Read Ngiemboon Megàŋ ntúm 13 Bible Online

Megàŋ ntúm 13 - Ngiemboon bible

Megàŋ ntúm 13

¹Á laa tsɛ̀ɛ cú’tè pʉ̀a Kristo gie á laa tÿǒsoŋo Antiokia, epʉ̀a pie pɔ́ ńnéŋe ńtsẅi nkʉ̀ gẅie é fóo mbwo Ssé gwɔ́ wó, ńgÿo pàzí’i pʉ̀a nò Ssé. Wɔɔn laa Panebâse, ńgÿó Simeon gẅie mé tóŋo yé lê «ssé nyìŋ», ńgÿo Lusius, á mûɔ Sirɛne, ńgÿo Manaen gẅie pɔ́ *Herôd gẅie à laa ngúmnɔ́ɔn la pú ńgú’, ḿbiŋ ńgÿo Sɔ̂l.

²Pɔ́ gÿo ne *ńkwoŋo kwoŋ ńnéŋe nzyè, ésẅíŋte Ssé. A Zẅìge Ndʉalʉ̌a gɔɔn né pɔ́b ngie: Pi faga Panebâse pɔ́ Sɔ̂l, ńnyé wɔ́b, pɔ́ fa’a fà’ gie mèŋ n ka tsɔ́’ɔ wɔ́b ńtí yɛ̌.

³Pɔ́ jú’ pá’ɔɔn, ńnéŋe nzyè, ésẅíŋte Ssé tà ńtsẅé jʉ’, ńdeen ńké ńzáb mbwó twó pɔ́b, ńnyé wɔ́b pɔ́ gʉa.

⁴A Zẅìge Ndʉalʉ̌a túmo Panebâse pɔ́ Sɔ̂l pú’u, pɔ́ gʉa lê Selesi. Efó wó ńkúu kanú’ légʉa lê Shʉ̀pele, é gwɔ́ ngwòŋ gẅie ntse la kéle ńnéŋe sòŋ.

⁵Pɔ́ gʉa tà ńkúu wó, ńkẅɛɛ tsɛ̀ɛ kanú’ á tÿǒsoŋo Salamine, ńne shwóŋó nò Ssé tsɛ̀ɛ *mendá cú’tè pà Yuda. Pâ Jâŋ Malékuse gwɔ́, á ne ńkẅéte wɔ́b.

⁶Pâ pɔ̌ gÿo fó wó ńzyɛ́’ tà ńkúu tÿǒsoŋo Pafos, ńkúu wó ḿbumte tsɔ̌ nyìŋ pà Yuda, mé tóŋo yé lê Mbar Yěsô. Á gwɔ́ ngàŋ lekàŋ, ńzɔ́gɔ shwóŋó pʉ̀a ngie yé aa *ntsẅì nkʉ̀ Ssé.

⁷Á gwɔ́ nyìŋ ná pʉ̀a pie ée lejʉ́ŋ ngúmnɔ́ɔn Serguis Pɔlos. Ngúmnɔ́ɔn ŋwɛ́ gwɔ́ nyìŋ ńgẅiin legyè tɛ’. Á tsẅi mé gʉa ńtóŋo Panebâse pɔ́ Sɔ̂l ńná né yé, mélà’mie à la ne ńtsɔ́ɔn lé jú’u nò Ssé.

⁸Tá à ngàŋ lekàŋ wa, gẅie lezíŋ sé lɔgɔ ńgwɔ́ Elimas ná shwóŋè Gelekia la, ne ḿbʉa Panebâse pɔ́ Sɔ̂l, ńne fa’a létáte tà ngúmnɔ́ɔn le záb ntʉ́m wé ná Yěsô wɔ́.

⁹A Zẅìge Ndʉalʉ̌a jÿó Sɔ̂l, gẅie mé gíŋe ńtóŋo yé le Pɔl la. Á lêen ńké ńdíe Elimas,

¹⁰ńgɔɔn né yé ngie: Mûɔ Sáta, ɔ́ɔ ngàŋa cÿɔ̌ nò. Ɔ̀ zsě pɔ́ léfʉte pʉ̀a. Ɔ̀ɔ ngàŋ mbù nò mbòŋo ntsèm, kɔ̀ɔkɔ́ɔ gie Ssé gÿo á tyé ndʉŋ ndʉŋ wɔ́, ɔ̀ lěen ńké ńtɔ́ɔn, ńŋwɔ́’te. Tà ɔ̀ te nyé wɛ nzẅìŋ pɛ́’ɛ̀ wɔ́?

