Read Ngiemboon Megàŋ ntúm 17 Bible Online

Megàŋ ntúm 17 - Ngiemboon bible

Megàŋ ntúm 17

¹Pɔl pɔ́ Silas lu ssé ńcʉa ye tÿǒsoŋ Anfipolis mbɔɔ ye Apolonia, ńgʉa tà ńkúu tÿǒsoŋ Tesalonika, ńgyá tà’ *ndá cú’tè pà Yuda gwɔ́ wó.

²Pɔl kúu tsɛ̀ɛ yɛ̌ *ndá cú’tè légyá pà Yuda, á gwɔ́ mà mbwo yé, ńgʉa wó té tsó nà lyɛ̌’ nzse pà Yuda sétá. Pâ pà Yuda ne ńtóŋo ŋwà’ne Ssé ńtúu nò ńnáa mǒ.

³Pɔl ne ńnyɛte ńkyagte shwóŋó wɔ́b ngie a *Nzà’nkÿo gẅie mé ka ne ḿbyɛ́bɛ la, ka gẅiin légyá ngɔ́’, ńkwé, ḿbiŋ ńzíme nà legwé. A *Nzà’nkÿo áwɛ̌ aa Yěsô gẅie yé shwóŋó wɔ́b lɔɔn.

⁴Etsɔ́ ntá’ pà Yuda jú’ á kúte wɔ́b, pɔ́ zẅíŋ, ńcʉ́me nzèm Pɔl pɔ́ Silas, tà mbɔɔ tsɔ́ pà Gelekia tà ńgyɔ́ɔn pie pɔ́ la zẅíŋe nò Ssé pà Israel. Tà mbɔɔ tsɔ́ pánzwě pie ée tÿǒsoŋ, ńcʉ́e la zẅíŋ yɔ́b.

⁵Tá pà Yuda pie e lʉ̌’, gyá pú’u, ńkwɔ́’ɔ lóŋ, ńgʉa metwó nzsè, ńcú’te pàtèkǔ nà nò, pâ pɔ̌ sẅite lá’, ḿma’a và’ tÿǒsoŋ. Pɔ́ gʉa ndá Jasoŋ léfa’a Pɔl pɔ́ Silas pá’ pɔ́ ge gwoon wɔ́b gʉa tÿɔ́gɔ wɔ́b mvfò lá’,

⁶ńkúu wó, pɔ́ té wɔ́b gyá, éfó ńgwoon Jasoŋ pâ tsɔ́ mefɛ́ mefɛ́ ńdɔgɔ wɔ́b ńgʉa tà ńkúu mvfò pàtsɔ́’te ntsaŋ, pà Yuda lɔg ngyè tetʉ̀ ńgɔɔn ngie: Pʉ̀a pɔɔn é pǔ ḿma’a và’ jʉ’ ntsèm. À gie pɔ́ lɔ̌g ńtó tà ńkúu jʉ’ɔɔn lɔɔn!

⁷Jasoŋ kéen ńkúe wɔ́b mbʉ̀a yé. Pɔ́ né ńgwá ńgwága *lepʉ̌ Kása, ńgɔɔn ngie atsɔ̌ fùɔ aa wó, mé tóŋo yé lê Yěsô.

⁸Yɔɔn shwóŋè pú ńtágte twó lá’ tà mbɔɔ ye pàtsɔ́’te mentsaŋ tÿǒsoŋ.

⁹Á gwɔ́ tà pàsá’a lá’ zɛ́te mbwo Jasoŋ pâ petsɔ́ mefɛ́ mefɛ́ ngie pɔ́ nuŋe mbwɔ́’ nkáb ssé tá mé nyé wɔ́b[15].

¹⁰Nzěm lêen ńgwaa síŋ, mefɛ́ mefɛ́ gÿo Pɔl pɔ́ Silas gʉa nê tÿǒsoŋ Mbelɛ, ńgʉa tà ńkúu wó, ńgʉa *ndá cú’tè pà Yuda.

¹¹Pà Yuda pie ée nà yɛ̌ tÿǒsoŋ gẅiin ntʉ́m mbòŋo ńcʉa pie ée Tesalonika. Pɔ́ zẅí’te shwóŋè Pɔl pɔ́ Silas lê ntʉ́m mbòŋo, ńgwɔ́ lyɛ̌’ ntsèm, ńne ńtóŋo ŋwà’ne Ssé, ńtuu nò ńnáa mǒ, éfa’a lézsé ka nò gie pɔ́ shwóŋó wɔ́b, áa pú’u wɔ́.

¹²Pʉ̀a tà ńgyɔ́ɔn tsetsɛ̀ɛ pɔ́b fó pú’u, ńzáb ntʉ́m wɔ́b ná Yěsô. Tà mbɔɔ pànzwě pà Gelekia pie pɔ́ cʉ́e, mbɔɔ mbàŋa tà ńgyɔ́ɔn gíŋe ńzáb yɔ́b.

