Read Ngiemboon Megàŋ ntúm 15 Bible Online

Megàŋ ntúm 15 - Ngiemboon bible

Megàŋ ntúm 15

¹Etsɔ́ pʉ̀a gÿo fó Jẅidea, ńtóo Antiokia, ńzye lézí’i pʉ̀a Kristo ngie Ssé lɔɔn ńgwɔ́ á légÿo pɔ́ tsẅɛ́ té gwɔ́ gie mé pú’u wɔ́b pá’ *lepʉ̌ Mǒsê ne ńzɛ́te wɔ́.

²Pɔl pɔ̀ Panebâse lʉ’. Pâ pɔ̌ zye nzoŋ, ńké tè gwɔ́ tà’ ncwò wɔ́. Á cʉa wɔ́b tà pɔ́ gebe tsetsɛ̀ɛ, ńzáb ngie, à lɔɔn ńgwɔ́ Pɔl pɔ́ Panebâse, ńgyo tsɔ́ ntá’ pʉ̀a gʉa Yerósalem, ńgyá ngàŋ ntúm Yěsô pâ pàkẅé mvfò tsɛ̀ɛ cú’tè pʉ̀a kristo légwɔ́ gie pâ pɔ̌ ge sáŋa nò ńnáa mǒ.

³Acú’tè pʉ̀a Kristo ye Antiokia ná shúm sie á ne ńzɛ́te mbwo pɔ́b lélɔg ńcʉ́me mánzsè. Pɔ́ cʉa tsɛ̀ɛ ngwòŋ Fenisia, mbàa tsɛ̀ɛ we Samalîɛ, ńgiŋe shwóŋó mbwo pʉ̀a Kristo ngie pʉ̀a pie é té pà Yuda wɔ́ kéen sele nnɛ́ tà ńcʉ́’ ńgwɔ́ pɔ́ nzèm Cʉ̀apʉ̀a, mefɛ́ mefɛ́ jú’ ḿbú ńkág tɛ’.

⁴Pɔ́ lêen ńké ńgʉa tà ńkúu Yerósalem, acú’tè pʉ̀a Kristo, megàŋ ntúm Yěsô pâ pàkẅé mvfò tsɛ̀ɛ cú’tè pʉ̀a Kristo kúe wɔ́b. Pɔ́ píte kɔ̀ɔkɔ́ɔ wɔ́ gie e Ssé ka lɔgɔ wɔ́b ńgÿo, éshwóŋó wɔ́b.

⁵Tá tsɔ́ ntá’ pà *farisay, pie pɔ́ ka záb ntʉ́m wɔ́b ná Yěsô, é ne ńkẅi yɔ́b pɔ́ ngie: Á zɛ́te ngie mé pú’ pʉ̀a pie pɔ́ gwaa záb ntʉ́m wɔ́b ná Yěsô, pɔ́ té pà Yuda wɔ́, ḿbiŋ ńzɛ́te mbwo pɔ́b ngie pɔ́ giŋ pá’ *lepʉ̌ Mǒsê ne ńzɛ́te.

⁶Pɔ́ gɔɔn pú’u, megàŋ ntúm Yěsô, lâ pàkẅé mvfò tsɛ̀ɛ cú’tè pʉ̀a Kristo ńnéŋe ssé lélíe nò ńnáa mǒ,

⁷ńdá’ ńkwaŋ, á tʉ tʉ. Tà Piɛ lu ssé ńgɔɔn ngie: Mefɛ́ mefɛ́, pi ne ńzsé gí pá’ Ssé la tsɔ́’ɔ wɔ̀ɔn tsetsɛ̀ɛ pi tà ntyě saga ńgie n gʉa ńtsẅi nkʉ̀ mbòŋo mbwo pʉ̀a pie é té pà Yuda wɔ́ pá’ pɔ́ ge záb ntʉ́m wɔ́b ná Yěsô.

⁸E Ssé gẅie à zsé ntʉ́m mânyìŋ ntsèm, la nyɛ ngie à zẅǐŋ ngie pɔ́ ée pʉ̀a pé, ńtúmo Zẅìge yé mbwo pɔ́b yɔ́b. Pɔ́ ndʉŋ ndʉŋ pá’ à la túmo mbwó pege.