¹¹Ké ńjú’ fʉ̀’ɔɔn, Cʉ̀apʉ̀a Ssé zabá pwó yé ná gù. Ɔ̀ ge fʉ̀ tà à ná’a ńnéŋe, ɔ́ le gíŋe lejÿɔ́g nèm ńgyá wɔ́, ńdeen ńgɔɔn pú’u, nÿɔ́g Elimas síŋ. Á cʉ́’ ńgwɔ́ pɔ́ tsɛ̀ɛ nzěm, ńzye lésele ńkéle jʉ’ó, éfa’a nyìŋ gẅie à ge kíbe pwó yé.

¹²Angúmnɔ́ɔn gyá mmó gie á cʉ̌a, ńzáb ntʉ́m wé ná Yěsô. Á gwaa gwɔ́, mbà nò Cʉ̀apʉ̀a gie mé shwoŋó yé, á kuté yé tɛ’.

¹³Pɔl pâ pʉ̀a pie pâ pɔ́ laa nùɔ, kúu kanú’ á tÿǒsoŋo Pafos, ńgʉa lê tÿǒsoŋ Pɛrge gie áa tsɛ̀ɛ ngwòŋ Panfilia. Jâŋ Malékuse gʉa tà ńkúu wó, ńnyé wɔ́b ḿbiŋ nê Yerósalem.

¹⁴Pɔl pɔ́ Panebâse cʉ́’ nzèm éfó tÿǒsoŋ Pɛrge, ńgʉa lê tÿǒsoŋo Antiokia gie áa ngʉ̀ŋe Pisidia. Alyɛ’ɛ́ nzse pà Yuda gÿo ńku’, pɔ́ gʉa *ndá cú’tè, ésẅɛ́’ ńnéŋe ssé.

¹⁵Mé tóŋo shwóŋè Ssé tsɛ̀ɛ ŋwà’ne *lepʉ̌ mbɔɔ tsɛ̀ɛ meŋwà’ne pà *ntsẅì nkʉ̀ Ssé, ńtóŋ tà ńtsẅé jʉ’, melÿo tsɛ̀ɛ yɛ̌ *ndá cú’tè túm mé gʉa ńzɛ́te wɔ́b ngie: Mefɛ́, pi lɔɔn ńgẅiin shwóŋè lélɔg ńkẅiŋte pʉ̀a, pi ná.

¹⁶Pɔl lu ssé, ńka’a pwó yé, ńgɔɔn ngie: Pà Israel, tà mbɔɔ pi pie pi pɔ́g Ssé yeg pà Israel, pi jú’.

¹⁷E Ssé yeg pà Israel la tsɔ́’ pàmangʉa njʉ’ pég, ńgÿo alá’ yɔɔn shʉ́a ngẅɛ̀ yé, áfʉ̀’ gie pɔ́ lɔ́ɔn ńtsẅé túm, á tsɛ̀ɛ ngwòŋ Egipto. E Ssé gÿo ńdɔg pɔ́ tʉ̀ tá fó wó ńkẅile wɔ́b,

¹⁸ńjÿɔ́gɔ wɔ́b nkwòŋo tsẅɛ jÿɔ́g, á mmó ngù’u lá’ móm lekùa,

¹⁹ńgÿo ḿbyág melá’ pʉ̀a Kanaan sɔɔn mbʉ́a, ńgabte tsetsá’a yɔ́b á mbwo pʉ̀a pég.

²⁰Á gwɔ́ fʉ̀’ó, é lɔgɔ ńgwɔ́ mmó ngù’ lá’ nkÿo lekùa lê móm ntʉ̀a pá’ à la tsɔ́’ɔ wɔ́b. E Ssé pɔ́ɔnte ńná pàtág nzèm á mbwo pɔ́b. Tà ndá’ ńgʉa ńzsote nà fʉ̀’e *ntsẅì nkʉ̀ Ssé Samîɛ[9].

