Read Ngiemboon Megàŋ ntúm 1 Bible Online

Megàŋ ntúm 1 - Ngiemboon bible

Megàŋ ntúm 1

¹Ntʉ́ nzẅìŋ Téofil! Mèŋ n da ŋwe’e mvɔ́g mvfò ŋwà’ne, ńnáa mbwo gù ńdɔg ḿbíte menò mie Yěsô la gÿó, mbɔɔ mie à la la’te mbwo pʉ̀a ta fó nzyète fà’ ye,

²ńgʉa ńkúu na lyɛ̌’ gie à la kwɔ́’ né tÿǒ lépwó. À la gwɔ́ kwɔ́’, ńcʉa na Zẅìge Ndʉalʉ̌a, ńtsẅii mmó gie ngàŋ ntúm gie à la tsɔ́’ ge cʉ́’ʉ ně gÿo.

³À la gyá ngɔ́’ tà ńkwé, ńgÿo ńzíme nà legwé. Ńdɔg mentí tà ńgyɔ́ɔn, ńnyɛ mbùm ye mbwo pɔ́b pɔɔn, ngie aa ntentʉ́, tà ńgwaa ńgwɔ́ pɔ́ le gíŋe ḿmʉ́’te wɔ́, ńkẅɛɛ mvfò pɔ́b kẅɛ nà melyɛ̌’ móm lekùɔ, ńně shwóŋó wɔ́b nò nà nò *lefùɔ Ssé.

⁴Pâ pɔ́ fó lyɛ̌’ ńne ḿbúte ḿpfɛ́ɛ mmó, á tsẅi né pɔ̌b ngie, tà pɔ́ fó Yerósalem ńgʉa ngʉ̀a shʉ̀shʉ̀a. Pɔ́ ke ńnéŋe pɔ́ wó, ńzẅí’te mmó gie Tá la ka’a lénáa mbwó pɔ́b.

⁵Á gwɔ́ pá’ à la shwóŋó wɔ́b ngie: Jâŋ la nù’ pʉ̀a ntse, tá ńgʉa ná pɔ́b, mbà é cʉ́’ lyɛ̌’ shÿɔ́’ɔ tsɔ́ wɔ́, e Ssé ńnéŋe wɔ́b mbwo Zẅìge Ndʉalʉ̌a.

⁶Megàŋ ntúm la cú’te pú’u, ńzɛ́te Yěsô ngie: Andè, yɔɔn lɔgɔ ńgwɔ́ fʉ̀’ gie ɔ̀ ge gÿo tà lefùɔ piŋe mbwo Israel keen?

⁷Yěsô tsɔ́’ɔ mbwo pɔ́b ngie: Pi zɔ tè gẅiin lézsé kà fʉ̀’ wɔ́, ka lyɛ̌’ gie mɛ̌ menò ge gÿo wɔ́. Tá gíle yé zɔ la kwaŋte ńzáb.

⁸!Pi zsé pɔ́ ndà’ ngie à Zẅìge Ssé ge gÿo tóo ná pi, é náa gẅi metʉ̀. Pi lɔg ńku’u léshwóŋó kɔ̀ɔkɔ́ɔ gie pi zsé nà mèŋ! E zyé Yerósalem éshwóŋ shwóŋ maga Jẅidea. E piŋ fó Samalîɛ, éshwóŋ shwóŋ kúu jʉ’ gie tsetsá’ zsote wó.

⁹Yěsô la gɔɔn yɔɔn nò tà ńtsẅé jʉ’, pɔ́ tyé ńnyé ne ńdíe yé líe, á kwɔ́’ le tÿǒ. Tsɔ́ melɔ́ɔn pwoon yé, á pyéte menÿɔ́g pɔ́b.

¹⁰Á ne ńkwɔ́’ɔ, pɔ́ tyé ńké ne ńdíe lefaŋ líe. Tsɔ́ pʉ̀a mépʉ́a lêen ńkẅɛ ńtyé lejʉ́ŋ pɔ́b, ḿmá’ mefefɔ́gɔ nzsǒ,

¹¹ńgɔɔn né pɔ̌b ngie: Pà Galilea, pi tyě náŋte tÿǒ lepwó mélà’a kɔ́? Yěsô wɛ̂ gẅie Ssé fǒ mbwo pi ésa’a yé ńdɔg ńgee tÿǒ lépwó lɛ̀, à ge gÿó gíŋe piŋ nzèm pɔ́ na ntí gie pi gyǎ á lɔgɔ ńgee lɛ̀.

¹²Megàŋ ntúm Yěsô lêen ńké fó lekwɔ’ɔ́ metÿǒ mèvɛ olive ḿbiŋ nzèm né Yerósalem. Lefǒ nà sɛ̌ lekwɔ’ɔ́, ńgʉa kúu wó, á gwɔ́ mmó tà’ kilo mítà.

