Read Ngiemboon Jâŋ 7 Bible Online

Jâŋ 7 - Ngiemboon bible

Jâŋ 7

¹Yɔɔn nò tɔ́g, Yěsô gwɔ́ pɔ́ tsɛ̀ɛ pàga ngwòŋ Galilea, ńne ńgwá ńgiŋe, à tè ne ńkwoŋo légʉa tsɛ̀ɛ pàga ngwòŋ Jẅidea wɔ́, mélà’mie pàsá’a lá’ pà Yuda la ne fa’a lézẅé yé.

²Á gwaa gwɔ́, alínɔ́ɔn pà Yuda gie mé tóŋo le línɔ́ɔn *mentàb ne ḿbɔ́ɔnte.

³Mefɛ́ Yěsô gɔɔn né yé ngie: Fóo jʉ’ɔɔn ńgʉa né Jẅidea tá *ngàŋa kwò ɔ́ gie ée jʉ’ó gyá yɔ́b menò mie ɔ̀ ne ńgÿo.

⁴Nyìŋ lɔɔn ne ńkwoŋo ngie mé zsé yé, á le lÿoon mmó gie à ne ńgÿo wɔ́. Pá’, ɔ̀ ne ńgÿo memáa menò la, gÿo, alá’ zsé ɔ́.

⁵Pɔ́ gɔɔn ńtí nue kwà’ pɔ́b mefɛ́ Yěsô la tè ne ńzába ntʉ́m ná yé wɔ́.

⁶Yěsô tsɔ́’ɔ mbwo pɔ́b ngie: Ayɔ́ɔn fʉ̀’ nyé tè ku’, tá ńgʉa ná pi, mbà fʉ̀’ʉ kɔ́ wɔ́ áa mbwo pi ńgwɔ́ pɔ́ mbòŋ.

⁷Alɔɔn ńgwɔ́ pʉ̀a njÿó le gẅi pʉ̀a. Tá ńgʉa ná mèŋ, mbà pɔ́ pʉa wɔ̀ɔn, mélà’mie mèŋ n kě ne shwóŋó wɔ́b shwóŋ ngie ngÿǒ nò wɔ́b té poŋ.

⁸Pi zɔ pʉ ńgʉa jʉ’ʉ línɔ́ɔn. Á gʉa ná mèŋ, mbà mèŋ n tě ńgee nê wó wɔ́, ayɔ́ɔn fʉ̀’ kaa ku’u.

⁹Ńgɔɔn né pɔ́b pú’u, ńgíŋ ńnéŋe Galilea.

¹⁰Mefɛ́ pé piŋ ńgwɔ́ tà ḿbʉ nê jʉ’ʉ línɔ́ɔn, á leen ńké ńcʉ́m yé mánzsè. Tá ńgiŋ pɔ́ shute shuté.

¹¹Mé gwɔ́ tà ne ńjÿó línɔ́ɔn, pàsá’a lá’ pà Yuda ne ńgwá fa’a yé, ńzɛ́te ngie: Yěsô gwɔ́ pɔ́ nzɔ̌?

¹²Alá’ ne shwóŋè mencwò mencwò ńtí Yěsô. Petsɔ́ pʉ̀a ne ńgɔɔn ngie aa kwà’ nyìŋ. Petsɔ́ ne ńgɔɔn ngie à fʉte pʉ̀a fʉte.

¹³Tá nyìŋ ké tě ńgɔɔn nò ná yé tà ngyè ye kwɔ́’ɔ tÿǒ wɔ́, ḿbɔ́gɔ pàsá’a lá’ pà Yuda.

¹⁴Mé jÿó línɔ́ɔn tà ńgebe, Yěsô gʉa ne *jʉ’ʉ Ssé, ńzye lézí’i pʉ̀a mmó.

¹⁵Á kʉ’ʉ pà Yuda, pɔ́ gɔɔn ngie: À gÿo lêkɔ́ ńzsé ŋwà’ne Ssé pɛ́’ɛ̀, tá mbà à la tè sekúd zí’i?

