Read Ngiemboon Jâŋ 6 Bible Online

Jâŋ 6 - Ngiemboon bible

Jâŋ 6

¹Mɔɔn menò tɔ́g, Yěsô túm ńgʉa yetsɔ̌ nzǐŋ letʉŋ sie ée Galilea, mé gíŋe ńtóŋ ngie letʉŋ Tiberiad

²Alá’ ne ńcʉ́me nzèm yé tɛ’, á nue pʉ̀a la ne ńgyá menò mmɔɔn mmɔɔn mie à la ne ńgÿo nà megàŋa guɔ.

³Yěsô kwɔ́’ɔ ndùm tsɔ́ lekwɔ’ɔ́, pâ *ngàŋa kwò yé ńnéŋe ssé.

⁴Á gwaa gwɔ́, afʉ̀’ gie pà Yuda gee ńjÿó línɔ́ɔn yɔ́b gie mé tóŋo le *Páskà ne ńku’u.

⁵Yěsô ńnéŋe tà ḿbʉ’ʉ twó yé ńgyá máamáa nùɔ lá’ ne ńtóo né lejʉ́ŋ yé, á gɔɔn né Filib ngie: Pege ge gʉa nzɔ̌ jú mbelég tá lɔg jÿɔ́gɔ wɔ́b?

⁶À lɔ̌ɔn ńgɔɔn pú’u, ńdɔgɔ ńdʉŋte yé lʉŋte. Kwà’ yé Yěsô ne ńzsé mmó gie à ge piŋ gÿo.

⁷Filib tsɔ́’ ngie: Mé jú mbelég pɔ́ ye medenie nkÿo pʉ́a, nyìŋ wɔ́b pfɛ́ tà é gʉa lʉ́m?

⁸Atsɔ̌ *ngàŋa kwò Yěsô gwɔ́ jʉ’ó, lezíŋ sé gwɔ́ le Ndeléya, á gwɔ́ fɛ́ Símo. Á gɔɔn né Yěsô ngie:

⁹Atsɔ̌ mûɔ mbàŋa aa jʉ’ɔɔn, ńgẅiin mbelég[3] mbu’ú ntʉ̀a, ńgÿo messó ntá’ pʉ́a, sɛ̌ shúm ké ńku’u kɔ́ nà nzẅìŋ lá’ yɔɔn?

¹⁰Yěsô gɔɔn ngie: Pi gÿo alá’ néŋte ssé, legǐ laa jʉ’ó tɛ’. Epʉ̀a néŋte ssé, ńgwɔ́ nyìŋ mbàŋa mmó ntsá’ yétʉ̀a.

¹¹Yěsô pí mbelég, ńná ndǎg mbwo Ssé, ńgába mbwo lá’, ńgíŋ ńgÿo pɔ́ pú’u nà messó, wɔ̌wɔ́ɔ pfɛ́ɛ mmó pá’ à kwǒŋ.

¹²Pʉ̀a metsèm pfɛ́ɛ mmó tà ńzẅɛ́, Yěsô gɔɔn né *ngàŋa kwò yé ngie: Pi lag mekèm mie é vʉ’ʉ́ tà mmó le pyé.

¹³Pɔ́ lag mekèm mie é vʉ’ʉ́ nà mbelég gie pʉ̀a pfɛ̌ ntá’ tʉ̀a la, é lúe tsɛ̀ɛ mekèkàg ntsɔ̀b pʉ́a nê legém.

¹⁴Alá’ gyá nò mmɔɔn mmɔɔn gie Yěsô gÿǒ, ńgɔɔn ngie: Nyìŋ wɔɔn aa kwà’ *ntsẅì nkʉ̀ Ssé gẅie mé ka ne ńzẅí’te ngie à tóo tsɛ̀ɛ njÿó.

¹⁵Yěsô gyá shÿó gẅie pɔ́ ne fa’a légwoon yé ńdɔgɔ yé ńgÿo fùɔ, ńgíŋe ńnyé wɔ́b ńgʉa né ndùm lekwɔ’ɔ́ gílé yé.

¹⁶Á gÿo ńgwɔ́ ncwò nzém, *ngàŋa kwò Yěsô cwóŋ ńgʉa né nkʉ̀ŋ ntse Galilea.