¹³Pɔ́ kúu Yerósalem, ńkwɔ́’ɔ ná ndêg we tÿǒ, ńkúu tsɛ̀ɛ lûm ndá gẅie pɔ́ lɔ́ɔn ńcú’te wó. Wɔɔn laa Piɛ, ńgÿo Jâŋ pɔ́ Jâg, ńgÿo Ndeléya. Wɔɔn gwɔ́ Filib, ńgÿo Tomáse, pɔ́ Patelemî mbɔɔ Matio. Wɔɔn gwɔ́ Jâg míŋ Alfe, ńgÿo Símo gẅie mé lɔ́ɔn ńtóŋo yé le mûɔ ngwòŋ, pɔ́ Jẅide míŋ Jâg.

¹⁴Pɔ́b métsèm lɔ́ɔn ńdɔgɔ tà’a zẅìge ésẅíŋte Ssé té tsó, pâ Malîɛ má pà Yěsô, ńgÿo petsɔ́ pànzwě mbɔɔ mefɛ́ Yěsô.

¹⁵Á gÿo ńgwɔ́ tsɔ̌ lyɛ̌’, mefɛ́ mefɛ́ cú’te ssé, (tà ńgwɔ́ mmó pʉ̀a nkÿo lemóm mbʉ́a). Piɛ lu ssé, ńtyé tsetsɛ̀ɛ pɔ́b ńgɔɔn ngie:

¹⁶Mefɛ́ mefɛ́, á ka ne ńzɛ́te ngie ammó gie Zẅìge Ndʉalʉ̌a la lɔg ncwò fùɔ Ndavíd ḿbÿé, mé ŋwe’e tsɛ̀ɛ ŋwà’ne Ssé à pumte. Á nò gie à la tʉ́ njÿó ńgɔɔn ntí Jẅidas gẅie yé zɔ kéen ńkẅɛɛ nnyɛ̀ nzsè tá mé gwoon Yěsô.

¹⁷Tá mbà à kaa tsɔ̌ tà’ nyìŋ nà nùɔ yég megàŋ ntúm. Tà ńgíŋe ńgẅiin yé twó fà’ gie à ge gÿo tsetsɛ̀ɛ pege.

¹⁸À kéen ńkẅé nkáb sóon, ńdɔg ńjú nká’, ńkúu wó, ńgwe ssé mvfò mvfò. Lepfòm sé vɛ́. Ntú mé kẅɛ sa jʉ’.

¹⁹Yerósalem ntsèm ntsèm la jú’u yɔɔn nò, tà ńtsẅi lezíŋ nká’ ngie: Akelduma, ńdɔgɔ ńgɔɔn ńgie nká’ metse.

²⁰Á zɔɔn ńgwaa gwɔ́ mbà mé la ńŋwe’e tsɛ̀ɛ ŋwà’ne me zɔ́bɔ ntse ngie: Á poŋ ndá ye cʉ́’ʉ fòmo ndá Mbɔ́ɔn nyìŋ lelá’ ńgíŋe ńnéŋe tsoló, ńgíŋe ńcʉ́me ngie tsɔ̌ nyìŋ ndyɛ’ɛ jÿó jʉ’ yé.

²¹Áa yɛ̌ tá á ne ńzɛ́te ngie pege gʉa tsetsɛ̀ɛ pʉ̀a pie pega pɔ̌ kɔ̌ɔn ńzɔ́gɔ ńgiŋe nzèm Cʉ̀apʉ̀a Yěsô, tà fó fʉ̀’ gie Jâŋ la ne ńnu’u pʉ̀a ntse ńkúu nà lyɛ̌’ gie mé la lɔgɔ Yěsô éfó tsetsɛ̀ɛ pege ńgʉa, éfa’a tà’ nyìŋ, pega pɔ́ púte métsèm éshwóŋó mmó gie pege zsé nà Ndè wege Yěsô. Á ná pá’ à la zíme nà legwé.

²³Mé la tÿɔ́g pʉ̀a mepʉ́a ssé. Wɔɔn laa Yesyɛ̂b gẅie mé lɔ́ɔn ńgíŋe ńtóŋo yé le Mbarsabas, setsɔ́ lezíŋ sé gíŋe ńgwɔ́ le Jẅistẅis. Wetsɔ́ nyìŋ gwɔ́ Matias.

²⁴Mé leen ńké sẅíŋte Ssé ńgɔɔn ngie: Cʉ̀apʉ̀a, gù gẅie ɔ̀ zsé ntʉ́m mânyìŋ ntsèm lá, gʉa nà pʉ̀a pɔɔn mépʉ́a, ńnyɛɛ wég nyìŋ gẅie ɔ̀ tsɔ’ɔ́ yé.

²⁵Wɛ̌ nyìŋ cʉ́’ʉ ngàŋ ntúm Yěsô, ńtyé nà jʉ’ gie Jẅidas kaa wó tá ńgwá’ ńgʉa né yé jʉ’ la.

²⁶Ésẅíŋte Ssé tà ńtsẅé jʉ’, ḿma’a tyèente lélɔg fa’a nyìŋ gẅie Cʉ̀apʉ̀a tsɔ́’ɔ yé, á gwe nà Matias. Mé kẅi’i yé nà nùɔ megàŋ ntúm ntsɔ́b yemɔ’ɔ́ nê legém.