¹⁶Yěsô tsɔ́’ɔ mbwo pɔ́b ngie: Ammó gie mèŋ n zí’i pʉ̀a té fóo mbwo mèŋ wɔ́, á fóo pɔ́ mbwo nyìŋ gẅie à ka tumó wɔ̀ɔn.

¹⁷Nyìŋ lɔɔn ne ńkwoŋo légÿo mmó gie Ssé ne ńkwoŋo, mbà ngàŋ ge zsé, ka mmó gie mèŋ n zí’i pʉ̀a fóo pɔ́ mbwo Ssé wɔ́, ka á gwɔ́ pɔ́ yɔ́ɔn shwóŋè wɔ́.

¹⁸Nyìŋ lɔɔn ne ńgɔɔn nò, ńgwɔ́ gie á gwɔ́ pɔ́ shwóŋè yé, mbà à fa’a pɔ́ we legú’. Tá ńgwɔ́ gie nyìŋ lɔɔn ne fa’a legú’ nyìŋ gẅie à ně ńtúmo yé, mbà ngàŋ shwóŋó nò nénʉ́, atsɔ́ nò nŋwɔ́’te ŋwɔ’té té ná yé wɔ́.

¹⁹Mǒsê zɔ la tè ná meŋwà’ne né pi wɔ́ le? Tà wɔ̌ ná pi mɔ̌ɔn ńne ńgiŋe mǒ? Pi piŋe fa’a lézẅé wɔ̀ɔn mélà’a kɔ́?

²⁰Alá’ tsɔ́’ɔ mbwo Yěsô ngie: Ɔ̀ɔ *ssé tepòŋ! Awɔ̌ ne fa’a lézẅé gú?

²¹Yěsô gíŋe ńtsɔ́’ɔ mbwo pɔ́b ngie: Mèŋ n ka gÿǒ pɔ́ ndà’ tà’a mmó, á pú ńgege gẅi metsèm.

²²Tá’ pi ké ńjú’, Mǒsê la zí’i gẅi lépú’u mûɔ mbàŋa, á fó tě fóo pɔ́ ne yé Mǒsê wɔ́, á fóo mbwo pà mangʉa njʉ’. Pi piŋ ne ḿbú’u múɔ lyɛ’ɛ́ nzsè gí.

²³Tà á lɔɔn ńgwɔ́ gie à ńgwɔ́ pi pú’u múɔ lyɛ’ɛ́ nzsè, mbɔ́gɔ pá’ pi ge fʉa *lepʉ̌ Mǒsê, pi piŋe ńgyáŋa lóŋ ná mèŋ ngie mèŋ n gÿǒ nyìŋ zeŋe lyɛ’ɛ́ nzsè mélà’a kɔ́?

²⁴Tà pi ŋaga nò nyìŋ té zsé letsiŋé, pi ŋag pɔ́ pá’ áa jʉ’ó ńgwɔ́ pú’u.

²⁵Tsɔ́ ntá’ pʉ̀a Yerósalem ne ńgɔɔn ngie: Wɛ̂ tè nyìŋ wá gẅie mé fa’a lézẅé yé la wâ?

²⁶Yé wɛ̂, ńne shʉ̀ashʉ̀a ńgɔɔn nò, nyìŋ tě ńtsɔ́bɔ wɔ́. Ndyɛ̀’ pàsá’a lá’ pégè gyǎ ngie aa *Nzà’nkÿo nénʉ́.

²⁷Tá’, wɛ̂ nyìŋ aa pɛ́’ɛ̀ peg ne ńzsé jʉ’ gie à fóo wó. Tá ńgʉa ná *Nzà’nkÿo, mbà nyìŋ tè gÿo zsé jʉ’ gie à fóo wó wɔ́.

