Read Ngiemboon Megàŋ ntúm 14 Bible Online

Megàŋ ntúm 14 - Ngiemboon bible

Megàŋ ntúm 14

¹Pɔl pɔ́ Panebâse metsèm kúu Ikonium, menò gíŋe ńcʉate pɔ́ ndʉŋ ndʉŋ pá’ é ka cʉate Antiokia. Pɔ́ gʉa *ndá cú’tè pà Yuda éshwóŋó nò Ssé. Tà lelÿò pà Yuda, tà mbɔɔ pʉ̀a pie é té pà Yuda wɔ́ zẅíŋe nò Yěsô.

²Tá’ petsɔ́ pà Yuda lʉ’ʉ lézẅíŋ, ḿbímte pʉ̀a pie é té pà Yuda wɔ́, pɔ́ zye lélíe mefɛ́ mefɛ́ tepòŋ.

³Tá ńgÿo pɔ́ lêkɔ́ wɔ́, Pɔl pɔ́ Panebâse zye ńnéŋe Ikonium, ńtÿɔ́g pɔ́ Cʉ̀apʉ̀a mvfò, ńne shʉ̀ashʉ̀a ńgɔɔn mbwo pʉ̀a ngie Cʉ̀apʉ̀a à kwoŋo wɔ́b. Cʉ̀apʉ̀a gíŋe ne ńcʉa ná menò mmɔɔn mmɔɔn mie à lɔgɔ wɔ́b ńgÿo, ńnyɛɛ ngie anò gie pɔ́ gɔɔn ná pá’ Yěsô ne ńcÿo gem pʉ̀a, áa nénʉ́.

⁴E pʉ̀a pie ée tÿǒsoŋ shʉ́a, ńgábte nzsè pʉ́a. Tà’ nùɔ cʉ́me nzèm pà Yuda. Yetsɔ́ nùɔ cʉ́me nzèm megàŋ ntúm.

⁵Pà Yuda, mbɔɔ pʉ̀a pie é té pà Yuda wɔ́, pâ mekěm lá’ pɔ́b, záb ngie pɔ́ ge lɔg tʉ̀ kúu mǒ. E tém megàŋ ntúm Yěsô lê metóon é zẅé,

⁶ńnyé ńkwaŋa kwaŋ, pɔ́ vɔg ńjú’, ńdeen ńké ńkÿo ńgʉa nê tsɛ̀ɛ pàga ngwòŋ Likaonie, ńkúu wó ńgʉa tÿǒsoŋ Listele pɔ́ ye Nderbe, tà mbɔɔ tsɛ̀ɛ metsɔ́ metÿǒsoŋ mie ée shÿó jʉ’ó,

⁷ńgíŋe ně ńtsẅii pɔ́ nkʉ̀ mbòŋo.

⁸Á laa tÿǒsoŋo Listele, tsɔ̌ ngàŋa kwʉ́’te gwɔ́ wó. Mbà mé la gwaa zyé yé á gwɔ́ pɔ́ nkÿǒon. Mbà à laa giŋe.

⁹Á gwɔ́ tsɔ́ lyɛ̌’, ńne ńzẅí’te shwóŋè gie Pɔl ne ńgɔɔn. Pɔl líe yé, ńgyá á ne ńzába ntʉ́m nà Ssé tà ńgwɔ́ gie à lɔɔn ńgwɔ́ Ssé gÿo á sẅéte.

¹⁰Pɔl lɔg ngyè tetʉ̀ ńgɔɔn né yé ngie: Lu ssé, ńdɔg mekwò mú ńtyé tyé. Angàŋa kwʉ́’te jú’, ńgú’u ssé lê gub, ńzye légiŋ.

¹¹Alá’ gyá mmó gie Pɔl gÿǒ, ńdɔgɔ shwóŋè lá’a yɔ́b, á shwóŋè Likaonie ńgɔɔn ngie: À yɔɔn gie messé selé ńcʉ́’ pá’ pʉ̀a mesoŋ, tà sẅɛ́’ ńgwɔ́ tsetsɛ̀ɛ pege lɔɔn!

¹²Ńgɔɔn ngie Panebâse aa ssé Zeus. Pɔl gwɔ́ ssé gie mé tóŋo lê Hermes, ńgɔɔn pú’u mélà’mie Pɔl zɔ la ne ńgɔɔn nò[10] fʉ̀’ ntsèm.

¹³Mé lɔ́ɔn ńtɔ́gɔ nà tsɔ̌ ndá ssé yɔb tá ńkúu tÿǒsoŋ, é gwɔ́ ye ssé Zeus. Nyìŋ gẅie à nuŋe pwɔ́’ ná yɛ̌ ndá ssé, gʉa ńgwoon mefòŋ, ńdɔgɔ fèléwa ńnyɛte ńkẅiŋe wɔ́b, ńdɔg ńtóo ndùmo gyɛ̌. Pâ lá’ cú’te, éfa’a légwa mefòŋ ŋwɛ́ ńdɔg ńnuŋe pwɔ́’ mvfò Pɔl pɔ́ Panebâse.

¹⁴Pɔ́ jú’u yɔɔn nò, éshʉate menzsǒ mɔ́b, ńnɔ́ɔnte ńkúu tsetsɛ̀ɛ lá’ ńga’te lê tʉ̀ ńgɔɔn ngie:

¹⁵Meshǔ pég, pi fa’a légÿo kɔ́ pɛ́’ɛ̀? Peg léen ńgwɔ́ pɔ́ pʉ̀a mesoŋ pá’ pi! Peg tǒ pɔ́ létsẅi nkʉ̀ mbòŋo mbwo pi, é gwɔ́ ngie pi gwá’ messé mɛ́ mie é té tsɔ́ mmó ku’, ésele nnɛ́ ńtó ńkẅɛ́te Ssé gẅie aa ntentʉ́. Yé zɔ la gÿo tÿǒ lépwó pɔ́ tsetsá’, mbɔɔ ntse tê pàa, tà mbɔɔ shúm ntsèm sie ée wó.

