Read Ngiemboon Megàŋ ntúm 11 Bible Online

Megàŋ ntúm 11 - Ngiemboon bible

Megàŋ ntúm 11

¹Megàŋ ntúm Yěsô, pâ mefɛ́ mefɛ́ pie ée Jẅidea lêen ńjú’ mé ne ńgɔɔn ngie: Pʉ̀a pie é té pà Yuda wɔ́ kéen ńzẅíŋ yɔ́b nò Ssé.

²Piɛ gÿo ńgwɔ́ tà ḿbiŋe Yerósalem, pʉ̀a Kristo pie ée pà Yuda zye léŋaga yé ńgɔɔn ngie:

³Ɔ̀ ka kúu ndá pʉ̀a pie mé la té wɔ́b pú’ tà pia pɔ̌ fó ńjÿó mbɔɔ shúm léjÿó[7].

⁴Piɛ lêen ńké ḿbíte kɔ̀ɔkɔ́ɔ wɔ́ gie á ka cʉa, éshwóŋó wɔ́b tà fó nzyète, ńgɔɔn né pɔ́b ngie:

⁵Mèŋ n kaa tÿǒsoŋo Jope, ńne sẅíŋte Ssé, e Ssé nyɛ́’ nÿɔ́g mɔ́ɔn, mèŋ n gyá nkʉ̀’ʉ nò, n gyá tsɔ́ mmó yá, á gwɔ́ pá’ máamáa pwó nzsǒ gie mé kú’te nà mezẅé lekùa la, á fó tÿǒ lepwó ésẅɛ́’ ńtó ńcʉ́ŋe mvfò mèŋ.

⁶Mèŋ n nyɛte ńdíe mmó gie aa tsoló, ńgyá menɔ̀ɔn pie ée ndùmo ssé tsetsá’ ńgẅiin mekwò lekùa gwɔ́ tsoló, ńgyá menɔ̀ɔn mbà’ gwɔ́ tsoló, ńgyá mbɔɔ pie pɔ́ shwoŋo lepfòm sɔ́b pɔ́ ssé, mbɔɔ meshʉ́ŋ.

⁷N deen ńjú’ tsɔ̌ ngyè nyìŋ gɔɔn né mèŋ ngie: Piɛ, lu ssé, ńzẅé, ḿpfɛ́!

⁸Mèŋ n tsɔ́’ ngie: Ngǎŋ me Cʉ̀apʉ̀a! Ammó gie *lepʉ̌ tɔ’, kà pɔ́ ye nzse wɔ́, a laa ncwò wɔ̀ɔn zyɛ́’ɛ

⁹N gíŋe ńjú’ ngyè ŋwɛ́ nà mbɔ́ɔntè yépʉ́a, é gɔɔn ngie: Ammó lɔɔn ńgwɔ́ tà Ssé kẅile *lɔ̌’ mǒ tè gíŋe ńzse nzse mǒ,

¹⁰ńgÿo pɔ́ pú’u, tà é gwɔ́ ngʉ̀a ntá. Eshúm ŋwɛ́ pú ńkwɔ́’ ńgee tÿǒ lepwó.

¹¹Á gwóon ńgwɔ́ pɔ́ fʉ̀’ó, pʉ̀a métá tóo ndá jʉ’ gie peg kaa wó. Mbà mé fǒ Sezare ńtúmo wɔ́b né mèŋ.

¹²A Zẅìge Ssé gɔɔn né mèŋ ngie: Lu ssé pia pɔ́ gʉa, tè zoŋ. Epʉ̀a ntɔgɔ́ pɔɔn pie n dɔgɔ wɔ́b ńtóo jʉ’ɔɔn lɔɔn, la gʉa ńtsege wɔ̀ɔn Sezare. Pega pɔ́ púte ńkúu ndá Kornɛy.

¹³Kornɛy lêen ńké ḿbíte shwóŋó wég ngie: Yé ně ḿvege ńgyá *cÿɔ́’ Ssé tyé mvfò yé, à tsɛ̀ɛ ndá yé, ńtsẅi né yé ngie, túm pʉ̀a pɔ́ gʉa Jope, ńtsẅi, tsɔ̌ nyìŋ gẅie aa wó, mé tóŋo yé lê Símo, ńgíŋe ńtóŋo yé lè Piɛ à tó.

¹⁴À ge tó shwóŋó gú menò mie e Ssé ge cʉa mǒ gÿo pia ngẅɛ̀ ndá jù tsẅɛ́.

¹⁵Mèŋ n tó, ńdeen ńké ńzye légɔɔn nò mbwo wɔ́ba pʉ̀a pie mèŋ n gwǎ tó, pɔ́ gwɔ́ ndá, ńnyé ńgɔɔn nò mbwo pɔ́b gɔɔn, a Zẅìge Ndʉalʉ̌a sẅɛ́’ ńkúu ná pɔ́b ndʉŋ ndʉŋ pá’ á la kúu ná pege, á nzyetě la.

¹⁶N deen ńké ńkímte shwóŋè Cʉ̀apʉ̀a pá’ à la gɔɔn ngie: Jâŋ la nu’ pʉ̀a ntse, tá ńgʉa ná pi, mbà Ssé ge gÿo ńnéŋe gẅi mbwo Zẅìge Ndʉalʉ̌a.

