ssé Tá gẅie aa lesa’á le gwɔ́ tèmí, à la ná mɛ̌ metʉ̀ mbwo míŋ we.

²⁷À la gíŋe ńnáa yé metʉ̀ lélɔg ńzá’ mentsaŋ pʉ̀a mesoŋ, mélà’mie yé zɔɔ *Míŋ Nyìŋ.

²⁸Tà á mɔ́ɔn ńkʉ’ʉ gẅi kʉ’ʉ, á nue afʉ̀’ ne ńku’u pá’ mepfó ssé metsèm pie é nuŋe tsɛ̀ɛ mesyè ge jú’ ngyè ye,

²⁹é leen ké fó tsɛ̀ɛ mesyè kẅɛte. Epʉ̀a pie pɔ́ ka ne ńgÿo nò mbòŋo zíme nà legwé ńkẅé le gwɔ́ tèmì, tá pʉ̀a pie pɔ́ ka ne ńgÿo nò tepòŋ zím ńgwe ntsaŋ.

³⁰Mèŋ n tè zá’ ntsaŋ nyìŋ té píge Ssé wɔ́. E yɔ̀ɔn ntí leŋag, é gwɔ́ nénʉ́, mélà’mie mèŋ n tè ne fa’a pɔ́ légÿo mmó gie mèŋ n zɔ kwoŋo wɔ́, n gÿo yɔ́ɔn pɔ́ mmó gie Nyìŋ gẅie à la túmo wɔ̀ɔn ne ńkwoŋo.

³¹Mèŋ n ke ńgwɔ́ pé’e ne sele ńgɔɔn pɔ́ nò gie mèŋ n zsé nà twó mbùm yɔ́ɔn, mbà à lɔɔn ńgwɔ́ mé le yɛ̌ nò zẅíŋ.

³²Nyìŋ ndyɛ̀’ɛ zɔ gɔɔn nò gie à zsé ná mèŋ, mèŋ m biŋ ne ńzsé ngie nò gie à gɔɔn ná mèŋ áa nénʉ́.

³³Pi la tè túm pʉ̀a mbwo Jâŋ wɔ́ le? À la gɔɔn nò gie à zsě nà nò gie áa nénʉ́.

³⁴Á gʉa ná mèŋ, mbà mèŋ n tè ne ńtsɔ́ɔn ngie nyìŋ mesoŋ zɔ gɔɔn nò gie à zsě ná mèŋ wɔ́. Tá’, mèŋ n gɔɔn yɔɔn nò légwɔ́ gie pi ge cʉa mǒ tsẅɛ́.

³⁵Jâŋ la gwɔ́ pɔ́ pá’ lâm gẅie mé lyɛ̌ ńtÿɔ́g á ne ńkyɛ’ɛ jʉ’. Á kyɛ’ jʉ’, anò poŋo gẅi tá á té ńnéŋe.

³⁶Tá’ mèŋ n ké ńgwɔ́ pá’ɔɔn ńgẅiin tsɔ́ nò gie á la’te nyìŋ gẅie mèŋ n gee wɛ̌, á nue mefà’ mie Tá wɔ̀ɔn la ná ngie mèŋ fa’, kwà’ mɛ̌ mefà’ mie mèŋ n gÿo zɔ́ la’te ngie Tá wɔ̀ɔn la túmo wɔ̀ɔn.

³⁷Tá wɔ̀ɔn gẅie à la túmo wɔ̀ɔn, kwà’ yé máŋwɛ́ ne ńgɔɔn nò gie à zsě ná mèŋ. Pi laa ngyè ye jú’u, ńké tè shÿó wé gyá.

³⁸Ashwóŋè yé té ntʉ́m pi wɔ́, mélà’mie pi kaa záb ntʉ́m ná nyìŋ gẅie à la túmo yé wɔ́.

³⁹Pi mwoon ŋwà’ne Ssé, mélà’mie pi ne ńkwaŋa ngie pi ge cʉa mǒ gẅiin le gwɔ́ tèmì. Yɛ̌ zɔ ké ne ńgɔɔn nyìŋ gẅie mèŋ n gee wɛ̌.

⁴⁰Pi piŋ ńké tè ne ńkwoŋo létóo mbwo mèŋ ńgẅiin le gwɔ́ tèmì wɔ́.

⁴¹Mèŋ n tè ne ńtsɔ́ɔn tsɔ̌ ngɔ́ɔnte gie e fóo mbwo pʉ̀a mesoŋ wɔ́.

⁴²Tá’, mèŋ n zɔɔn ne ńzsé gẅí, pi ee ntʉ́m pi, pi tè Ssé kwoŋ.

⁴³Mèŋ n ka lɔg lezíŋ Tá wɔ̀ɔn ńtó, pi lʉ’ʉ lézẅíŋe yɔ́ɔn nò. Tá ńgwɔ́ gie tsɔ̌ nyìŋ ndyɛ̀’ɛ lɔɔn ńtó fʉ̀’ɔɔn pɔ́ nà sé lezíŋ, mbà pi ge zẅíŋe yé nó.

⁴⁴Ńgwɔ́ pi záb ntʉ́m ná mèŋ lêkɔ́? Pi fa’ pɔ́ ngie nyìŋ mesoŋ ná ngɔ́ɔnte wetsɔ̌, pi tè fa’ ngie e Ssé gílé yé zɔ ná ngɔ́ɔnte gi wɔ́, ée ndà’ yé ńgwɔ́ Ssé.

⁴⁵Tà pi kwaŋ ngie mèŋ n zɔ ge lá’ tyé mvfò Tá, é zába nò twó pi. Anzàba nò twó pi ge lá’ gwɔ́ pɔ́ Mǒsê gẅie pi kwaŋa gí kɔ̀ɔkɔ́ɔ ńtÿɔ́gɔ pɔ́ ná yé.

⁴⁶Pi la zɔɔn pé’e ńzẅíŋe nò gie Mǒsê la gɔɔn, mbà pi zẅíŋe yɔ́ɔn, mélà’mie à la ŋwè’e nò ńtí wɔ̀ɔn.

⁴⁷Pá’ pi tè ne ńzẅíŋe nò gie Mǒsê la ŋwe’e wɔ́ la, pi ge gǎ tá zẅíŋe nò gie mèŋ n gɔɔn?