²¹Pàmangʉa njʉ’ pég gÿo ńdúɔ fùɔ, e Ssé náa Saẅil, míŋ Kis né pɔ́b. Á fóo ná ngẅɛ̀ ndá Mběnjameŋ. Á sá’a lá’ ngù’u lá’ móm lekùa,

²²e Ssé gwá’a yé, ńtsɔ́’ɔ Ndavíd, ńdɔg ńgÿo fùɔ, ńgɔɔn nò ńtí Ndavíd ngie: «Mèŋ n gyá Ndavíd, míŋ Jesé á gwɔ́ lìi nyìŋ gẅie mèŋ n ne ńkwoŋo. À ge gÿo gÿo mmó ntsèm gie n kwǒŋ».

²³E Ssé piŋ ńgʉa nà ngẅɛ̀ ndá fùɔ Ndavíd, ńgÿo mé zyé nyìŋ gẅie à ge gÿo pà Israel tsẅɛ́ pá’ à la ka’, angàŋ gwɔ́ Yěsô.

²⁴Yěsô gÿo ńgwaa tó, mbà Jâŋ tǒ yé tà ne sá’a shwóŋó mbwó lá’a Israel ngie pɔ́ kúbe mà wɔ́b, ńgÿo mé nu’u wɔ́b ntse.

²⁵Jâŋ gÿo ńcʉ́’ʉ lémege fà’ yé, ńzɛ́te lá’ ngie: Pi ee pá’ɔɔn ne ńkwaŋa ngie mèŋ n gee wɔ̌? Mèŋ n ké tè *Nzà’nkÿo pù’ wɔ́! Pi ké ńjú’ mboŋó, àa nzèm mèŋ ńne ńtóo. N zɔɔn fó tè ku’u nyìŋ gẅie à lɔɔn ńgwɔ́ n kyɛ́’ nkÿo melɔ̌ɔn mé wɔ́.

²⁶Pɔl gíŋe ńgɔɔn ngie: Mefɛ́ mefɛ́, e Ssé gɔɔn yɔɔn nò pɔ́ mbwo pege metsèm. Á lélɔg ńgÿo pege tsẅɛ́. À túmo yɔɔn nò mbwo pi pie pi ee púɔ Ábalam, mbɔɔ mbwo pi pie pi pɔ́g Ssé.

²⁷Tá á ke ńgwɔ́ pá’ɔɔn, mbà pʉ̀a Yerósalem pâ pà sá’a lá’a yɔ́b kéen tè zsé nyìŋ gẅie Yěsô aa wɛ̌ wɔ́, pɔ́ kéen ńgíŋ tè jú’u mmó gie shwóŋè pà *ntsẅì nkʉ̀ Ssé gɔɔn wɔ́, tá ḿbiŋ ne ńtóŋo ngwòŋ melyɛ’ɛ́ nzse mɔ́b ntsèm. Á ka cʉa pú’u, pɔ́ sẅiŋe Yěsô pá’ mé ge zẅé. Pɔ́ ka lɔg pú’u, ńgÿo ammó gie pà *ntsẅì nkʉ̀ Ssé la tʉ́ njÿó ńtsẅi á púmte,

²⁸ńzága mmó gie pɔ́ ge cʉa mǒ é gÿo mé zẅé yé, ńgʉa ńgyá *Pilato ngie à ke ńzẅé yé zẅé.

²⁹Pɔ́ kéen ńgwɔ́ tà ḿbú ńgÿo kɔ̀ɔkɔ́ɔ gie mé la ŋwe’e tsɛ̀ɛ ŋwà’ne Ssé ńtí yé Yěsô, pɔ́ gÿo mé fó nà tÿǒ nkǐ ésẅé’e yé, ńnéŋe tsɛ̀ɛ lesyè.

³⁰Tá Ssé zíme yé nà legwé.

³¹Á lɔg melyɛ̌’ tà ńgyɔ́ɔn, ńnyɛ mbùm ye á mbwo pʉ̀a pie pâ pɔ̌ la fóo Galilea ḿbúte ńgʉa Yerósalem. Pɛ̌ pʉ̀a ŋwɛ́ ee fʉ̀’ɔɔn ńgwɔ́ pé pàjÿò ńgyá á mvfò lá’.