¹⁷Ńkúu tsɛ̀ɛ tsɔ́ kanú’, ńne ńgee né Kapernawúm ná yetsɔ̌ nzǐŋ, nzěm gwaa síŋ, Yěsô nyé pɔ́ tè kẅɛté wɔ́b.

¹⁸Atsɔ̌ máamáa fèfà ne ńcʉ’ʉ, ntse ne ḿbʉe.

¹⁹Pɔ́ lɔgɔ kanú’ ńgiŋe mmó mekílo méntʉ̀a ka ntɔgɔ́ wɔ́, ńgyá Yěsô ne ńgiŋe ndùm ntse ńtóo, pɔ́ pɔ́g.

²⁰Tá Yěsô gɔɔn né pɔ́b ngie tà pi pɔ́g, à gwɔ́ pɔ́ mèŋ.

²¹Pɔ́ ne fa’a légÿo á kúu tsɛ̀ɛ kanú’, ńgwóon ńgyá, mbà mé kǔ ngʉ̀ŋe ntse.

²²Njÿó gÿo ńdʉ́a, alá’ gie mé ně ńyé nà yetsɔ̌ nzǐŋ ntse kímte ngie kanú’ kaa ssé ndà’ yémɔ’ɔ́, *ngàŋa kwò Yěsô piŋ ńgwaa lɔg gʉa, pâ Yěsô té gwɔ́. Pɔ́ gʉa pɔ́ gílé pɔ́b.

²³Etsɔ́ mekanú’ piŋ fó Tiberiad, ńtóo jʉ’ gie Yěsô ka tyé wó, ńná ndǎg mbwo Ssé nà mbelég, ńgábte mé pfɛ́ la.

²⁴Á gwaa gwɔ́, mbà lá’ yɛ̌ gyǎ ngie Yěsô cʉ’ʉ́ jʉ’ó wɔ́, *ngàŋa kwò yé gíŋe ńcʉ́’ʉ yɔ́b jʉ’ó wɔ́, pɔ́ leen ńké ńkúu tsɛ̀ɛ mekanú’ ŋwɛ́, ńdɔg ye Kapernawúm légwá fa’a Yěsô.

²⁵Ńgʉa tà ńkúu nà yetsɔ̌ nzǐŋ, ńgyá yé, ńgɔɔn né yé ngie: Tsítsà, ɔ̀ tǒ tà ńkúu jʉ’ɔɔn fʉ̀’e kɔ́.

²⁶Yěsô tsɔ́’ɔ mbwo pɔ́b ngie: Tà mèŋ shwóŋó gẅí, kwà’ nénʉ́, pi tě séen fa’a wɔ̀ɔn, pɔ́ mélà’mie pi ka gyá menò mmɔɔn mmɔɔn mie mèŋ n ka gÿo, é nyɛɛ metʉ̀ Ssé wɔ́, pi fa’a wɔ̀ɔn ńtí pɔ́ pá’ pi ka pfɛ́ mbelég tà ńzẅɛ́.

²⁷Tà pi kag tʉ̀ nà shúm léjÿó sie é té láte, pi kag tʉ̀ pɔ́ nà shúm léjÿó sie nyìŋ jÿǒ, é gÿo á lá’a ńgwɔ́ pɔ́ wó. *Míŋ Nyìŋ zɔ ge ná sɛ̌ shúm léjÿó mbwo pi, mélà’mie Ssé Tá la cÿɔ’ɔ liŋé yé ná yé.

²⁸Pɔ́ gɔɔn né yé ngie: Peg ge gÿo lêkɔ́ tá gÿo mmó gie Ssé ne ńkwoŋo?

²⁹Yěsô tsɔ́’ɔ mbwo pɔ́b ngie: Ammó gie e Ssé ne ńkwoŋo ngie pi gÿo, aa lezáb ntʉ́m ná nyìŋ gẅie à ka tǔm.

³⁰Pɔ́ pʉŋe ngie: Anò mmɔɔn mmɔɔn gie ɔ̀ ge gÿo, à fóo mbwo Ssé tá peg gyá ńzáb ntʉ́m ná gù áa kɔ́? Ammó gie ɔ̀ ge gÿo áa kɔ́?

³¹Pà mangʉa njʉ’ pég la pfɛ́ɛ mána, á nkwòŋo tsẅɛ. Á lɔgɔ ńcʉ́me ná pá’ ŋwà’ne Ssé ne ńgɔɔn ngie: «À la náa wɔ́b shúm léjÿó sie é fóo tÿǒ lepwó».

