Read Ngiemboon Megàŋ ntúm 12 Bible Online

Megàŋ ntúm 12 - Ngiemboon bible

Megàŋ ntúm 12

¹Á gwɔ́ fʉ̀’ó, fùɔ *Herôd zye létsɔ́’ɔ kwò tsɔ́ ngàŋa cú’tè pʉ̀a Kristo té pòŋ,

²ńtúm mé gʉa ńdɔg nně ncù ńzẅé Jâg gẅie aa fɛ́ Jâŋ.

³Á gyá, mbà à gÿǒ pú’u, á poŋ pà Yuda. Á lêen ńké ńgíŋ ńgÿo mé gwoon Piɛ yé, ńgwaa gwoon yé pú’u, á gwɔ́ fʉ̀’ gie mé jÿó línɔ́ɔn *mbelég té mvòŋ.

⁴*Herôd tsẅi mé gwoon Piɛ pú’u, ńdɔgɔ yé ńgʉa ńjÿɔ́’ɔ ndá tsǎŋ. Á táŋte pàlÿɔ́’ ncù lekùa lekùa ngʉ̀a lekùa ńtÿɔ́gte ngie pɔ́ ne ḿbyɛ́bɛ yé, ńne ńzẅí’te pá’ línɔ́ɔn *Páskà ge cʉa, à tÿɔ́gɔ yé mvfò lá’, mé ŋaga yé.

⁵Mé jÿɔ́’ɔ Piɛ ndá tsǎŋ pú’u, acú’tè pʉ̀a Kristo ne ńtsyɛ’te Ssé nà twó yé té kʉ́a.

⁶Njÿó, ge lʉ́a, fùɔ *Herôd gÿo mé tÿɔ́gɔ Piɛ mvfò lá’, mé ŋaga yé. Piɛ gwɔ́ lêtsẅɛ́’, ńnuŋe tsetsɛ̀ɛ pàlÿɔ́’ ncù mémbʉ́a, ńne ńdyé. Mbà mé lɔ̌g mentsɛ̂n mémbʉ́a ńcʉŋe yé. Pàpyɛ́b jʉ’ gwɔ́ ncwò ndá, lépyɛ́bɛ yé.

⁷Atsɔ̌ *Cÿɔ́’ Cʉ̀apʉ̀a vege vege ńkẅɛɛ jʉ’ gie Piɛ aa wó, ejʉ’ pú ńkyɛ́’ɛ tsɛ̀ɛ ndá. *Cÿɔ́’ Ssé pú’te gwǒŋo nnɛ́ Piɛ, ńzyeen yé, ńgɔɔn né yé ngie: Lu ssé lê tʉ̀! Mentsɛ̂n lêen ńké fó nà mbwó mé ńkyɛ́’te ḿbʉle ssé.

⁸*Cÿɔ́’ Ssé gíŋe ńgɔɔn né yé ngie: Tʉ́m nzsǒ jù, ńjÿɔ́g melɔ̌ɔn mú. Piɛ gÿo pú’u. *Cÿɔ́’ Ssé gíŋe ńgɔɔn né yé ngie: Ma’ nzsǒ fÿɔ́g jù, ńcʉ́me nzèm mèŋ.

⁹Piɛ fó ndà tsǎŋ ńkẅɛ, ńcʉ́me nzèm yé. À tè ne ńzsé ngie *cÿɔ́’ Ssé kwǎ’ ńtó ńkẅéte yé wɔ́, ńkwaŋ ngie Ssé nyɛ̌’ pɔ́ nÿɔ́g mé tá á gyá mɛ̌ menò.

¹⁰*Cÿɔ́’ Ssé lɔgɔ Piɛ ńtɔ́gɔ mvfò mvɔg mvfò nùɔ pàlÿɔ́’ ncù, ńgíŋe ḿbɔ́ɔnte ńtɔ́gɔ mvfò yetsɔ́ nùɔ, ńgʉa tà ńkúu ncwò ndá gẅie mé la lɔgɔ tʉ̌ ńnyɛte, mé fóo jʉ’ó ńkẅɛɛ ńkúu tÿǒsoŋ. Ncwò ndá tsɔ́’ɔ gílé yé, á mvfò pɔ́b, pɔ́ lêen ńkẅɛ, ńcʉ́me láŋ tà ńná’a ńzye ńgiŋ, *cÿɔ́’ Ssé gwóon ńnyé Piɛ, ńgʉa.

¹¹Legyè sé lêen ńké ńtó. Á gɔɔn ngie: Mèŋ n děen ńké ńcwoŋo ńgyá mboŋó fʉ̀’ɔɔn ngie áa nò, Cʉ̀apʉ̀a tumó cÿɔ́’ we, á tó ńkẅé wɔ̀ɔn mbwo fùɔ *Herôd. À giŋé ńkẅé wɔ̀ɔn nà nò tepòŋ ntsèm gie pà Yuda ka ne ńtsɔ́ɔn ngie á gÿo wɔ̀ɔn.

¹²Piɛ kwaŋte, ńgʉa ne ndá Malîɛ, má pà Jâŋ gẅie mé gíŋe ńtóŋo yé lê Malékuse. Á gwaa gwɔ́, mbà pʉ̀a Kristo cu’té tà ńgyɔ́ɔn ne sẅíŋte Ssé.

