Read Ngiemboon Megàŋ ntúm 10 Bible Online

Megàŋ ntúm 10 - Ngiemboon bible

Megàŋ ntúm 10

¹Atsɔ̌ nyìŋ gwɔ́ tÿǒsoŋ Sezare, lezíŋ sé gwɔ́ lê Kornɛy, á gwɔ́ tsɔ̌ tà’ tándá pàlÿɔ́’ ncù pà *Roma, ésá’a pʉ̀a nkÿo. Mé tóŋo yɛ̌ nùɔ lê nùɔ ye Italia.

²Á gwɔ́ nyìŋ, pâ ngẅɛ̀ yé ntsèm pú ńgÿo mekù’ Ssé pà Yuda, ńjú’u ncwò wé. Á piŋ ńkẅéte pà Yuda pie ée mepóŋ tà é gyɔ́ɔn gyɔ̌ɔn, ńnéŋe sẅíŋte Ssé fʉ̀’ ntsèm.

³Á gwɔ́ tsɔ̌ lyɛ̌’, á nà mmó nèm tá mbÿɛ̀ njÿó, e Ssé nyɛ́’ nÿɔ́g mé. Á gyá tsɔ̌ *cÿɔ́’ Ssé tó ńtsɛ́ɛ yé ndá, ńtóŋo yé ngie: Kornɛy!

⁴Á pʉ’ʉ twó yé, ńdíe *cÿɔ́’ Ssé, ńne ḿbɔ́gɔ, ńgɔɔn né yé ngie: Áa kɔ́ Cʉ̀apʉ̀a? *Cÿɔ́’ Ssé tsɔ́’ɔ mbwo yé ngie: E Ssé jǔ’ pá’ ɔ̀ zɔgɔ lésẅíŋte yé, ńgíŋ ńgyá mbɔɔ mmó gie ɔ̀ ne ńgÿo ná mepóŋ ńdɔgɔ ńkẅéte wɔ́b. E Ssé kaa gú lege.

⁵Afʉ̀’ɔɔn lá, túm pʉ̀a pɔ́ gʉa Jope, éfa’a tsɔ̌ nyìŋ gẅie mé tóŋo yé lê Símo. Setsɔ́ lezíŋ sé gíŋe ńgwɔ́ lê Piɛ.

⁶À neŋé ndá tsɔ̌ nyìŋ. Esé lezíŋ gíŋe ńgwɔ́ lê Símo. Angàŋ fa’a ná *mengùb menɔ̀ɔn, e ye ndá gwɔ́ ngʉ̀ŋe ntse té pàa.

⁷*Cÿɔ́’ Ssé tsẅii nò mbwo yé tà ńgʉa, Kornɛy cʉ́’ ńtóŋ megàŋa fà’ pé mépʉ́a, ńgÿo tà’ ndÿɔ́’ ncù. Á gwɔ́ gẅie pɔ́ yé zyě ńtsẅé. Á piŋ ńgwɔ́ nyìŋ ńgÿo yé mekù’ Ssé.

⁸Kornɛy tóŋo wɔ́b pú’u, ńdeen ńké ḿbíte kɔ̀ɔkɔ́ɔ gie á cʉ̌a, éshwóŋó wɔ́b, tá ńtúmo wɔ́b Jope.

⁹Njÿó gÿo ńdʉ́a, pɔ́ nyé ńgwɔ́ pɔ́ mánzsè, á gwɔ́ mmó tsɛ̀ɛ zsǒ, tà mbà pɔ́ gʉ̌a tà ńcʉ́’ʉ lékúu tsɛ̀ɛ tÿǒsoŋo Jope. Á gwaa gwɔ́, mbà Piɛ kwɔ’ɔ́ nà jʉ’ gie áa ntsɔ̀’ ndá, ńgwɔ́ pɔ́ pá’ tetʉ́a la lésẅíŋte Ssé.

¹⁰Nzyè zye légyáŋa yé, á tsɔ́ɔn léjÿó mmó. Mé gwaa gwɔ ne ńcwoŋte shúm sie à ge jÿó, e Ssé nyɛ́’ nÿɔ́g mé á gyá tsɔ́ mmó gie á fóo mbwo yé Ssé,

¹¹ńgyá ncwò tÿǒ lepwó tsɔ́’ɔ ńtyé, atsɔ́ mmó fó wó sẅɛ́’, ńne ńtóo lê ssé, ńgwɔ́ pá’ máamáa pwó nzsǒ gie mé ku’tě nà mezẅé lekùa la.