²⁸Yěsô gwɔ́ fʉ’ó, ńgwɔ́ tsɛ̀ɛ *jʉ’ʉ Ssé ńne ńzí’i pʉ̀a mmó, ńgɔɔn né ngyè tetʉ́ʉ ngie: Pi kwa’ ńne ńzsé wɔ̀ɔn, ńgíŋe ńne ńzsé jʉ’ gie mèŋ fóo lê wó la? Mèŋ n zɔ ka tè záb ngie mèŋ n ge tó wɔ́. Tá’ nyìŋ gẅie à la túmo wɔ̀ɔn, aa nyìŋ gẅie à lɔɔn ńgɔɔn nò, mbà áa nò nénʉ́. Pi tè ne ńzsé yé wɔ́.

²⁹Mèŋ n kě ne ńzsé yé. Mèŋ fóo pɔ́ ne lejʉ́ŋ yé, mbà yé zɔ ka tumó wɔ̀ɔn.

³⁰Pɔ́ jú’u yɔɔn nò, éfa’a légwoon yé, tá nyìŋ ké tè pwó ná yé záb, mélà’mie à yé fʉ̀’ la nyé tè ku’.

³¹Lelÿò pʉ̀a tsɛ̀ɛ nùɔ lá’ ké ne ńzába ntʉ́m ná yé zǎb, ńne ńgɔɔn ngie, tà *Nzà’nkÿo ge gÿo tó gíŋe gÿo tsɔ́ menò mmɔɔn mmɔɔn tà e tɔ́g mie nyìŋ wɛ̂ ne ńgÿo la?

³²Pà *farisay jú’ pá’ alá’ ne shÿɔ́gɔ ncwò ssé ńkíme Yěsô, pɔ́ gʉa ńgyá mentándá pànuŋe pwɔ́’ pâ pɔ̌ túm pàpyɛ́bɛ *jʉ’ʉ Ssé ngie pɔ́ gʉa ńgwoon Yěsô.

³³Á gwaa gwɔ́ Yěsô ne ńgɔɔn mbwo lá’ ngie pege ge gíŋe ná’a ńnéŋe, n gʉa ńtsɛ́ɛ nyìŋ gẅie à la túmo wɔ̀ɔn.

³⁴Pi ge gÿo gwá fa’a wɔ̀ɔn, é piŋ ké le wɔ̀ɔn gyá, á nue ajʉ’ gie mèŋ n gee nê wó, pi tè ku’u létóo jʉ’ó wɔ́.

³⁵Epʉ̀a zye légɔɔn tsetsɛ̀ɛ pɔ́b ngie: Aa pá’ɔɔn ge gʉa pɔ́ nzɔ̌, tà peg le yé gyá? A ge gʉa kẅɛ́te pɔ́ pʉ̀a pégè pie pɔ́ la sa jʉ’, ńgee lá’ pà Gelekia keen? Kà à gee pɔ́ ńzí’i pà Gelekia nò Ssé?

³⁶Yɔɔn ntí shwóŋè ee pá’ɔɔn ńdɔgɔ ńgɔɔn ngie kɔ́, pá’ à gɔɔn ngie pi ge fa’a wɔ̀ɔn é piŋ ké le wɔ̀ɔn gyá, ḿbiŋ tè ku’u létóo jʉ’ gie mèŋ n gee wó wɔ́?

³⁷Á gwɔ́ nzsò nzèm lyɛ’ɛ́ línɔ́ɔn, á gie áa máamáa lyɛ’ɛ́ lá’, Yěsô lu ssé ńtyé tsetsɛ̀ɛ pʉ̀a, ńgɔɔn né ngyè tetʉ́ʉ ngie: Agága nyìŋ lɔɔn ne shÿó, á tó ńtsɛ́ɛ wɔ̀ɔn, ńnú ntse.

³⁸Nyìŋ gẅie à zǎb ntʉ́m wé ná mèŋ la, mbà nò gie ŋwà’ne Ssé gɔɔn ge pumte: «Ntse ge fó tsɛ̀ɛ ntʉ́m wé kẅɛ ne cwóŋo pá’ ntse gẅie é fóo lesá’a la».