³²Peg yég, peg tyě pá’ɔɔn, ńne ḿbÿé gẅi á yɛ̌ nò mbòŋo. Á gwɔ́ nò gie e Ssé la lá’ ńka’a mbwo pàmangʉa njʉ’ pà Israel.

³³À kéen ńgÿo yɛ̌ nò pumte twó pege pie pege ee gubé yɔ́b. À ka gÿó Yěsô zíme nà legwé pá’ mé la ŋwe’e tsɛ̀ɛ ŋwà’ne mezɔ́bɔ ntse, á nà mbɔ́ɔntè pàg pʉ́a ngie: Ɔ̀ɔ Míŋ wɔ̀ɔn tà fó lyɛ̌’ɔɔn, mèŋ n cʉ’ʉ́ tá gù.

³⁴Áa pú’u, tá Ssé ka gÿo Yěsô zíme nà legwé. À těen ńdá’a ńgíŋe ḿbiŋe tsɛ̀ɛ lesyè pá’ ńgwɔ́ á lʉ́ wɔ́. Á gwɔ́ nò gie à la zɔɔn ntʉ́ njÿó ńgɔɔn ngie: Mèŋ, n ge gÿo néŋ mbʉ́lè yɔ̀ɔn ná pi e gwɔ́ kwà’ yɛ̌ gie n da pÿé mbwo fùɔ Ndavíd.

³⁵Áa yɛ̌ tá mé la gíŋe ŋwe’e tsɛ̀ɛ tsɔ́ jʉ’e ŋwà’ne Ssé ngie: Ɔ̀ tè lá’ nyé nyìŋ gẅie ɔ̀ la tsɔ́’ɔ yé, à lʉ́ʉ tsɛ̀ɛ lesyè wɔ́

³⁶Á gʉa ná fùɔ Ndavíd, mbà à la pú ńgÿo mmó gie Ssé la gɔɔn ngie à gÿo nà yé fʉ̀’, ńgÿo ńkwé. Mé ńnéŋe pfó yé jʉ’ gie mé la ńnéŋe ye metá pé wó. Á lʉ́ʉ tsɛ̀ɛ lesyè.

³⁷Tá ńgʉa ná Yěsô, mbà à ka tè lʉ́ʉ tsɛ̀ɛ lesyè wɔ́. E Ssé kéen ńgÿo á zíme nà legwé.

³⁸Mefɛ́ mefɛ́, pi zsé ngie mé shwóŋó gẅi lyɛ̌’ɔɔn ngie e Ssé e lege menò tepòŋ pʉ̀a pá’ɔɔn ńzẅɛ́’ɛ Yěsô. Awɔ̌wɔ́ɔ gẅie à zǎb ntʉ́m wé ná Yěsô ŋwɛ́ wɔ́, e Ssé líe yé á gwɔ́ mvfò yé ńgwɔ́ ndʉŋ ndʉŋ. Yɔɔn piŋ ńgwɔ́ mmó gie *lepʉ̌ Mǒsê la tè ku’u légÿo wɔ́.

³⁹

⁴⁰Pú’u la, pi ké ńdaga twó gí, ḿbɔ́gɔ mmó gie pà *ntsẅì nkʉ̀ Ssé la ŋwe’e tsɛ̀ɛ ŋwà’ne Ssé légÿo gẅí. Pɔ́ la gɔɔn ngie:

⁴¹Pi pàgwága wɔ̀ɔn, pi líe tá ńgyá. Anò ge kʉ’ʉ gẅi tà pi syeente! Pi ge zɔɔn nyé gwɔ́ pɔ́ ndùmo ssé tsetsá’, mèŋ n gÿo tsɔ̌ máa nò, tà ńgwɔ́ gie mé gwɔ́ pé’e shwóŋó gẅi shwóŋ, mbà à lɔɔn ńgwɔ́ pi le zẅíŋ.

⁴²Pɔl pɔ́ Panepâse gÿo fó *ndá cú’tè ńkẅɛ. Mé sẅíŋte wɔ́b tɛ’ ngie pɔ́ lá’a lyɛ’ɛ́ nzse pà Yuda ye ngàb, ńgíŋe ńtó shwóŋó wɔ́b nò ńnáa ná yɛ̌ nò.

