Read Ngiemboon Megàŋ ntúm 16 Bible Online

Megàŋ ntúm 16 - Ngiemboon bible

Megàŋ ntúm 16

¹Pɔl gʉa tà ńkúu tÿǒsoŋo Nderbe, ńgÿo fó wó ńdɔg ye Listele. Àtsɔ̌ nyìŋ Kristo gwɔ́ wó, mé tóŋo yé lê Timoté. Má we gwɔ́ mûɔ Yuda, mbà à léen ńzẅíŋe nò Yěsô. Mbà tá we laa nyìŋ Gelekia.

²Timoté gwɔ́ nyìŋ, epʉ̀a Kristo pie ée Listele mbɔɔ Ikonium kíme yé mboŋó tɛ’.

³Pɔl ne ńkwoŋo ngie pɔ́ Timoté giŋe kwò, ńzɔɔn ḿvɔg ńgÿo mé pú’u yé, ńzsé ngie pà Yuda ge kúe yé, mélà’mie pà Yuda pie ée nà yɛ̌ pàga ngwòŋ la ne ńzsé ngie tá pà Timoté laa nyìŋ Gelekia [12]

⁴Pâ Pɔl lêen ńké ńne ńgwá ńgiŋe tsɛ̀ɛ metÿǒsoŋ ńtsẅii pà’ ngàŋ ntúm lâ pákẅé mvfò tsɛ̀ɛ cú’tè pʉ̀a Kristo ye Yerósalem, ka zǎb, ńne ńgɔɔn né pɔ́b ngie pɔ́ kú’te yɛ̌ nò mboŋó.

⁵Epʉ̀a Kristo ne ńkẅi’i ńzába ntʉ́m nà Ssé ńdɔgɔ ńgee pɔ́ lê mvfò. Anùɔ yɔ́b ne ńgwɔ́ lyɛ̌’ ntsèm, ńkẅi’i kẅi’i.

⁶Pɔl pâ Silas ké ne ńgwá ńgiŋe giŋ, à Zẅìge Ssé gÿo ńtɔ́’ɔ wɔ́b légʉa tsɛ̀ɛ pàga ngwòŋ Azia éshwóŋó nò Ssé, Pɔ́ lêen ńké ńcʉ́’ ńzyɛ́’ɛ tsɛ̀ɛ pàga ngwòŋ Filigia pɔ́ ye Galatia zyɛ̌’,

⁷ńgʉa tà ńcʉ́’ʉ lékúu tsɛ̀ɛ pàga ngwòŋ Misia, éfa’ shÿó légʉa Mbitinia. Tá Zẅìge Yěsô té zẅíŋ ngie pɔ́ gʉa wó wɔ́.

⁸Pú’u, tà pɔ́ cʉ́’ ńzyɛ́’ɛ Misia zyɛ̌’, ńcwóŋ ńgʉa lê tÿǒsoŋ Toras.

⁹Á gÿo ńgwɔ́ tsɔ̌ lêtsẅɛ́’, e Ssé nyɛ́’ nÿɔ́g Pɔl, á gyá tsɔ̌ nkʉ̀’ʉ nò. Á gyá tsɔ̌ nyìŋ Makedonia tyé, ńne sẅíŋte yé ńgɔɔn ngie: Tsétsɔ’, tó tà ńkúu Makedonia, ńkẅéte wég.

¹⁰Pɔl gyá pú’u, peg lêen fa’ shÿó ńgʉa Makedonia, ńne ńcwóŋo ńzsé ngie Ssé zɔ tóŋo wég wó ngie peg tsẅi nkʉ̀ mbòŋo [13].