³²Yěsô tsɔ́’ɔ mbwo pɔ́b ngie: Tà mèŋ shwóŋó gẅí, kwà’ nénʉ́, Mǒsê la tè ná shúm léjÿó sie é fóo tÿǒ lepwó né pi wɔ́. Tá wɔ̀ɔn zɔ ne ńnáa kwà’ shúm léjÿó sie é fóo tÿǒ lepwó né pi.

³³Á nue shúm léjÿó sie é fóo mbwó Ssé, aa nyìŋ gẅie à fǒ tÿǒ lepwó ésẅɛ́’, ńgÿo pʉ̀a mesoŋ tsɛ̀ɛ njÿó gwɔ́ wó.

³⁴Pɔ́ leen ńké ńgɔɔn né yé ngie: Andè, ńnéŋe ńnáa sɛ̌ shúm léjÿó né peg fʉ̀’ ntsèm.

³⁵Yěsô tsɔ́’ɔ mbwo pɔ́b ngie: Eshúm léjÿó sie é gÿo nyìŋ gwɔ́ wó, à gwɔ́ pɔ́ mèŋ. Nyìŋ lɔɔn ńtó ńtsɛ́ɛ wɔ̀ɔn, mbà nzyè tè lá’ gíŋe gyáŋa yé wɔ́. Nyìŋ záb ntʉ́m ná mèŋ, mbà gag yé té lá’ gíŋe shÿó wɔ́.

³⁶Tá’, mèŋ n ka shwóŋó gẅí, pi ne ńgyá wɔ̀ɔn, ńké tè záb ntʉ́m ná mèŋ wɔ́.

³⁷Awɔ̌wɔ́ɔ gẅie Tá wɔ̀ɔn nǎ mbwo mèŋ wɔ́, à ge tó tsɛ́ɛ wɔ̀ɔn. M biŋ ńké le lá’a tsɔ́ lyɛ̌’ ńkẅile nyìŋ gẅie à tǒ ńtsɛ́ɛ wɔ̀ɔn, ńnáa pǐ wɔ́.

³⁸Á nue mèŋ n da tè fó tÿǒ lepwó ńtó pɔ́ légÿo yɔ́ɔn mmó gie mèŋ n kwǒŋ wɔ́, n da tó légÿo mmó gie nyìŋ gẅie à la túmo wɔ̀ɔn à ne ńkwoŋo.

³⁹Ammó gie nyìŋ gẅie à la túmo wɔ̀ɔn ne ńkwoŋo, á gwɔ́ pɔ́ ngie tà mèŋ n cʉ́’ tà tsɔ̌ tà’ nà pʉ̀a pie à la náa mbwo mèŋ pyé. À lyɛ’ɛ́ lá’ nzsò nzèm lá’ ńgwɔ́, mèŋ n zíme wɔ́b nà legwé.

⁴⁰Ammó gie Tá wɔ̀ɔn ne ńkwoŋo à yɔɔn: Nyìŋ gyá múɔ, ńzáb ntʉ́m ná yé, angàŋ gẅiin le gwɔ́ tèmì. Mèŋ n dá’a lyɛ’ɛ́ lá’ nzsò nzèm ńzíme yé nà legwé.

⁴¹Pàsá’a lá’ leen ńké ńzye lézẅɛ́te nzèm Yěsô, mélà’mie à gɔ̌ɔn ngie aa mmó léjÿó gie à fóo tÿǒ lepwó.

⁴²Pɔ́ gíŋe ne ńgɔɔn ngie nyìŋ wɛ̂ à tè Yěsô míŋ Yesyɛ̂b wɔ́ le! Pege tě ne ńzsé tá we pɔ́ má we wɔ́ le? Á ge gÿo lêkɔ́ tá à shwóŋó wégè fʉ̀’ɔɔn ngie à ka fó tÿǒ lepwó sẅɛ́’?

⁴³Yěsô tsɔ́’ɔ mbwo pɔ́b ngie: Tà pi gíŋe ńzẅɛ́te!

⁴⁴Atsɔ̌ nyìŋ lɔɔn ńgwɔ́ á le tó ńtsɛ́ɛ wɔ̀ɔn té gwɔ́ gie Tá wɔ̀ɔn gẅie à la túmo wɔ̀ɔn zɔ shwoŋté yé wɔ́. Mèŋ, m biŋ ńdá’a nà lyɛ’ɛ́ lá’ nzsò nzèm, ńzíme yé nà legwé.