¹²Ntí ntí menɔ̀ɔn pú ńgwɔ́ tsoló. Menɔ́ɔn mekwo lekùa, menɔ̀ɔn pie pɔ́ shwóŋó lepfòm sɔ́b pɔ́ ssé, ńgÿo meshʉ́ŋ[6]

¹³Ngyè nyìŋ gɔɔn né yé ngie: Piɛ, lu ssé, ńzẅé ḿpfɛ́.

¹⁴Piɛ tsɔ́’ ngie: Ngǎŋ me Cʉ̀apʉ̀a. Mèŋ n daa zɔɔn ńjÿó mmó gie *lepʉ̌ tɔ’ wɔ́, ḿbiŋ ńké tè pfɛ́ɛ mmó nzse wɔ́.

¹⁵Piɛ gíŋe ńjú’ ngyè nyìŋ nà mbɔ́ɔntè yépʉ́a, é gɔɔn né yé ngie: Ammó lɔɔn ńgwɔ́ tà Ssé kẅile *lɔ̌’, tè gíŋe ńzse nzse mǒ.

¹⁶Á ké ńjú’ pɔ́ pú’u, tà é gwɔ́ ngʉ̀a ntá. Mé lêen ńké ńgwóon ńdɔgɔ yɛ̌ mmó ḿbiŋ ne tÿǒ lepwó.

¹⁷Piɛ cʉ́’ ńkwaŋ á cʉa yé. Á ne ńzɛ́te ngie: Ammó gie n du ssé légyá, aa pá’ɔɔn ńdɔgɔ ńgɔɔn ngie kɔ́? Á gwaa gwɔ́, mbà pʉ̀a pie Kornɛy ně ńtúmo wɔ́b, gwǎ ńzɛ́te ngie: Ndá Símo ee nzɔ̌? Tà ńgwɔ́ fʉ’ó ńcʉ́’ ńgwɔ́ pɔ́ ncwò ndá,

¹⁸ńtóŋ ńzɛ́te ngie: Símo gẅie mé gíŋe ńtóŋo yé le Piɛ tsẅé jʉ’ɔɔn.

¹⁹Á gwaa gwɔ́ Piɛ ké nyé ńkwaŋte pɔ́ nò gie à fóo légyá. A Zẅìge Ssé shwóŋó yé ngie: Pʉ̀a métá ée jʉ’ɔɔn ne fa’a gú.

²⁰Lu ssé, ésẅɛ́’, pia pɔ̌ gʉa. Tè zoŋ á nue mèŋ n zɔ tumó wɔ́b.

²¹Piɛ sẅɛ́’ ńkẅɛ́te pʉ̀a ŋwɛ́, ńgɔɔn né pɔ́b ngie: Pi ne fa’a nyìŋ! Àa wɔ̀ɔn. Pi tóo mélà’a kɔ́?

²²Epʉ̀a ŋwɛ́ gɔɔn lé yé ngie: Kornɛy zɔ tumó weg, ńgwɔ́ tsɔ̌ tándà ncù pà *Roma, ésá’a pʉ̀a nkÿo. Àa nyìŋ, ńgÿó mmó gie Ssé kwoŋ, ḿbɔ́g Ssé. Pà Yuda metsèm kíme yé pɔ́ mbòŋ. Tà’ *cÿɔ́’ Ssé ka tǒ ńgɔɔn mbwo yé ngie: Túmo mé gʉa tóŋo Piɛ, à tóo ndá gù, ɔ̀ zẅí’te nò gie à ge shwóŋó gú.

²³Piɛ lêen ńké ńgÿo pɔ́ kúu ndá, pâ pɔ̌ lá’. Njÿó gÿo ńdʉ́a, Piɛ pâ pʉ̀a pá métá cʉ́me mánzsè. Etsɔ́ ntá’ pʉ̀a tsetsɛ̀ɛ mefɛ́ mefɛ́ pe Jope gʉa ńtsege wɔ́b.

²⁴Yɛ̌ lyɛ̌’ tɔ́g, pɔ́ gwaa kúu Sezare, mbà Kornɛy ně ḿbú ńcú’te ngẅɛ̀ ndá yé tà mbɔɔ meshǔ ntʉ́m pé ńdɔgɔ ńzẅí’te Piɛ.

²⁵Piɛ tó tà ńgwɔ́ ńkúu ndá, Kornɛy tó ńzá’a yé, ńnuŋe mekwò yé, ńgÿo mekù’ mé.