⁴³Mé kẅɛɛ *ndá cú’tè, ńgwaa fagte, lelÿò pà Yuda, pâ pʉ̀a pie é la zẅíŋe nò Ssé pà Yuda gʉa ńtsege wɔ́b. Pɔl pɔ́ Panebâse gíŋe ńkẅiŋte wɔ́b ngie pɔ́ kú’te menò mbòŋo mie e Ssé kà lɔg ńcÿó gem yɔ́b, ńkú’te kwà’ mboŋó.

⁴⁴Yetsɔ́ lyɛ’ɛ́ zse pà Yuda gÿo ńgwɔ́, pʉ̀a tÿǒsoŋ pú ńkwɔ́’ tɛ’, ńtóo lé jú’u shwóŋe Cʉ̀apʉ̀a Ssé.

⁴⁵Pà Yuda gyá nzẅìŋ lá’ gie á kwɔ̌’, ńkwɔ́’ɔ lóŋ, ńzye lésa shÿó nò gie Pɔl pɔ́ Panepâse gɔ̌ɔn, ńzye lézoonte wɔ́b.

⁴⁶Pɔl pɔ́ Panebâse lêen ńké shʉ̀ashʉ̀a ńgɔɔn né pɔ́b ngie: Peg kě ńzɔɔn ńgẅiin lévɔg shwóŋó nò Ssé pɔ́ mbwo pi pà Yuda. Pá’ pi kě ńdʉ’ lʉ’, ńnyɛ ngie pi kaa ku’ pá’ ńgwɔ́ pi gẅiin le gwɔ́ tèmì wɔ́ lá, peg ge sele nnɛ́ é gʉa fa’ pʉ̀a pie é té pà Yuda wɔ́,

⁴⁷mélà’mie Cʉ̀apʉ̀a ka zɔɔn ńtsẅii mbwo peg ngie: Mèŋ n dɔgɔ gú ńgÿo kyɛ̀’ gie á ge kyɛ’ɛ mengwòŋo mengwòŋ. Ɔ̀ gʉa tà ńkúu jʉ’ gie tsetsá’ zsote wó, ńgɔɔn mbwo lá’ ngie: E Ssé gÿǒ pi tsẅɛ́!

⁴⁸Pʉ̀a pie é té pà Yuda wɔ́ jú’u yɔɔn nò, ḿbú ńkág tɛ’, ńgu’te shwóŋè Cʉ̀apʉ̀a. Pʉ̀a pie ée tsetsɛ̀ɛ pɔ́b, mbà Ssé tsɔ’ɔ́ wɔ́b pá’ pâ pɔ̌ ge gẅiin le gwɔ́ tèmì, záb ntʉ́m wɔ́b ná Yěsô.

⁴⁹Ashwóŋè Cʉ̀apʉ̀a piŋ ne ḿbú saa yɛ̌ pàga ngwòŋ ntsèm.

⁵⁰Tá pà Yuda lêen ńké sẅite tsɔ́ pànzwě pie ée tÿǒsoŋo Antiokia ńcʉ́e. Mbà pɔ́ léen ńzáb ntʉ́m nà Ssé pà Yuda, ésẅite mbɔɔ tsɔ́ mekěm pie ée tÿǒsoŋ. Pâ pɔ̌ gyɔ́ɔn sóon ná Pɔl pɔ́ Panebâse, ńjwoŋo wɔ́b tà pɔ́ fóo lá’ pɔ́b ńké ńgʉa gʉa.

⁵¹Pɔl pɔ́ Panebâse gwaa fó lá’ ŋwɛ́ kẅɛ, ḿbú’u pfepfɔ́b nà mekwò mɔ́b lélɔg shwóŋó wɔ́b ngie á cʉ́’ʉ ńdíe pɔ́ wɔ́b, ńdeen ńké ńgʉa lê Ikonium.

⁵²Á ké ńgʉa nà *ngàŋa kwò Yěsô, pɔ́ cʉ́’ʉ tÿǒsoŋo Antiokia, a Zẅìge Ndʉalʉ̌a jÿó wɔ́b, pɔ́ ńnéŋe tsɛ̀ɛ lekág.