³⁹A lɔ̌ɔn ńgɔɔn pú’u, ńgɔɔn Zẅìge Ssé gie pʉ̀a pie é záb ntʉ́m ná yé lɔ́ɔn ge kẅé. Á gwaa gwɔ́, a Zẅìge Ssé ŋwɛ́ nyé té tó, á nue Yěsô la nyé tè kǔ tsɛ̀ɛ legú’ we.

⁴⁰Alá’ jú’u shwóŋè Yěsô, etsɔ́ pʉ̀a tsetsɛ̀ɛ pɔ́b gɔɔn ngie aa kwà’ *ntsẅì nkʉ̀ Ssé.

⁴¹Petsɔ́ ne ńgɔɔn ngie yé zɔɔ *Nzà’nkÿo. Tá’, petsɔ́ ne ńgɔɔn yɔ́b pɔ́ ngie *Nzà’nkÿo lɔɔn ńgwɔ́ á le fó Galilea wɔ́.

⁴²Ńtí nue mé la ŋwe’e tsɛ̀ɛ ŋwà’ne Ssé ngie: *Nzà’nkÿo ge lá’ fó pɔ́ nà ngẅɛ̀ ndá fùɔ Ndavíd, ńgie *Nzà’nkÿo ge lá’ fó pɔ́ Mbetélehem á gẅie áa lá’ pà fùɔ Ndavíd.

⁴³Anò Yěsô leen ńké ḿma’a fàgte tsetsɛ̀ɛ pɔ́b.

⁴⁴Petsɔ́ pʉ̀a ná pɔ́b ne fá’a légwoon Yěsô, tá’ atsɔ̌ nyìŋ wɔ́b ké tè ku’u lézába pwó ná yé wɔ́.

⁴⁵Pàpyɛ́bɛ jʉ’e Ssé pie mé ně ńtúmo wɔ́b piŋ nzèm ńkẅɛ́te mentándá pànuŋe pwɔ́’ lâ pà *farisay, pɔ́ zɛ́te wɔ́b ngie pɔ́ kaa lɔgɔ Yěsô ńtó wɔ́ mélà’a kɔ́?

⁴⁶Pàpyɛ́bɛ jʉ’e Ssé tsɔ́’ ngie: Peg laa zɔɔn ńjú’ tsɔ̌ nyìŋ shwóŋó pá’ nyìŋ áwe wɛ̌ wɔ́!

⁴⁷Pà *farisay leen ńké ńgɔɔn né pɔ́b ngie: Ńzsé ngie à selé twó gí gí wɔ́?

⁴⁸Tsoon tsɔ̌ tà’ ná mekěm peg, tsoon tà’ ná pà *farisay laa záb ntʉ́m ná nyìŋ wɛ̂ wɔ́!

⁴⁹Anùɔ lá’ yɛ̂ gie á tè ŋwà’ne Ssé zsé, ée megàŋ ndòon.

⁵⁰Pà *farisay ne ńzoŋo pá’ɔɔn, tsɔ̌ nyìŋ wɔ́b, á Nikodem, ńgwɔ́ nyìŋ gẅie à la gʉa ńgyá Yěsô. Á ńnéŋe tà ńgɔɔn né yetsɔ́ kwò yɔ́b ngie:

⁵¹Áa nà *lepʉ̌ sége pé’e, mé gɔɔn ngie nyìŋ gwě ntsaŋ té gwɔ́ gie mé ju’ú nò gie á kẅɛ̌ ncwò yé, ḿbiŋ ńzsé mmó gie à gÿǒ?

⁵²Tá petsɔ́ pʉ̀a tsɔ́’ɔ mbwo yé ngie: Ɔ̀ɔ jú nyìŋ Galilea ka? Ɔ̀ lɔɔn fa’ mboŋó, mbà ɔ̀ ge gyá ngie tsɔ̌ *ntsẅì nkʉ̀ Ssé laa kẅɛɛ Galilea wɔ́.

⁵³Pɔ́ gÿo pú’u, ésyeente, awɔ̌wɔ́ɔ gʉa nê mbʉ̀a yé.