⁴⁵Mé la ŋwe’e tsɛ̀ɛ ŋwà’ne pà *ntsẅì nkʉ̀ Ssé ngie: «E Ssé lê twó yé ge lá’ zí’i nò yé mbwo mânyìŋ tsèm». Nyìŋ lɔɔn ńjú’u nò gie à fóo mbwo Tá, ńzẅíŋe mmó gie à zí’i pʉ̀a, mbà wɛ̌ nyìŋ ge tó tsɛ́ɛ wɔ̀ɔn.

⁴⁶Sɔɔn nyìŋ laa Tá gyá, tà ńdí’ ndà’ nyìŋ gẅie à fóo lejʉ́ŋ ye. Àngàŋ zɔ lǎ gyá Ssé Tá.

⁴⁷Tà mèŋ shwóŋó gẅí, kwà’ nénʉ́, nyìŋ lɔɔn ńzáb ntʉ́m ná mèŋ, mbà ngàŋ ge gẅiin le gwɔ́ tèmì.

⁴⁸Ammó léjÿó gie á gÿo mé gwɔ́ wó à gwɔ́ pɔ́ mèŋ.

⁴⁹Pà mangʉa njʉ’ pí la pfɛ́ɛ mána nkwòŋo tsẅɛ, ńgíŋ ńkwé kwé.

⁵⁰Tá’, ammó léjÿó gie á fóo tÿǒ lépwó sẅɛ́’ɛ, áa gie nyìŋ jÿó, á le gíŋe ńkwé wɔ́.

⁵¹Mèŋ máŋwɛ́, mèŋ n gee mmó léjÿó gie á ku’u légÿo mé gwɔ́ wó, á gie á fóo tÿǒ lépwó sẅɛ́’ɛ. Nyìŋ lɔɔn ńjÿó yɛ̌ mmó léjÿó, mbà à ge lá’a gwɔ́ pɔ́ wó mengù’u mengù’. Yɛ̌ mmó léjÿó gie mèŋ n ge ná, ee mbab nnɛ́ yɔ̀ɔn. Mèŋ n ge ná tá à cʉa pú’u, epʉ̀a mesoŋ tsɛ̀ɛ njÿó e gwɔ́ wó.

⁵²Ńgɔɔn pú’u, pàsá’a lá’ pá zoŋo tsetsɛ̀ɛ pɔ́b tɛ’ ńgɔɔn ngie: Nyìŋ wɛ̂ ge gÿo lêkɔ́ tá ná mbab nnɛ́ ye pege pfɛ́?

⁵³Yěsô tsɔ́’ɔ mbwo pɔ́b ngie, tà mèŋ shwóŋó gẅí, kwà’ nénʉ́, pi lɔɔn tè pfɛ́ mbab nnɛ́ *Míŋ Nyìŋ, ńnú metse mé wɔ́, mbà pi tě ge gwɔ́ wó wɔ́.

⁵⁴Nyìŋ pfɛ́ mbab nnɛ́ yɔ̀ɔn, ńnú metse mɔ́ɔn, á gẅiin le gwɔ́ tèmì. Mèŋ n gÿo ńzíme ngàŋ nà legwé á lyɛ’ɛ́ nzsò nzèm.

⁵⁵Á nue mbab nnɛ́ yɔ̀ɔn ée shúm léjÿó se mbòŋo, metse mɔ́ɔn é gwɔ́ kwà’ mmó nǔ.

⁵⁶Nyìŋ pfɛ́ mbab nnɛ́ yɔ̀ɔn, ńnú metse mɔ́ɔn, mbà à temté ná mèŋ, mèŋ n temte ná yé.

⁵⁷Tá wɔ̀ɔn zɔ ka túmo wɔ̀ɔn, aa lesa’á le gwɔ́. Mèŋ n dɔgɔ pɔ́ pú’u, ńgwɔ́ wó, áa ndʉŋ ndʉŋ pá’ nyìŋ gÿo ḿpfɛ́ mbab nnɛ́ yɔ̀ɔn, mbà a ge lɔg pɔ́ pú’u, gwɔ́ wó.