¹⁶À laa fʉ̀’e mvfò, ńnyé túmo túm ntsèm, pɔ́ giŋe nà memánzsè mie pɔ́ kwoŋ.

¹⁷Tá’, e Ssé ké tè tsó té lɔg mefà’ mbòŋo mé ńnyɛɛ wɔ́b ngie aa wó wɔ́, ńne fóo tÿǒ lepwó ńtúmo mbʉ̀ŋ mbwo pɔ́b, ńgÿo shúm zéme, pɔ́ laga ná fʉ̀’ gie á ne ńzɛ́te. Á lɔg ńgÿo pɔ́ gẅiin shúm léjÿó tà ntʉ́m wɔ́b poŋ, ḿbiŋ ńnéŋe ńkág kág.

¹⁸Pɔ́ la tsɛ ńjú’u yɔɔn shwóŋè tá’, Pɔl pɔ́ Panebâse lá’ ḿbú ńgyá ngɔ́’ nzèm pɔ́b tɛ’, tá pɔ́ tsẅé jʉ’. Tà pɔ́ té nuŋe pwɔ́’ mvfò pɔ́b wɔ́.

¹⁹Étsɔ́ pà Yuda lêen ńgÿo fó Antiokia gẅie aa ngʉ̀ŋe Pisidie, petsɔ́ fó tÿǒsoŋ Ikonium, pɔ́ pú ńtó sele lá’ tà pɔ́ cʉ́’ ńgwɔ́ pɔ́ nà yɔb nzèm. Pâ pɔ̌ lêen ńké ńdɔg metóon ńtémte Pɔl, tà ne ńkwaŋa pɔ́ ngie à kwě, éshwoŋo yé ńdɔg fó tÿǒsoŋ, ńgʉa ńgwá’.

²⁰Pàzẅíŋe nò Yěsô tÿɔ́’ɔ Pɔl ńnéŋe soŋ, á lu ssé, pâ pɔ̌ piŋ lê tsɛ̀ɛ tÿǒsoŋ. Njÿó gÿo ńdʉ́a, pɔ́ Panebâse kẅɛ ńcʉ́me mánzsè légʉa lé tÿǒsoŋ Nderbe.

²¹Pɔl pɔ́ Panebâse kúu Nderbe, ńtsẅi nkʉ̀ mbòŋo, tà pʉ̀a tà ńgyɔ́ɔn cʉ́’ pʉ̀a Kristo. Pɔ́ fó wó, ńgíŋ ḿbiŋe Listele pɔ́ Ikonium, ńgʉa gʉa tà ńkúu Antiokia gẅie aa ngʉ̀ŋe Pisidie,

²²ńgiŋe ńtóonte ntʉ́m pʉ̀a Kristo ngie tà pɔ́ kʉ́a ná lézáb ntʉ́m nà Yěsô, ńne ńgɔɔn né pɔ́b ngie: Á ne ńzɛ́te ngie pâ pɔ̌ cʉa tsɛ̀ɛ ngʉ̀ngʉ̀ tà ńgyɔ́ɔn tá ńkúu tsɛ̀ɛ *lefùɔ Ssé.

²³Pɔl pɔ́ Panebâse ne ńcʉa nzɔ̌ jʉ’ wɔ́, ńtsɔ́’ɔ pʉ̀a pie pɔ́ ge kẅé mvfò tsɛ̀ɛ yɛ̌ cú’tè pʉ̀a Kristo wó. Tà á ku’, pɔ́ kwoŋo kwoŋ, ńdʉ’ʉ shúm léjÿó, ésẅíŋte Cʉ̀apʉ̀a Ssé, ńdeen ńké ńcʉ́me wɔ́b mbwo Cʉ̀apʉ̀a gẅie pɔ́ zẅiŋé nò yé.

²⁴Pɔl pɔ́ Panebâse gÿo fó nà pàga ngwòŋ Pisidie, ńzyɛ́’, ńgʉa tà ńkúu ná ye Panfilia,

²⁵ńkúu tÿǒsoŋ Pɛrge, éshwóŋó nò Ssé. Tà á ku’ pɔ́ cwóŋ né tÿǒsoŋo Atalia,

²⁶éfó wó, ńkúu tsɛ̀ɛ kanú’, gie á gee lê Antiokia. Antiokia gwɔ́ jʉ’ gie mé la fó wó, ńcʉ́me wɔ́b mbwó Ssé, tá pɔ́ giŋe fa’a fà’ gie pɔ́ fa’a lɔɔn.

²⁷Pɔ́ gʉa tà ńkúu wó, ńcú’te pʉ̀a Kristo metsèm, ḿbú ḿbíte kɔ̀ɔkɔ́ɔ wɔ́ gie Ssé cʉ̌a ná pɔ́b ńgÿo, éshwóŋó wɔ́b. Lelÿò menò gwɔ́ pá’ e Ssé kéen ná shÿó mbwo pʉ̀a pie pɔ́ té pà Yuda wɔ́, ss lézáb ntʉ́m ná Yěsô.

²⁸Pâ pʉ̀a Kristo zye ńnéŋe wó.