¹³Á kwá’te ncwò nká’, atsɔ̌ ngàŋa fà’ we mánzwě, mé tóŋo yé lê Rode, á tóo létsɔ́’,

¹⁴ńjú’ ngyè Piɛ, ńdiŋ. Á poŋo yé poŋ tà á lege létsɔ́’ ncwò nká’, ńkÿote ḿbiŋe ndá ńtsẅii mbwo petsɔ́ pʉ̀a, ngie: Piɛ wɛ̂ ncwò nká’!

¹⁵Pɔ́ gɔɔn né yé ngie: Ɔ̀ɔ pʉ̀a! Á gɔɔn ngie n gɔɔn shwóŋó nò. À wɛ̂ ncwò nká’. Pɔ́ gɔɔn ngie ndyɛ̀’, mbà à gwɔ́ pɔ́ *cÿɔ́’ Ssé gẅie aa ḿbyɛ́bɛ yé.

¹⁶Piɛ ké ńkwá’te ncwò nká’ kwá’te tà pɔ́ tsɔ́’, ńgyá á gwɔ́ yé, á pú ńkʉ’ʉ wɔ́b tɛ’.

¹⁷Piɛ myɛ’te pwó ńdɔg ńgɔɔn ngie pɔ́ láŋte. Pɔ́ láŋte, á zye lépíte shwóŋó wɔ́b pá’ Cʉ̀apʉ̀a ně ńgÿo tá á kẅɛɛ ndá tsǎŋ, ḿbiŋ ńgɔɔn né pɔ́b ngie: Pi gʉa ńtsẅii yɔɔn nò, á mbwo Jâg mbɔɔ mbwo petsɔ́ mefɛ́ mefɛ́, ńgɔɔn pú’u, ńkẅɛ, ńgʉa lê jʉ’e ndyɛ̀’ɛ.

¹⁸Njÿó gÿo ńdʉ́a, ejʉ’ pú ńnʉ’ʉ tsetsɛ̀ɛ pàlÿɔ́’ ncù. Pɔ́ té zsé mmó gie Piɛ ně ńcʉ́’ʉ yɛ̌ wɔ́.

¹⁹Fùɔ *Herôd tsẅi mé fa’a yé jʉ’ ntsèm, mé té yé gyá. Á zɛ́te menò mbwo pàlÿɔ́’ ncù pie pɔ́ ké ne ḿbyɛ́bɛ Piɛ, ńdeen ńké ńtsẅi ngie mé zẅéte wɔ́b. *Herôd gÿo pú’u, éfó tsɛ̀ɛ pàga ngwòŋ Jẅidea ńkẅɛ, ńgʉa ne Sezare, ńkúu wó, ńná’a ńzye ńnéŋe.

²⁰Fùɔ *Herôd ne ḿbú ńgyáŋa lóŋ nà pʉ̀a tÿǒsoŋ Tyr pɔ́ tÿǒsoŋ Sidoŋ pá’ɔɔn tɛ’. Pɔ́ cú’te ńgwɔ́ tà’ ncwò légʉa ńgyá yé. Á cʉa pú’u, pɔ́ kwɛ́ɛ pwó Mbelatus, á gwɔ́ nyìŋ gẅie yé zɔ pyɛ́bɛ ndá fùɔ, pá’ à ge gíŋ kěm wɔ́b ná, acÿɔ́g gie aa tsetsɛ̀ɛ pɔ́ba fùɔ mag, ńtsɔ́ɔn pú’u, á nue ammó léjÿó gie mé lɔ́ɔn ńjÿó tÿǒsoŋ Tyr pɔ́ tÿǒsoŋ Sidoŋ, á lɔ́ɔn fóo pɔ́ lá’ fùɔ *Herôd.

²¹Mé táŋa lyɛ̌’, afùɔ *Herôd ma’ nzsǒ lefùɔ ye, ńtó ńnéŋe nà lʉ̀ŋe lefùɔ yé, ńne ńgɔɔn nò mbwo pɔ́b,

²²alá’ ne ḿbú ńnáa gugẅî, ńgɔɔn ngie: Nyìŋ mesoŋ zɔ těen ńgɔɔn nò pɛ́’ɛ̀ wɔ́, e gwɔ́ pɔ́ tsɔ̌ ssé.

²³Atsɔ̌ cÿɔ́’ Cʉ̀apʉ̀a gwóon ńtyé pɔ́ fʉ̀’ó, ḿma’a guɔ ná fùɔ *Herôd, mélà’mie à kǎŋ mekù’ mie é gwɔ́ pɔ́ me Ssé, ńdɔg ńgÿo mé. Mengingi lú’te yé á kwé.

²⁴Á ke ńgʉa nà shwóŋè Ssé, á ne ńkẅi’i saa jʉ’ ńgee pɔ́ nê mvfò.

²⁵Panebâse pɔ́ Sɔ̂l gwɔ́ tà ḿmaga yɔ́b fà’ gie mé ně ńtúmo wɔ́b mǒ Yerósalem, ńgwɔ́ piŋe Antiokia ńdɔgɔ Jâŋ gẅie mé tóŋo yé lê Malékuse ńgʉa.