²⁶Tá Piɛ pʉ’ʉ yé, ńgɔɔn ngie: Lu ssé, mèŋ n gee yɔ́ɔn pɔ́ nyìŋ mesoŋ pá’ gù.

²⁷Pɔ́ yé gwaa zyɛ́’ kúu ndá, ńgiŋe shwóŋe. Piɛ gyá, mbà pʉ̀a pǔ ńcú’te ndá tà ńgyɔ́ɔn gyɔ́ɔn.

²⁸Á gɔɔn né pɔ́b ngie: Pi ne ńzsé gí ngie *lepʉ̌ pà Yuda tɔ’ɔ nyìŋ wɔb légwɔ́ shǔ nyìŋ lá’a ndyɛ̀’ɛ. Tà ḿbʉ́ mbɔɔ yé lékúu ndá yé. Tá’, e Ssé ka nyɛɛ wɔ̀ɔn tsɔ́ mmó. À ka nyɛɛ wɔ̀ɔn ngie mèŋ n te gẅiin lékʉ́e tsɔ̌ nyìŋ ngie à gẅiin *lɔ̌’ tà á ne ńzɛ́te ngie mèŋ n dÿɔ́’te yé wɔ́.

²⁹Áa mmó gie á gÿǒ, mèŋ n deen ńdu ssé té zoŋ, pá’ pi tǔm ńtóŋo wɔ̀ɔn. Afʉ̀’ɔɔn lá, pi gÿo mèŋ n zsé mmó gie pi toŋó wɔ̀ɔn jʉ’ɔɔn ńtí yɛ̌.

³⁰Kornɛy tsɔ́’ɔ mbwo Piɛ ngie: Ée fʉ̀’ɔɔn ńgwɔ́ lyɛ̌’ tá, pá’ á laa ná nèm tá mbÿɛ̀ njÿó pá’ fʉ̀’ɔɔn lɔɔn, mèŋ n gwɔ́ ndá mèŋ ne sẅíŋte Ssé, ńgwaa gyá atsɔ̌ nyíŋ vege vege ńkẅɛ ńtyé mvfò mèŋ, ḿma’ menzsǒ é ne ńŋwʉŋe ŋwʉŋe,

³¹ńgɔɔn né mèŋ ngie: Kornɛy, e Ssé ju’ú sẅíŋte jú. À kaa lege shúm sie ɔ̀ náa mbwo mepóŋ ńdɔgɔ ńkẅéte wɔ́b la wɔ́.

³²Túm pʉ̀a, pɔ́ gʉa Jope, ńgÿo Símo gẅie mé gíŋe ńtóŋo yé lê Piɛ tó. À tsẅe ndá Símo gẅie yé fà’ aa lényɛte megùb menɔ̀ɔn, ndá ŋwɛ́ gwɔ́ ngʉ̀ŋe ntse té pàa.

³³À ka gɔ̌ɔn pú’u, n gwóon ńtúm pʉ̀a fǎ’ gù. Ɔ̀ gÿǒ mboŋó pá’ ɔ̀ tǒ lɛ. Áa fʉ̀’ɔɔn pá’ɔɔn, pege metsèm tyé mvfò Ssé. Peg tyě pá’ɔɔn, mbà peg taŋté mbùm yeg lé jú’u nò gie Cʉ̀apʉ̀a cʉmé mbwo gù ngie ɔ̀ shwóŋó wég.

³⁴Piɛ lêen ńké ńgɔɔn ngie: Mèŋ n gee fʉ̀’ɔɔn pá’ɔɔn, mbà mèŋ n děen ńké ńgyá, kwà’ nénʉ́, ngie e Ssé tè tyɛ’te pʉ̀a mesoŋ wɔ́.

³⁵Nyìŋ lɔɔn ńgÿo mekù’ Ssé, ńgíŋ ńgÿo mmó gie e Ssé ne ńkwoŋo, ńgwɔ́ pɔ́ nyìŋ yɛ̌ lá’ gwɔ́, mbà nò yé ge poŋ Ssé poŋ.

³⁶E Ssé ka túmo shwóŋè yé mbwo púɔ Israel. E gwɔ́ nkʉ̀ mbòŋo, ńgɔɔn nò na mbʉ́lè gie mé cʉa ná Yěsô Kristo gẅie aa Cʉ̀apʉ̀a pʉ̀a metsèm, ńgẅiin.