⁵⁸Wɔɔn aa pá’ shúm léjÿó sie é fóo tÿǒ lepwó é gwɔ́, é té pá’ sie metá pí la pfɛ́ ńké ńgíŋe nkwé kwé wɔ́. Nyìŋ lɔɔn ńjÿó sɔɔn shúm léjyó, mbà ngàŋ ge lá’a gwɔ́ pɔ́ wó.

⁵⁹Yěsô lɔ̌ɔn ńgɔɔn mɔɔn menò, á fʉ̀’ gie à la ne ńzí’i pʉ̀a nò Ssé tsɛ̀ɛ *ndá cú’tè pà Yuda á Kapernawúm.

⁶⁰*Ngàŋa kwò Yěsô jú’u shwóŋè yé, lelÿò zye légɔɔn ngie: Ashwóŋe yɛ̂ á tʉ̌ tà ńcʉa! À lɔɔn ńgwɔ́ à wɔ̌ zẅí’te?

⁶¹Yěsô zsé ngie *ngàŋa kwò yé ne ńzẅɛ́te ńtí nò gie à gɔ̌ɔn, ńzɛ́te wɔ́b ngie ashwóŋè yɔ́ɔn ne ńgege gẅi gege ka?

⁶²Tà pi lɔɔn ńgwɔ gyá *Míŋ Nyìŋ gíŋe ńkwɔ́’ ńgʉa né jʉ’ gie à la zɔɔn ńgwɔ́ wó, pi gÿo pɔ́ lêkɔ́?

⁶³A Zẅìge Ssé zɔ̌ gÿo mé kwà’ ńgwɔ́ wó. Nyìŋ mesoŋ nê twó yé tè ku’u légÿo tsɔ́ mmó wɔ́. Ashwóŋè gie mèŋ n náa mbwo pi fóo mbwo Zẅìge Ssé, yɛ̌ shwóŋè zɔ̌ gÿo tá mé gwɔ́ wó.

⁶⁴Tà mbàa pú’u, etsɔ́ pʉ̀a tsetsɛ̀ɛ pi té ne ńzẅíŋe wɔ́. Á gwaa gwɔ́, mbà Yěsô la lá’ ńzsé pʉ̀a pie é té ne ńzába ntʉ́m ná yé wɔ́, ńgíŋe ńzsé nyìŋ gẅie à ge gÿo sẅiŋe yé.

⁶⁵Yěsô gíŋe ńgɔɔn ngie, áa mmó gie á ně ńgÿo tá mèŋ n gɔɔn né pi ngie, à lɔɔn ńgwɔ́ nyìŋ le tó ńkẅɛ́te wɔ̀ɔn té gwɔ́ gie Tá wɔ̀ɔn zɔ gÿǒ ngie ngàŋ tó wɔ́.

⁶⁶Á fó fʉ’ó, lelÿò *ngàŋa kwò Yěsô kÿo, pâ pɔ̌ té gíŋe ńgiŋ wɔ́.

⁶⁷Yěsô gÿo ńgɔɔn mbwo pʉ̀a ntsɔ̀b pʉ́a nê legém ngie: Pi tè ne ńkwoŋo gí légʉa wɔ́ ka?

⁶⁸Símo Piɛ tsɔ́’ɔ mbwo yé ngie: Cʉ̀apʉ̀a, peg ge gʉa kẅɛ́te pɔ́ wɔ̌? Ɔ̀ gẅiin shwóŋè gie á náa le gwɔ́ tèmì.

⁶⁹Peg léen ńdá’ ńzẅíŋ, ńgíŋ ne ńzsé ngie ɔ́ɔ kwà’ nyìŋ gẅie à fóo lejʉ́ŋ Ssé.

⁷⁰Yěsô tsɔ́’ɔ mbwo pɔ́b ngie: Pi pɛ̂ ntsɔ̀b pʉ́a nê legém, mèŋ n zɔ ka tè tsɔ́’ɔ gẅi wâ? Tsɔ̌ nyìŋ kě ńgwɔ́ tsetsɛ̀ɛ pi, ńgwɔ́ nyìŋ Sátà.

⁷¹Yěsô gɔɔn pú’u, ńgɔɔn Jẅidas, míŋ Símo Iskariod. Yé zɔ lɔ̌ɔn ge gÿo sẅiŋe Yěsô, tà mbɔɔ pá’ à laa nùɔ pʉ̀a ntsɔ̀b pʉ́a nê legém.