¹⁷E Ssé lɔgɔ pú’u, ńnáa yɔ́b mmó gie pege la záb ntʉ́m ná Cʉ̀apʉ̀a Yěsô Kristo, á náa mbwo pege la. Mèŋ, n kaa yɔ́ɔn wɔ̌, tà ńgwɔ́ gie ńgwɔ́ n tɔ’ Ssé légÿo mmó?

¹⁸Epʉ̀a Kristo jú’ menò mɔɔn, ḿbʉ́le ńnéŋe, ḿbiŋ ne ńnáa ndǎg mbwo Ssé ńgɔɔn ngie: À yɔɔn gie e Ssé ka ná shÿó mbɔɔ mbwo pʉ̀a pie é té pà Yuda wɔ́, á lékúbe mà, á gÿó pɔ́ gẅiin le gwɔ́ tèmì.

¹⁹À gwaa gwɔ́, mbà mé la gwɔ́ tà ńzẅé Etien pá’a, ńzye létsɔ́’ɔ kwò pʉ̀a Kristo té pòŋ. Pɔ́ fó Yerósalem ńkẅɛ sa jʉ’. Petsɔ́ pʉ̀a lɔg ye Fenisia. Petsɔ́ lɔg ye Shʉ̀pele. Petsɔ́ lɔg ye Antiokia, ńkúu nzɔ̌ nzɔ̌ wɔ́, éshwóŋó nò Ssé pɔ́ ndà’ mbwo pà Yuda.

²⁰Tá’, etsɔ́ ntá’ pʉ̀a Kristo tsetsɛ̀ɛ pɔ́b pie é laa pʉ̀a Sirɛne, mbɔɔ pe Shʉ̀pele, gʉa tà ńkúu Antiokia yɔ́b, éshwóŋó nò Nkʉ̀ Mbòŋo Cʉ̀apʉ̀a Yěsô mbɔɔ mbwo pʉ̀a pie é té pà Yuda wɔ́.

²¹Cʉ̀apʉ̀a ne ńtóonte wɔ́b tóonte, epʉ̀a tà ńgyɔ́ɔn ne ńzába ntʉ́m ná Cʉ̀apʉ̀a Yěsô, ńne sele ńcʉ́’ʉ pʉ̀a pé.

²²Yɔɔn nò gwe letuŋó pʉ̀a cú’tè Kristo gie áa Yerósalem. Pɔ́ tsɔ́’ɔ Panebâse, ńtúmo yé Antiokia.

²³Á gʉa tà ńkúu wó, ńgyá yé pá’ Ssé ne ńdíe pʉ̀a pie pɔ́ zǎb ntʉ́m ná yé pú’u, ànò poŋo yé tɛ’. Á kẅiŋte wɔ́b métsèm, ngie pɔ́ ké ńzsé pɔ́ ndà’ Cʉ̀apʉ̀a, ḿbiŋ ńcʉŋe pɔ́ ná yé.

²⁴Panebâse ŋwɛ́ zɔɔn ńgwɔ́ nyìŋ ńgẅiin tsẅé mbòŋo. Mbà Zẅìge Ndʉalʉ̌a léen ńjÿó yé. Á piŋ ńzáb ntʉ́m wé ná Cʉ̀apʉ̀a tɛ’. Pʉ̀a tà ńgyɔ́ɔn fó mbɔɔ ná ye ntí, ńcʉ́’ pʉ̀a Cʉ̀apʉ̀a.

²⁵Panebâse piŋ ńgʉa Tarso, léfa’a Sɔ̂l,

²⁶ńkúu wó, ńgyá yé, ńdɔgɔ yé ḿbiŋ lê Antiokia. Pɔ́ mépʉ́a pâ pʉ̀a Kristo pú ńnéŋe Antiokia ná tà’ ngù’u lá’. Pɔ́ ne ńzí’i pʉ̀a tà ńgyɔ́ɔn mmó. Mé la zye pɔ́ Antiokia ŋwɛ́ létóŋ *ngàŋa kwò Yěsô lê Pʉ̀a Kristo.

²⁷Á gwɔ́ fʉ̀’ó, epʉ̀a fó lyɛ̌’, éfóo Yerósalem ńtóo Antiokia, ńgwɔ́ pʉ̀a pie pɔ́ ńnéŋe ńtsẅii nkʉ̀ gẅie é fóo mbwo Ssé.

²⁸Atsɔ̌ tà’ nyìŋ gwɔ́ tsetsɛ̀ɛ pɔ́b, mé tóŋo yé lê Agabus. A Zẅìge Ssé tsẅi, á tʉ́ njÿó ńgɔɔn ngie: Atsɔ̌ máamáa gwáŋa ge gwe ndùmo tsetsá’ ntsèm[8], ńgɔɔn pú’u, wɛ̌ gwáŋa gÿo ńkwa’ ńgwe fʉ̀’ gie Kɔlɔde laa Kása pà Roma.

²⁹Agabus gɔɔn pá’ɔɔn, epʉ̀a Kristo záb ngie awɔ̌wɔ́ɔ náa yé mmó gie à ku’u mǒ, mé túm, ńdɔg ńkẅéte mefɛ́ mefɛ́ pie pɔ́ tsẅé tsɛ̀ɛ pàga ngwòŋ Jẅidea.

³⁰Awɔ̌wɔ́ɔ mwoonte pɔ̀ɔn yé. Mé cú’tè, ńnáa mbwo Panebâse pɔ́ Sɔ̂l. Pɔ́ lɔg ńgʉa lénáa mbwo pàkẅé mvfò tsɛ̀ɛ cú’tè pʉ̀a Kristo.