³⁷Wɔɔn nkʉ̀ ŋwɛ́ ka pɔ́ɔnte nò gie Jâŋ la gwɔ́ nu’ pʉ̀a ntse, ńne ńgɔɔn. Pi ne ńzsé ngie yɔɔn nò ka zye Galilea, ḿbiŋ ńgʉa ḿbú sa jʉ’ tsɛ̀ɛ Jẅidea ntsèm.

³⁸Pi giŋé ne ńzsé ngie e Ssé la ná metʉ̀ Zẅìge Ndʉalʉ̌a ne Yěsô mûɔ Nǎzarɛd ńdɔgɔ pú’u, ńzɔ́’ɔ yé, ḿbiŋ ne ńtÿɔ́’te yé. Á gʉa jʉ’ ntsèm, ńne ńgÿo menò mbòŋo, ńne ńkẅé pʉ̀a metsèm pie pɔ́ laa megàŋa tsǎŋ nà mbwó Sátà.

³⁹Peg pɔɔn tyě pá’ɔɔn, mbà peg ka lɔg nÿɔ́g még, ḿbú ńgyá kɔ̀ɔkɔ́ɔ gie à ka gÿo tsɛ̀ɛ lá’a pà Yuda mbàa Yerósalem. Mé ka gwɔ zẅé yé, ńkime yé nà tÿǒ nkǐ.

⁴⁰Tá’, á kaa nà mbɔ́ɔntè lyɛ̌’ tá, e Ssé zíme yé nà legwé, ńgÿo á kẅɛ ńnyɛ mbùm ye.

⁴¹À ka tè nyɛɛ mbwo lá’a ntsèm wɔ́, à ka nyɛ pɔ́ mbwo peg pàjÿó ńgyá pie Ssé la vɔg ńtsɔ́’. À ka zimé nà legwé pú’u, pega pɔ́ jÿó shúm ḿbiŋ ńnú.

⁴²À ka piŋ ńtúmo wég ngie peg gʉa ńtsẅi nkù mbòŋo mbwo lá’, ńgÿo pɔ́ zsé ngie yé Yěsô ŋwɛ́ aa nyìŋ gẅie Ssé ka tsɔ̌’ ngie à zá’ ntsaŋ pʉ̀a metʉ̀ pâ mepfó ssé.

⁴³Yé zɔ zɔɔn ńgwɔ́ nyìŋ gẅie pà *ntsẅì nkʉ̀ Ssé metsèm lɔ́ɔn ńda’te, pá’ pɔ́ la ne ńgɔɔn ngie: Awɔ̌wɔ́ɔ gẅie à zǎb ntʉ́m wé ná yé wɔ́, e Ssé ge lege menò tepòŋ ngàŋ é náa mbwó yé, é tí yé.

⁴⁴Piɛ nyé ńgɔɔn nò gɔɔn, a Zẅìge Ndʉalʉ̌a sẅɛ́’, ńkúu nà ngwòŋ pʉ̀a metsèm pie pɔ́ ne ńzẅí’te nò gie à ne ńgɔɔn.

⁴⁵Pʉ̀a Kristo pie pɔ́ ně ńtó ńtsege Piɛ, é laa pà Yuda. Pɔ́ gyá yɔɔn nò, á pú ńkʉ’ʉ wɔ́b tɛ’, pá’ e Ssé nǎ Zẅìge Ndʉalʉ̌a mbwo pʉ̀a pie é té pà Yuda wɔ́ pɔ́ pá’ à la náa mbwó pɔ́b yɔ́b!

⁴⁶Pɔ́ zɔɔn ńgíŋe ne ńjú’u pɔ́ ne ńdɔgɔ shwóŋè lá’a ndyɛ̀’ɛ ńnáa mekù’ mbwo Ssé. Piɛ gyá pú’u, ńcʉ́’ ńgɔɔn pɔ́ ngie:

⁴⁷Afʉ̀’ɔɔn gie pɔ́ ně ńdá’ ńkẅé Zẅìge Ndʉalʉ̌a pá’ peg la, à lɔɔn ńgwɔ́ nyìŋ gíŋe ńtɔ́’ɔ lénu’u wɔ́b ntse lá?

⁴⁸Ńgɔɔn pú’u, ńtsẅi ngie mé nu’u wɔ́b ntse ná lezíŋ Yěsô Kristo. Pɔ́ métsèm gÿo ńzɛ́te yé ngie pɔ́ laa pɔ̌ gíŋe ńná’a ńnéŋe tsɔ́ mbɔ́ melyɛ̌’.