¹³Tá pà Yuda pe Tesalonika jú’ pá’ Pɔl áa Mbelɛ, ńgíŋe ne shwóŋó nò Ssé, ńjuŋte ńtóo wó, ńzye léma’a và’ ńdɔg sẅite lá’.

¹⁴Mefɛ́ mefɛ́ gwóon ńgÿo Pɔl lɔg shÿó ntse té pàa ńgʉa. Silas pɔ́ Timoté cʉ́’ ńzso Mbelɛ.

¹⁵Pʉ̀a pie pɔ́ la gʉa ńtsege Pɔl lɔgɔ yé ńgʉa tà ńkúu Atɛ̀ne, ńgwaa piŋ nzèm, Pɔl tsẅi né pɔ́b ngie pɔ́ gÿo Silas pɔ́ Timoté lwo ńtó ńkẅɛ́te yé.

¹⁶Pɔl gwaa ne zẅí’te wɔ́b Atɛ̀ne, ńgyá shúm ntí ntí sie pʉ̀a tÿǒsoŋ áyɛ̌ gu’te ngie ee messé. E gyɔ́ɔn pá’ɔɔn tɛ’, mbùm ye pú ńtsyɛte.

¹⁷Á ne ńgee ndà cú’tè pà Yuda, ńkẅɛ́te pà Yuda mbɔɔ pàzẅíŋe nò Ssé pà Yuda ńne shwóŋó wɔ́b nò, ńgwɔ́ lyɛ̌’ ntsèm, ńgee ndùmo gyɛ̌, ńgyá pʉ̀a pie ée wó, ńgíŋe shwóŋó wɔ́b nò.

¹⁸Pâ tsɔ́ *pàkwaŋte nò, la gíŋe ne shwóŋó, pɔ́ gwɔ́ pʉ̀a pie pɔ́ ée nà nùɔ Epikẅire mbɔɔ pie ée nà nùɔ Zenoŋ. Á laa pú’u, Pɔl ne ńgɔɔn nò Yěsô mbwo pɔ́b, mbɔɔ nò ná *lezimé nà legwé. Petsɔ́ ne ńzɛ́te ngie: Wɛ̂ ngàŋa shwǒŋ gɔɔn ngie kɔ́ lɛ? Petsɔ́ ne ngie á gwá’a fʉ̀’e à shwóŋó wégè nò ná tsɔ́ messé mendyɛ̀’ɛ lá.

¹⁹Pɔ́ lɔgɔ Pɔl ńgʉa mvfò Aeropage, á gwɔ́ cú’tè pàsá’ ntsaŋ tÿǒsoŋ, ńkúu wó, ńzɛ́te yé ngie: À lɔɔn ńgwɔ́ peg zsé yég á nò sẅé yɛ̂ gie ɔ̀ zí’i pʉ̀a lɛ?

²⁰Menò mie ɔ̀ gwaa shwóŋó wég ne ńkʉ’ʉ wég kʉ’ʉ. Peg ne ńkwoŋo lécwoŋo ńzsé pá’ ɔ̀ lɔgɔ ńgɔɔn.

²¹Á la gwaa gwɔ́ pú’u, ńtí nue pʉ̀a pie ée tÿǒsoŋ Atɛ̀ne mbɔɔ pʉ̀a pie é fóo túm ńtóo ńtsẅé wó, lɔ́ɔn ńgwɔ́ fʉ̀’ ntsèm ńcú’te ńjú’u menò me sẅé mie é nyé tá ńkẅɛɛ.

²²Pɔl lêen ńké ńdu ssé ńtyé tsetsɛ̀ɛ cú’tè pàsá’a tÿǒsoŋ ńgɔɔn ngie: Epʉ̀a Atɛ̀ne, mèŋ n gyǎ pi tyé nà kɔ̀ɔkɔ́ɔ wɔ́, ńgwɔ́ pʉ̀a ńnéŋe twó nà nò Ssé tɛ’.

²³Mèŋ n gwǎ ne giŋe tsɛ̀ɛ tÿǒsoŋ gí, ńgyá mendá messé mí gyǎ, tà ńgyá tsɔ̌ gwɔ́ wó, mbà mé la ŋwe’e mǒ ngie: Yɔɔn áa jʉ’ʉ ssé gie peg kaa lezíŋ sé zsé. Áa yɛ̌ tá, yɛ̌ Ssé gie pi tsẅé ńgu’te yé té zsé yé la, mèŋ n tóo pá’ɔɔn léshwóŋó gẅi nò yé.

²⁴E Ssé gẅie à la nyɛte njÿó laa shúm sie é pú ńgwɔ́ wó. Yé zɔ Cʉ̀apʉ̀a tÿǒ lepwó mbɔɔ ndùmo ssé tsetsá’. Àa těen ńtsẅé tsɛ̀ɛ mejʉ’ʉ ssé mie pʉ̀a mesoŋ lɔ̌g mbwo mɔ́b ńkwɛ́ wɔ́.