¹¹Peg kúu *máamáa kanú’ á tÿǒsoŋo Toras, ńgʉ́a pɔ́ ndʉŋ ndʉŋ tà ńkúu tsɛ̀ɛ tsɔ́ lá’ gie ntse la kéle ńnéŋe soŋ, mé tóŋo lê Samoteras. Njÿó lʉ́a peg gíŋ ńdɔg pɔ́ kanú’ ńgʉa nê tÿǒsoŋ Neapolis,

¹²ńtóo wó ńkẅɛɛ tsɛ̀ɛ kanú’ ńgʉa nê tÿǒsoŋo Filib. Á gwɔ́ máamáa tÿǒsoŋ tsɛ̀ɛ pàga ngwòŋ Makedonia, mbà mé léen ńdɔgɔ yé ńgÿo tsɔ́ tÿǒsoŋo pà *Roma. Peg ńnéŋe wó tsɔ́ nzẅìŋ melyɛ̌’[14].

¹³Alyɛ’ɛ́ nzse pà Yuda gwɔ́, peg fó tÿǒsoŋ ńkẅɛ, ńgʉa tà ńkúu ngʉ̀ŋe tsɔ̌ ntse, ńne ńkwaŋa yég pɔ́ ngie peg ge gʉa tà kúu wó, à gÿo lêkɔ́ wɔ́ peg gyá jʉ’ gie pà Yuda cú’te wó ésẅíŋte Ssé. Ńkẅɛ́te tsɔ́ pànzwě jʉ’ó, ńnéŋe yég ssé ńgɔɔn nò Ssé mbwo pɔ́b.

¹⁴Atsɔ̌ tà’ gwɔ́ tsetsɛ̀ɛ pɔ́b, mé tóŋo yé lê Litiɔ. Mbà à la fó tÿǒsoŋo Tiatire. Á táŋa tsɔ́ mepàŋ nzsǒ é poŋ tɛ’. Mbà à la zẅíŋe nò Ssé pà Yuda. Peg ne ńgɔɔn nò, á nyɛte ńzẅí’te kwà’ mboŋó, ńtí nue Cʉ̀apʉ̀a la tsɔ́’ ntʉ́m wé pá’ à ge téŋe letuŋó sé ńnyɛte zẅí’te nò gie Pɔl ne ńgɔɔn.

¹⁵Mé pɔ́ɔnte ḿbú ńnu’u wɔ́ba ngẅɛ̀ ndá yé ntse. Á pɔ́ɔnte ńgwɔ tóŋo wég mbʉ̀a yé ńgɔɔn ngie: Peg lɔɔn ńgyá yég ngie à zẅiŋé nò Cʉ̀apʉ̀a tà shwóŋó nò, peg tó ńtsẅé mbʉ̀a yé, ńgɔɔn pú’u, ńtsóte wég tsóte lézẅíŋ.

¹⁶Peg fó lyɛ̌’ ńkẅɛ ńne ńgee jʉ’ gie mé sẅíŋte Ssé wó, atsɔ̌ múɔ manzwě gẅie à laa nkwɔɔn tó ńzá’a wég. Mbà tsɔ́ *ssé tepòŋ la kúu ná yé, ńgÿo á ku’u léshwóŋ pʉ̀a menò mie é ge táa tá gÿo wɔ́b. Pàjúu yé lɔgɔ yé ńdaba nkáb tà é gyɔ́ɔn gyɔ̌ɔn.

¹⁷Á cʉ́me nzèm peg lâ Pɔl, ńgiŋe ńgɔɔn lê tʉ̀ ngie: Epʉ̀a pɔɔn ée ngàŋa fà’ mbwo Ssé gẅie à pi’i kɔ̀ɔkɔ́ɔ! Pɔ́ ne shwóŋó gẅi pá’ à lɔɔn ńgwɔ́ pi giŋ pú’u tá ńtsẅɛ́.

¹⁸Á ke ńgÿo pɔ́ pú’u, nà melyɛ̌’ tà ńgyɔ́ɔn. Pɔl fó ńgebe tsetsɛ̀ɛ ńgyáŋa lóŋ, ésele nnɛ́ ńgɔɔn nê *ssé tepòŋ ngie: Mèŋ n dɔ̌g lezíŋ Yěsô Kristo ńgɔɔn ngie ɔ̀ fó ná manzwě wɛ̂ ńkẅɛ! E *ssé tepòŋ gwóon fó ná yé ńkẅɛ.