⁹E Ssé la té gÿo tsɔ́ lǎga metuŋ tsetsɛ̀ɛ pega pɔ̌ wɔ́. À la cʉa ná pá’ pɔ́ zǎb ntʉ́m ná Yěsô, ésɔg ntʉ́m wɔ́b.

¹⁰Afʉ̀’ɔɔn, pi piŋ ńgÿo lêkɔ́ ńkumte Ssé? Pi fa’a lékaa pì’ gie metá pégè la tè ku’u lékaa wɔ́, kwà’ pege yégè gíŋe tè mǒ ku’, ńzába twó pɔ́b keen?

¹¹Ammó gie pege ne ńnyɛte ńzsé, á gwɔ́ pɔ́ ngie pege la gwɔ́ tsẅɛ́, ńzẅɛ́’ pɔ́ pá’ Cʉ̀apʉ̀a Yěsô cÿǒ gem yégè. Á gwɔ́ pɔ́ ndʉŋ ndʉŋ pá’ á cʉa pú’u, tá pɔ́ tsẅɛ́ yɔ́b.

¹²Piɛ gɔɔn tà ńtsẅé jʉ’, pʉ̀a metsèm láŋte. Mé cʉ́’ʉ ńzẅí’te pɔ́ nò gie Pɔl pɔ́ Panebâse ne ńgɔɔn. Pɔ́ ne ḿbíte menò mmɔɔn mmɔɔn laa menkʉ̀’ʉ menò mie Ssé ka lɔgɔ wɔ́b ńgÿo, á tsetsɛ̀ɛ pʉ̀a pie é té pà Yuda wɔ́, éshwóŋó wɔ́b.

¹³Pɔ́ píte tà ńtsẅé jʉ’, Jâg gɔɔn yé ngie: Mefɛ́ pɔ́ɔn, pi zẅí’te nò gie mèŋ n gee ngɔ̌ɔn.

¹⁴Simo lǔ ssé lékímte wégè nò gie e Ssé ka gÿo nà pʉ̀a pie é té pà Yuda wɔ́. Yɛ̌ nò gwɔ́ ngie tà fó nzyetě, e Ssé záb ngie à ge gʉa tsetsɛ̀ɛ pʉ̀a pie é té pà Yuda wɔ́, é tsɔ́’ pʉ̀a lɔg gÿo pʉ̀a pie ée pé.

¹⁵Yɔɔn lɔgɔ ḿbumte ná nò gie e Ssé la lá’ ńdɔg ncwò pà ntsẅì kʉ̀ pé ńgɔɔn. Mé la ŋwe’e ngie:

¹⁶Ntyě ge gÿo sag, mèŋ n gíŋe ńtó. É gíŋe kwɛ́ ndá fùɔ Ndavíd gie e la gwe. Mèŋ n ge lá’ gíŋe pʉ’ʉ ndá ye gie mé la tágte tà è tyé tyé.

¹⁷Pʉ̀a pie é té pà Yuda wɔ́ pɔ́ gyá, éfa’a Cʉ̀apʉ̀a. Oon, mèŋ n gɔɔn túmo túm gie mèŋ n ge gÿo tóŋo wɔ́b ngie pɔ́ cʉ́’ pʉ̀a pɔ́ɔn. Cʉ̀apʉ̀a Ssé zɔ gɔɔn pú’u. À lɔgɔ pá’ɔɔn ńgÿo menò mie à la záb.

¹⁸É gwɔ́ menò mie aa ńzsé zsě.

¹⁹Jâg gíŋe ńgɔɔn ngie: Pú’u la, mèŋ n kwǎŋ yɔ́ɔn ngie tà mé gege pʉ̀a pie é té pà Yuda wɔ́ tà á cʉa. N gɔɔn pʉ̀a pie pɔ́ záb ntʉ́m wɔ́b ná Yěsô.