²⁵À ké té ne ńzẅí’te ngie pʉ̀a mesoŋ gÿo tsɔ́ mmó tá à lɔg ńgwɔ́ yé wó wɔ. Àtsɔ́ mmó té mbwo yé zág. Yé zɔ náa zẅìge mbwo pʉ̀a mesoŋ, tá pɔ́ lɔg ńgwɔ́ wó, tà mbɔɔ kɔ̀ɔkɔ́ɔ wɔ́.

²⁶À la fóo ná tà’ nyìŋ wémɔ’ɔ́, ḿbú ńgÿo melá’ melá’, légwɔ́ gie pʉ̀a mesoŋ ge ńnéŋe jʉ’ ntsèm ndùmo ssé tsetsá’, ńtʉ́ njÿó ńzáb mekème njÿó mɔ́b mbɔɔ mejʉ’ mie pɔ́ ge lá’ ńnéŋe wó.

²⁷E Ssé gÿo pú’u, légwɔ́ gie pʉ̀a mesoŋ ge fa’a yé. Tà mbɔɔ pá’ pɔ́ lɔɔn fó fa’a yé pɔ́ lekyɛ̀bɛ lekyɛ̀bɛ, mbà ndyɛ̀’ tsɔ́ pɔ́ ké ńgyá yé gyá. Pege zɔɔn ńgwaa ńnéŋe pá’ɔɔn, á zɔɔn ńgwɔ́ lejʉ́ŋ máa wɔ̌wɔ́ɔ tsetsɛ̀ɛ pege.

²⁸Mé zɔɔn ńgɔɔn ngie: Pege lɔgɔ pɔ́ yé tá ńgwɔ́ wó. Yé zɔ gÿo pege ŋele. Yé zɔ gÿo pege gwɔ́ wó. Mbà tsɔ́ pà sǎg legʉa pí la gíŋe ńgɔɔn ngie: Pege zɔɔn ńgwɔ́ pɔ́ pʉ̀a á nà ngẅɛ̀ yé.

²⁹Pege lɔgɔ ńgwɔ́ púɔ Ssé yé máŋwɛ́. Pú’u la, tà pege kwaŋ ngie Ssé áa tsɔ́ mmó gie mé la lɔgɔ tʉ̌ ngɔl, kà pɔ́ tʉ̌ nkáb wɔ́, kà tóon wɔ́, ńdɔg ńnyɛte. Pá’ tsɔ́ pʉ̀a lɔgɔ legyè sie é kẅɛɛ twó pɔ́b ńdɔgɔ ńnyɛte.

³⁰E Ssé piŋ ńké ńcʉ́’ʉ sáŋa yɛ̌ fʉ̀’ gie nyìŋ mesoŋ kɔ̌ɔn ńgÿo pú’u ńdɔgɔ ńgʉe gʉe wɔ́. Àa fʉ̀’ɔɔn, ńne ńtóŋo ngwòŋ pʉ̀a metsèm, á tsɛ̀ɛ melá’ ntsèm ngie pɔ́ kúbe mà wɔ́b.

³¹Á zɔɔn ńgwaa gwɔ́ pú’u, mbà Ssé léen ńzába lyɛ̌’ gie à ge lá’ lɔgɔ nyìŋ gẅie à la tsɔ́’ɔ yé, é ŋag njÿó, é ké ŋag pɔ́ nà ntí gie ee ndʉŋ ndʉŋ. À la zíme ngàŋ ná legwé lélɔg ńnyɛɛ mbwo mânyìŋ ntsèm ngie à ge lá’ gÿo pú’u.

³²Pà Gelekia gwɔ́ tà ńjú’ pá’ Pɔl gɔ̌ɔn ngie nyìŋ la zíme nà legwé, etsɔ́ pʉ̀a pɔ́b é gwaa zoonte yé, petsɔ́ gɔɔn lê yé ngie: Peg ge lá’a tsɔ́ lyɛ̌’ tá gíŋ zẅí’te nò gie ɔ̀ gɔɔn lɛ!

³³Pɔl cʉ́’ ńkẅɛɛ tsetsɛ̀ɛ pɔ́b ńgʉa gʉa.

³⁴Tá tsɔ́ ntá’ pʉ̀a ke ńcʉ́me nzèm ye, ńcʉ́’ pʉ̀a Kristo. Á gʉa nà nùɔ yɔ́b, mé gyá Ndenis gẅie à laa nùɔ pàsá’ ntsaŋ á tÿǒsoŋo Atɛ̀ne, ńgyá tsɔ̌ mánzwě gẅie mé tóŋo yé lê Ndamaris ńgÿo mbɔɔ tsɔ́ pʉ̀a.