¹⁹Epʉ̀a pie pɔ́ la júu yé, gyá ngie pɔ́ té gíŋe ńku’u lélɔgɔ yé ńdab nkáb wɔ́, ńdeen ńké ńgwoon Pɔl pɔ́ Silas, éshwoŋo wɔ́b ńdɔg ńgʉa ndùmo gyɛ̌, ńtÿɔ́gɔ wɔ́b mvfò pàsá’a lá’,

²⁰ńgɔɔn mbwo pà *Roma pie pɔ́ lɔ́ɔn sá’a lá’ ngie: Epʉ̀a pɔɔn ne ḿma’a tág tsɛ̀ɛ tÿǒsoŋ yégè, ḿbiŋ ńgwɔ́ pà Yuda.

²¹Pɔ́ ne ńda’te pʉ̀a tsɔ̌ mà we sẅé. Á gwɔ́ gẅie pege pà *Roma tè gẅiin lézẅíŋ wɔ́, ḿbiŋ ńké tè gẅiin légiŋ pá’ pɔ́ la’te wɔ́.

²²Alá’ pú ńgyáŋa lóŋ ná Pɔl pɔ́ Silas. Pà *Roma pie é lɔ́ɔn sá’a lá’ tsẅi, mé sẅɛ menzsǒ mɔ́b, ńdɔg mekésiŋ ńnyɛte ńcúa wɔ́b.

²³Mé cúa wɔ́b kwà’ mboŋó, ńgʉa ḿma’a wɔ́b ndá tsǎŋ, ńtsẅi nê mbyɛ̀b ndá tsǎŋ ngie à nyɛte ḿbyɛ́bɛ wɔ́b kwà’ mboŋó.

²⁴Mé gɔɔn pú’u, nyìŋ gẅie à pyɛ́bɛ ndá tsǎŋ gʉa ńnéŋe wɔ́b tsɛ̀ɛ lûm gẅie aa kwà’ tsɛ̀ɛ tsɛ̀ɛ ndá tsǎŋ, ńnéŋe *kɔ̌’ nà mekwò mɔ́b.

²⁵Tsɛ̀ɛ tsẅɛ́’ gÿo ne ńku’u, Pɔl pɔ́ Silas ne sẅíŋte Ssé, ńzɔbɔ ntse ńdɔgɔ ńgú’te yé. Petsɔ́ megàŋa tsǎŋ ne ńjú’u,

²⁶ńnéŋe tà ńjú’, atsetsá’ cʉ’e lê tʉ̀ tà mesǎg ndá tsǎŋ pú ńnʉ’ʉ. Mencwò ndá gwóon ńtsɔ́’ɔ ńtyéte. Metsɛ̂n fó ná megàŋa tsǎŋ métsèm ńkyɛ́’te ḿbʉle ssé.

²⁷Nyìŋ gẅie á ke ne ḿbyɛ́bɛ ndá tsǎŋ zyeen, ńgyá mencwò ndá tsǎŋ pú ńgwɔ́ pɔ́ me ntsɔ̌’. Á lêen ńké soŋ nně, ńne fa’a lélɔg sɔb mbùm ye, ńne ńkwaŋa pɔ́ ngie ngàŋa tsǎŋ ně ńkẅɛ ńkÿote.

²⁸Tá Pɔl ga’te lê tʉ̀ ngie: Tè sɔb mbùm jù, peg gwɔ́ pɔ́ ssé métsèm.

²⁹Ambyɛ̀b ndá tsǎŋ tsẅi mé lɔgɔ kyɛ̀’ ńtó. Á lɔg ńkÿote ńkúu tsɛ̀ɛ ndá tsǎŋ. Mbú ne ńcÿɔ’ɔ tà ḿvɛɛ vɛ, ésẅɛ́’ ńnuŋe mekwò Pɔl pɔ́ Silas,

³⁰ḿbiŋ ńgÿo pâ pɔ̌ fó tsɛ̀ɛ ndá tsǎŋ ńkẅɛ, á zɛ́te wɔ́b ngie: Pà ndè, ńgwɔ́ n gÿo lêkɔ́ tá ńtsẅɛ́?