²⁰Tá’, áa mbòŋ ngie pege ŋwe’e pɔ́ ndà’ ŋwà’ne ńdɔg ńtsẅi né pɔ́b ngie: Pɔ́ pɔ́ɔn lépfɛ́ɛ pfwɔ́’ɔ mbab gie mé lɔ̌g ńgwá’ messé. Ngie pɔ́ pɔ́ɔn lépfɛ́ mbab nɔ̀ɔn gẅie mé fomó yé fóme. Ngie pɔ́ pɔ́ɔn lépfɛ́ metse. Ngie pɔ́ pɔ́ɔn lépumo wɔ̌wɔ́ɔ pâ pɔ́ nuŋe nuŋe[11]

²¹Tà fó mengù’u mengù’, ńkú lyɛ̌’ɔɔn, mé ée ńzɔ́gɔ pɔ́ lésá’ mbʉ̌ Mǒsê tsɛ̀ɛ metÿǒsoŋ, ngwòŋ melyɛ’ɛ́ nzse pà Yuda ntsèm. Mé tóŋo pɔ́ sɛ̌ *lepʉ̌ tsɛ̀ɛ *mendá cú’tè mɔ́b.

²²Megàŋ ntúm Yěsô, pâ pàkẅé mvfò tsɛ̀ɛ cú’tè pʉ̀a Kristo pie pɔ́ ée Yerósalem, pâ cú’tè pʉ̀a Kristo ntsèm lêen ńké ńzáb ngie á poŋ mé gʉa tsetsɛ̀ɛ pɔ́b, ńtsɔ́’ tsɔ́ ntá’ pʉ̀a, ńtúmo wɔ́b lâ Pɔl pɔ́ Panebâse a Antiokia. Mé tsɔ́’ɔ Jẅide gẅie mé gíŋe ńtóŋo yé lê Mbarsabas, ńgíŋe ńtsɔ́’ɔ Silas. Pʉ̀a pɔɔn mépʉ́a gwɔ́ pʉ̀a pie pɔ́ gɔɔn nò mé jú’.

²³Mé gÿo ŋwà’ne gie pɔ́ ge lɔg gʉa, ńŋwe’e tsoló ngie: Peg megàŋ ntúm Yěsô, pâ pàkẅé mvfò tsɛ̀ɛ cú’tè pʉ̀a Kristo á Yerósalem, peg mefɛ́ pí peg tsyɛ’té gẅi metsèm, á gẅi mefɛ́ mefɛ́ pie pi tè pà Yuda wɔ́, á gẅi gẅie pi tsẅé Antiokia, tà mbɔɔ petsɔ́ pʉ̀a pie ée nà pàga ngwòŋ Siria, tà mbɔɔ pʉ̀a pie ée nà pàga ngwòŋ Silisia.

²⁴Peg ka jǔ’ ngie etsɔ́ ntá’ pʉ̀a ka fó tsetsɛ̀ɛ peg, ńtó ḿma’a tág tsetsɛ̀ɛ pi, ńdɔgɔ shwóŋè yɔ́b ńgÿo tà pi cʉ́’ʉ ńzsé twó gí wɔ́. Tá’ peg zɔ ka ké tè túmo wɔ́b ngie pɔ́ gʉa ńgɔɔn pú’u wɔ́.

²⁵Áa mmó gie á gÿǒ tá peg metsèm cú’te ńzáb ngie mé tsɔ́’ pʉ̀a, ńtúmo wɔ́b mbwo pi. Pâ Pɔl pɔ́ Panebâse, é mentʉ̀ nzẅìŋ mefɛ́ pégè, pɔ́ tó ńgyá gẅí,

²⁶ée pʉ̀a pie pɔ́ léen ńzẅíŋe lékwé ńtí nò Cʉ̀apùa wege Yěsô Kristo.

²⁷Peg lɔgɔ pá’ɔɔn ńtúmo Jẅide pɔ́ Silas. Pɔ́ ge tyé mvfò pi, éshwóŋó gẅi mmó gie peg ŋwe’é tsɛ̀ɛ yɔɔn ŋwà’ne.

²⁸Peg zɔ̌ɔn ńgwâ zába yɔɔn nò, à Zẅìge Ndʉalʉ̌a gíŋe ńzáb yé ngie tà mé kẅi’i pì’ mbwo pi. Tá’, á ke ne ńzɛ́te ngie pi nyɛte ńkú’te mɔɔn mbʉ̌ mie peg gee ngɔ̌ɔn lɔɔn kwà’ mboŋó.

²⁹Pi pɔ́ɔn lépfɛ̀ɛ pfwɔ́’ɔ mbab gie mé lɔ̌g ńgwá’ messé. Pi pɔ́ɔn lépfɛ́ mbab nɔ̀ɔn gẅie me fomé yé fóme. Pi pɔ́ɔn lépfɛ́ metse. Pi pɔ́ɔn lépumo wɔ̌wɔ́ɔ pia pɔ̌ nuŋe nuŋe. Pi lɔɔn ńjú’ ncwò weg ná mɔɔn menò ńkú’te, mbà pi gÿǒ mboŋó. Peg mefɛ́ pí, peg tsyɛ’té gẅí.

³⁰Mé ŋwe’e pá’ɔɔn, ńdɔg ntúm pʉ̀a pa. Pɔ́ gʉa ńkúu Antiokia, ńcú’te pʉ̀a Kristo metsèm, ńnáa ŋwà’ne mbwo pɔ́b.

³¹Pɔ́ gwɔ́ tà ńtóŋo yɛ̌ ŋwà’ne, á kẅiŋte wɔ́b. Pɔ́ pú ńkág pá’ɔɔn tɛ’.

³²Pá’ Jẅide pɔ́ Silas é laa pʉ̀a pie pɔ́ ńnéŋe ńtsẅi nkʉ̀ gẅie é fóo mbwò Ssé la, pâ pɔ̌ gíŋe shwóŋó pá’ɔɔn tɛ’. Pɔ́ nyɛte ńkẅiŋte wɔ́b, ńtóonte wɔ́b pɔ́ tʉte.

³³Pâ pɔ̌ gíŋe ńná’a ńnéŋe Antiokia. Pɔ́ gÿo ńgwaa gʉa, mefɛ́ mefɛ́ nyɛte ńde’e wɔ́b. Ngie pɔ́ giŋ lê kwò mbòŋo, lépiŋ ńkẅɛ́te pʉ̀a pie é ka túmo wɔ́b.

³⁴[ Tá’ Silas cʉ́’ ńzáb pɔ́ ngie à ge zso Antiokia]

³⁵Pɔl pɔ́ Panebâse cʉ́’ ńnéŋe Antiokia. Pâ pàzáb ntʉ́m ná Yěsô tà ńgyɔ́ɔn ne ńgwá ńzí’i pʉ̀a mmó, ḿbiŋ ne ńtsẅii nkʉ̀ mbòŋo Cʉ̀apʉ̀a Yěsô Kristo.

³⁶Á ná’a ńnéŋe méjʉ’, Pɔl gɔɔn né Panebâse ngie: Pɔgɔ piŋ nzèm, ńdíe mefɛ́ mefɛ́ pie pɔ́ ée tsɛ̀ɛ metÿǒsoŋ mie pɔgɔ ka cʉa wó éshwóŋó nò Cʉ̀apʉ̀a, ńdíe ńgyá pá’ pɔ́ ka cʉ̌’ ńgwɔ́ pú’u.

³⁷Panebâse ne ńkwoŋo ngie pɔ́ yé lɔgɔ Jâŋ gẅie mé gíŋe ńtóŋo lé Malékuse la ńgʉa.

³⁸Tá Pɔl tè kwoŋ pú’u wɔ́, á nue à la lá’ ńgwá’a wɔ́b yé Panfilia. À laa gíŋe ńcʉ́me nzèm pɔ́b pâ pɔ̌ fa’a fà’ wɔ́.

³⁹Pɔl pɔ́ Panebâse pú ńzoŋ zoŋ, ḿbú tè jú’e, tà ńgebe tsetsɛ̀ɛ é fege. Panebâse lɔgɔ Jâŋ Malékuse ńgʉa. Pɔ́ yé kúu kanú’ ńgʉa lê Shʉ̀pele.

⁴⁰Pɔl cʉ́’ ńtsɔ́’ yé Silas, pɔ́ yé gwɔ gʉa, mefɛ́ mefɛ́ cʉ́me wɔ́b mbwo Cʉ̀apʉ̀a Ssé.

⁴¹Á zyɛ́’ ye Siria pɔ́ Silisia, ńgiŋe ńkẅiŋte *mendá cú’tè ná lenyɛte ńzáb ntʉ́m wɔ́b ná Cʉ̀apʉ̀a.