³¹Pɔ́ tsɔ́’ɔ mbwo yé ngie: Záb ntʉ́m gú ná Cʉ̀apʉ̀a Yěsô. À gÿo pia ngẅɛ̀ ndá jù tsẅɛ́.

³²Pɔl pɔ́ Silas shwóŋó nò Cʉ̀apʉ̀a Yěsô mbwo pɔ́ba ngẅɛ̀ ndá yé.

³³Pɔ́ fʉ̀’ó fʉ̀’ó, pɔ́ kwà’ lêtsẅɛ́’ ŋwɛ́, á lɔgɔ wɔ́b ńgʉa mbʉ̀a yé, ésɔg mefʉ̌ŋ mɔ́b, ńcÿɔ’. Pɔ́ lêen ńké ḿbú ńnu’u wɔ́ba ngẅɛ̀ ndá ye tsɛ̀ɛ ntse.

³⁴Á piŋ ńdɔgɔ wɔ́b mépʉ́a ḿbʉ́ ńgʉa ndá yé, ńná shúm pɔ́ jÿó. Pâ ngẅɛ̀ ndá ye pú ńkág, mélà’mie pɔ́ zǎb ntʉ́m wɔ́b nà Ssé.

³⁵Njÿó gÿo ńdʉ́a, pàtsɔ́’te ntsaŋ, ńgwɔ́ pà *Roma, túm pà mékɔ́ɔn ngie pɔ́ gʉa ńtsẅii mbwo nyìŋ gẅie à pyɛ́bɛ ndá tsǎŋ ngie à kyɛɛ pʉ̀a pá ńnyé pɔ́ gʉa.

³⁶Nyìŋ gẅie à pyɛ́bɛ ndá tsǎŋ tó ńgɔɔn mbwo Pɔl ngie: Pàtsɔ́’te ntsaŋ tsẅǐ ngie mèŋ n nyé gẅi pi gʉa, ńgwɔ́ pi kẅɛ fʉ̀’ɔɔn ńgʉa lê mbʉ́lè!

³⁷Tá’, Pɔl gɔɔɔn mbwo pà mékɔ́ɔn ngie: Pɔ́ ka nyě pɔ́ tè ŋág ntsaŋ yeg, ńtsẅi mé cúa wég mvfò lá’. Tá peg gwɔ́ púɔ lá’a pà *Roma. Pɔ́ ka cua wég pú’u, tá á ku’ pɔ́ ńnéŋe wég tsǎŋ. Pɔ́ piŋ ńgwɔ́ pɛ́’ɛ̀ fa’a léshúte shúte ńkẅile wég. Peg lʉ̌’. Á zɛ́te ngie kwà’ pɔ́b zɔ tó ńkẅile wég ndá tsǎŋ.

³⁸Pà mékɔ́ɔn gʉa ḿbíte yɔɔn nò éshwóŋ pàtsɔ́’te ntsaŋ pà *Roma, pɔ́ jú’ ngie Pɔl pɔ́ Silas ée púɔ lá’ pà *Roma ḿbú ḿbɔ́g tɛ’,

³⁹ńtó, ḿbú’ mbwó ńgÿo pɔ́ fó ndá tsǎŋ ńkẅɛ, ńgíŋe sẅíŋte wɔ́b ngie pɔ́ fó tÿǒsoŋ ńgʉa.

⁴⁰Pɔl pɔ́ Silas kẅɛ fʉ̀’ɔɔn, ńgʉa nê mbʉ̀a Litiɔ, ńkúu wó, ḿbú ḿbíte kɔ̌kɔ́ɔ shwóŋ mefɛ́ mefɛ́, ńkẅiŋte wɔ́b, tá ńgʉa.